L orco d Col dala Pelda
L orco dl Col dala Pelda.
Śepl da Brancion fova jit na sëira ‒ l dajova la luna ‒ tʼ Sëlva a mutans. Tl unì zeruch, sun col de Rustlea se pënsel: "Ue pa udëi sce chëi de Sëlva à sait" y pëta n cich per i desfidé ora.
Te chël mumënt vëijel dan ël n tel pitl mandl, l ne fova tan grant ch’ l ti ruvova sai jenodli. Chësc pitl uem jiva for n valgun var dan ël; sce Śepl jiva dassënn, sautova nce chësc pitl danora, y sce Śepl stajova chiet se fermova nce chësc pitl.
A jì da Pigon y Pizuela y sëura Larjac ora i parova a Śepl che chësc mandl deventësse for majer y majer.
Canchʼ i fova daujin da Col dala Pelda fova chësc pitl bele majer chʼ Śepl.
Śepl se temova a la diaula; l fossa gën sautà sëura sief ora per i mucé dant a chësc cër uem, ma l ne sʼ ova nfidà, davia che l se ova belʼ ntendù che l ie l orco.
Śën ruvi via n la costa ulache n vëiga Col dala Pelda; Śepl sta n pueʼ chiet a udëi sce l orco va sëura via, de viers de Plesdinaz o do l stradon ora da Runcac ju.
Bel mpont, l orco ch’ univa for majer y majer, pea do la streda d’ Plesdinaz.
Scebën che Śepl se temova, fovel mpo feter curiëus d’ udëi cie che devënta y datrai ovel nce audì cuntan che n ne daussa mucé dal orco ‒ y daviadechël ti val do.
Bele dan ruvé via puent univel tan aslune grant che canche l fova pra puent da mulin d’ Inaz arjunjova la dumbrea sa Pertëut. A udëi chësta gran dumbrea se temova Śepl che la gotes jiva dut ntëur ju.
L se pënsa, a udëi coche l orco fej a passé l puent, merë chʼ ësse n toʼ de pan sëch da ti tré al orco. Ma śën ne iel auter che passé zënza pan l puent.
Te chëla vëighel nce ch’ l orco ie te n iede bele dalonc dla dal puent. Śepl ne se à ntendù dainora, sce l orco ie jit sëura o sot al puent ora. Śën val bel plan nstës via da chësc puent, passa via drët bel achiet, ma te chëla stajova chësc orco dan ël su petan de drë cighes che Śepl stajova a unì ora de cervel.
Dala gran tëma iel restà iló sun ëur de ruf de Mastlé nciurnì.
L di do, canche l stlaiova di y chʼ i sunova lʼ anmaria fovel te ciamp da la siela de chëi da Inaz.