L bambin da Nadel

From Wikisource
Jump to navigation Jump to search
L bambin da Nadel  (1913)  by Josef Runggaldier
Gherdeina
grafia moderna

L bambin da Nadel.


Na pitla muta ulova mëter na lëtra te na scatula dala posta, ma la n' arjunjova nia su. Te chëla passa n seniëur, ti dà na udleda a chësta pitla, po liejel l' adres y mët la lëtra te scatula. Su la cuvierta stajovel: "A chël bel pitl bambin da Nadel sun Paravis." L seniëur va te scritorio dla posta y se fej liejer la lëtra. L fova scrit:

Bon bambin da Nadel! N aud dijan, che te portes datrai tel bela robes a chi pitli; daviadechël te prëii pa bel, ne nes desmincië pa nëus, po ies' a drët valënt. Te ses bën, l' oma ie for tan amaleda, mi fredesc ie mo tan pitli, po ons tan la stënta: puech y nia da maië, deguna lëgna da sciaudé ite, śën che l ie tan frëit. Te ses bën ulache stajon, ora nsom la cuntreda dla pecunia. Valdalafam, 24. XII.

L seniëur damanda do y nriesc, che l ie propi na puera familia. Y da sëira al fà purté da si fanc de drë cestons de lëgna, de farina y de roba da maië a chësta familia. No mé la familia à abù de bona festes, nce l seniëur fova cuntënt d' avëi pedù fé tan na bona opra.