L studënt
I.
N conta, ch' i ova menà te Funes
N tel pitl mut de Gherdëina;
Davia che l ova nuef ani mé ades,
Stajova si oma cun pëina.
Si sor fova ënghe iló a servì,
Ma no tla medema cuntreda;
N pue' plu in ite mussovun mo jì,
Iló fova ëila ruveda.
II.
Śën fovi dui doi te Funes a servì;
Ma Engl vardova la vaces,
Maria mussova lauré dut l di,
Da sëir i dulova i braces.
Pernanche la fova unid' a l savëi,
Che Engl ie tlora che l verda,
Ti iela sauteda de jì a l udëi;
Ma po i à zachei metù verda.
III.
"Du Moidl, du Moidl, wou gheasche denn hin?"
Ti sveia riesc do la patrona;
Po s' ëuta Maria y disc a ndevin:
"I oni ferlëuren na crona".
"Jez gheasche zu klauben a gros fir di chie!"
Cumanda adaut ch'la tudëscia.
Maria se mpënsa: "Śën iela sc' ch' la ie,
N' ie auter ch' ulghé y cun prëscia."
IV.
"Chël pesta pudëss pu unì a me crì",
Dijovela prësc do nfugheda,
"O muessi pa propi tò ca y ti scrì,
Che son feter for amaleda?"
La ulova de forza che l fossa unì,
Ma no se tò do la scurieda;
Da chëla s' temovela – ne sè ce me n dì -,
La l' ova n iede paieda.
V.
Ma Engl, sambën, ova auter da fé,
Che jì ncantëur pra maledes;
Levé y gusté y po jì a vardé
Y jì do si fac y si stredes.
Do n pez à Maria messù po se n jì,
Drë' bën ne stajovela plu ëila;
A cësa ala fà mé bel prësc a varì,
Y śën iel na cherdla de n' ëila.
VI.
Do n' ann à nce Engl mudà si patron,
Y va per Laion a San Piere;
Śën ovel pra mëisa na majera sciadon,
Y n miëur bon bucon te taiere.
La n' à durà giut, che l cialova tan bon,
Che si oma stentov' a l cunëscer;
El fova nfati nton y de rion,
Medrë n' ulovel no crëscer.
VII.
"San Piere, adio! ue jì a Urtijëi,
Iló muessi fé mi fertuna;
Ja l Englwirt vedi tl prim a udëi,
Scenó vedi pa bën ja la Luna."
Nscila se mpënsel y nscila al fat,
Ma po i iela jita sbujeda;
"Fé l sciolder, dijovel, n' ie nia de fat,
Tlo muessi giaté mo vel' streda."
VIII.
N di abenëura po s' al mpensà
De jì a studië, se n l lascia;
Ma po i ai dit, canche l à damandà:
"Tu bën a studië! Via Fascia!"
"Purvón, disc si oma, lascionsel pu jì,
L pò unì n preve dainora!"
"Po disc mò si pere: "O tu es lier dì,
Unions' a cui grosc po bën ora?"
IX.
"Cui grosc? Per i grosc me vën bën mé da rì,
Chëi fej me n pue' de paruda;
Idie y la Madona nes pò benedì,
Po bën onse dut chël che juda."
Y l mut ai mandà a Bulsan a studië,
Y l ie unì n preve dainora.
N vëiga ch' Idie sà daniëura premië
N' oma che prëia y l adora.