Jv/Kakawin Nītiśāstra/Pupuh 5

From Wikisource
Jump to navigation Jump to search
please do not remove empty parameters (see the template documentation).
Kakawin Nītiśāstra by [[Author:{{{author}}}|{{{author}}}]]
Pupuh 5

Pupuh V – Kusumawicitra

1.

  • taki-takining sewaka guṇa widya
  • smara-wiṣaya rwang puluh ing ayuṣya
  • tĕngah i tuwuh san-wacan gĕgön-ta
  • patilaring ātmeng tanu pagurokĕn

2.

  • dhana phalaning mona tan angucap wwang
  • ikang agalak ring waca nĕmu duhka
  • ikang umĕnĕng lyab dhana ya matumpuk
  • damar uga himpĕrnikanang aśabda

3.

  • waṣita nimittanta manĕmu lakṣmi
  • waṣita nimittanta pati kapangguh
  • waṣita nimittanta manĕmu duhka
  • waṣita nimittanta manĕmu mitra

4.

  • masĕpi tikang waktra tan amucang wwang
  • masĕpi tikang weśma tan ana putra
  • masĕpi tikang deśa tan ana mukya
  • sĕpinikanang try āpupul ing anartha

5.

  • lwiring awalā tinggalakĕna denta
  • krĕpaṇa daridreka rĕsĕb awaknya
  • swaranika māwor drawa kamadhatrī
  • agalak aśabdāghrĕna ya mapunggung

6.

  • lwiring awalā yogya pinaka patnī
  • wara-guṇa rūpādhika kula dhāni
  • mapĕs ikang ambĕk ghrĕṇa ya suśīlā
  • kadi panĕḍĕngning kusumawicitra

]]