Jv/Kakawin Arjunawiwāha/Pupuh 27

From Wikisource
Jump to navigation Jump to search
Kakawin Arjunawiwāha by Mpu Kanwa
Pupuh 27

Pupuh 27 - Jagaddhita 100%.png

1.

  • a. sang hyang Pāśupatāstramantra rinĕgĕp nṛpasuta masamādhi sakṣaṇa
  • b. rĕp māwak tikang agni rākṣasaśarīra pitung ayuta kapwa sāyudha
  • c. maryak mālun-alun ya ring gagana pūrṇa mĕtu saka ri tungtunging laras
  • d. krūrakāra tĕkângasut gumĕsĕng ikang asura saha bhṛtya wāhana

2.

  • a. siddhi śrī Maṇimāntakādhipa manusmaraṇa warabhaṭāra Bherawa
  • b. acchedyâmaraṇângjĕlag ri tĕngahing hawu ri hilangikang balāsura
  • c. dhyāyi rĕp mĕtu tang balāsura muwah saka ri tutuk apūrwabhīṣaṇa
  • d. icchânantara kātarâpulih amuk dumaśaguna halĕpnikang hilang

3.

  • a. ping pat ping lima yan minangkana muwah kagiri-giri ta ya triwikrama
  • b. ngke sang hyang Tripurāntakāgniśara panglĕpas iriya muwah triwikrama
  • c. ndah yêkā pinasang rahasyaning upaya tĕkapira sang ārya Phālguna
  • d. sūkṣmajñāna ring amaśāpa katuturnira ri wĕkasikāng anugraha

4.

  • a. ngĕsngösĕn surasangghya mawrĕg alayū tĕkapi paramaśaktining musuh
  • b. sang Pārthâta mahā tumūt katawurag milu pinakapamuntat ing murud
  • c. lwir kewran matawan-tawan tiki dinwan hinujungan inirup sināhasan
  • d. dening rākṣasa pangharĕp mamanah anghudani ri musala mwang tomara

5.

  • a. yêka-n garjita sang Niwātakawacânudingi kiwa manguṇḍa tomara
  • b. hāhāh mānuṣa dibya ko-n wĕnang amangpang aku sakala lokikāntaka
  • c. ākw īki-ng makadṛwya ng aṇḍabhuwanâku makahulun ikang jagattraya
  • d. panglampūnya silunglungamwa mulihêng nirayapada nahan wuwusnika

6.

  • a. ndan sang Pāṇḍusutâsuwe sira huwus tumihangakěn ikang śarottama
  • b. nārācāstra śarīrabandhana ngaranya saha japa samādhi dewata
  • c. těmpuning waratomarê siramahânghapiti ya mapi kantěping ratha
  • d. makrak sang Maṇimāntakādhipa těkângamah-amah atěhěr mangadwakěn

7.

  • a. kālanya-n kasilib kabañcana měngā babahan ikang anugrahêng sira
  • b. tan dwa-dwan pinanah sěsěk śara warāstra tutukira kalěnggaking ratha
  • c. amběk niścaya sawalepa magawe lupa larapan ikang pati-n těka
  • d. byātītan těka-ng antaśāpa ya tinūtni pangawaśanikāng anityaśa