L'ancona apede l pont del ruf de Valongia
L'ancona apede l pont del ruf de Valongia
D'aisciuda da l'an mileotcent e nef aea i Franzeji jà passà Careza e i vegnìa jù da mont da Vich. I Fascegn aea paura che l nemich rue te Fascia. I é jic sa Sènt'Uliana e i l'à preada che la ge deide te chist besegn. La sènta veriera é sgolada vers la mont da Vich. Ma i Franzeji i era nterdana jà rué no dalonc dal pont del ruf de Valongia e aló la se à mbatú con ic. I sudé pussaa e i ufiziai se rejonaa apede l'ancona, coche i à da tratar i Fascegn, e cotant de tribut che i à da partener. La sènta é vegnuda apede ic e la i volea persuader, che te Fascia l'é bona, ma pera jent, e che no i à nia a che far ló ite. Ma i ufiziai i à dit, che la vae coche la vel, e che ic i va ite, a se tor la preda. A veder che dut l rejonament no ge joa nia, la é se n jita. Apena che la era demez, l'é sozedú n miràcol. Se i Franzeji vardaa ite Fascia, no i vedea nia auter che na nìgola scura e scurenta, e se i vardaa fora per Busan, i vedea dut lumenous. Parché no i saea inout e no i era bogn da troar l troi te Fascia, i à cognù dar de outa. L comandante, daldut dessená, ge à trat na schiopetada al ciaf de la Madona te chela ancona.
L busc de la bala se veit amò e se se met na ureia sun chel busc, se sent amò pif, paf, pif, paf e te anter pum, pum e tromtomtom, terdototom che l par, che se sente na batalia dalvers.