L Vivan sa Mazin
L Vivan sa Mazin
Da chi monc sora Mazin vegnìa da spes na bela joena vivana a se prear pan noel. La era lurenta e la ge didaa valch outa a la patrona. Chista, ma enche so fi Piere, ge volea n ben dal cher. Na dì l la domana, se la l vel per spos. Ela era contenta e la se à lascià batejar. Dapò i à fat noza e i à vivù n chiap de egn zenza aer na bega. Le doi pìcole che i à ciapà, la le à arlevade ben e n amor de Dio, e la le tegnìa nete e ben rencurade.
Na dì rua Piere suan e dut spaventà e l conta, che sul col de Mazin l'à sentù na ousc grovia che cridaa:
Tarata, gei, gei, che Taraton é mort."
Soa fémena se à metù a vaar e braiar e dapò l'à dit:
"Ades cogne me n jir, che mi pare é mort." Seben che Piere e sie pìcole i à preà, che la reste, la é se n jita. L'à dit a l'om, tégnete a ment:
"Sora zapa e badil no semenar!" e a le pìcole la ge à dit: "Ben ben lavar, ben petenar, bele trece fasc far."
Dapò la é se n jita su per Lavazei, e no la é mai più vegnuda. A chela majon, olache la stajea, i ge disc amò anchecondì al "Vivan".