Jv/Kakawin Arjunawiwāha/Pupuh 9

From Wikisource
Jump to navigation Jump to search
Kakawin Arjunawiwāha by Mpu Kanwa
Pupuh 9

Pupuh 9 - Suwadanā 100%.png

1.

  • a. sang hyang Rudrātĕmĕn krodhanira mayatakĕn pāśāyudha sira
  • b. hrū ĕe śangkalākāra mamukha bhujaga krūrângamah-amah
  • c. ndan rangkĕp kāladangṣṭrā pinakadulur ikāng prāṇapraharaṇa
  • d. sang Pārthângĕṭṭahāsâmalĕsa mahawĕlū langkapnira muwah

2.

  • a. prodbhūta ng wainateyāstra pamapagira ring nāgākṛtiśara
  • b. tĕmpuhning kāladangṣṭrā tulakĕn aparĕpĕk mĕṇḍĕk juga sira
  • c. punggĕl têkāng laras karwa rukuhira rĕmuk ratnanya sumirat
  • d. krodhān tandang masādhyāmupuha makagadā langkapnira tikĕl

3.

  • a. langguk sang hyang parĕng rakwa parĕkira huwus tyaktāyudha sira
  • b. kapwâsowe silih bandha masĕlur angiring cidrānĕmu sikĕp
  • c. sang Pārthâsor karĕnggut sira wahu katĕtĕh śīghrânĕmu walĕs
  • d. jöng sang hyang karwa kārun tĕkapira kasikĕp sāmpun kakawaśa

4.

  • a. sānyāsâmbĕknirāngjambakĕna hilangikāng jöng tan pajamuga
  • b. sumyūk tang puṣpawarṣâmarĕngi jaya-jayâstūngkāra karĕngö
  • c. māyā-māyā jugāngañjali wĕkasan anon tejâkara-kara
  • d. sāksāt dṛṣṭārdhanārīśwara tĕka hana ring padmāsana maṇi

5.

  • a. śīghrānĕmbah ta sang Paṇḍusuta nipuna ring dewôpacaraṇa
  • b. wruh ring sangsiptapūjā sira humarĕpakĕn hyang Rudra tan adoh
  • c. mudra mwang kūṭamantra smṛti wimala nahan puṣpāñjalinira
  • d. sampunyān mangkanā mastuti ta sira rĕngön uccāraṇanira