L scioz dla dlieja de Val
L scioz dla dlieja de Val.
Te Val, delà dala dlieja de San Salvester nascel na funtana d' ega.
Dan plu cënt ani vardova n di d' instà doi mutans de Sëlva la vaces ite per chëla pastures. Per se paré via l' aurela longia, s' oveles sentà ju daujin da chësta funtana y se cuntova stories.
"Tu," dij una de chësta mutans, "ne n' es' a mei audì cuntan, che te chësta funtana dëssel vester truep grosc ascuendui?"
"O sce n ëssa duc chi grosc che ie tlo te Val ascuendui", respuend l' autra, "tan de vaces pudëssen ma mei se cumpré!"
"Nosta doi plu bela manses dajëssi bën ca, sce giatësse n poz de dinei" dij inò la prima.
N chël mumënt, che l' à abù dì chësta paroles, nasc ora de funtana n gran poz colm de dinei lucënc d' or, y doi lëufes blanc fier de Chedul ju y ti sauta tl col ala doi plu bela manses. La mutans, canche les à udù i lëufes, scumëncia dala tëma a cherdé y svaië n aiut.
I lëufes lascia la manses y mucia, y tl medemo tëmp arsësc nce l poz cui grosc inò te funtana.
Da ntlëuta nca ne n' an plu mei nrescì nia dl scioz de Val.