L' Orco y Iocl dl Vedl da Corvara
L' Orco y Iocl dl Vedl da Corvara
L' Orco é n gran bur malan,
do les animes plëgn de fan;
sciöche le lu che mangia la cern
dles püres bisces bëgn bëgn rabius,
insciö i saltel do furius
por les trá jön funz dl infer!
Cara jënt! N' i jide daimpró,
ló che le tofëis, oltesse inaó!
Ne stede a i craié, ne stede a le sceché
y ne stede a le temëi, sc' al ves ó tramonté!
Signesse y tolede, sce podëis, l' ega santa
che ciacia la forza dl infer döta canta!
Os ne savëis os ci ch' al é sté.
Iocl dl Vedl savess pa cunté!
Al á odü l' Orco daimpró da cortina
ch' al i parô impröma le ciaval dl Fujina.
Mo chël ne fôl ch' al fô a Bornech,
stanch y pëigher sciöche n gran sgnech!
Mile y otcënt y spo vintecinch
contân che les stibles de parincinch
stlefâ jön stüa de comun
a plëna löna la nöt de Capiun.
Por lincerna sorvî la löna
ala fia de Iocl ch' injignâ la cöna.
Le früt dl picé saludâ chësc monn
intan che Corvara ciauriâ tl sonn.
Y le pere verc che fô Iocl dl Vedl
- sán bele - na te ota ne stlujô pa n edl.
Le romun dla cosciënza ne le lasciâ dormí,
al saltâ ite y fora tl scür - abramí.
Fora en sorá le porta les iames,
lëgns che parô de chi da Col de Flames.
Te chël ch' al vëiga le ciampaní,
tomel inaó, döt intramortí.
Ater co le ciaval dl Fujina
che ciarâ sura le mür de cortina!
Al odô bel tres chël ciaval:
col ce tocâl sön ciampaní prësc le ial!
Ciari, Iocl, ciari ciamó n pice püch!
Al spriza dai edli gran tizes de füch!
Al trëma la tera ch' al pësta coi fers,
y dala bocia - oh! - ci n bur vers!
I morc se spavënta jön funz de cortina,
sc' al ciga da orco y scassa la tlina!
Oh püre Iocl, püre vedl, püre diau,
aste aldí sëgn y odü sëgn le bau?
Vëigheste sëgn, vedl, ci ch' al ó dí
a tomé fora de grazia de Dî!
Sce t' esses gorné n pü' miec chëra möta
col aiüt de Dî che ion nes aiüta,
ne n' esste odü l' Orco y ne fossel n bastert,
la fia no te piz che stess de pert.
Mo sëgn ci oste fá? Oh sëgnete la frunt!
Ne vëigheste che l' Orco é gran sciöche na munt!
Sciampa te stüa y téte l' ega santa!
I me tëmi scenó che l' Orco t' la cianta.
Vá do furnel a sorví sëgn tüa fia
y státun pro d' ëra fin al sonn dl' Aimaria!
Chël ch' é fat é sëgn fat. Fajede penitënza
y tö y tüa fia, y imparede cherianza!
Porcí n te scandal te döt le paisc!?
Ne fossel morvëia, sce Chël Bel Dî en paraisc
menass l' Orco o ciamó valch deplü
a castié n te gran piciadú?
Le püre Iocl, döt spaventé
se [n] sciampa te stüa, dër bur suraventé.
Tl müs i vëgnel na burta gran rogna,
al cridla y smociogna ch' al é na vergogna.
Y os jënt, che ëis odü chësta storia,
ponsede a os instësc y ne n' ede tanta boria!
La superbia é la cöna de vigni gran viz
che á sciuré le verc pere y süa fia te n piz.
Sëgn stede bëgn y bi prosc indertöra,
y spo dal Orco ne n' ede paüra!