Jv/Kakawin Arjunawiwāha/Pupuh 16

by Mpu Kanwa

←Pupuh 15

Kakawin Arjunawiwāha by Mpu Kanwa Pupuh 16

Pupuh 17→

Pupuh 16 - Turidagati

1.

• a. hana mata pājaran wahu katon tinuduhakĕn ikang walantaga
• b. kadi-kadi lĕmbu mangrĕpah i sornya pinutih apayung-payung wĕlu
• c. puru-puru tan katon hatĕp i rangkangika tĕkap i sanghubning nadī
• d. asĕmu kadewatan malalayan magupura kadi mukṣa tolihĕn

2.

• a. surawanitā mamañcana tĕhĕr lumaku kili śīnāpa sang ṛṣi
• b. masaji sĕkar marêng bañu dudū manĕtĕk asĕp i saṇḍinging durung
• c. manis i matanya tan dadi kalingsira mapaga ri tinghaling tamuy
• d. inilan aśabda yan tĕhĕr angingguti halis irikang tapowana

3.

• a. lwah ika mijil sakêng wukir anak titir analaga tūsnya tūt lurah
• b. gumulak ing arga jambangan anger tali mĕlĕk amangun-mangun hima
• c. tĕka ri pasirnikang suranadī hiliran ing asanâsinang rurū
• d. sukha hana jīwa-jīwa masibū mwang asisik amiwir-miwir hĕlar

4.

• a. kawĕlas-arĕp sĕkar sĕminikang kayu paḍa turung angharas gĕlung
• b. mangayam-ayam kasumpinga tiling-tilingana tĕkap ing kawīśwara
• c. tĕka mara sang Dhanañjaya lawan kalulutira sĕḍang smarātura
• d. inuhuh ikang kuwong sira-n araryan i pangiwati lunggahing gaḍung

5.

• a. atha haliwat sirêrika katon tataraban i sabhānikang musuh
• b. diwasa pitung tabĕh kĕñar ing arka sinidik i tibānikang hudan
• c. angada-hadâhawuk midĕr anūtakĕn angin i hiringnikang langit
• d. ana lumarap manuknya samĕnur tinali-tali tinuntun ing wulat

6.

• a. i para-parahikang i Maṇimāntakanagara kasinggahan hudan
• b. ya juga tinolih ing diwakarânĕpuhi kanaka bapra gopura
• c. akara-karā katinghalan ikang dhawalagṛha ri pöhan ing kuṭa
• d. dumaśaguṇa-ng surālaya halĕpnya pinakaphalaning sĕḍang jaya

6.

• a. i para-parahikang i Maṇimāntakanagara kasinggahan hudan
• b. ya juga tinolih ing diwakarânĕpuhi kanaka bapra gopura
• c. akara-karā katinghalan ikang dhawalagṛha ri pöhan ing kuṭa
• d. dumaśaguṇa-ng surālaya halĕpnya pinakaphalaning sĕḍang jaya

7.

• a. ri suruping arka tan hana pĕtĕng mĕtu tĕkapi pajangnikang wulan
• b. mangkin aparĕk sayabni laku sang nṛpatanaya lawan dulurnira
• c. paḍahi paran tikîbu gumuruh pilih angajarakĕn mahotsawa
• d. asura paḍâwĕrö wija-wijah sakuwu-kuwu kapwa ghūrṇita

8.

• a. pataña narendraputra sumahur sang ahayu tuhu ling nṛpātmaja
• b. niyata mamaṇḍi-maṇḍi tumĕkāna Wiwudhapati kapwa sanggraha
• c. amahayu sanjatâśramanikang lĕbuh alap-alapan mabherawa
• d. tuhu mara yan pitung wĕngi hinernya lumuruga marêng kadewatan

9.

• a. nṛpasuta yan kangĕn bhayanika-ng pangutusira Surendra durgama
• b. aputĕk arĕs twasing pinatiwar sinurungakĕn anambahêng musuh
• c. syapa tan arĕngwa hewa mulatêng kagamĕla tĕkaping durātmaka
• d. lĕhĕnga jugâpĕjah saka ri pāpaning anahĕn irang lawan lara

10.

• a. sukha-ng apa ta-n wineh tĕkap ikang Widhi winilĕtakĕn twas i nghulun
• b. pinarikĕdö marambatana tan sakawaśa kayuhĕn pakāśrayan
• c. tĕwas angĕlih makānta-ng anawak tawang ataya kĕdö niniṣṭhura
• d. wuwus ikang apsarī tĕhĕr apet tangis angisĕk-isĕk gawe-gawe

11.

• a. rari mapa lingta merang i pakon Surapati rinasan kasinggihan
• b. kunĕng i hanangku sākṣya mulatêng kita parĕk aparan kasangśaya
• c. si kagamĕlâta dening asurâpa kawĕdi palalu pwa kölakĕn
• d. ibu hiḍĕpĕn nghulun tuhu tĕkapta manisakĕn i heng tikung wulat

12.

• a. saphala yaśanta yan wutaha denya mawarah i rahasyaning pati
• b. kawĕnang ikâri yan kadi rikāna ring acala lĕkasta ring giha
• c. wuwusira sang Dhanañjaya tĕhĕr mahayu gĕlung ikang winodhanan
• d. tikĕl in halisnya tan prihati hetu saji-saji pinĕñcir ing guyu