Jv/Kajawen 06 1927-02-10
[ Front-cover ]
ꦫꦱꦶ
꧋ꦱꦼꦫꦠ꧀ꦩꦶꦁꦒꦺꦴꦤ꧀꧇
ꦏꦗꦮꦺꦤ꧀꧈
ꦨꦭꦺꦥꦸꦱ꧀ꦏꦠ=ꦮꦺꦭ꧀ꦠꦼꦦ꦳ꦿꦺꦣꦼꦤ꧀꧈
꧋ꦱꦤꦗꦤ꧀ꦥꦲꦺꦴꦤ꧀ ꦠꦏ꧀ꦱꦶꦃꦲꦶꦁꦒꦶꦭ꧀
ꦮꦺꦴꦤ꧀ꦠꦼꦤ꧀ꦱꦠꦸꦁꦒꦶꦭ꧀ꦭꦶꦁꦱꦼ
ꦒꦫꦺꦠ꧀ꦲꦶꦁꦏꦁꦉꦒꦶꦤꦶꦥꦸ
ꦤ꧀ꦢꦶꦥꦸꦤ꧀ꦲꦤ꧀ꦝꦥ꧀ꦥꦏꦼꦤ꧀
ꦲꦤꦔꦶꦁ
[ꦒꦩ꧀ꦧꦂꦥꦤꦃꦩꦼꦁꦔꦶꦱꦺꦴꦂ]
ꦲꦶꦁꦒꦶꦃꦥꦸꦤꦶꦏ꧇
ꦲ꧈ ꦣꦺ꧈ ꦩꦒ꧀ꦒꦶꦭ꧀ꦭꦥꦿꦶ ꦲꦶꦁ ꦄꦩ꧀ꦧꦫꦮ꧉
꧋ꦏꦭꦤ꧀ꦠꦶꦥ꧀ꦥꦤ꧀ꦤꦶꦁꦭꦫꦺꦱꦥꦶꦃꦲꦤ꧀꧈
a. ꧋ꦏꦸꦭꦒꦸꦩꦸꦤ꧀ꦝꦠꦼꦁꦥꦸꦤ꧀ꦛꦺꦴꦭꦺ꧈ ꦤꦩꦸꦁꦥꦶꦤ꧀ꦠꦼꦂꦫꦶꦥꦸꦤ꧀ꦠꦶꦪꦁꦤꦭꦶꦏꦢꦶꦥꦸꦤ꧀ꦱꦥꦶꦃꦥꦸꦤꦶꦏ꧈ ꦭꦗꦼꦁꦧꦺꦴꦠꦼꦤ꧀ꦏꦺꦔꦼꦠꦤ꧀ꦤꦼꦱꦼꦥ꧀ꦧꦧꦂꦥꦶꦱꦤ꧀꧈ ꦥꦚ꧀ꦕꦺꦤ꧀ꦭꦤ꧀ꦠꦶꦥ꧀꧈ꦔꦽꦠꦺꦴꦱ꧀ꦩꦤꦮꦶꦢꦶꦥꦸꦤ꧀ꦥꦼꦁꦒꦏ꧀ꦲꦁꦒꦺꦤꦶꦥꦸꦤ꧀ꦤꦼꦱꦼꦥ꧀꧈
b. ꧋ꦩꦁꦱꦸꦭꦶꦱꦼꦩꦸꦲꦺꦮ: ꦭꦥꦸꦤ꧀ꦱꦭꦶꦪ꧈ꦲꦤꦏ꧀ꦏꦸꦭ꧈ ꦤꦭꦶꦏꦢꦶꦥꦸꦤ꧀ꦱꦥꦶꦃꦧꦶꦪꦸꦔꦶꦥꦸꦤ꧀ ꦭꦗꦼꦁꦱꦒꦼꦢ꧀ꦩꦸꦔꦼꦭ꧀: ꦲꦏꦸꦩꦶꦏ꧀ꦲꦶꦩꦸꦤꦝꦼꦲꦲꦺ꧉ ꦲꦫꦥꦸꦤꦥꦧꦺꦴꦠꦼꦤ꧀ꦭꦤ꧀ꦠꦶꦥ꧀꧈
c. ꧋ꦚꦩ꧀ꦧꦼꦠꦶꦒ꧀ꦭꦪꦼꦩ꧀ꦒ꧀ꦭꦪꦼꦩ꧀: ꦲꦼꦩ꧀ ꦱꦪꦲꦤꦏ꧀ꦏꦸꦭꦥꦸꦤ꧀ꦱꦭꦶꦩ꧈ꦤꦭꦶꦏꦢꦶꦥꦸꦤ꧀ꦱꦥꦶꦃꦥꦸꦤꦶꦏꦩꦮꦶꦢꦶꦥꦸꦤ꧀ꦮꦶꦕꦤ꧀ꦠꦼꦤꦶꦧꦶꦪꦸꦔꦶꦥꦸꦤ꧀ꦩꦏꦠꦼꦤ꧀:ꦭꦺ꧈ꦮꦶꦱ꧀꧈ꦲꦗꦤꦸꦱꦸ:ꦪ꧈ꦩꦝꦁꦧꦲꦺ꧉ꦮꦁꦱꦸꦭꦤꦶꦥꦸꦤ꧀: ꦲꦶꦪ꧈ꦤꦶꦁꦔꦁꦒꦺꦴꦱꦩ꧀ꦧꦼꦭ꧀꧈ ꦕꦺꦴꦧꦶꦮꦺꦴꦤ꧀ꦠꦼꦤ꧀ꦭꦫꦺꦠꦼꦏꦭꦤ꧀ꦠꦶꦥꦶꦥꦸꦤ꧀ꦏꦢꦺꦴꦱ꧀ꦩꦏꦠꦼꦤ꧀꧈
d. ꧋ꦚꦩ꧀ꦧꦼꦠꦶꦱꦗꦏ꧀ꦔꦿꦺꦩꦺꦲꦏꦼꦤ꧀ꦉꦩ꧀ꦧꦒ꧀ꦱꦢꦪꦮꦻꦴ: ꦲꦼꦩ꧀꧈ꦠꦶꦪꦁꦏꦭꦤ꧀ꦠꦶꦥꦤ꧀ꦏꦢꦺꦴꦱ꧀ꦩꦏꦠꦼꦤ꧀ꦏꦺꦩꦮꦺꦴꦤ꧀ꦢꦢꦏ꧀ꦢꦶꦥꦸꦤ꧀ꦥꦩꦺꦫꦏꦼꦤ꧀꧈ꦕꦼꦏꦏꦶꦥꦸꦤ꧀ꦱꦢꦴꦮꦻꦴꦢꦺꦫꦺꦁꦮꦺꦴꦤ꧀ꦠꦼꦤ꧀ꦲꦶꦁꦏꦁꦏꦢꦺꦴꦱ꧀ꦱꦭꦶꦩꦶꦤ꧀ ꦕꦺꦴꦧꦶꦏꦸꦭꦲꦠꦸꦫꦶꦲꦁꦒꦭꦶꦃ꧈ꦱꦮꦼꦤꦺꦲꦶꦁꦢꦶꦤ꧀ꦠꦼꦤ꧀ꦱꦭꦶꦩꦶꦤ꧀ꦩꦤ꧀ꦠꦸꦏ꧀ꦱꦏꦶꦁꦲꦔꦺꦤ꧀꧈ꦢꦸꦩꦸꦒꦶꦲꦶꦁꦒꦿꦶꦪꦭꦗꦼꦁꦏꦼꦝꦼꦥꦼꦱ꧀ꦱꦶꦭꦮꦺꦴꦤ꧀ꦠꦼꦤ꧀ꦱꦔꦗꦼꦔꦶꦁꦧꦶꦪꦸꦔꦶꦥꦸꦤ꧀ꦠꦸꦮꦶꦤ꧀ꦮꦶꦕꦤ꧀ꦠꦼꦤ꧀꧈ ꦠꦸꦂꦧꦱ꧈ꦠꦼꦩ꧀ꦧꦸꦔꦶꦥꦸꦤ꧀: ꦧꦶꦪꦸꦁ꧈ꦱꦫꦺꦃꦤꦶꦁꦲꦁꦒꦺꦤ꧀ꦏꦸꦭꦲꦔꦺꦤ꧀ꦩꦲꦺꦱꦠꦼꦧꦶꦃ꧈ꦏꦸꦭꦚꦸꦮꦸꦤ꧀ꦢꦶꦥꦸꦤ꧀ꦱꦥꦶꦃꦏꦺꦩꦮꦺꦴꦤ꧀꧈ ꦧꦶꦪꦸꦔꦶꦥꦸꦤ꧀ꦩꦶꦉꦁꦠꦼꦩ꧀ꦧꦸꦔꦶꦥꦸꦤ꧀ꦱꦭꦶꦩꦶꦤ꧀ꦩꦏꦠꦼꦤ꧀ꦮꦻꦴꦭꦗꦼꦁꦱꦼꦝꦏꦼꦥ꧀꧈ ꦒꦼꦝꦼꦒ꧀ꦒꦼꦝꦼꦒ꧀ꦠꦸꦮꦶꦤ꧀ꦮꦶꦕꦤ꧀ꦠꦼꦤ꧀: ꦲꦺ꧈ ꦲꦺ꧈ꦲꦤꦧꦺꦴꦕꦃꦭꦤ꧀ꦠꦶꦥ꧀ꦠꦼꦏꦱꦩꦺꦴꦤꦺꦴ꧈ ꦢꦭꦃꦱꦥꦶꦃꦧꦲꦺꦧꦶꦱꦤꦼꦩ꧀ꦧꦸꦁꦝꦺꦮꦺ꧉
[ Cover ]
꧋ꦎꦁꦏ 6꧈ ꧗꧇ ꦫꦸꦮꦃꦠꦲꦸꦤ꧀ꦮꦮꦸ꧇ ꧑ ꧘꧕꧗꧇꧈ 10 ꦥꦺꦧꦿꦸꦮꦫꦶ 1927꧈ ꦠꦲꦸꦤ꧀ II.
꧋ꦏꦗꦮꦺꦤ꧀꧈
ꦏꦮꦼꦢꦭ꧀ꦭꦏꦼꦤ꧀ꦱꦧꦼꦤ꧀ꦢꦶꦤ꧀ꦠꦼꦤ꧀ꦏꦼꦩꦶꦱ꧀
꧋ꦉꦒꦶꦤꦶꦁꦱꦼꦫꦠ꧀ꦏꦧꦂꦥꦸꦤꦶꦏꦲꦶꦁꦢꦊꦩ꧀꧇
ꦠꦶꦒꦁꦮꦸꦭꦤ꧀ . . . . . . . . . f. 150
ꦧꦪꦂꦫꦤ꧀ꦤꦶꦥꦸꦤ꧀ꦏꦱꦸꦮꦸꦤ꧀ꦫꦸꦩꦶꦪꦶꦤ꧀
ꦧꦺꦴꦠꦼꦤ꧀ꦏꦺꦔꦶꦁꦭꦁꦒꦤ꧀ꦤꦤ꧀ꦏꦶꦫꦁꦱꦏꦶꦁ 3 ꦮꦸꦭꦤ꧀꧈
꧋ꦗꦸꦫꦸꦔꦫꦁ ― ꦄꦢ꧀ꦩꦶꦤꦶꦱ꧀ꦠꦿꦱꦶ
ꦧꦭꦺꦥꦸꦱ꧀ꦠꦏ꧈
ꦲꦶꦁꦱꦮꦶꦁꦏꦶꦔꦶꦁꦏꦤ꧀ꦠꦺꦴꦂꦥꦭꦶꦱ꧀꧈
ꦠꦶꦭ꧀ꦥꦸꦤ꧀ꦤꦺꦴꦩꦼꦂ 2791 ― ꦮꦺꦭ꧀ꦠꦼꦥꦿꦺꦝꦼꦤ꧀꧈
꧋ꦄꦕꦶꦃ꧉
꧋ꦔꦶꦁꦒꦶꦭ꧀ꦥꦸꦤꦶꦏꦒꦩ꧀ꦧꦫꦶꦥꦸꦤ꧀ꦱꦠꦸꦁꦒꦶꦭꦶꦁꦥꦼꦏꦼꦤ꧀ꦲꦶꦁꦄꦕꦶꦃ꧉
꧋ꦥꦢꦸꦏꦠꦸꦮꦤ꧀ Prof. Dr. C. SNOUCK HURGRONJE꧉
꧋ꦥꦫꦩꦲꦺꦴꦱ꧀ꦠꦩ꧀ꦠꦸꦤꦶꦥꦸꦤ꧀ꦱꦩꦶꦧꦺꦴꦠꦼꦤ꧀ꦏꦏꦶꦭꦥ꧀ꦥꦤ꧀ ꦱꦶꦤ꧀ꦠꦼꦤ꧀ꦥꦢꦸꦏꦠꦸꦮꦤ꧀ Prof. Dr. C. Snouck Hurgronje ꦥꦸꦤꦶꦏ꧈ ꦲꦶꦁꦒꦶꦃꦥꦸꦤꦶꦏꦱꦠꦸꦁꦒꦶꦭ꧀ꦭꦶꦁꦥꦸꦗꦺꦴꦁꦒꦲꦒꦼꦁꦲꦶꦁꦤꦒꦫꦶꦮꦭꦤ꧀ꦢꦶ꧈ ꦲꦶꦁꦏꦁꦩꦶꦱꦸꦮꦸꦂꦲꦱ꧀ꦩꦤꦶꦥꦸꦤ꧀ꦲꦶꦁꦱꦲꦶꦤ꧀ꦢꦼꦁꦔꦶꦁꦧꦮꦤ꧉ ꦱꦱꦩ꧀ꦥꦸꦤ꧀ꦤꦶꦥꦸꦤ꧀ꦱꦮꦠꦮꦶꦱ꧀ꦠꦲꦸꦤ꧀ꦔꦱ꧀ꦠꦄꦢ꧀ꦥꦶꦱꦸꦂ Inl. Zaken ꦲꦶꦁꦠꦤꦃꦲꦶꦤ꧀ꦢꦶꦪꦔꦿꦶꦏꦶ꧈ ꦮꦱꦤꦤꦶꦥꦸꦤ꧀ꦭꦗꦼꦁꦏꦠꦼꦠꦼꦥꦏꦼꦤ꧀ꦢꦢꦺꦴꦱ꧀ꦒꦸꦫꦸꦲꦒꦼꦁꦲꦶꦁꦥꦩꦸꦭꦔꦤ꧀ꦫꦸꦲꦸꦂꦲꦶꦁꦭꦺꦲꦶꦝꦼꦤ꧀꧉ꦱꦩꦁꦏꦺꦱꦩ꧀ꦥꦸꦤ꧀ꦏꦊꦉꦱ꧀ꦪꦸꦱ꧀ꦮ꧇꧗꧐꧇ꦠꦻꦴꦤ꧀꧈ꦱꦲꦭꦗꦼꦁꦱꦺꦭꦺꦃꦥꦏꦂꦪꦤ꧀꧉ꦆꦁꦱꦫꦺꦃꦤꦶꦁꦥꦢꦸꦏꦠꦸꦮꦤ꧀ Prof. Dr. C. Snouck Hurgronje ꦲꦸꦂꦒꦚ꧀ꦗꦺꦮꦻꦴ꧈ꦏꦛꦃꦱꦔꦼꦠ꧀ꦊꦭꦧꦼꦠꦤꦶꦥꦸꦤ꧀ꦠꦸꦩꦿꦥ꧀ꦧꦁꦱꦆꦤ꧀ꦢꦶꦪꦔꦿꦶꦏꦶ꧈ꦱꦪꦩꦭꦶꦃꦠꦸꦩꦿꦥ꧀ꦒꦺꦴꦭꦺꦴꦔꦤ꧀ꦆꦱ꧀ꦭꦩ꧀꧈ꦲꦩꦶꦭꦱꦩ꧀ꦥꦸꦤ꧀ꦢꦢꦺꦴꦱ꧀ꦮꦗꦶꦧꦶꦥꦸꦤ꧀ꦠꦸꦮꦶꦤ꧀ꦥꦤ꧀ꦠꦼꦱ꧀ꦱꦔꦼꦠ꧀ꦏꦗꦮꦺꦤ꧀ꦲꦔꦤ꧀ꦝꦫꦏꦼꦤ꧀ꦱꦮꦠꦮꦶꦱ꧀ꦩꦼꦁꦒꦃꦊꦭꦩ꧀ꦥꦲꦤꦶꦥꦸꦤ꧀ꦱꦁꦩꦶꦤꦸꦭꦾꦮꦻꦴ꧉ꦱꦪꦼꦏ꧀ꦠꦺꦴꦱꦶꦥꦸꦤ꧀ꦲꦔꦺꦭ꧀ꦱꦔꦼꦠ꧀ꦲꦔꦤ꧀ꦝꦫꦏꦼꦤ꧀ꦊꦭꦩ꧀ꦥꦲꦤꦶꦥꦸꦤ꧀ꦥꦢꦸꦏꦠꦸꦮꦤ꧀ Prof. Dr. C. Snouck Hurgronje ꦲꦸꦂꦒꦚ꧀ꦗꦺꦲꦶꦁꦏꦁꦠꦤ꧀ꦥꦲꦚꦫꦶꦪꦺꦴꦱꦏꦼꦤ꧀ꦥꦢꦩꦼꦭꦤꦶꦥꦸꦤ꧀꧉ꦆꦁꦔꦿꦶꦏꦶꦏꦺꦔꦶꦁꦏꦕꦫꦶꦪꦺꦴꦱꦏꦼꦤ꧀꧈ꦧꦶꦭꦶꦃꦥꦢꦩꦼꦭꦤ꧀ꦲꦶꦁꦒꦶꦃꦊꦭꦩ꧀ꦥꦲꦤꦶꦥꦸꦤ꧀꧈ꦊꦭꦩ꧀ꦥꦲꦤ꧀ꦲꦶꦁꦒꦶꦃꦥꦢꦩꦼꦭꦤꦶꦥꦸꦤ꧀꧉ꦩꦶꦭꦲꦶꦁꦒꦶꦃꦲꦮꦶꦱ꧀ꦠꦶꦪꦁꦥꦶꦤ꧀ꦠꦼꦂꦠꦸꦂꦮꦼꦏꦼꦭ꧀ꦲꦶꦁꦢꦩꦼꦭ꧀ꦏꦢꦺꦴꦱ꧀ꦢꦺꦤꦺꦥꦢꦸꦏꦠꦸꦮꦤ꧀ Prof. Dr. C. Snouck Hurgronje ꦥꦸꦤꦶꦏ꧉
꧋ꦩꦼꦁꦒꦃꦠꦼꦧꦤꦶꦁꦥꦢꦩꦼꦭꦤ꧀ꦲꦶꦁꦏꦁꦢꦶꦥꦸꦤ꧀ꦱꦫꦶꦫꦤꦶꦏꦤ꧀ꦛꦶꦭꦸꦩꦶꦤ꧀ꦠꦸꦤꦶꦁꦥꦁꦒꦒꦱ꧀ꦲꦶꦁꦱꦊꦧꦼꦠꦶꦁꦱꦤꦸꦧꦫꦶꦤꦶꦥꦸꦤ꧀ꦠꦸꦮꦤ꧀ Prof. Dr. C. Snouck Hurgronje ꦥꦸꦤꦶꦏꦱꦪꦼꦏ꧀ꦠꦺꦴꦱ꧀ꦧꦺꦴꦠꦼꦤ꧀ꦤꦩꦲꦭꦶꦠ꧀꧉ꦠꦸꦩꦿꦥ꧀ꦥꦔꦸꦢꦶꦤꦶꦥꦸꦤ꧀ꦱꦮꦂꦤꦶꦤꦶꦁꦏꦮꦿꦸꦃꦮꦺꦠꦤꦤ꧀ꦲꦶꦁꦏꦁꦱꦪꦢꦔꦸꦱꦪꦏꦼꦕꦸꦏꦸꦥ꧀ꦠꦸꦮꦶꦤ꧀ꦲꦚꦼꦏꦥꦶ꧈ꦮꦺꦴꦤ꧀ꦠꦼꦤ꧀ꦱꦥꦺꦫꦔꦤ꧀ꦲꦶꦁꦏꦁꦥꦿꦱꦱꦠ꧀ꦢꦶꦥꦸꦤ꧀ꦊꦩ꧀ꦥꦫꦏꦏꦼꦤ꧀꧈ꦲꦶꦁꦒꦶꦃꦥꦸꦤꦶꦏꦲꦶꦁꦧꦧ꧀ꦏꦮꦿꦸꦃꦲꦶꦁꦏꦁꦒꦼꦒꦪꦸꦠꦤ꧀ꦏꦭꦶꦲꦤ꧀ꦲꦒꦩꦶꦆꦱ꧀ꦭꦩ꧀꧈ꦤꦔꦶꦁꦩꦼꦁꦒꦲꦶꦁꦥꦼꦥꦛꦺꦴꦏꦤ꧀ꦲꦶꦁꦏꦁꦥꦽꦭꦸꦥꦽꦭꦸꦠꦸꦩꦿꦥ꧀ꦒꦼꦱꦔꦶꦥꦸꦤ꧀ꦠꦼꦠꦶꦪꦁꦲꦶꦁꦏꦁꦱꦩꦶꦔꦿꦱꦸꦏ꧀ꦝꦠꦼꦁꦲꦒꦩꦶꦮꦻꦴ꧈ꦥꦸꦤꦶꦏꦲꦶꦁꦏꦁꦏꦻꦴꦢꦶꦏꦤ꧀ꦛꦶꦠꦸꦩꦼꦩꦼꦤ꧀ꦢꦺꦤꦶꦁꦥꦢꦸꦏꦠꦸꦮꦤ꧀ Snouck꧉ꦆꦁꦏꦁꦩꦏꦠꦼꦤ꧀ꦮꦻꦴꦤꦩꦢꦺꦢꦺꦥꦢꦩꦼꦭꦤ꧀ꦲꦶꦁꦏꦁꦒꦩ꧀ꦥꦶꦭ꧀꧈ꦲꦩꦂꦒꦶꦱꦒꦼꦢꦶꦥꦸꦤ꧀ꦏꦊꦏ꧀ꦱꦤꦤ꧀ꦱꦢꦪꦏꦼꦢꦃꦏꦤ꧀ꦛꦶꦠꦶꦤ꧀ꦢꦏ꧀ꦠꦸꦩꦼꦩꦼꦤ꧀꧈ꦲꦶꦁꦏꦁꦏꦥꦶꦱꦤ꧀ꦏꦼꦢꦃꦱꦒꦼꦢ꧀ꦝꦠꦼꦁꦧꦱꦄꦫꦧ꧀ꦲꦶꦁꦏꦁꦱꦪꦼꦏ꧀ꦠꦺꦴꦱ꧀꧈ꦥꦔꦽꦠꦺꦴꦱꦶꦥꦸꦤ꧀ [ 83 ]
ꦝꦠꦼꦁꦱꦼꦱꦼꦫꦠꦤ꧀ꦄꦫꦧ꧀ꦏꦺꦢꦃꦲꦶꦁꦏꦁꦩꦚ꧀ꦗꦶꦁ꧈ꦕꦼꦏꦏꦶꦥꦸꦤ꧀ꦏꦼꦢꦃꦱꦒꦼꦢ꧀ꦩꦲꦺꦴꦱ꧀ꦱꦲꦩꦔꦽꦠꦺꦴꦱ꧀ꦱꦲꦺꦱ꧀ꦠꦸꦝꦠꦼꦁꦱꦢꦪꦱꦼꦫꦠ꧀ꦱꦼꦫꦠ꧀ꦲꦶꦁꦏꦁꦢꦢꦺꦴꦱ꧀ꦮꦼꦮꦲꦺꦴꦱꦤꦶꦥꦸꦤ꧀ꦧꦁꦱꦄꦫꦧ꧀꧉ꦏꦗꦮꦶꦥꦸꦤꦶꦏꦥꦔꦽꦠꦺꦴꦱꦶꦥꦸꦤ꧀ꦝꦠꦼꦁꦲꦒꦩꦶꦆꦱ꧀ꦭꦩ꧀ꦲꦸꦒꦶꦏꦺꦢꦃꦱꦩ꧀ꦥꦸꦂꦤ꧈ꦲꦤꦔꦶꦁꦠꦸꦩꦿꦥ꧀ꦱꦠꦸꦁꦒꦶꦭꦶꦁꦧꦁꦱꦮꦭꦤ꧀ꦢꦶꦲꦶꦁꦏꦁꦲꦚꦶꦤꦻꦴꦲꦒꦩꦶꦆꦱ꧀ꦭꦩ꧀꧈ꦲꦶꦁꦏꦁꦥꦽꦭꦸꦥꦶꦪꦩ꧀ꦧꦏ꧀ꦏꦼꦢꦃꦲꦩꦶꦒꦠꦺꦴꦱꦏꦼꦤ꧀꧈ꦏꦢꦺꦴꦱ꧀ꦥꦸꦤ꧀ꦢꦶꦕꦫꦕꦫꦤꦶꦥꦸꦤ꧀ꦠꦼꦠꦶꦪꦁꦲꦶꦁꦏꦁꦱꦩꦶꦔꦿꦱꦸꦏ꧀ꦲꦒꦩꦶꦆꦱ꧀ꦭꦩ꧀ꦲꦶꦁꦆꦤ꧀ꦢꦶꦪꦤꦺꦢꦼꦂꦭꦤ꧀ꦔꦿꦶꦏꦶ꧈ꦠꦸꦮꦶꦤ꧀ꦏꦢꦺꦴꦱ꧀ꦥꦸꦤ꧀ꦢꦶꦲꦁꦒꦺꦤꦺꦤꦶꦤ꧀ꦢꦏꦏꦼꦤ꧀ꦲꦒꦩꦶꦤꦶꦥꦸꦤ꧀꧉ꦩꦸꦫꦶꦃꦱꦒꦼꦢꦶꦥꦸꦤ꧀ꦱꦸꦩꦼꦉꦥ꧀ꦲꦶꦁꦧꦧ꧀ꦩꦏꦠꦼꦤ꧀ꦥꦸꦤꦶꦏꦏꦼꦢꦃꦚꦺꦴꦥ꧀ꦭꦺꦴꦏ꧀ꦝꦠꦼꦁꦧꦱꦤꦶꦥꦸꦤ꧀ꦠꦼꦠꦶꦪꦁꦆꦤ꧀ꦢꦶꦪꦮꦻꦴ꧉
꧋ꦱꦪꦶꦢ꧀ꦄꦧ꧀ꦢꦸꦭ꧀ꦭꦃꦱꦮꦮꦶ꧈ꦱꦺꦴꦧꦠꦶꦥꦸꦤ꧀꧉ꦥꦢꦸꦏꦠꦸꦮꦤ꧀ Prof. Dr. Snouck Hurgronje.
꧋ꦱꦢꦪꦏꦮꦿꦸꦃꦲꦶꦁꦏꦁꦱꦩ꧀ꦥꦸꦤ꧀ꦏꦥꦿꦠꦺꦭꦏꦏꦼꦤ꧀ꦲꦶꦁꦔꦶꦁꦒꦶꦭ꧀ꦥꦸꦤꦶꦏ꧈ꦥꦢꦸꦏꦠꦸꦮꦤ꧀ꦱ꧀ꦤꦺꦴꦲꦸꦕ꧀ꦏ꧀ꦲꦶꦁꦱꦊꦧꦼꦠꦶꦥꦸꦤ꧀ꦮꦠꦮꦶꦱ꧀ꦩꦁꦱꦏꦺꦩꦮꦺꦴꦤ꧀ꦱꦩ꧀ꦥꦸꦤ꧀ꦱꦒꦼꦢ꧀ꦲꦚꦼꦏꦥꦶ꧉ꦠꦤ꧀ꦝꦪꦼꦏ꧀ꦠꦶꦤꦶꦥꦸꦤ꧀꧈ꦢꦺꦤꦺꦏꦭ [ 84 ]
ꦪꦸꦱ꧀ 25 ꦠꦻꦴꦤ꧀꧈ꦥꦢꦸꦏꦠꦸꦮꦤ꧀ Snouck ꦱꦩ꧀ꦥꦸꦤ꧀ꦲꦁꦱꦭ꧀ꦱꦱꦼꦧꦸꦠꦤ꧀ꦝꦺꦴꦏ꧀ꦠꦺꦴꦂ꧈ꦗꦭꦫꦤ꧀ꦱꦏꦶꦁꦲꦁꦒꦺꦤꦶꦥꦸꦤ꧀ꦔꦁꦒꦶꦠ꧀ꦱꦼꦫꦠ꧀ꦲꦶꦁꦏꦁꦩꦶꦤꦁꦏꦥꦤ꧀ꦢꦢꦂ꧈ꦲꦕꦶꦫꦶ:ꦥꦥꦶꦱ꧀ꦠꦤ꧀ꦲꦶꦁꦩꦼꦏꦃ꧉ꦆꦁꦲꦁꦒꦶꦠꦤꦶꦥꦸꦤ꧀ꦮꦻꦴ꧈ꦥꦚ꧀ꦗꦼꦤꦼꦔꦤꦶꦥꦸꦤ꧀ꦱꦒꦼꦢ꧀ꦲꦚ꧀ꦗꦁꦏꦏꦤ꧀ꦛꦶꦕꦼꦛ꧈ꦥꦸꦤꦥꦲꦶꦁꦠꦼꦩ꧀ꦧꦺꦥꦢꦩꦼꦭꦤ꧀ꦲꦶꦁꦏꦁꦕꦭꦺꦴꦤ꧀ꦧꦝꦺꦏꦠꦶꦤ꧀ꦢꦏꦏꦼꦤ꧀꧈ꦗꦼꦂꦲꦁꦒꦶꦠꦤꦶꦥꦸꦤ꧀ꦥꦸꦤꦶꦏꦮꦮꦱꦤ꧀ꦧꦧꦢ꧀ꦧꦧꦢꦶꦥꦸꦤ꧀ꦲꦗ꧀꧈ꦲꦶꦁꦒꦶꦃꦥꦸꦤꦶꦏꦱꦠꦸꦁꦒꦶꦭꦶꦁꦫꦸꦏꦸꦤ꧀ꦆꦱ꧀ꦭꦩ꧀꧇꧕꧇ꦥꦿꦏꦮꦶꦱ꧀꧉
꧋ꦱꦪꦼꦏ꧀ꦠꦺꦴꦱꦶꦥꦸꦤ꧀ꦱꦩ꧀ꦥꦸꦤ꧀ꦏꦱꦸꦩꦼꦉꦥꦤ꧀ꦢꦔꦸ꧈ꦧꦶꦭꦶꦃꦲꦶꦁꦏꦁꦏꦮꦱ꧀ꦠꦤꦤ꧀ꦲꦗ꧀ꦮꦻꦴ꧈ꦢꦺꦢꦺꦱꦠꦸꦁꦒꦶꦭꦶꦁꦥꦿꦤꦠꦤ꧀ꦆꦱ꧀ꦭꦩ꧀ꦭꦸꦒꦸ꧈ꦲꦤꦔꦶꦁꦱꦩ꧀ꦥꦸꦤ꧀ꦮꦺꦴꦤ꧀ꦠꦼꦤ꧀ꦱꦢꦺꦫꦺꦔꦶꦥꦸꦤ꧀ꦲꦒꦩꦶꦆꦱ꧀ꦭꦩ꧀ꦥꦗꦥꦗꦮꦺꦴꦤ꧀ꦠꦼꦤ꧀꧉ꦆꦁꦲꦁꦒꦶꦠꦤ꧀ꦮꦻꦴ꧈ꦠꦸꦮꦤ꧀ Snouck ꦲꦔꦤ꧀ꦝꦫꦏꦼꦤ꧀ꦲꦶꦁꦏꦁꦫꦸꦩꦶꦪꦶꦤ꧀ꦥꦶꦪꦩ꧀ꦧꦏ꧀ꦧꦧ꧀ꦮꦺꦴꦤ꧀ꦠꦼꦤꦶꦥꦸꦤ꧀ꦲꦗ꧀ꦥꦸꦤꦶꦏ꧈ꦏꦤ꧀ꦛꦶꦲꦩꦼꦛꦶꦏ꧀ꦱꦏꦶꦁꦱꦼꦫꦠ꧀ꦱꦼꦫꦠ꧀ꦄꦫꦧ꧀꧈ꦭꦁꦏꦸꦁꦩꦭꦶꦃꦱꦏꦶꦁꦏꦺꦴꦫꦤ꧀ꦱꦲꦏꦶꦠꦧ꧀ꦲꦢꦶꦱ꧀꧉
꧋ꦥꦸꦤꦥꦠꦱꦊꦉꦱꦶꦥꦸꦤ꧀ꦩꦼꦁꦒꦃꦲꦶꦁꦏꦁꦢꦶꦥꦸꦤ꧀ꦮꦱ꧀ꦠꦤꦶꦲꦗ꧀ꦥꦸꦤꦶꦏ꧉ꦱ꧀ꦮꦂꦒꦶ Prof. Dozij ꦏꦭꦫꦸꦩꦶꦪꦶꦤ꧀ꦚꦺꦴꦧꦶꦲꦤꦼꦫꦔꦏꦼꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦱꦠꦸꦁꦒꦶꦭꦶꦁꦱꦼꦫꦠꦤ꧀꧈ꦧꦶꦭꦶꦃꦥꦿꦤꦠꦤ꧀ꦮꦻꦴꦏꦊꦧꦼꦠ꧀ꦱꦠꦸꦁꦒꦶꦭꦶꦁꦥꦿꦤꦠꦤ꧀ꦲꦶꦁꦲꦒꦩꦶꦆꦱꦿꦻꦭ꧀꧉ꦥꦶꦤ꧀ꦠꦼꦤ꧀ꦥꦶꦤ꧀ꦠꦼꦤ꧀ꦥꦸꦗꦁꦒꦧꦁꦱꦄꦫꦧ꧀ꦱꦩꦶꦩꦔꦶꦤ꧀ꦠꦼꦤ꧀꧈ꦧꦶꦭꦶꦃꦱꦢꦪꦥꦁꦒꦺꦤꦤ꧀ꦥꦁꦒꦺꦤꦤ꧀ꦱꦸꦕꦶꦲꦶꦁꦩꦼꦏꦃꦥꦸꦤꦶꦏꦱꦩꦶꦒꦼꦒꦪꦸꦠꦤ꧀ꦏꦭꦶꦲꦤ꧀ꦏꦔꦁꦤꦧꦶꦆꦧꦿꦲꦶꦩ꧀ (a.s.) ꦱꦲꦱꦢꦺꦫꦺꦔꦶꦥꦸꦤ꧀ꦏꦔꦁꦤꦧꦶꦫꦱꦸꦭ꧀ꦩꦶꦪꦺꦴꦱ꧀꧈ꦱꦩ꧀ꦥꦸꦤ꧀ꦏꦛꦃꦠꦼꦠꦶꦪꦁ꧈ꦲꦶꦁꦏꦁꦧꦺꦴꦠꦼꦤ꧀ꦉꦤꦱꦔꦼꦠ꧀ꦝꦠꦼꦁꦠꦶꦤ꧀ꦢꦏꦶꦥꦸꦤ꧀ꦧꦁꦱꦄꦫꦧ꧀꧈ꦲꦶꦁꦏꦁꦏꦭꦱꦩꦤ꧀ꦠꦼꦤ꧀ꦏꦺꦔꦶꦁꦏꦮꦱ꧀ꦠꦤꦤ꧀ꦚꦼꦩ꧀ꦧꦃꦧꦿꦲꦭ꧈ꦱꦂꦠꦭꦗꦼꦁꦔꦮꦺꦴꦤ꧀ꦠꦼꦤꦏꦼꦤ꧀ꦲꦒꦩꦶꦲꦺꦁꦒꦭ꧀꧈ꦩꦶꦭ꧀ꦭꦃꦆꦧꦿꦲꦶꦩ꧀꧈ꦲꦶꦁꦒꦶꦃꦥꦸꦤꦶꦏꦲꦒꦩꦶꦤꦶꦥꦸꦤ꧀ꦏꦔꦁꦤꦧꦶꦆꦧꦿꦲꦶꦩ꧀꧉
꧋ꦲꦤꦔꦶꦁꦲꦶꦁꦲꦁꦒꦶꦠꦤꦶꦥꦸꦤ꧀ꦥꦢꦸꦏꦠꦸꦮꦤ꧀ Snouck ꦏꦱꦼꦧꦸꦠ꧀ꦔꦶꦁꦒꦶꦭ꧀꧈ꦲꦚꦫꦶꦪꦺꦴꦱꦏꦼꦤ꧀꧈ꦧꦶꦭꦶꦃꦠꦸꦮꦸꦲꦶꦥꦸꦤ꧀ꦮꦮꦱꦤ꧀ꦲꦶꦁꦏꦁꦩꦏꦠꦼꦤ꧀ꦮꦻꦴ꧈ꦏꦭꦠꦏ꧀ꦱꦶꦃꦱꦸꦒꦼꦔꦶꦥꦸꦤ꧀ꦏꦔꦁꦤꦧꦶꦩꦸꦲꦩ꧀ꦩꦢ꧀ a.s.꧉ꦢꦺꦤꦺꦲꦒꦩꦶꦲꦶꦁꦏꦁꦏꦮꦼꦝꦫꦏꦼꦤ꧀ꦢꦺꦤꦶꦁꦏꦔꦁꦤꦧꦶꦩꦸꦲꦩ꧀ꦩꦢ꧀꧈ꦥꦸꦤꦶꦏꦱꦗꦠꦺꦴꦱꦶꦥꦸꦤ꧀ꦧꦺꦴꦠꦼꦤ꧀ꦧꦺꦢꦏꦢꦺꦴꦱ꧀ꦲꦒꦩꦶꦲꦶꦁꦏꦁꦱꦩ꧀ꦥꦸꦤ꧀ꦏꦮꦼꦝꦫꦏꦼꦤ꧀ꦲꦶꦁꦥꦫꦤꦧꦶꦲꦶꦁꦱꦢꦺꦫꦺꦔꦶꦥꦸꦤ꧀ꦏꦔꦁꦤꦧꦶꦩꦸꦲꦩ꧀ꦩꦢ꧀ꦮꦻꦴ꧉ꦢꦢꦺꦴꦱ꧀ꦲꦒꦩꦶꦤꦶꦥꦸꦤ꧀ꦏꦔꦁꦤꦧꦶꦆꦧꦿꦲꦶꦩ꧀ꦮꦻꦴ꧈ꦲꦶꦁꦏꦁꦢꦢꦺꦴꦱ꧀ꦧꦧꦺꦴꦤꦶꦥꦸꦤ꧀ꦱꦢꦪꦲꦒꦩꦶ꧈ꦢꦢꦺꦴꦱ꧀ꦲꦸꦒꦶꦧꦧꦺꦴꦤꦶꦥꦸꦤ꧀ꦲꦒꦩꦶꦆꦱ꧀ꦭꦩ꧀꧉
꧋ꦢꦺꦤꦺꦲꦁꦒꦺꦤꦺꦲꦁꦒꦶꦠꦤꦶꦥꦸꦤ꧀ꦠꦸꦮꦤ꧀ꦥꦿ꧉ꦢꦿ꧉ Snouck ꦩꦶꦱꦸꦮꦸꦂꦮꦻꦴ꧈ꦗꦭꦫꦤ꧀ꦲꦁꦒꦺꦤꦶꦥꦸꦤ꧀ꦲꦤꦼꦫꦔꦏꦼꦤ꧀ꦧꦧ꧀ꦔꦶꦁꦒꦶꦭ꧀ꦮꦻꦴꦱꦏ꧀ꦭꦁꦏꦸꦁꦕꦼꦛ꧉ꦄꦤꦔꦶꦁꦲꦁꦒꦺꦤꦺꦠꦸꦮꦤ꧀ Snouck ꦏꦒꦸꦔꦤ꧀ꦮꦮꦱꦤ꧀ꦲꦶꦁꦏꦁꦩꦏꦠꦼꦤ꧀ꦮꦻꦴ꧈ꦤꦩꦸꦁꦩꦼꦛꦶꦏ꧀ꦱꦏꦶꦁꦧꦸꦏꦸꦧꦸꦏꦸꦏꦺꦩꦮꦺꦴꦤ꧀꧉ꦩꦸꦫꦶꦃꦱꦩ꧀ꦥꦸꦂꦤꦤꦶꦥꦸꦤ꧀ꦝꦠꦼꦁꦲꦒꦩꦶꦆꦱ꧀ꦭꦩ꧀꧈ꦠꦸꦮꦤ꧀ Snouck ꦭꦗꦼꦁꦢꦼꦢꦊꦩ꧀ꦮꦺꦴꦤ꧀ꦠꦼꦤ꧀ꦲꦶꦁꦥꦁꦒꦺꦤꦤ꧀ꦲꦶꦁꦏꦁꦠꦼꦠꦶꦪꦔꦶꦥꦸꦤ꧀ꦩꦗꦼꦁꦝꦠꦼꦁꦲꦒꦩꦶꦆꦱ꧀ꦭꦩ꧀꧉ꦆꦁꦏꦁꦥꦸꦤꦶꦏꦠꦸꦮꦤ꧀ Snouck ꦭꦗꦼꦁꦏꦒꦸꦔꦤ꧀ꦏꦤꦶꦪꦠꦤ꧀ꦱꦸꦩꦼꦢꦾꦢꦼꦢꦊꦩ꧀ꦮꦺꦴꦤ꧀ꦠꦼꦤ꧀ꦲꦶꦁꦩꦼꦏꦃ꧈ꦲꦶꦁꦏꦁꦲꦶꦁꦔꦿꦶꦏꦸꦮꦻꦴꦱꦶꦤꦼꦧꦸꦠ꧀ꦠꦼꦊꦔꦶꦁꦥꦿꦗꦲꦒꦩꦶꦆꦱ꧀ꦭꦩ꧀꧉ꦏꦢꦺꦴꦱ꧀ꦥꦸꦤ꧀ꦢꦶꦫꦏꦲꦺꦴꦱꦶꦥꦸꦤ꧀ꦠꦸꦩꦿꦥ꧀ꦧꦁꦱꦌꦫꦺꦴꦥꦃꦢꦼꦢꦸꦤꦸꦁꦮꦺꦴꦤ꧀ꦠꦼꦤ꧀ꦲꦶꦁꦩꦼꦏꦃ꧈ꦲꦶꦁꦔꦿꦶꦧꦸꦔꦿꦶꦏꦸ꧉ꦧꦺꦴꦠꦼꦤ꧀ꦥꦼꦂꦭꦸꦢꦶꦥꦸꦤ꧀ꦲꦤ꧀ꦝꦫꦏꦼꦤ꧀꧈ꦕꦼꦏꦥ꧀ꦏꦕꦫꦶꦪꦺꦴꦱꦏꦼꦤ꧀꧈ꦧꦶꦭꦶꦃꦮꦺꦴꦲꦶꦥꦸꦤ꧀ꦥꦶꦤꦁꦒꦶꦃꦱꦲꦺꦱꦔꦼꦠ꧀꧈ꦏꦺꦴꦤ꧀ꦢꦸꦂꦲꦶꦁꦤꦒꦫꦶꦮꦭꦤ꧀ꦢꦶ꧈ꦲꦶꦁꦠꦻꦴꦤ꧀꧇꧑꧘꧘꧘꧇ꦭꦤ꧀꧇꧑꧘꧘꧙꧇ꦭꦗꦼꦁꦲꦔꦁꦒꦶꦠ꧀ꦧꦸꦏꦸꦧꦧ꧀ꦏꦮꦺꦴꦤ꧀ꦠꦼꦤꦤꦶꦥꦸꦤ꧀ꦤꦒꦫꦶꦩꦼꦏꦃꦩꦮꦶꦧꦱꦗꦼꦂꦩꦤ꧀꧈ꦲꦶꦁꦏꦁꦲꦶꦱꦶꦤꦶꦥꦸꦤ꧀ꦩꦶꦒꦸꦤꦤꦶꦱꦔꦼꦠ꧀ꦠꦸꦩꦿꦥ꧀ꦠꦼꦠꦶꦪꦁꦲꦶꦁꦏꦁꦱꦸꦩꦼꦢꦾꦲꦁꦒꦼꦒꦸꦭꦁꦝꦠꦼꦁꦲꦒꦩꦶꦆꦱ꧀ꦭꦩ꧀꧉
(ꦧꦝꦺꦏꦱꦩ꧀ꦧꦼꦠꦤ꧀) [ 85 ]
꧋ꦲꦩꦏꦺꦴꦥꦶ꧉
꧋ꦩꦼꦁꦒꦃꦲꦶꦁꦏꦁꦢꦢꦺꦴꦱ꧀ꦲꦩꦤꦶꦥꦸꦤ꧀ꦏꦺꦴꦥꦶꦥꦸꦤꦶꦏꦲꦶꦁꦒꦶꦃꦏꦛꦃꦱꦔꦼꦠ꧀ ꦫꦶꦫꦶꦁꦏꦼꦱ꧀ꦱꦤ꧀ꦤꦺꦶꦥꦸꦤ꧀ꦏꦢꦺꦴꦱ꧀ꦲꦶꦁꦔꦤ꧀ꦝꦥ꧀ꦥꦸꦤꦶꦏ:
ꦲ:ꦠꦸꦩꦏꦺꦴꦥꦶ꧈ ꦮꦂꦤꦶꦤꦶꦥꦸꦤ꧀ꦲꦶꦗꦼꦩ꧀ ꦥꦼꦛꦏ꧀ ꦲꦧꦿꦶꦠ꧀ꦠꦸꦮꦶꦤ꧀ꦕꦼꦩꦼꦁ꧈ ꦱꦒꦼꦢ꧀ꦲꦔꦿꦶꦱꦏ꧀ꦔꦿꦶꦱꦏ꧀ꦏꦏꦼꦤ꧀ ꦲꦩꦂꦒꦶꦠꦸꦩꦤꦶꦁꦏꦺꦴꦥꦶꦮꦻꦴꦤꦼꦱꦼꦥ꧀ꦠꦺꦴꦪꦤꦶꦁꦏꦺꦴꦥꦶ꧉ꦠꦸꦩꦠꦸꦩꦮꦻꦴꦱꦒꦼꦢ꧀ꦔꦼꦢꦭꦏꦼꦤ꧀ꦱꦮꦂꦤꦶꦠꦺꦴꦪꦕꦸꦮꦺꦂ꧈ꦫꦲꦺꦴꦱꦶꦥꦸꦤ꧀ꦊꦒꦶ꧈ꦏꦮꦱ꧀ꦠꦤꦤ꧀ꦧꦸꦤ꧀ꦩꦢꦸ꧈ꦲꦶꦁꦏꦁꦭꦗꦼꦁꦱꦒꦼꦢ꧀ꦤꦸꦮꦸꦲꦏꦼꦤ꧀ꦗꦩꦸꦂꦕꦼꦩꦼꦁ꧈ꦲꦶꦁꦒꦶꦃꦥꦸꦤꦶꦏꦲꦶꦁꦏꦁꦔꦿꦶꦱꦏꦏꦼꦤ꧀ꦒꦺꦴꦝꦺꦴꦔꦶꦥꦸꦤ꧀꧉ꦏꦛꦃꦏꦺꦮꦤ꧀ꦱꦤꦺꦱ꧀ꦲꦶꦁꦏꦁꦢꦢꦺꦴꦱ꧀ꦩꦼꦁꦱꦲꦶꦥꦸꦤ꧀ꦠꦸꦩꦮꦻꦴ꧈ꦏꦢꦺꦴꦱ꧀ꦠ:ꦧꦁꦱꦤꦶꦁꦊꦩ꧀ꦧꦶꦁ꧈ꦠꦮꦺꦴꦤ꧀ꦝꦺꦤ꧀ꦝꦺꦁꦭꦤ꧀ꦱꦤꦺꦱ꧀ꦱꦤꦺꦱꦶꦥꦸꦤ꧀꧉ꦱꦫꦤꦤꦶꦥꦸꦤ꧀ꦲꦚꦶꦂꦤꦏꦏꦼꦤ꧀ꦲꦩꦥꦸꦤꦶꦏ꧈ꦒꦺꦴꦝꦺꦴꦁꦠꦸꦮꦶꦤ꧀ꦮꦶꦠꦶꦁꦏꦺꦴꦥꦶꦏꦼꦢꦃꦢꦶꦥꦸꦤ꧀ꦱꦶꦫꦩꦶꦩꦮꦶ:ꦠꦺꦴꦪꦒꦩ꧀ꦥꦶꦁ꧈ꦠꦺꦴꦪꦱꦠ꧈ꦠꦺꦴꦪꦱꦧꦸꦤ꧀꧈ꦲꦸꦠꦮꦶꦠꦺꦴꦪꦏꦮꦺꦴꦮꦺꦴꦫꦤ꧀ꦭꦶꦱꦃꦥꦠꦿ꧉
ꦤ:ꦈꦊꦂꦲꦶꦁꦏꦁꦩꦁꦱꦒꦺꦴꦝꦺꦴꦔꦶꦥꦸꦤ꧀꧈ꦏꦢꦺꦴꦱ꧀ꦠ:ꦲꦸꦊꦂꦕꦺꦭꦺꦁꦠꦸꦮꦶꦤ꧀ꦲꦸꦊꦂꦱꦼꦫꦶꦠ꧀꧉
ꦕ:ꦧꦁꦱꦤꦶꦁꦠꦶꦁꦒꦶ꧈ꦥꦸꦤꦶꦏꦚꦼꦫꦺꦴꦠ꧀ꦠꦺꦴꦪꦤꦶꦁꦒꦺꦴꦝꦺꦴꦁ꧈ꦲꦼꦥꦁꦲꦸꦠꦮꦶꦮꦺꦴꦲꦶꦥꦸꦤ꧀꧉ꦠꦽꦏꦝꦁꦱꦒꦼꦢ꧀ꦔꦿꦶꦱꦏꦏꦼꦤ꧀ꦲꦸꦮꦶꦠ꧀ꦭꦤ꧀ꦲꦼꦥꦔꦶꦥꦸꦤ꧀꧈ꦱꦂꦠꦱꦒꦼꦢ꧀ꦲꦁꦒꦫꦶꦔꦏꦼꦤ꧀ꦮꦺꦴꦲꦶꦥꦸꦤ꧀ꦲꦶꦁꦏꦁꦱꦩ꧀ꦥꦸꦤ꧀ꦩꦺꦃꦱꦼꦥꦸꦃ꧌ꦩꦠꦼꦁ꧍꧉
ꦫ:ꦄꦩꦲꦶꦁꦏꦁꦔꦼꦭꦺꦁꦲꦶꦁꦲꦸꦮꦶꦠ꧀ꦲꦸꦠꦮꦶꦲꦶꦁꦲꦼꦥꦁ꧈ꦏꦢꦺꦴꦱ꧀ꦠ:ꦤꦺꦴꦤꦺꦴꦭ꧀꧌ꦮꦸꦗꦸꦢ꧀ꦲꦸꦊꦂ꧍ꦭꦤ꧀ꦲꦸꦫꦺꦠꦶꦥꦸꦤ꧀ꦲꦺꦴꦭꦺꦁꦲꦺꦴꦭꦺꦁ꧌ꦧꦁꦱꦤꦶꦁꦏꦸꦮꦔ꧀ꦮꦸꦁ꧍꧉
ꦏ:ꦈꦫꦺꦠ꧀꧌ꦲꦼꦩ꧀ꦧꦸꦒ꧀ꦲꦼꦩ꧀ꦧꦸꦒ꧀꧍ꦲꦶꦁꦒꦶꦃꦥꦸꦤꦶꦏꦲꦸꦫꦺꦠꦶꦥꦸꦤ꧀ꦧꦁꦱꦤꦶꦁꦲꦩ꧀ꦥꦭ꧀꧈ꦲꦶꦁꦏꦁꦱꦸꦔꦸꦠꦶꦥꦸꦤ꧀ꦏꦢꦺꦴꦱ꧀ꦒꦺꦴꦝꦺꦴꦔꦶꦁꦏꦺꦴꦥꦶ꧈ꦥꦸꦤꦶꦏꦩꦁꦒꦺꦤ꧀ꦲꦶꦁꦱꦶꦠꦶ꧈ꦱꦲꦤꦼꦝꦤꦶꦲꦺꦴꦪꦺꦴꦢꦶꦥꦸꦤ꧀꧉
ꦢ:ꦕꦕꦶꦁꦲꦭꦶꦠ꧀ꦲꦭꦶꦠ꧀ꦱꦔꦼꦠ꧀꧈ꦲꦱꦿꦶꦁꦲꦔꦿꦶꦱꦏꦏꦼꦤ꧀ꦲꦺꦴꦪꦺꦴꦢ꧀꧉ꦧꦶꦭꦶꦃꦲꦺꦴꦪꦺꦴꦢꦶꦁꦮꦶꦠ꧀ꦏꦺꦴꦥꦶꦮꦻꦴꦢꦶꦥꦸꦤ꧀ꦫꦶꦱꦏ꧀ꦲꦶꦁꦕꦕꦶꦁꦏꦱꦼꦧꦸꦠ꧀ꦔꦶꦁꦒꦶꦭ꧀꧈ꦥꦸꦤꦶꦏꦭꦗꦼꦁꦏꦠꦶꦔꦭ꧀ꦥꦠꦶꦁꦥ꧀ꦭꦼꦤ꧀ꦛꦶꦁ꧉
ꦠ:ꦏꦺꦴꦥꦶꦲꦶꦁꦏꦁꦢꦶꦥꦸꦤ꧀ꦱꦶꦩ꧀ꦥꦼꦤ꧀ꦲꦶꦁꦒꦸꦝꦁ꧈ꦲꦱꦿꦶꦁꦢꦶꦥꦸꦤ꧀ꦩꦁꦱꦢꦺꦤꦶꦁꦧꦁꦱꦤꦶꦁꦲꦩ꧀ꦥꦭ꧀ꦲꦭꦶꦠ꧀ꦲꦭꦶꦠ꧀꧌ꦧꦸꦧꦸꦏ꧀꧍ꦲꦶꦁꦒꦶꦃꦥꦸꦤꦶꦏꦲꦶꦁꦏꦁꦢꦶꦥꦸꦤ꧀ꦮꦱ꧀ꦠꦤꦶꦢꦺꦤꦶꦁꦥꦫꦮꦭꦤ꧀ꦢꦶ:ꦏꦺꦴꦥ꦳꧀ꦥ꦳ꦶꦪꦺꦱ꧀ꦤꦸꦮꦶꦠ꧀ꦏꦺꦮ꦳ꦺꦂ꧉ꦱꦫꦤꦤꦶꦥꦸꦤ꧀ꦲꦁꦒꦺꦤꦺꦲꦚꦶꦂꦤꦏꦏꦺꦤ꧀ꦧꦸꦧꦸꦏ꧀ꦮꦻꦴ꧈ꦠꦤ꧀ꦝꦺꦴꦤ꧀ꦏꦺꦴꦥꦶꦲꦶꦁꦏꦁꦏꦱꦶꦩ꧀ꦥꦼꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦒꦸꦝꦁ꧈ꦏꦼꦢꦃꦢꦶꦥꦸꦤ꧀ꦏꦸꦏꦸꦱꦶꦩꦮꦶꦏꦸꦏꦸꦱꦶꦁꦭꦶꦱꦃꦧꦺꦤ꧀ꦱꦶꦤ꧀꧌ꦧꦺꦤ꧀ꦗ꦳ꦶꦤꦺ꧍ꦲꦸꦠꦮꦶꦩꦮꦶꦮꦭꦶꦫꦁ꧌ꦗ꦳꧀ꦮꦺꦮ꦳ꦺꦭ꧀ꦏꦺꦴꦲꦺꦴꦭ꧀ꦱ꧀ꦠꦺꦴꦥ꦳꧀꧍꧉
ꦗꦮꦶ꧉
꧋ꦏꦥꦉꦔꦠꦸꦩꦸꦤ꧀ꦠꦼꦤ꧀ꦩꦸꦤ꧀ꦝꦸꦠ꧀꧈ꦤꦩꦸꦁꦏꦤ꧀ꦠꦸꦤ꧀ꦱꦏꦼꦝꦶꦏ꧀
꧋ꦒꦩ꧀ꦧꦂꦢꦊꦩ꧀ꦆꦁꦏꦁꦮꦶꦕꦏ꧀ꦱꦤꦒꦸꦥꦼꦂꦤꦸꦂꦗꦺꦤ꧀ꦢꦿꦭ꧀ Jhr. Mr. A.C.D. de Graeff
꧋ꦢꦭꦚ꧀ꦕꦔꦶꦥꦸꦤ꧀ꦏꦤ꧀ꦢꦼꦭ꧀꧈ꦒꦫꦥꦤꦶꦥꦸꦤ꧀ꦲꦢꦶ꧉ꦉꦒꦶꦤꦶꦥꦸꦤ꧀ꦱꦊꦩ꧀ꦧꦂꦤꦩꦸꦁ f 0.10, ꦤꦔꦶꦁꦱꦏꦼꦝꦶꦏ꧀ꦱꦏꦼꦝꦶꦏꦶꦥꦸꦤ꧀ꦏꦼꦢꦃꦩꦸꦤ꧀ꦝꦸꦠ꧀ 25 ꦊꦩ꧀ꦧꦂ꧉ [ 86 ]
꧋ꦯꦟꦠꦲꦶꦁꦡꦶꦪꦺꦴꦁꦏꦺꦴꦏ꧀ ꦱꦱꦩ꧀ꦥꦸꦤ꧀ꦤꦶꦥꦸꦤ꧀ꦏꦭꦶꦁꦒꦂꦫꦏꦼꦤ꧀ꦱꦏꦶꦁꦏꦝꦠꦺꦴꦤ꧀ꦲꦶꦁꦥꦦꦏꦶꦁ꧈ ꦭꦗꦼꦁꦢꦢꦊꦩ꧀ꦮꦺꦴꦤ꧀ꦠꦼꦤ꧀ꦲꦶꦁꦡꦶꦤ꧀ꦱꦶꦤ꧀ ꦱꦶꦠꦶꦮꦼꦮꦼꦁꦏꦺꦴꦤ꧀ꦗꦼꦥꦁ꧉ꦱꦿꦶꦤꦫꦺꦤ꧀ꦢꦿꦮꦻꦴꦱꦏꦸꦭꦮꦂꦒꦠꦼꦤ꧀ꦠꦽꦩ꧀ꦮꦺꦴꦤ꧀ꦠꦼꦤ꧀ꦲꦶꦁꦔꦿꦶꦏꦸ꧉ꦒꦩ꧀ꦧꦂꦲꦶꦁꦔꦶꦁꦒꦶꦭ꧀ꦥꦸꦤꦶꦏ꧈ꦲꦶꦁꦏꦁꦠꦼꦔꦃꦒꦩ꧀ꦧꦫꦶꦥꦸꦤ꧀ꦥꦿꦩꦺꦱ꧀ꦮꦫꦶꦤꦠ꧉
꧋ꦏꦕꦫꦶꦪꦺꦴꦱ꧀ꦲꦶꦁꦢꦶꦤ꧀ꦠꦼꦤ꧀ꦱꦼꦤꦺꦤ꧀ꦲꦶꦁꦏꦁꦱꦩ꧀ꦥꦸꦤ꧀ꦏꦠꦩ꧀ꦠꦺꦴꦏ꧀ꦏꦏꦼꦤ꧀ꦲꦶꦁꦄꦧꦸꦤꦮꦱ꧀꧈ꦲꦺꦚ꧀ꦗꦶꦁꦲꦺꦚ꧀ꦗꦶꦁꦗꦩ꧀꧇꧗꧇ꦱꦁꦥꦿꦧꦸꦲꦫꦸꦤ꧀ꦄꦭ꧀ꦫꦱꦶꦢ꧀ꦱꦩ꧀ꦥꦸꦤ꧀ꦗꦼꦁꦏꦂꦱꦏꦶꦁꦏꦫꦠꦺꦴꦤ꧀ꦧꦝꦺꦠꦼꦝꦏ꧀ꦝꦠꦼꦁꦒꦿꦶꦪꦤꦶꦥꦸꦤ꧀ꦄꦧꦸꦤꦮꦱ꧀꧉ꦏꦭꦱꦩꦤ꧀ꦠꦼꦤ꧀ꦥꦫꦥꦁꦔꦒꦼꦁꦤꦒꦫꦶ꧈ꦥꦁꦔꦒꦼꦁꦔꦶꦁꦥꦔꦢꦶꦭ꧀ꦭꦤ꧀ꦱꦲꦥꦫꦱꦸꦢꦒꦂꦱꦩ꧀ꦥꦸꦤ꧀ꦱꦩꦶꦊꦁꦒꦃꦱꦠꦠꦮꦺꦴꦤ꧀ꦠꦼꦤ꧀ꦲꦶꦁꦒꦿꦶꦪꦤꦶꦥꦸꦤ꧀ꦄꦧꦸꦤꦮꦱ꧀꧉ꦱꦉꦁꦱꦁꦥꦿꦧꦸꦫꦮꦸꦃ꧈ꦱꦢꦪꦲꦶꦁꦏꦁꦮꦺꦴꦤ꧀ꦠꦼꦤ꧀ꦲꦶꦁꦔꦿꦶꦏꦸꦱꦩꦶꦒꦶꦠꦲꦩꦼꦛꦸꦏ꧀ꦏꦏꦼꦤ꧀ ꦩꦏꦠꦼꦤ꧀ꦲꦸꦒꦶꦥꦸꦤ꧀ꦄꦨꦸꦤꦮꦱ꧀꧈ ꦱꦱꦩ꧀ꦥꦸꦤ꧀ꦤꦶꦥꦸꦤ꧀ꦱꦁꦦꦿꦧꦸꦏꦲꦠꦸꦂꦫꦤ꧀ꦭꦼꦁꦒꦃ꧈ ꦄꦨꦸꦤꦮꦱ꧀ꦭꦗꦼꦁꦚꦸꦮꦸꦤ꧀ꦥꦩꦶꦠ꧀ꦩꦼꦢꦭ꧀ꦱꦏꦼꦝꦥ꧀ ꦲꦩ꧀ꦧꦼꦏ꧀ꦠꦏꦿꦶꦪꦸꦏ꧀ꦲꦒꦼꦁ꧈ꦲꦶꦁꦏꦁꦤꦸꦤ꧀ꦠꦼꦤ꧀ꦏꦒꦤ꧀ꦠꦸꦁꦔꦏꦼꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦥꦔꦶꦁꦮꦶꦠ꧀ꦲꦒꦼꦁ꧈ꦮꦺꦴꦤ꧀ꦠꦼꦤ꧀ꦲꦶꦁꦱꦔꦤ꧀ꦝꦥ꧀ꦥꦶꦁꦮꦶꦠ꧀ꦮꦲꦸꦄꦧꦸꦤꦮꦱ꧀ꦭꦗꦼꦁꦲꦢꦩꦼꦭ꧀ꦒꦿꦩ꧉
꧋ꦏꦺꦴꦕꦥ꧀ꦥꦱꦩ꧀ꦥꦸꦤ꧀ꦱꦮꦠꦮꦶꦱ꧀ꦭꦩꦶꦱꦁꦥꦿꦧꦸꦊꦁꦒꦃꦮꦺꦴꦤ꧀ꦠꦼꦤ꧀ꦲꦶꦁꦒꦿꦶꦪꦤꦶꦥꦸꦤ꧀ꦄꦧꦸꦤꦮꦱ꧀꧈ꦲꦺꦮꦢꦺꦤꦺꦢꦺꦫꦺꦁꦮꦺꦴꦤ꧀ꦠꦼꦤ꧀ꦱꦼꦒꦃꦲꦤ꧀ꦥꦸꦤꦥꦥꦸꦤꦥꦲꦶꦁꦏꦁꦏꦮꦼꦢꦭ꧀ꦭꦏꦼꦤ꧀꧈ꦲꦶꦁꦏꦁꦥꦸꦤꦶꦏꦱꦁꦥꦿꦧꦸꦭꦗꦼꦁꦲꦤꦶꦩ꧀ꦧꦭꦶꦥꦸꦤ꧀ꦄꦧꦸꦤꦮꦱ꧀ꦱꦂꦠꦏꦝꦮꦸꦃꦲꦤ꧀ꦩꦏꦠꦼꦤ꧀:ꦲꦺ꧈ꦄꦧꦸꦤꦮꦱ꧀꧈ꦏꦥꦿꦶꦪꦺꦲꦁꦒꦺꦴꦤ꧀ꦩꦸꦲꦺꦴꦭꦃꦲꦺꦴꦭꦃ꧈ꦲꦥꦢꦸꦫꦸꦁꦩꦠꦼꦁ꧉ꦄꦠꦸꦂꦫꦶꦥꦸꦤ꧀ꦥꦸꦤ꧀ꦄꦧꦸꦤꦮꦱ꧀:ꦝꦸꦃ꧈ꦒꦸꦱ꧀ꦠꦶ꧈ꦩꦸꦒꦶꦏꦂꦱꦲꦲꦔꦼꦤ꧀ꦠꦺꦴꦱ꧀ꦱꦶꦱꦏꦼꦝꦥ꧀꧉
꧋ꦩꦶꦉꦁꦲꦠꦸꦂꦫꦶꦥꦸꦤ꧀ꦄꦧꦸꦤꦮꦱ꧀ꦩꦏꦠꦼꦤ꧀ꦮꦲꦸ꧈ꦱꦁꦥꦿꦧꦸꦭꦗꦼꦁꦏꦺꦤ꧀ꦢꦼꦭ꧀ꦱꦲꦲꦔꦼꦤ꧀ꦠꦺꦴꦱ꧀ꦱꦶꦏꦤ꧀ꦛꦶꦥꦁꦒꦭꦶꦃꦱꦧꦂ꧈ꦲꦤꦁꦔꦶꦁꦔꦤ꧀ꦠꦺꦴꦱ꧀ꦮꦚ꧀ꦕꦶꦧꦼꦝꦸꦒ꧀ꦱꦼꦒꦃꦲꦤ꧀ꦤꦶꦥꦸꦤ꧀ꦠꦤ꧀ꦱꦃꦧꦺꦴꦠꦼꦤ꧀ꦏꦮꦼꦢꦭ꧀ꦮꦼꦢꦭ꧀ꦭꦏꦼꦤ꧀꧈ꦲꦶꦁꦩꦁꦏꦏꦭꦱꦩꦤ꧀ꦠꦼꦤ꧀ꦱꦁꦥꦿꦧꦸꦱꦩ꧀ꦥꦸꦤ꧀ꦏꦫꦲꦺꦴꦱ꧀ꦭꦸꦮꦺ꧈ꦲꦩꦶꦭꦄꦧꦸꦤꦮꦱ꧀ꦭꦗꦼꦁꦲꦺꦁꦒꦭ꧀ꦏꦝꦮꦸꦃꦲꦤ꧀ꦤꦶꦩ꧀ꦧꦭ꧀ꦭꦶꦱꦲꦲꦤ꧀ꦢꦁꦔꦸꦧꦧ꧀ꦮꦼꦢꦭ꧀ꦭꦶꦁꦱꦼꦒꦃꦲꦤ꧀ꦲꦶꦁꦏꦁꦧꦝꦺꦏꦲꦸꦚ꧀ꦗꦸꦏ꧀ꦏꦏꦼꦤ꧀ꦝꦠꦼꦁꦱꦁꦥꦿꦧꦸ꧉ꦢꦺꦤꦺꦥꦸꦤ꧀ꦄꦧꦸꦤꦮꦱ꧀ꦠꦤ꧀ꦱꦃꦲꦸꦩꦠꦸꦂ꧈ꦱꦸꦥꦢꦺꦴꦱ꧀ꦱꦁꦥꦿꦧꦸꦏꦂꦱꦲꦲꦔꦼꦤ꧀ꦠꦺꦴꦱ꧀ꦱꦶꦱꦮꦠꦮꦶꦱ꧀꧉ꦱꦉꦁꦥꦸꦤ꧀ꦄꦧꦸꦤꦮꦱ꧀ꦩꦼꦢꦭ꧀ꦝꦠꦼꦁꦗꦮꦶꦩꦭꦶꦃ꧈ꦱꦁꦥꦿꦧꦸꦧꦺꦴꦠꦼꦤ꧀ꦱꦫꦺꦴꦤ꧀ꦠꦭꦗꦼꦁꦲꦸꦒꦶꦠꦶꦤ꧀ꦢꦏ꧀ꦝꦠꦼꦁꦗꦮꦶ꧉ꦱꦁꦥꦿꦧꦸꦱꦏ꧀ꦭꦁꦏꦸꦁꦔꦸꦁꦔꦸꦤ꧀ꦥꦁꦒꦭꦶꦃꦲꦶꦥꦸꦤ꧀ꦱꦉꦁꦲꦔꦸꦤ꧀ꦤꦶꦔꦤꦶ꧈ꦧꦶꦭꦶꦃꦄꦧꦸꦤꦮꦱ꧀ꦱꦮꦼꦒ꧀ꦲꦔꦸꦧꦸꦧ꧀ꦧꦶꦭꦠꦸꦮꦺꦴꦤ꧀ꦠꦼꦤ꧀ꦲꦶꦁꦱꦔꦤ꧀ꦝꦥ꧀ꦥꦶꦁꦮꦶꦠ꧀ꦮꦶꦠ꧀ꦠꦤ꧀꧈ꦢꦺꦤꦺꦏꦿꦶꦪꦸꦏ꧀ꦲꦒꦼꦁꦒꦸꦩꦤ꧀ꦠꦸꦁꦮꦺꦴꦤ꧀ꦠꦼꦤ꧀ꦲꦶꦁꦲꦼꦥꦁꦔꦶꦁꦒꦶꦭ꧀꧉ꦱꦁꦥꦿꦧꦸꦭꦗꦼꦁꦲꦤ꧀ꦢꦔꦸ:ꦲꦺ꧈ꦄꦧꦸꦤꦮꦱ꧀꧈ꦭꦒꦶꦲꦥꦱꦶꦫ꧈ꦢꦼꦊꦁꦔꦤꦺꦠꦼꦏꦫꦺꦥꦺꦴꦠ꧀ꦩꦁꦏꦺꦴꦤꦺꦴ꧉ꦄꦧꦸꦤꦮꦱ꧀ꦲꦸꦩꦠꦸꦂꦧꦶꦭꦶꦃꦱꦮꦼꦒ꧀ꦲꦺꦴꦕꦭ꧀ꦲꦺꦴꦕꦭ꧀꧉ꦱꦁꦥꦿꦧꦸꦱꦪꦭꦁꦏꦸꦁꦔꦸꦁꦔꦸꦤ꧀ꦥꦁꦒꦭꦶꦃꦲꦶꦥꦸꦤ꧀ꦱꦲꦭꦗꦼꦁꦲꦩꦁꦒꦭꦶꦃ꧈ꦧꦶꦭꦶꦃꦄꦧꦸꦤꦮꦱ꧀ꦱꦩꦁꦏꦺꦏꦺꦔꦶꦁꦱꦼꦱꦏꦶꦠ꧀ꦲꦺꦔꦼꦠ꧀ꦠꦤ꧀꧉ꦄꦩꦂꦒꦶꦱꦤꦗꦤ꧀ꦲꦸꦫꦸꦧ꧀ꦧꦶꦁꦭꦠꦸꦮꦲꦸꦱꦮꦶꦤ꧀ꦢꦸꦭꦩꦶꦤꦶꦥꦸꦤ꧀꧈ꦱꦩ꧀ꦥꦸꦤ꧀ꦠꦩ꧀ꦠꦸꦧꦫꦁꦲꦶꦁꦏꦁꦏꦲꦺꦴꦭꦃꦮꦲꦸꦧꦺꦴꦠꦼꦤ꧀ꦱꦒꦼꦢ꧀ꦩꦠꦼꦁ꧈ꦗꦭꦂꦫꦤ꧀ꦱꦏꦶꦁꦠꦼꦧꦶꦃꦲꦶꦁꦭꦠꦸꦱꦏꦶꦁꦧꦫꦁꦲꦶꦁꦏꦁꦧꦝꦺꦏꦲꦺꦴꦭꦃ꧉ꦲꦶꦁꦏꦁꦩꦏꦠꦼꦤ꧀ꦮꦲꦸꦱꦁꦥꦿꦧꦸꦭꦗꦼꦁꦲꦤ꧀ꦢꦔꦸꦝꦠꦼꦁꦥꦸꦤ꧀ꦄꦧꦸꦤꦮꦱ꧀꧈ꦢꦺꦤꦺꦒꦝꦃꦥꦺꦴꦏꦭ꧀ꦲꦶꦁꦏꦁꦏꦢꦺꦴꦱ꧀ꦩꦏꦠꦼꦤ꧀ꦥꦸꦤꦶꦏ꧉ꦄꦧꦸꦤꦮꦱ꧀ꦭꦗꦼꦁꦲꦔꦠꦸꦂꦫꦏꦼꦤ꧀ꦱꦢꦪꦊꦭꦩ꧀ꦥꦃꦲꦤ꧀ꦤꦶꦥꦸꦤ꧀ꦠꦶꦪꦁꦩꦶꦱ꧀ꦏꦶꦤ꧀ꦏꦭꦶꦃꦲꦤ꧀ꦱꦸꦢꦒꦂꦱꦸꦒꦶꦃꦲꦶꦁꦏꦁꦲꦁꦒꦝꦃꦲꦶꦧ꧀ꦭꦸꦩ꧀ꦧꦁꦲꦶꦁꦏꦁꦲꦱꦽꦥ꧀ꦠꦺꦴꦪꦤꦶꦥꦸꦤ꧀꧉ꦱꦂꦠꦲꦸꦒꦶꦏꦲꦠꦸꦂꦫꦏꦼꦤ꧀ꦥꦿꦗꦔꦪꦤ꧀ꦤꦶꦥꦸꦤ꧀ꦱꦸꦢꦒꦂꦧꦝꦺꦲꦚꦸꦏꦤꦶꦲꦂꦠ꧇꧑꧐꧇ꦫꦶꦁꦒꦶꦠ꧀ꦝꦠꦼꦁꦠꦶꦪꦁꦱꦶꦤ꧀ꦠꦼꦤ꧀ꦤꦲꦶꦁꦏꦁꦠꦲꦤ꧀ꦏꦸꦁꦏꦸꦩ꧀ꦱꦢꦭꦸꦮꦺꦴꦤ꧀ꦠꦼꦤ꧀ꦲꦶꦁꦧ꧀ꦭꦸꦩ꧀ꦧꦁꦔꦶꦥꦸꦤ꧀꧈ꦲꦤꦔꦶꦁꦗꦔꦪꦤ꧀ꦤꦶꦥꦸꦤ꧀ꦱꦸꦢꦒꦂꦮꦲꦸꦱꦤ꧀ꦢꦺ꧈ꦲꦩꦂꦒꦶꦲꦤꦏ꧀ꦏꦶꦥꦸꦤ꧀ꦠꦶꦪꦁꦩ꧀ꦭꦫꦠ꧀ꦮꦲꦸꦲꦢꦩꦼꦭ꧀ꦧꦼꦝꦶꦪꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦱꦕꦼꦭꦏ꧀ꦏꦶꦁꦔꦿꦶꦏꦸ꧉ꦱꦭꦗꦼꦁꦔꦶꦥꦸꦤ꧀꧈ꦄꦧꦸꦤꦮꦱ꧀ꦲꦸꦩꦠꦸꦂꦩꦏꦠꦼꦤ꧀:ꦝꦸꦃ꧈ꦒꦸꦱ꧀ꦠꦶ꧈ꦩꦼꦁꦒꦃꦫꦸꦩꦲꦺꦴꦱ꧀ꦏꦮꦸꦭꦢꦪꦤꦶꦥꦸꦤ꧀ꦧꦼꦝꦶꦪꦤꦶꦁꦭꦫꦺꦠꦸꦩꦿꦥ꧀ꦠꦶꦪꦁꦲꦶꦁꦏꦁꦏꦸꦁꦏꦸꦩ꧀ꦮꦺꦴꦤ꧀ꦠꦼꦤ꧀ꦲꦶꦁꦧ꧀ꦭꦸꦩ꧀ꦧꦁꦥꦸꦤꦶꦏ꧈ꦏꦢꦺꦴꦱ꧀ꦧꦺꦴꦠꦼꦤ꧀ꦧꦺꦢꦏꦭꦶꦃꦲꦤ꧀ꦭꦠꦸꦠꦸꦩꦿꦥ꧀ꦏꦿꦶꦪꦸꦏ꧀ꦲꦶꦁꦏꦁꦏꦒꦤ꧀ꦠꦸꦁꦲꦶꦁꦥꦔꦶꦁꦮꦶꦠ꧀ꦥꦸꦤꦶꦏ꧈ꦢꦢꦺꦴꦱ꧀ꦱꦩ꧀ꦥꦸꦤ꧀ꦢꦢꦺꦴꦱ꧀ꦮꦗꦶꦧ꧀ꦧꦶꦥꦸꦤ꧀ꦱꦸꦢꦒꦂꦲꦩ꧀ꦧꦪꦂꦥꦸꦤꦥꦲꦶꦁꦏꦁꦱꦩ꧀ꦥꦸꦤ꧀ꦏꦗꦔꦏ꧀ꦏꦏꦼꦤ꧀꧉ꦩꦶꦉꦁꦲꦠꦸꦂꦫꦶꦥꦸꦤ꧀ꦄꦧꦸꦤꦮꦱ꧀꧈ꦱꦁꦥꦿꦧꦸꦱꦏ꧀ꦭꦁꦏꦸꦁꦢꦸꦏꦤꦶꦥꦸꦤ꧀꧈ꦱꦸꦢꦒꦂꦮꦲꦸꦭꦗꦼꦁꦏꦝꦮꦸꦃꦲꦤ꧀ꦩꦠꦿꦥꦶꦥꦲꦸꦏꦸꦩꦤ꧀ꦱꦲꦲꦤꦼꦠꦼꦥ꧀ꦥꦶꦥꦸꦤꦥꦲꦶꦁꦏꦁꦱꦩ꧀ꦥꦸꦤ꧀ꦏꦗꦔꦏ꧀ꦏꦏꦼꦤ꧀꧈ꦲꦶꦁꦒꦶꦃꦥꦸꦤꦶꦏꦲꦩ꧀ꦧꦪꦂ꧇꧑꧐꧇ꦫꦶꦁꦒꦶꦠ꧀ꦝꦠꦼꦁꦠꦶꦪꦁꦩ꧀ꦭꦫꦠ꧀ꦮꦲꦸ꧉ [ 90 ]
꧋ꦔꦤ꧀ꦝꦥ꧀ꦥꦸꦤꦶꦏꦥꦮꦂꦠꦺꦴꦱ꧀ꦮꦂꦤꦶꦮꦂꦤꦶꦱꦏꦶꦁꦆꦗꦱ꧀ꦩꦼꦛꦶꦏ꧀ꦱꦏꦶꦁꦱꦼꦫꦠ꧀ꦏꦭꦮꦂꦠꦶꦆꦁꦒꦿꦶꦱ꧀:
꧋ꦗꦶꦪꦫꦃꦩꦶꦁꦒꦃꦏꦗꦶ꧉ꦩꦁꦱꦤꦶꦥꦸꦤ꧀ꦠꦶꦪꦁꦩꦶꦁꦒꦃꦏꦗꦶꦲꦶꦁꦠꦻꦴꦤ꧀꧇꧑꧙꧒꧗꧇ꦏꦺꦔꦶꦁꦏꦮꦱ꧀ꦠꦤꦤ꧀ꦱꦩ꧀ꦥꦸꦤ꧀ꦮꦶꦮꦶꦠ꧀ꦲꦶꦁꦠꦁꦒꦭ꧀ꦏꦥꦶꦁ꧇꧘꧇ꦮꦸꦭꦤ꧀ꦝꦺꦱꦺꦩ꧀ꦧꦼꦂꦲꦶꦁꦏꦁꦏꦥꦼꦁꦏꦼꦂꦥꦸꦤꦶꦏ꧈ꦲꦶꦁꦒꦶꦃꦥꦸꦤꦶꦏꦱꦝꦠꦼꦁꦔꦶꦥꦸꦤ꧀ꦥꦫꦗꦩꦲꦃꦗꦮꦶꦲꦶꦁꦏꦁꦫꦸꦩꦶꦪꦶꦤ꧀ꦥꦶꦪꦩ꧀ꦧꦏ꧀꧈ꦲꦶꦁꦏꦁꦱꦩꦶꦤꦸꦩ꧀ꦥꦏ꧀ꦧꦲꦶꦠꦏꦥꦭ꧀ꦱꦼꦩ꧀ꦥꦿꦺꦴꦁꦧ꧀ꦭꦮꦸꦤꦩꦥꦿꦶꦪꦩ꧀꧈ꦕꦕꦃꦲꦶꦁꦥꦫꦗꦩꦲꦃꦮꦻꦴꦮꦺꦴꦤ꧀ꦠꦼꦤ꧀ꦠꦶꦪꦁ꧇꧘꧐꧇꧉ꦢꦺꦤꦺꦲꦁꦒꦺꦤ꧀ꦤꦶꦥꦸꦤ꧀ꦱꦩꦶꦮꦸꦏꦸꦥ꦳꧀꧈ꦏꦶꦤ꧀ꦠꦼꦤ꧀ꦏꦶꦤ꧀ꦠꦼꦤ꧀ꦧꦺꦚ꧀ꦗꦶꦁꦲꦶꦁꦠꦼꦔꦃꦠꦼꦔꦃꦲꦶꦥꦸꦤ꧀ꦮꦸꦭꦤ꧀ꦗꦸꦤꦶ꧉ꦱꦗꦠꦺꦴꦱ꧀ꦱꦶꦥꦸꦤ꧀ꦕꦕꦃꦲꦶꦁꦥꦫꦗꦩꦲꦃꦮꦲꦸꦤꦩꦸꦁꦱꦏꦼꦝꦶꦏ꧀ꦱꦔꦼꦠ꧀꧈ꦲꦤꦁꦔꦶꦁꦠꦶꦪꦁꦲꦶꦁꦗꦸꦢꦃꦱꦩꦶꦲꦔꦗꦼꦁꦲꦗꦼꦁ꧈ꦧꦶꦭꦶꦃꦱꦊꦧꦼꦠ꧀ꦠꦶꦥꦸꦤ꧀ꦱꦠꦼꦔꦃꦠꦲꦸꦤ꧀ꦥꦸꦤꦶꦏꦧꦝꦺꦏꦛꦃꦱꦔꦼꦠ꧀ꦲꦶꦁꦏꦁꦱꦩꦶꦝꦠꦼꦁꦩꦶꦁꦒꦃꦏꦗꦶ꧉
꧋ꦔꦶꦁꦒꦶꦭ꧀ꦥꦸꦤꦶꦏꦒꦩ꧀ꦧꦂꦫꦶꦥꦸꦤ꧀ꦥꦶꦤ꧀ꦠꦼꦤ꧀ꦥꦶꦤ꧀ꦠꦼꦤ꧀ꦲꦸꦤ꧀ꦠꦲꦶꦁꦏꦁꦭꦶꦩꦿꦃꦲꦶꦥꦸꦤ꧀ꦏꦁꦒꦺꦠꦸꦩ꧀ꦥꦏ꧀ꦏꦤ꧀ꦤꦶꦥꦸꦤ꧀ꦠꦶꦪꦁꦲꦶꦁꦏꦁꦧꦝꦺꦩꦶꦁꦒꦃꦏꦗꦶ꧈ꦲꦶꦁꦏꦁꦲꦶꦁꦠꦼꦩ꧀ꦧꦺꦧꦝꦺꦏꦒꦤ꧀ꦠꦺꦴꦱ꧀ꦩꦮꦶꦱꦼꦥꦸꦂꦲꦸꦠꦮꦶꦲꦺꦴꦠꦺꦴꦧꦶꦱ꧀꧉
꧋ꦫꦤ꧀ꦠꦩꦤꦶꦥꦸꦤ꧀ꦱꦁꦥꦿꦧꦸꦆꦧ꧀ꦤꦸꦯꦎꦢ꧀꧉ꦫꦤ꧀ꦠꦩꦤ꧀ꦲꦶꦁꦠꦻꦴꦤ꧀ꦲꦶꦁꦏꦁꦏꦥꦶꦱꦤ꧀ꦲꦩꦿꦠꦺꦭ꧀ꦭꦏ꧀ꦏꦏꦼꦤ꧀ꦮꦺꦴꦤ꧀ꦠꦼꦤ꧀ꦤꦶꦥꦸꦤ꧀ꦥꦩꦼꦢꦭ꧀ꦥ꦳꧀ f 6.000.000,-. ꧉ꦢꦺꦤꦺꦲꦂꦠꦲꦶꦁꦏꦁꦏꦁꦒꦺꦮꦿꦒꦢ꧀ꦱꦢꦪꦲꦶꦁꦏꦁꦢꦢꦺꦴꦱ꧀ꦏꦧꦼꦠꦃꦲꦤ꧀ꦤꦶꦥꦸꦤ꧀ꦲꦶꦁꦠꦤꦃꦲꦶꦗꦱ꧀꧈ꦥꦸꦤꦶꦏꦧꦺꦴꦠꦼꦤ꧀ꦭꦁꦏꦸꦁꦱꦏꦶꦁꦏꦛꦃꦲꦶꦁꦲꦂꦠꦫꦤ꧀ꦠꦩ꧀ꦩꦤ꧀ꦮꦻꦴ꧉ꦧꦧ꧀ꦎꦤ꧀ꦢꦼꦂꦮꦶꦱ꧀ꦲꦶꦁꦲꦶꦗꦱ꧀ꦏꦠꦶꦔꦭ꧀ꦮꦺꦴꦤ꧀ꦠꦼꦤ꧀ꦏꦩꦗꦼꦁꦔꦤꦶꦥꦸꦤ꧀ꦱꦏꦼꦝꦶꦏ꧀꧉ꦏꦭꦏꦊꦉꦱ꧀ꦗꦸꦩꦼꦤꦼꦁꦔꦶꦥꦸꦤ꧀ꦱꦁꦥꦿꦧꦸꦆꦧ꧀ꦤꦸꦯꦎꦢ꧀ꦮꦺꦴꦤ꧀ꦠꦼꦤ꧀ꦲꦶꦁꦲꦶꦗꦱ꧀꧈ꦱꦁꦥꦿꦧꦸꦝꦮꦸꦃꦪꦱꦱꦼꦏꦺꦴꦭꦃꦲꦤ꧀꧈ꦱꦩꦁꦏꦺꦩꦸꦫꦶꦢ꧀ꦢꦶꦥꦸꦤ꧀ꦱꦢꦪꦏꦶꦫꦁꦭꦁꦏꦸꦁꦮꦺꦴꦤ꧀ꦠꦼꦤ꧀꧇꧒꧕꧐꧇꧈ꦱꦥꦺꦫꦁꦔꦤ꧀ꦲꦒꦼꦁꦱꦏꦶꦁꦩꦸꦫꦶꦢ꧀ꦩꦸꦫꦶꦢ꧀ꦮꦻꦴꦱꦩꦶꦏꦮꦸꦭꦁꦧꦱꦆꦁꦒꦿꦶꦱ꧀꧉
꧋ꦏꦺꦴꦤ꧀ꦢꦸꦂꦫꦶꦥꦸꦤ꧀ꦌꦩꦶꦂꦥ꦳ꦱꦭ꧀꧉ꦏꦭꦠꦁꦒꦭ꧀ꦏꦥꦶꦁ꧇꧖꧇ꦝꦺꦱꦺꦩ꧀ꦧꦼꦂꦲꦶꦁꦏꦁꦏꦥꦼꦁꦏꦼꦂꦥꦸꦤꦶꦏ꧈ꦌꦩꦶꦂꦥ꦳ꦱꦭ꧀ꦏꦺꦴꦤ꧀ꦢꦸꦂꦱꦏꦶꦁꦩꦼꦢꦶꦤꦃꦝꦠꦼꦁꦩꦼꦏꦃ꧉ꦏꦭꦩꦶꦮꦶꦠ꧀ꦠꦶꦧꦝꦺꦤꦶꦤ꧀ꦢꦏ꧀ꦏꦏꦼꦤ꧀ꦥꦢꦩꦼꦭ꧀ꦭꦤ꧀ꦤꦶꦥꦸꦤ꧀ꦫꦸꦩꦶꦪꦶꦤ꧀꧈ꦲꦶꦁꦒꦶꦃꦥꦸꦤꦶꦏꦥꦢꦩꦼꦭ꧀ꦭꦤ꧀ꦫꦗꦩꦸꦝꦲꦶꦁꦩꦼꦏꦃ꧈ꦲꦶꦁꦔꦿꦶꦏꦸꦢꦶꦥꦸꦤ꧀ꦮꦺꦴꦤ꧀ꦠꦼꦤ꧀ꦤꦏꦼꦤ꧀ꦥꦲꦂꦒꦤ꧀ꦲꦒꦼꦁꦲꦒꦼꦁꦔꦤ꧀꧈ꦩꦶꦤꦁꦏꦲꦔꦸꦂꦩꦠ꧀ꦠꦶꦏꦺꦴꦤ꧀ꦢꦸꦂꦫꦶꦥꦸꦤ꧀ꦌꦩꦶꦂꦥ꦳ꦱꦭ꧀ꦱꦏꦶꦁꦲꦁꦒꦺꦤ꧀ꦤꦺꦠꦶꦤ꧀ꦢꦏ꧀ꦏꦤ꧀ꦝꦠꦼꦁꦌꦫꦺꦴꦥꦃ꧉ꦱꦫꦺꦃꦤꦶꦁꦏꦭꦱꦩꦤ꧀ꦠꦼꦤ꧀ꦲꦶꦁꦏꦁꦫꦩ꧈ꦱꦁꦥꦿꦧꦸꦆꦧ꧀ꦤꦸꦯꦎꦢ꧀ꦏꦊꦉꦱ꧀ꦱꦮꦼꦒ꧀ꦠꦶꦤ꧀ꦢꦏ꧀ꦝꦠꦼꦁꦤꦺꦗ꧀꧈ꦲꦩꦶꦭꦲꦶꦁꦏꦁꦏꦮꦗꦶꦧ꧀ꦧꦏꦼꦤ꧀ꦲꦩꦏꦶꦭ꧀ꦭꦶꦱꦁꦥꦿꦧꦸ꧈ꦤꦩ꧀ꦥꦶꦌꦩꦶꦂꦥ꦳ꦱꦭ꧀ꦮꦻꦴꦲꦶꦁꦏꦁꦫꦪꦶ꧈ꦲꦶꦁꦒꦶꦃꦥꦸꦤꦶꦏꦌꦩꦶꦂꦩꦸꦃꦲꦩꦢ꧀꧉
꧋ꦱꦼꦫꦠ꧀ꦏꦧꦂ Loc. ꧈ꦠꦁꦒꦭ꧀ꦏꦥꦶꦁ꧇꧓꧇ꦥꦺꦧꦿꦸꦮꦫꦶꦩꦂꦠꦺꦴꦱ꧀ꦱꦏꦼꦤ꧀ꦩꦏꦠꦼꦤ꧀:
꧋ꦤꦒꦫꦶꦄꦯꦶꦂꦭꦤ꧀ꦆꦧ꧀ꦤꦸꦯꦎꦢ꧀꧉ꦏꦭꦠꦁꦒꦭ꧀꧇꧒꧇ꦥꦺꦧꦿꦸꦮꦫꦶ꧈ꦥꦫꦥꦿꦗꦸꦫꦶꦠ꧀ꦮꦲꦨꦶꦱꦲꦨꦢꦸꦮꦶꦱꦩꦶꦏꦧꦶꦝꦭ꧀ꦭꦏꦼꦤ꧀ꦝꦠꦼꦁꦲꦶꦁꦠꦥꦼꦭ꧀ꦮꦠꦼꦱ꧀ꦱꦶꦥꦸꦤ꧀ꦤꦒꦫꦶꦄꦱꦶꦂ꧉ꦮꦺꦴꦤ꧀ꦠꦼꦤ꧀ꦲꦶꦁꦔꦿꦶꦏꦸꦥꦫꦥꦿꦗꦸꦫꦶꦠ꧀ꦠꦶꦥꦸꦤ꧀ꦆꦧ꧀ꦤꦸꦱꦲꦺꦴꦢ꧀ꦲꦶꦁꦏꦁꦥꦶꦤꦸꦚ꧀ꦗꦸꦭ꧀ꦱꦩꦶꦱꦝꦶꦪꦥꦕꦏ꧀ꦧꦫꦶꦱ꧀꧉ꦢꦺꦤꦺꦲꦶꦁꦤꦒꦫꦶꦄꦱꦶꦂꦠꦤ꧀ꦱꦃꦲꦤ꧀ꦝꦠꦼꦁꦔꦏꦼꦤ꧀ꦢꦼꦢꦩꦼꦭ꧀ꦥꦼꦫꦁꦮꦂꦤꦶꦮꦂꦤꦶꦱꦏꦶꦁꦤꦒꦫꦶꦔꦩꦚ꧀ꦕ꧈ꦩꦏꦠꦼꦤ꧀ꦲꦸꦒꦶꦱꦧꦼꦤ꧀ꦢꦶꦤ꧀ꦠꦼꦤ꧀ꦲꦶꦁꦏꦶꦛꦎꦢꦺꦢꦃ꧈ꦠꦤ꧀ꦱꦃꦏꦝꦠꦼꦁꦔꦤ꧀ꦥꦿꦗꦸꦫꦶꦠ꧀ꦥꦿꦗꦸꦫꦶꦠ꧀ꦱꦏꦶꦁꦄꦥꦿꦶꦏꦃ꧉ꦠꦶꦪꦁꦒꦝꦃꦥꦔꦶꦤ꧀ꦠꦼꦤ꧀꧈ꦧꦶꦭꦶꦃꦧꦺꦴꦠꦼꦤ꧀ꦢꦔꦸꦩꦭꦶꦃꦧꦝꦺꦠꦸꦮꦸꦃꦥꦼꦫꦁꦲꦤ꧀ꦠꦮꦶꦱ꧀ꦱꦶꦥꦸꦤ꧀ꦤꦒꦫꦶꦲꦶꦗꦱ꧀ꦏꦭꦪꦤ꧀ꦤꦒꦫꦶꦄꦱꦶꦂ꧉
꧋ꦥꦶꦤ꧀ꦠꦼꦤ꧀ꦥꦶꦤ꧀ꦠꦼꦤ꧀ꦲꦸꦤ꧀ꦠꦲꦶꦁꦏꦁꦢꦶꦥꦸꦤ꧀ꦩꦺꦴꦩꦺꦴꦠ꧀ꦠꦶꦧꦫꦁꦧꦫꦁꦮꦂꦤꦶꦮꦂꦤꦶꦭꦸꦩꦩ꧀ꦥꦃꦠꦸꦫꦸꦠ꧀ꦱꦒꦤ꧀ꦠꦼꦤ꧀ꦮꦼꦝꦶ꧉ [ 91 ]
I. ꧋ꦫꦢꦺꦤ꧀ꦱꦱ꧀ꦠꦿꦮꦺꦴꦤ꧀ꦠꦼꦤ꧀ꦲꦶꦁꦱꦼꦥꦸꦂꦩꦲꦺꦴꦱ꧀ꦏꦗꦮꦺꦤ꧀꧉
II. ꧋ꦩꦼꦝꦏ꧀ꦱꦏꦶꦁꦱꦼꦥꦸꦂꦭꦩ꧀ꦥꦲꦶꦥꦸꦤ꧀ꦱꦏ꧀ꦭꦁꦏꦸꦁꦏꦱꦼꦱ꧈ꦢꦪꦢꦪꦲꦺꦁꦒꦭ꧀ꦢꦸꦩꦸꦒꦶꦪꦲꦶꦁꦒꦿꦶꦪꦤꦶꦥꦸꦤ꧀꧈ꦲꦩꦂꦒꦶꦱꦼꦭꦏ꧀ꦏꦼꦥꦺꦔꦶꦤ꧀ꦩꦲꦺꦴꦱ꧀ꦏꦗꦮꦺꦤ꧀ꦲꦶꦁꦏꦁꦝꦠꦼꦁꦲꦺꦁꦒꦭ꧀꧉
III. ꧋ꦈꦠ꧀ꦢꦿꦸꦢꦸꦠ꧀꧈ꦏꦺꦴꦫꦤ꧀ꦏꦸꦏꦗꦮꦺꦤ꧀ꦛꦶꦏ꧀ꦭꦭꦶ꧉
IV. ꧋ꦫꦢꦺꦤ꧀ꦱꦱ꧀ꦠꦿꦭꦗꦼꦁꦭꦸꦩꦗꦼꦁꦧꦸꦤ꧀ꦢꦼꦂ꧈ꦏꦊꦉꦱꦤ꧀ꦱꦼꦥꦸꦫꦶꦥꦸꦤ꧀ꦢꦺꦫꦺꦁꦩꦁꦏꦠ꧀꧈ꦱꦏꦶꦁꦏꦱꦼꦱꦤꦶꦥꦸꦤ꧀ꦲꦁꦒꦺꦤꦺꦭꦸꦩꦩ꧀ꦥꦃ꧈ꦔꦤ꧀ꦠꦺꦴꦱ꧀ꦲꦤꦸꦚ꧀ꦗꦔꦶꦥꦶꦤ꧀ꦠꦼꦤ꧀ꦥꦶꦤ꧀ꦠꦼꦤ꧀ꦠꦶꦪꦁ꧉ꦧꦼꦒ꧀ꦗꦤꦶꦥꦸꦤ꧀ꦢꦺꦤꦺꦱꦼꦫꦠꦶꦥꦸꦤ꧀ꦏꦗꦮꦺꦤ꧀ꦱꦒꦼꦢ꧀ꦥꦶꦤꦁꦒꦶꦃꦩꦭꦶꦃ꧉ [ 92 ]
꧋ꦱꦢꦔꦸꦤꦶꦥꦸꦤ꧀ꦲꦶꦁꦏꦁꦚꦼꦥꦼꦁꦥꦔꦸꦮꦱꦲꦶꦁꦏꦫꦗꦤ꧀ꦠꦸꦂꦏꦶꦥꦸꦤꦶꦏꦲꦶꦁꦏꦁꦩꦶꦤꦸꦭꦾꦏꦼꦩꦭ꧀ꦥꦱꦃ꧈ꦲꦶꦁꦔꦿꦶꦏꦸꦠꦸꦮꦸꦃꦩꦮꦂꦤꦶꦮꦂꦤꦶꦲꦺꦮꦃꦲꦺꦮꦃꦲꦤ꧀꧈ꦲꦶꦁꦏꦁꦱꦪꦼꦏ꧀ꦠꦺꦴꦱ꧀ꦲꦢꦩꦼꦭ꧀ꦕꦶꦔꦏꦶꦁꦱꦻꦤ꧀ꦢꦼꦁꦔꦶꦁꦢꦺꦴꦚꦆꦱ꧀ꦭꦩ꧀ꦱꦢꦪ꧉ꦆꦁꦔꦤ꧀ꦝꦥ꧀ꦥꦸꦤꦶꦏꦱꦮꦼꦤꦺꦃꦲꦶꦁꦲꦺꦮꦃꦲꦺꦮꦃꦲꦤ꧀ꦲꦶꦁꦏꦫꦗꦤ꧀ꦠꦸꦂꦏꦶ:
ꦲ:ꦠꦼꦠꦶꦪꦁꦠꦸꦂꦏꦶ꧈ꦏꦗꦮꦶꦥꦫꦲꦶꦁꦏꦁꦲꦁꦒꦼꦒꦸꦭꦁꦝꦠꦼꦁꦲꦒꦩꦶ꧈ꦏꦲꦮꦶꦱꦤ꧀ꦔꦁꦒꦺꦏꦺꦴꦥꦾꦃ꧉
ꦤ:ꦠꦼꦠꦶꦪꦁꦲꦺꦱ꧀ꦠꦿꦶꦧꦺꦴꦠꦼꦤ꧀ꦏꦮꦗꦶꦧ꧀ꦧꦏꦼꦤ꧀ꦩꦮꦶꦩꦼꦏꦼꦤ꧉
ꦕ:ꦠꦸꦩꦶꦤ꧀ꦢꦏ꧀ꦏꦶꦥꦸꦤ꧀ꦥꦔꦁꦒꦺꦕꦫ:ꦌꦫꦺꦴꦥꦃ꧉
ꦫ:ꦲꦔꦮꦶꦱ꧀ꦱꦶꦠꦶꦪꦁꦫꦧꦶꦭꦁꦏꦸꦁꦱꦠꦸꦁꦒꦭ꧀꧉
ꦏ:ꦱꦼꦫꦠ꧀ꦠꦤ꧀ꦄꦫꦧ꧀ꦏꦒꦤ꧀ꦠꦺꦴꦱ꧀ꦏꦭꦶꦃꦲꦤ꧀ꦱꦼꦫꦠ꧀ꦠꦤ꧀ꦭꦠꦶꦤ꧀꧈ꦭꦤ꧀ꦠꦏ꧀ꦱꦶꦃꦏꦛꦃꦠꦸꦁꦒꦶꦭ꧀ꦭꦶꦥꦸꦤ꧀꧉
꧋ꦲꦺꦮꦃꦲꦺꦮꦃꦲꦤ꧀ꦲꦶꦁꦔꦶꦁꦒꦶꦭ꧀ꦥꦸꦤꦶꦏꦠꦶꦔꦭ꧀ꦭꦶꦥꦸꦤ꧀ꦤꦩꦸꦁꦱꦼꦥꦺꦭꦺꦏꦺꦩꦮꦺꦴꦤ꧀꧈ꦲꦤꦔꦶꦁꦱꦗꦠꦺꦴꦱ꧀ꦱꦶꦥꦸꦤ꧀ꦲꦺꦮꦃꦲꦺꦮꦃꦲꦤ꧀ꦲꦶꦁꦏꦁꦲꦒꦼꦁꦱꦔꦼꦠ꧀꧉ꦏꦭꦫꦸꦩꦶꦪꦶꦤ꧀ꦱꦶꦤ꧀ꦠꦼꦤ꧀ꦲꦶꦁꦏꦁꦔꦶꦤ꧀ꦠꦼꦤ꧀꧈ꦧꦶꦭꦶꦃꦠꦶꦪꦁꦗꦊꦂꦠꦸꦂꦏꦶ꧈ꦲꦶꦁꦠꦼꦩ꧀ꦧꦺꦧꦝꦺꦧꦺꦴꦠꦼꦤ꧀ꦔꦁꦒꦺꦏꦺꦴꦥꦾꦃ꧈ꦱꦲꦠꦶꦪꦁꦲꦺꦱ꧀ꦠꦿꦶꦧꦝꦺꦲꦸꦕꦸꦭ꧀ꦱꦏꦶꦁꦩꦏꦼꦤꦤꦶꦥꦸꦤ꧀꧉ꦱꦩꦁꦏꦺꦒꦼꦱꦁꦔꦶꦥꦸꦤ꧀ꦠꦶꦪꦁꦲꦺꦱ꧀ꦠꦿꦶꦠꦸꦂꦏꦶꦧꦺꦴꦠꦼꦤ꧀ꦏꦥꦶꦔꦶꦠ꧀ꦩꦭꦶꦃ꧉ꦱꦤꦗꦤ꧀ꦲꦺꦮꦃꦲꦺꦮꦃꦲꦤ꧀ꦲꦶꦁꦏꦁꦩꦏꦠꦼꦤ꧀ꦥꦸꦤꦶꦏꦏꦊꦧꦼꦠ꧀ꦲꦮꦿꦠ꧀ꦠꦸꦩꦿꦥ꧀ꦲꦒꦩꦶꦆꦱ꧀ꦭꦩ꧀꧈ꦲꦺꦮꦢꦺꦤꦺꦱꦒꦼꦢ꧀ꦏꦊꦏ꧀ꦱꦤꦤ꧀ꦱꦢꦪ꧉ꦱꦩꦁꦏꦺꦲꦶꦁꦠꦸꦂꦏꦶꦏꦛꦃꦥꦫꦮꦤꦶꦠꦲꦶꦁꦏꦁꦭꦸꦩꦼꦧꦼꦠ꧀ꦲꦶꦁꦥꦩꦸꦭꦁꦔꦤ꧀ꦫꦸꦲꦸꦂ꧈ꦕꦭꦺꦴꦤ꧀ꦢꦢꦺꦴꦱ꧀ꦝꦺꦴꦏ꧀ꦠꦼꦂ꧈ꦲꦥꦺꦴꦏꦠ꧀ꦭꦤ꧀ꦱꦱꦩꦶꦤꦶꦥꦸꦤ꧀꧉
꧋ꦱꦪꦢꦔꦸꦤꦒꦫꦶꦠꦸꦂꦏꦶꦱꦪꦩꦶꦤ꧀ꦝꦏ꧀ꦉꦗ꧈ꦩꦂꦒꦶꦱꦼꦥꦸꦂꦱꦪꦩꦶꦤ꧀ꦝꦏ꧀ꦏꦛꦃ꧈ꦩꦏꦠꦼꦤ꧀ꦲꦸꦒꦶꦩꦺꦴꦠꦺꦴꦂꦱꦲꦲꦺꦴꦠꦺꦴꦧꦶꦱ꧀꧉ꦆꦁꦠꦸꦂꦏꦶꦱꦩꦁꦏꦺꦱꦒꦼꦢ꧀ꦪꦱꦧꦲꦶꦠꦏꦥꦭ꧀ꦥꦶꦪꦩ꧀ꦧꦏ꧀꧈ꦱꦒꦼꦢ꧀ꦲꦢꦩꦼꦭ꧀ꦩꦺꦴꦠꦺꦴꦂꦭꦤ꧀ꦭꦺꦴꦏꦺꦴꦩꦺꦴꦠꦶꦥ꧀ꦥꦶꦪꦩ꧀ꦧꦏ꧀꧈ꦕꦼꦏꦏ꧀ꦏꦶꦥꦸꦤ꧀ꦏꦩꦗꦼꦁꦔꦤꦶꦁꦏꦫꦗꦤ꧀ꦠꦸꦂꦏꦶꦱꦪꦼꦏ꧀ꦠꦺꦴꦱ꧀ꦲꦔꦺꦢꦥ꧀ꦲꦺꦢꦥ꧀ꦥꦶ꧉
꧋ꦏꦩꦗꦼꦁꦔꦤ꧀ꦲꦶꦁꦏꦁꦩꦏꦠꦼꦤ꧀ꦥꦸꦤꦶꦏꦥꦸꦤꦥꦱꦒꦼꦢ꧀ꦤꦸꦭꦂꦲꦶꦁꦏꦫꦗꦤ꧀ꦆꦱ꧀ꦭꦩ꧀ꦲꦶꦁꦄꦱꦶꦪꦃꦱꦤꦺꦱ꧀ꦱꦤꦺꦱ꧀ꦱꦶꦥꦸꦤ꧀꧉ꦩꦁꦒꦱꦩꦶꦢꦶꦥꦸꦤ꧀ꦪꦼꦏ꧀ꦠꦺꦴꦱ꧀ꦱꦶꦏꦺꦩꦮꦺꦴꦤ꧀꧉ [ 93 ]꧋ꦒꦫꦺꦁ:ꦠꦿꦸꦏ꧀꧈ꦲꦶꦁꦱꦫꦺꦃꦤꦶꦁꦱꦲꦶꦏꦶꦏꦶꦪꦶꦏꦊꦧꦸꦲꦶꦁꦗꦩꦤ꧀ꦏꦁꦲꦚꦼꦧꦼꦭ꧀ꦭꦶ꧈ꦗꦭꦂꦫꦤ꧀ꦱꦏꦏꦺꦲꦶꦁꦊꦭꦫ꧈ꦏꦁꦲꦚ꧀ꦗꦭꦂꦫꦶꦥꦠꦶꦤꦺꦥꦶꦫꦁꦥꦶꦫꦁꦩꦤꦸꦱ꧈ꦩꦫꦱꦲꦶꦏꦶꦲꦪꦺꦴꦥꦝꦉꦩ꧀ꦧꦸꦒ꧀ꦒꦤ꧀ꦥꦠꦿꦥ꧀ꦥꦺꦲꦤꦁꦒꦸꦭꦁꦔꦶꦱꦮꦼꦤꦺꦃꦲꦶꦁꦊꦭꦫ꧈ꦧꦺꦴꦏ꧀ꦩꦤꦮꦲꦤꦒꦸꦤꦤꦺꦠꦸꦩꦿꦥ꧀ꦮꦺꦴꦁꦲꦏꦺꦃ꧉ꦠꦶꦤꦶꦩ꧀ꦧꦁꦭꦸꦁꦒꦸꦃꦝꦶꦝꦶꦱ꧀꧈ꦫꦏ꧀ꦭꦸꦮꦸꦁꦲꦺꦴꦩꦺꦴꦁꦲꦺꦴꦩꦺꦴꦁꦔꦤ꧀ꦱꦶꦁꦥ꦳ꦂꦭꦸꦥ꦳ꦂꦭꦸ꧉
꧋ꦥꦺꦠꦿꦸꦏ꧀:ꦭ꧀ꦲ꧈ꦏꦸꦮꦶꦲꦏꦸꦩꦛꦸꦏ꧀ꦧꦔꦼꦠ꧀꧈ꦩꦸꦁꦧꦲꦺꦧꦸꦧꦸꦭ꧀ꦩꦸꦏꦸꦮꦶꦠꦩ꧀ꦧꦤꦤꦝꦶꦱꦶꦏ꧀꧈ꦲꦏꦸꦮꦼꦫꦸꦃꦥꦿꦠꦶꦏꦼꦭ꧀ꦭꦺꦔꦶꦭꦁꦔꦏꦺꦧꦸꦧꦸꦭ꧀ꦩꦸꦏꦸꦮꦶ꧈ꦪꦻꦏꦸ:ꦲꦁꦒꦺꦴꦝꦺꦴꦒ꧀ꦒꦮꦭꦸꦃꦱꦶꦁꦔꦤ꧀ꦠꦶꦩꦠꦼꦁ꧈ꦱꦻꦴꦮꦶꦱ꧀ꦱꦺꦱꦶꦏꦶꦭ꧀ꦩꦸꦭꦺꦴꦫꦺꦴꦥꦶꦱꦤ꧀ꦠꦥꦏ꧀ꦤꦤꦁꦮꦭꦸꦃꦏꦁꦩꦠꦼꦁꦏꦸꦮꦶ꧈ꦩꦼꦁꦏꦺꦴꦤꦺꦩꦱ꧀ꦔꦤ꧀ꦠꦺꦤ꧀ꦤꦺꦧꦸꦧꦸꦭ꧀ꦫꦏ꧀ꦥꦝꦏꦺꦭꦶꦚꦁꦮꦭꦸꦃꦩꦲꦸ꧉
꧋ꦒꦫꦺꦁ:ꦭꦺꦴ꧈ꦠꦿꦸꦏ꧀꧈ꦲꦗꦏꦺꦴꦏ꧀ꦏꦶꦫꦪꦺꦤ꧀ꦧꦸꦧꦸꦭ꧀ꦏꦸꦏꦶꦪꦶꦲꦤ꧀ꦢꦢꦺꦏ꧀ꦏꦏꦺꦥꦿꦶꦲꦠꦶꦤ꧀ꦏꦸ꧈ꦩꦭꦃꦠꦏ꧀ꦲꦁꦒꦼꦥ꧀ꦱꦮꦶꦗꦶꦤꦶꦁꦒꦩ꧀ꦧꦂꦫꦤꦶꦁꦥꦔꦺꦫꦤ꧀꧈ꦲꦩꦂꦒꦠꦸꦩꦼꦏꦤꦶꦁꦱꦲꦶꦏꦶꦲꦏꦸꦏꦶꦪꦶꦲꦶꦱꦶꦃꦠꦤ꧀ꦱꦃꦲꦔꦺꦭꦶꦁꦔꦶꦏꦧꦺꦃꦥꦔꦤ꧀ꦢꦶꦏꦤꦶꦁꦥꦫꦱꦼꦥꦸꦃ꧈ꦪꦏꦸꦮꦶ:ꦭꦤ꧀ꦢꦒꦸꦤ꧈ꦕꦶꦤ꧀ꦠꦼꦤ꧀ꦧꦤ꧀ꦝ꧈ꦗꦮꦠꦥ꧉ꦪꦺꦤ꧀ꦲꦏꦸꦲꦺꦴꦫꦏꦢꦸꦤꦸꦔꦤ꧀ꦩꦱ꧀ꦔꦤ꧀ꦠꦺꦤ꧀ꦧꦸꦧꦸꦭ꧀ꦏꦶꦪꦶ꧈ꦮꦶꦱ꧀ꦩꦼꦱ꧀ꦛꦶꦱꦧꦼꦤ꧀ꦢꦶꦤꦩꦔꦤ꧀ꦏꦸꦧꦶꦱꦏꦿꦱꦲꦺꦤꦏ꧀꧈ꦠꦸꦫꦸꦏꦥꦺꦤꦏ꧀꧈ꦥꦊꦱꦶꦂꦚꦁꦔꦼꦤ꧀ꦢꦶꦧꦲꦺꦪꦧꦶꦱꦏꦭꦏꦺꦴꦤ꧀꧉ꦱꦲꦸꦮꦶꦱꦺꦧꦚ꧀ꦗꦸꦂꦲꦥꦠꦥꦏꦸꦱꦲꦶꦏꦶ꧉ꦧꦭꦶꦏ꧀ꦲꦏꦸꦏꦁꦒꦺꦴꦤꦤ꧀ꦧꦸꦧꦸꦭ꧀ꦏꦶꦪꦶ꧈ꦲꦥꦲꦥꦫꦏ꧀ꦧꦚ꧀ꦗꦸꦂꦏꦼꦥꦼꦏ꧀ꦱꦠꦏ꧀ꦕꦼꦒꦃ꧈ꦢꦢꦶꦗꦼꦤꦼꦁꦲꦶꦱꦶꦃꦤꦼꦠꦼꦥ꧀ꦥꦶꦠꦥꦤꦺ꧉
꧋ꦥꦺꦠꦿꦸꦏ꧀:ꦌ꧈ꦭ꧈ꦪꦩꦼꦏ꧀ꦱꦲꦤꦧꦲꦺꦮꦁꦱꦸꦭ꧀ꦭꦤꦺ꧉ꦄꦏꦸꦥꦽꦕꦪꦪꦺꦤ꧀ꦏꦺꦴꦮꦺꦲꦺꦴꦫꦠꦻꦴꦭꦸꦔꦭꦸꦔ꧈ꦲꦤꦔꦶꦁꦲꦁꦒꦺꦴꦤ꧀ꦩꦸꦲꦸꦊꦩ꧀ꦲꦸꦊꦩ꧀ꦫꦶꦤꦮꦼꦔꦶꦠꦤ꧀ꦥꦏꦼꦤ꧀ꦝꦠ꧀꧉
꧋ꦒꦫꦺꦁ:ꦭ꧈ꦏꦸꦮꦶꦲꦫꦤ꧀ꦤꦺꦕꦒꦏ꧀ꦲꦼꦭꦺꦏ꧀꧈ꦔꦼꦭꦺꦏ꧀ꦏꦶꦲꦤꦏ꧀ꦥꦸꦠꦸꦧꦺꦤ꧀ꦧꦺꦱꦸꦏ꧀ꦥꦝꦢꦢꦶꦲꦸꦮꦺꦴꦁ꧉ꦲꦺꦴꦫꦠꦿꦸꦏ꧀꧈ꦲꦶꦁꦱꦫꦺꦃꦤꦶꦁꦱꦲꦶꦏꦶꦩꦺꦃꦲꦤ꧀ꦢꦸꦁꦏꦥ꧀ꦩꦁꦱꦆꦤ꧀ꦥ꧀ꦭꦸꦮꦺꦤ꧀ꦱꦃ꧈ꦲꦪꦺꦴꦥꦝꦉꦩ꧀ꦧꦸꦒꦤ꧀ꦧꦧ꧀ꦏꦸꦮꦶꦝꦶꦱꦶꦏ꧀꧉ꦏꦺꦴꦮꦺꦲꦥꦮꦶꦱ꧀ꦠꦲꦸꦲꦔ꧀ꦭꦏꦺꦴꦤ꧀ꦤꦶꦒꦶꦤꦚ꧀ꦗꦂꦭꦫꦆꦤ꧀ꦥ꧀ꦭꦸꦮꦺꦤ꧀ꦱꦃꦏꦸꦮꦶ꧉
꧋ꦥꦺꦠꦿꦸꦏ꧀:ꦱꦏꦥꦤ꧀ꦢꦺꦴꦔꦩꦸꦪꦮꦶꦱ꧀ꦠꦻꦴ꧈ꦩꦭꦃꦧꦢꦤ꧀ꦱꦏꦺꦴꦗꦸꦂꦏꦼꦧꦏ꧀ꦏꦧꦺꦃ꧈ꦮꦃ꧈ꦫꦱꦤꦺꦒꦠꦼꦭ꧀ꦭꦺꦔꦸꦢꦸꦧꦶꦭꦃꦲꦶꦩꦶꦤꦱ꧀ꦱꦺꦱꦺꦠ꧀ꦠꦶꦠꦼꦩꦼꦤ꧀ꦤꦤ꧀꧉
꧋ꦒꦫꦺꦁ:ꦮꦶꦪꦃ꧈ꦱꦶꦁꦏꦺꦴꦏ꧀ꦏꦤ꧀ꦝꦏ꧀ꦏꦏꦺꦏꦸꦮꦶꦫꦏ꧀ꦩꦱ꧀ꦭꦫꦒꦸꦝꦶꦒ꧀꧉ꦢꦺꦤꦺꦠꦤ꧀ꦝꦠꦤ꧀ꦝꦤꦺꦮꦺꦴꦁꦏꦁꦏꦼꦤꦊꦭꦫꦆꦤ꧀ꦥ꧀ꦭꦸꦮꦺꦤ꧀ꦱꦃꦏꦸꦮꦶꦲꦮꦏꦺꦥꦤꦱ꧀ꦏꦤ꧀ꦛꦶꦮꦠꦸꦏ꧀꧉
꧋ꦥꦺꦠꦿꦸꦏ꧀:ꦌ꧈ꦭ꧈ꦏ꧀ꦭꦶꦫꦸꦲꦏꦸ꧈ꦭꦮꦺꦴꦁꦩꦶꦠꦸꦫꦸꦠ꧀ꦏꦶꦫꦠꦧꦱꦤꦺꦆꦤ꧀ꦥ꧀ꦭꦸꦮꦺꦤ꧀ꦱꦃꦏꦸꦮꦶꦲꦠꦼꦒꦼꦱ꧀ꦭꦭꦸꦤꦺꦏꦤ꧀ꦛꦶꦭꦶꦱꦃ꧈ꦩꦸꦭꦪꦩꦛꦸꦏ꧀ꦧꦔꦼꦠ꧀꧈ꦲꦸꦥꦩꦢꦶꦕꦏꦏ꧀ꦏꦺꦚꦁꦭꦫꦒꦸꦝꦶꦒ꧀꧈ꦲꦩꦂꦒꦠꦩ꧀ꦧꦤꦺꦒꦸꦝꦶꦒ꧀ꦏꦸꦮꦶꦧꦁꦱꦤꦶꦁꦊꦔ꧈ꦪꦱꦶꦁꦢꦶꦲꦫꦤꦶꦱꦊꦥ꧀꧉ꦲꦺꦴꦫ꧈ꦫꦺꦁ꧈ꦩꦸꦁꦒꦸꦃꦗꦭꦫꦤ꧀ꦤꦺꦮꦺꦴꦁꦏꦼꦤꦊꦭꦫꦆꦤ꧀ꦥ꧀ꦭꦸꦮꦺꦤ꧀ꦱꦃꦏꦸꦮꦶꦏꦥꦿꦶꦪꦺ꧉
꧋ꦒꦫꦺꦁ:ꦭ꧀ꦭꦼꦭꦫꦆꦤ꧀ꦥ꧀ꦭꦸꦮꦺꦤ꧀ꦱꦃꦏꦸꦮꦶ:ꦏꦢꦢꦺꦪꦤ꧀ꦤꦺꦱꦏꦊꦧꦸꦲꦸꦠꦮꦧꦊꦢꦸꦒ꧀ꦏꦁꦏꦠꦸꦠ꧀ꦲꦶꦁꦲꦔꦶꦤ꧀꧈ꦩꦸꦭꦪꦢꦶꦔꦠꦶꦲꦠꦶ꧈ꦲꦗꦠꦸꦩꦤ꧀ꦢꦁꦱꦩꦸꦧꦫꦁꦒꦮꦺꦏꦁꦧꦶꦱꦔꦤꦏ꧀ꦏꦏꦺꦊꦧꦸꦲꦸꦠꦮꦧꦊꦢꦸꦒ꧀꧉
(ꦧꦝꦺꦏꦱꦩ꧀ꦧꦼꦠ꧀ꦠꦤ꧀) [ 94 ]꧋ꦱꦏꦶꦁꦱꦸꦫꦏꦂꦠꦏꦮꦂꦠꦺꦴꦱ꧀ꦱꦏꦼꦤ꧀꧈ꦧꦶꦭꦶꦃꦏꦭꦩꦊꦩ꧀ꦉꦧꦺꦴꦲꦶꦁꦏꦁꦏꦥꦼꦁꦏꦼꦂꦥꦸꦤꦶꦏ꧈ꦲꦶꦁꦕꦭꦩꦢꦸꦮꦺꦴꦤ꧀ꦠꦼꦤ꧀ꦏꦺꦕꦸ꧉ꦕꦕꦃꦲꦶꦁꦏꦺꦕꦸꦮꦺꦴꦤ꧀ꦠꦼꦤ꧀꧇꧖꧇ꦱꦩꦶꦭꦸꦩꦼꦧꦼꦠ꧀ꦲꦶꦁꦒꦿꦶꦪꦤꦶꦥꦸꦤ꧀ꦱꦠꦸꦁꦒꦶꦭ꧀ꦭꦶꦁꦠꦶꦪꦁꦥꦿꦶꦧꦸꦩꦶ꧈ꦗꦸꦫꦒꦤ꧀ꦫꦗꦏꦪ꧉ꦱꦭꦃꦱꦠꦸꦁꦒꦶꦭ꧀ꦭꦶꦥꦸꦤ꧀ꦏꦺꦕꦸꦮꦻꦴꦤꦺꦴꦛꦺꦴꦏ꧀ꦏꦺꦴꦫꦶꦤꦶꦁꦒꦿꦶꦪ꧈ꦱꦂꦠꦤꦼꦝꦭꦸꦩꦼꦧꦼꦠ꧀꧈ꦲꦶꦁꦏꦁꦒꦝꦃꦒꦿꦶꦪꦧꦺꦴꦠꦼꦤ꧀ꦚꦤꦚꦤꦩꦤꦮꦶꦧꦝꦺꦢꦶꦥꦸꦤ꧀ꦏꦺꦕꦸ꧈ꦱꦉꦁꦲꦔꦼꦔꦏ꧀ꦏꦏꦼꦤ꧀ꦏꦺꦴꦫꦶꦤꦶꦥꦸꦤ꧀꧈ꦲꦸꦗꦸꦓꦸꦗꦸꦒ꧀ꦢꦶꦥꦸꦤ꧀ꦕꦼꦥꦼꦁꦢꦺꦤꦶꦁꦠꦶꦪꦁ꧇꧓꧇ꦱꦂꦠꦭꦗꦼꦁꦢꦶꦥꦸꦤ꧀ꦠꦁꦱꦸꦭꦶꦮꦺꦴꦤ꧀ꦠꦼꦤ꧀ꦲꦶꦁꦥꦢꦺꦴꦤꦶꦁꦲꦩ꧀ꦧꦺꦤ꧀꧈ꦱꦱꦩ꧀ꦥꦸꦤ꧀ꦤꦶꦥꦸꦤ꧀ꦭꦗꦼꦁꦲꦔꦿꦩ꧀ꦥꦱ꧀ꦱꦢꦪꦧꦫꦁꦢꦂꦧꦺꦏ꧀ꦏꦶꦥꦸꦤ꧀ꦗꦸꦫꦒꦤ꧀ꦮꦻꦴ꧈ꦢꦺꦤꦺꦲꦶꦁꦏꦁ꧇꧓꧇ꦗꦒꦶꦮꦺꦴꦤ꧀ꦠꦼꦤ꧀ꦲꦶꦁꦱꦗꦮꦶꦤꦶꦁꦒꦿꦶꦪ꧉ꦏꦺꦕꦸꦮꦲꦸꦱꦒꦼꦢ꧀ꦲꦁꦒꦺꦴꦤ꧀ꦝꦺꦴꦭ꧀ꦧꦫꦁꦧꦫꦁꦏꦶꦤ꧀ꦠꦼꦤ꧀ꦏꦶꦤ꧀ꦠꦼꦤ꧀ꦉꦒꦶ f 80-.
꧋ꦱꦏꦶꦁꦥꦝꦁꦏꦮꦂꦠꦺꦴꦱ꧀ꦱꦏꦼꦤ꧀ꦏꦢꦺꦴꦱ꧀ꦲꦶꦁꦔꦤ꧀ꦝꦥ꧀ꦥꦸꦤꦶꦏ:
꧋ꦏꦭꦠꦁꦒꦭ꧀ꦏꦥꦶꦁ꧇꧓꧇ꦥꦺꦧꦿꦸꦮꦫꦶꦲꦶꦁꦏꦁꦏꦥꦼꦁꦏꦼꦂꦥꦸꦤꦶꦏ꧈ꦥꦠꦿꦺꦴꦭꦶꦲꦶꦁꦏꦁꦢꦶꦥꦸꦤ꧀ꦠꦶꦤ꧀ꦝꦶꦃꦲꦶꦢꦺꦤꦶꦁꦱꦼꦂꦱꦤ꧀ꦩꦼꦤꦝꦺꦴꦭꦶꦤ꧀ꦢꦺꦴꦁ꧈ꦮꦺꦴꦤ꧀ꦠꦼꦤ꧀ꦲꦶꦁꦩꦂꦒꦶꦥꦶꦤꦁꦒꦶꦃꦏꦭꦶꦃꦲꦤ꧀ꦥꦸꦁꦒꦮꦤꦶꦥꦸꦤ꧀ꦱꦶꦥꦠꦺꦏꦼꦏꦭꦶꦃ꧈ꦥꦠꦺꦥꦸꦤꦶꦏꦒꦼꦒꦼꦝꦸꦒ꧀ꦒꦶꦥꦸꦤ꧀ꦏꦺꦴꦩꦸꦤꦶꦱ꧀ꦲꦶꦁꦥꦝꦁ꧉ꦠꦶꦪꦁꦏꦼꦏꦭꦶꦃꦮꦲꦸ꧈ꦲꦶꦁꦏꦁꦲꦱꦿꦶꦁꦔꦸꦥꦢꦺꦴꦱ꧀ꦱꦏꦼꦤ꧀ꦠꦼꦝꦝꦠꦼꦁꦱꦶꦥꦠꦺ꧉ꦱꦼꦂꦱꦤ꧀ꦮꦲꦸꦭꦗꦼꦁꦩꦼꦏ꧀ꦱꦝꦠꦼꦁꦠꦶꦪꦁꦏꦼꦏꦭꦶꦃꦥꦸꦤꦶꦏꦏꦥꦸꦫꦶꦃꦲꦤꦼꦢꦃꦲꦏꦼꦤ꧀ꦥꦥꦤ꧀ꦥꦔꦸꦩ꧀ꦥꦼꦠ꧀ꦠꦶꦥꦸꦤ꧀ꦱꦶꦥꦠꦺ꧉ꦱꦉꦁꦱꦶꦥꦠꦺꦱꦸꦩꦼꦉꦥ꧀ꦮꦺꦴꦤ꧀ꦠꦼꦤ꧀ꦥꦠꦿꦺꦴꦭꦶꦝꦠꦼꦁ꧈ꦭꦗꦼꦁꦲꦺꦁꦒꦭ꧀ꦤꦼꦩ꧀ꦥꦸꦃ꧉ꦢꦼꦢꦩꦼꦭ꧀ꦭꦶꦥꦸꦤ꧀ꦥꦶꦱ꧀ꦠꦸꦭ꧀ꦱꦲꦫꦺꦚ꧀ꦕꦺꦴꦁ꧉ꦱꦤꦭꦶꦏꦱꦫꦝꦝꦸꦭꦗꦼꦁꦱꦩꦶꦲꦚꦼꦚ꧀ꦗꦠ꧉ꦱꦶꦥꦠꦺꦏꦼꦠꦠꦺꦴꦤ꧀ꦏꦮꦤ꧀ꦥꦁꦒꦺꦴꦤꦤ꧀꧈ꦲꦶꦁꦏꦁꦠꦶꦒꦮꦺꦴꦤ꧀ꦠꦼꦤ꧀ꦲꦶꦁꦧꦢꦤ꧀꧈ꦱꦠꦸꦁꦒꦭ꧀ꦭꦶꦥꦸꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦱꦶꦫꦃ꧉ꦏꦗꦮꦶꦥꦸꦤꦶꦏ꧈ꦏꦭꦱꦩꦤ꧀ꦠꦼꦤ꧀ꦱꦫꦝꦝꦸꦮꦲꦸꦲꦸꦒꦶꦱꦒꦼꦢ꧀ꦲꦩꦼꦗꦃꦲꦶꦧꦸꦪꦸꦁꦱꦫꦸꦤ꧀꧈ꦲꦶꦁꦒꦶꦃꦥꦸꦤꦶꦏꦧꦼꦧꦻꦴꦤꦶꦥꦸꦤ꧀ꦠꦼꦔꦼꦤ꧀ꦱꦶꦥꦠꦺ꧉
꧋ꦥꦔꦢꦶꦭꦤ꧀ꦭꦤ꧀ꦢꦿꦢ꧀ꦲꦶꦁꦧꦤ꧀ꦝꦸꦁꦲꦤ꧀ꦝꦮꦃꦲꦏꦼꦤ꧀ꦲꦸꦏꦸꦩꦤ꧀ꦏꦸꦚ꧀ꦗꦫꦭꦩꦶꦤꦶꦥꦸꦤ꧀꧇꧒꧐꧇ꦠꦻꦴꦤ꧀ꦝꦠꦼꦁꦠꦼꦠꦶꦪꦁꦏꦺꦴꦩꦸꦤꦶꦱ꧀ꦏꦭꦶꦃꦤꦩꦩꦤ꧀ꦱꦸꦂꦤꦶꦭꦤ꧀ꦄꦢꦶꦩꦤ꧀꧈ꦏꦭꦶꦃꦥꦶꦱꦤ꧀ꦱꦩꦶꦠꦸꦩꦸꦠ꧀ꦲꦢꦩꦼꦭ꧀ꦒꦺꦒꦺꦫꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦤꦒꦿꦺꦏ꧀꧉
꧋ꦲꦶꦁꦏꦁꦧꦝꦺꦠꦸꦩꦸꦠ꧀ꦲꦺꦏ꧀ꦱꦩꦼꦤ꧀ꦏꦁꦒꦺꦭꦸꦩꦼꦧꦼꦠ꧀ꦲꦶꦁꦥꦩꦸꦭꦁꦔꦤ꧀ꦤꦺꦴꦂꦩꦭ꧀ꦲꦶꦁꦧ꧀ꦭꦶꦠꦂ꧈ꦲꦶꦁꦏꦁꦢꦶꦥꦸꦤ꧀ꦮꦺꦴꦤ꧀ꦠꦼꦤ꧀ꦤꦏꦼꦤ꧀ꦏꦭꦠꦁꦒꦭ꧀ꦏꦥꦶꦁ꧇꧘꧇ꦥꦺꦧꦿꦸꦮꦫꦶꦥꦸꦤꦶꦏ꧈ꦱꦢꦪꦮꦺꦴꦤ꧀ꦠꦼꦤ꧀ꦭꦫꦺ꧇꧓꧑꧓꧇꧈ꦲꦶꦁꦏꦁꦩꦁꦏꦤꦩꦸꦁꦮꦺꦴꦤ꧀ꦠꦼꦤ꧀꧇꧒꧐꧇ꦥꦁꦒꦺꦤ꧀ꦤꦤ꧀꧈ꦱꦏꦶꦁꦏꦝꦶꦫꦶꦮꦺꦴꦤ꧀ꦠꦼꦤ꧀꧇꧖꧔꧇꧈ꦱꦏꦶꦁꦔꦚ꧀ꦗꦸꦏ꧀꧇꧕꧖꧇꧈ꦱꦏꦶꦁꦠꦽꦁꦒꦭꦺꦏ꧀꧇꧒꧕꧇꧈ꦱꦏꦶꦁꦠꦸꦭꦸꦔꦒꦸꦁ꧇꧙꧔꧇ꦭꦤ꧀ꦱꦏꦶꦁꦧ꧀ꦭꦶꦠꦂ꧇꧗꧔꧇꧉
꧋ꦱꦏꦶꦁꦧꦺꦴꦒꦺꦴꦂꦏꦮꦂꦠꦺꦴꦱ꧀ꦱꦏꦼꦤ꧀꧈ꦧꦶꦭꦶꦃꦱꦩ꧀ꦥꦸꦤ꧀ꦮꦺꦴꦤ꧀ꦠꦼꦤ꧀ꦱꦼꦫꦠ꧀ꦏꦼꦏꦚ꧀ꦕꦶꦁꦔꦤ꧀ꦩꦼꦢꦭ꧀꧈ꦲꦶꦁꦏꦁꦚꦼꦧꦸꦠ꧀ꦠꦏꦼꦤ꧀ꦠꦶꦪꦁꦏꦺꦴꦩꦸꦤꦶꦱ꧀ꦕꦕꦃꦲꦶꦥꦸꦤ꧀꧇꧔꧔꧇ꦩꦭꦶꦃ꧈ꦲꦶꦁꦏꦁꦧꦝꦺꦏꦱꦶꦁꦏꦶꦂꦫꦏꦼꦤ꧀ꦝꦠꦼꦁꦝꦶꦒꦸꦭ꧀꧉ꦠꦶꦪꦁꦱꦩꦤ꧀ꦠꦼꦤ꧀ꦏꦛꦃꦲꦶꦥꦸꦤ꧀ꦮꦲꦸ꧈ꦱꦢꦪꦱꦩꦶꦲꦱ꧀ꦭꦶꦱꦏꦶꦁꦥꦫꦺꦱꦶꦝꦺꦤ꧀ꦤꦤ꧀ꦱꦼꦩꦫꦁ꧉
꧋ꦩꦶꦠꦸꦫꦸꦠ꧀ꦱꦼꦫꦠ꧀ꦥꦭꦥꦸꦫꦤ꧀꧈ꦮꦶꦮꦶꦠ꧀ꦠꦁꦒꦭ꧀ꦏꦥꦶꦁ꧇꧒꧓꧇ꦗꦤꦸꦮꦫꦶꦢꦸꦩꦸꦒꦶꦤꦶꦥꦸꦤ꧀ꦠꦁꦒꦭ꧀꧇꧒꧙꧇ꦗꦤꦸꦮꦫꦶꦲꦶꦁꦏꦁꦏꦥꦼꦁꦏꦼꦂꦥꦸꦤꦶꦏ꧈ꦲꦶꦁꦗꦮꦶꦠꦼꦔꦃꦠꦼꦠꦶꦪꦁꦲꦶꦁꦏꦁꦏꦠꦿꦗꦁꦱꦼꦱꦏꦶꦠ꧀ꦥꦺꦱ꧀ꦱꦢꦪꦮꦺꦴꦤ꧀ꦠꦼꦤ꧀꧇꧑꧔꧕꧇꧈ꦠꦶꦪꦁꦱꦩꦤ꧀ꦠꦼꦤ꧀ꦮꦲꦸꦲꦶꦁꦏꦁ꧇꧕꧕꧇ꦱꦏꦶꦁꦠꦼꦩꦁꦒꦸꦁ꧈꧇꧗꧇ꦱꦏꦶꦁꦩꦒꦼꦭꦁ꧈꧇꧗꧇ꦔꦪꦺꦴꦒꦾꦏꦂꦠ꧈꧇꧓꧘꧇ꦏ꧀ꦭꦠꦺꦤ꧀꧈꧇꧑꧕꧇ꦥꦏꦭꦺꦴꦔꦤ꧀꧈꧇꧑꧔꧇ꦠꦼꦒꦭ꧀꧈꧇꧑꧇ꦧꦽꦧꦼꦱ꧀ꦭꦤ꧀꧇꧘꧇ꦱꦏꦶꦁꦥꦸꦂꦧꦭꦶꦁꦒ꧉
꧋ꦱꦼꦫꦠ꧀ꦏꦧꦂ de Crt. ꧋ꦩꦶꦉꦁꦥꦮꦂꦠꦺꦴꦱ꧀꧈ꦧꦶꦭꦶꦃꦏꦛꦃꦥꦫꦠꦼꦠꦶꦪꦁꦱꦸꦩꦠꦿꦃꦲꦶꦁꦏꦁꦢꦼꦢꦸꦤꦸꦁꦮꦺꦴꦤ꧀ꦠꦼꦤ꧀ꦲꦶꦁꦧꦠꦮꦶ꧈ꦩꦏꦠꦼꦤ꧀ꦲꦸꦒꦶꦥꦫꦝꦺꦴꦏ꧀ꦠꦼꦂꦥꦿꦶꦧꦸꦩꦶ꧈ꦱꦩꦶꦔꦠꦸꦂꦫꦏꦼꦤ꧀ꦱꦼꦫꦠ꧀ꦥꦤꦸꦮꦸꦤꦤ꧀ꦝꦠꦼꦁꦥꦩꦫꦺꦤ꧀ꦠꦃ꧈ꦱꦸꦥꦢꦺꦴꦱ꧀ꦥꦩꦫꦺꦤ꧀ꦠꦃꦏꦂꦱꦲꦲꦤꦼꦠꦼꦥꦏꦼꦤ꧀ꦝꦺꦴꦏ꧀ꦠꦼꦂ Abdul Rivai ꦲꦶꦁꦏꦁꦱꦩꦁꦏꦺꦮꦺꦴꦤ꧀ꦠꦼꦤ꧀ꦲꦶꦁꦤꦒꦫꦶꦮꦭꦤ꧀ꦢꦶꦢꦢꦺꦴꦱ꧀ꦭꦶꦢ꧀ꦥꦺꦴꦊꦏ꧀ꦱꦿꦢ꧀꧈ꦩꦶꦤꦁꦏꦮꦼꦮꦏꦶꦭ꧀ꦭꦶꦥꦸꦤ꧀ꦠꦤꦃꦱꦸꦩꦠꦿꦃꦲꦶꦁꦏꦁꦱꦶꦱꦶꦃꦏꦶꦭꦺꦤ꧀꧉ꦩꦶꦠꦸꦫꦸꦠ꧀ꦥꦮꦂꦠꦺꦴꦱ꧀ꦱꦶꦥꦸꦤ꧀ꦱꦼꦫꦠ꧀ꦏꦧꦂꦏꦱ꧀ꦧꦸꦠ꧀ꦔꦶꦁꦒꦶꦭ꧀꧈ꦝꦺꦴꦏ꧀ꦠꦼꦂ Rivai ꦮꦲꦸꦥꦚ꧀ꦕꦺꦤ꧀ꦏꦒꦸꦁꦔꦤ꧀ꦏꦤꦶꦪꦠ꧀ꦠꦏꦺꦢꦼꦢꦊꦩ꧀ꦮꦺꦴꦤ꧀ꦠꦼꦤ꧀ꦲꦶꦁꦤꦒꦫꦶꦮꦭꦤ꧀ꦢꦶ꧉ꦄꦤꦔꦶꦁꦤꦭꦶꦏꦢꦶꦥꦸꦤ꧀ꦏꦶꦤ꧀ꦠꦸꦤ꧀ꦤꦶꦱꦼꦫꦠ꧀꧈ꦱꦸꦏꦮꦁꦱꦸꦭ꧀ꦭꦤ꧀ꦩꦤꦮꦶꦥꦩꦫꦺꦤ꧀ꦠꦃꦏꦼꦂꦱꦲꦤꦼꦠꦼꦥ꧀ꦥꦏꦼꦤ꧀ꦢꦢꦺꦴꦱ꧀ꦭꦶꦢ꧀ꦥꦺꦴꦊꦏ꧀ꦱꦿꦢ꧀꧈ꦲꦶꦁꦒꦶꦃꦧꦝꦺꦮꦁꦱꦸꦭ꧀ꦔꦗꦮꦶꦩꦭꦶꦃ꧉
꧋ꦱꦏꦶꦁꦧꦤ꧀ꦠꦼꦤ꧀ꦏꦮꦂꦠꦺꦴꦱ꧀ꦱꦏꦼꦤ꧀꧈ꦧꦶꦭꦶꦃꦏꦭꦠꦁꦒꦭ꧀ꦏꦥꦶꦁ꧇꧘꧇ꦥꦺꦧꦿꦸꦮꦫꦶꦱꦠꦸꦁꦒꦭ꧀ꦧꦫꦶꦱ꧀ꦱꦤ꧀ꦱꦫꦝꦝꦸꦲꦶꦁꦏꦁꦢꦶꦥꦸꦤ꧀ꦏꦥꦭꦤꦶꦢꦺꦤꦶꦁꦏꦥ꧀ꦠꦶꦤ꧀ Schmidhamer ꧈ꦱꦏꦶꦁꦧꦤ꧀ꦠꦼꦤ꧀ꦮꦁꦱꦸꦭ꧀ꦝꦠꦼꦁꦧꦠꦮꦶ꧈ꦱꦩꦁꦏꦺꦱꦫꦝꦝꦸꦲꦶꦁꦏꦁꦠꦏ꧀ꦱꦶꦃꦏꦤ꧀ꦠꦸꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦧꦤ꧀ꦠꦼꦤ꧀ꦤꦩꦸꦁꦮꦺꦴꦤ꧀ꦠꦼꦤ꧀ꦠꦶꦒꦁꦧꦫꦶꦱꦤ꧀꧈ꦲꦶꦁꦒꦶꦃꦥꦸꦤꦶꦏ꧇꧑꧇ꦮꦺꦴꦤ꧀ꦠꦼꦤ꧀ꦲꦶꦁꦭꦧꦸꦮꦤ꧀ꦭꦤ꧀ꦩꦼꦤꦺꦱ꧀꧈꧇꧑꧇ꦮꦺꦴꦤ꧀ꦠꦼꦤ꧀ꦲꦶꦁꦥꦤ꧀ꦝꦺꦒ꧀ꦭꦁ꧈ꦭꦤ꧀꧇꧑꧇ꦩꦭꦶꦃꦮꦺꦴꦤ꧀ꦠꦼꦤ꧀ꦲꦶꦁꦱꦺꦫꦁ꧉
꧋ꦥꦔꦢꦶꦭꦤ꧀ꦭꦤ꧀ꦢꦿꦢ꧀ꦲꦶꦁꦕꦶꦲꦩꦶꦱ꧀꧈ꦧꦺꦚ꧀ꦗꦶꦁꦠꦁꦒꦭ꧀ꦏꦥꦶꦁ꧇꧑꧔꧇ꦥꦺꦧꦿꦸꦮꦫꦶꦔꦗꦼꦁꦥꦸꦤꦶꦏ꧈ꦧꦝꦺꦩꦶꦮꦶꦠ꧀ꦠꦶꦩꦿꦶꦏ꧀ꦱꦥꦿꦏꦮꦶꦱ꧀ꦱꦶꦥꦸꦤ꧀ꦠꦶꦪꦁꦏꦺꦴꦩꦸꦤꦶꦱ꧀ꦱꦏꦮꦤ꧀ꦲꦶꦁꦏꦁꦏꦢꦏ꧀ꦮ:ꦩꦼꦗꦃꦲꦶꦥꦸꦁꦒꦮꦥꦒꦤ꧀ꦠꦺꦴꦱ꧀ꦱꦤ꧀ꦧꦁꦱꦠꦶꦪꦺꦴꦤ꧀ꦒ꧀ꦃꦮ꧀꧈ꦲꦤꦠꦺꦴꦤꦶꦲꦒꦺꦤ꧀ꦥꦸꦭꦶꦱꦶꦔꦤ꧀ꦠꦺꦴꦱ꧀ꦫꦩ꧀ꦧꦃꦏꦥꦶꦁ꧇꧑꧖꧇꧈ꦲꦤꦠꦺꦴꦤꦶꦱꦭꦃꦱꦠꦸꦁꦒꦶꦭ꧀ꦭꦶꦁꦥꦸꦁꦒꦮꦥꦸꦭꦶꦱꦶꦝꦸꦱꦸꦤ꧀꧈ꦭꦤ꧀ꦲꦤꦠꦺꦴꦤꦶꦱꦠꦸꦁꦒꦭ꧀ꦲꦒꦺꦤ꧀ꦥꦺꦭ꧀ꦥꦸꦭꦶꦱꦶ꧈ꦲꦶꦁꦏꦁꦠꦔꦤ꧀ꦤꦶꦥꦸꦤ꧀ꦏꦶꦮꦔꦤ꧀ꦠꦺꦴꦱ꧀ꦥꦸꦠꦸꦁꦧꦧꦂꦥꦶꦱꦤ꧀꧉
꧋ꦱꦏꦶꦁꦧꦤ꧀ꦝꦸꦁꦏꦮꦂꦠꦺꦴꦱ꧀ꦱꦏꦼꦤ꧀꧈ꦧꦶꦭꦶꦃꦲꦂꦠꦲꦸꦗꦸꦂꦫꦤ꧀ꦠꦸꦩꦿꦥ꧀ꦥꦸꦁꦒꦮꦱꦼꦥꦸꦂꦒꦸꦥꦼꦂꦩꦺꦤ꧀ꦱꦊꦧꦼꦠ꧀ꦠꦶꦥꦸꦤ꧀ꦠꦼꦔꦃꦲꦤ꧀ꦠꦲꦸꦤ꧀ꦥꦸꦁꦏꦱꦤ꧀ꦤꦶꦥꦸꦤ꧀ꦠꦲꦸꦤ꧀꧇꧑꧙꧒꧖꧇ꦏꦥꦼꦁꦏꦼꦂꦥꦸꦤꦶꦏ꧈ꦧꦝꦺꦏꦮꦼꦢꦭ꧀ꦭꦏꦼꦤ꧀ꦧꦺꦚ꧀ꦗꦶꦁꦥꦸꦁꦏꦱꦤ꧀ꦤꦶꦥꦸꦤ꧀ꦥꦺꦧꦿꦸꦮꦫꦶꦔꦗꦼꦁꦥꦸꦤꦶꦏ꧈ꦢꦺꦤꦺꦏꦛꦃꦲꦶꦥꦸꦤ꧀ꦱꦠꦼꦔꦃꦧ꧀ꦭꦚ꧀ꦗꦤ꧀꧉ [ 95 ]꧋ꦩꦶꦠꦸꦫꦸꦠ꧀ꦱꦼꦫꦠ꧀ꦏꦧꦂꦢꦂꦩꦏꦤ꧀ꦝ꧈ꦱꦊꦧꦼꦠ꧀ꦠꦶꦥꦸꦤ꧀ꦠꦻꦴꦤ꧀꧇꧒꧖꧇ꦲꦶꦁꦏꦁꦏꦥꦼꦁꦏꦼꦂꦥꦸꦤꦶꦏ꧈ꦏꦛꦃꦲꦶꦥꦸꦤ꧀ꦥꦿꦏꦮꦶꦱ꧀ꦲꦶꦁꦏꦁꦱꦩ꧀ꦥꦸꦤ꧀ꦢꦶꦥꦸꦤ꧀ꦫꦩ꧀ꦥꦸꦁꦔꦶꦲꦶꦁꦭꦤ꧀ꦢꦿꦢ꧀ꦱꦸꦫꦏꦂꦠ꧈ꦏꦛꦃꦲꦶꦥꦸꦤ꧀ꦱꦢꦪꦮꦺꦴꦤ꧀ꦠꦼꦤ꧀꧇꧖꧔꧖꧇ꦥꦿꦏꦮꦶꦱ꧀꧈ꦥꦿꦏꦮꦶꦱ꧀ꦱꦶꦥꦶꦭ꧀꧇꧒꧒꧔꧇꧈ꦥꦿꦏꦮꦶꦱ꧀ꦏꦿꦶꦩꦶꦤꦭ꧀꧇꧔꧒꧒꧇꧉
꧋ꦱꦩ꧀ꦥꦸꦤ꧀ꦥꦶꦤ꧀ꦠꦼꦤ꧀ꦥꦶꦤ꧀ꦠꦼꦤ꧀ꦠꦲꦸꦤ꧀ꦥꦸꦤꦶꦏ꧈ꦭꦫꦺꦭꦫꦺꦧꦭꦶꦭꦤ꧀ꦭꦺꦴꦩ꧀ꦧꦺꦴꦏ꧀ꦩꦤꦮꦶꦧꦝꦺꦲꦔ꧀ꦭꦗꦼꦁꦔꦏꦼꦤ꧀ꦥꦱꦶꦤꦲꦺꦴꦤꦶꦥꦸꦤ꧀ꦮꦺꦴꦤ꧀ꦠꦼꦤ꧀ꦲꦶꦁ Osvia ꦏꦼꦢꦃꦭꦸꦩꦼꦧꦼꦠ꧀ꦲꦶꦁ Osvia ꦩꦏꦱꦂ꧉ꦆꦁꦏꦁꦩꦏꦠꦼꦤ꧀ꦥꦸꦤꦶꦏꦠꦼꦠꦶꦪꦁꦧꦭꦶꦭꦺꦴꦩ꧀ꦧꦺꦴꦏ꧀ꦧꦺꦴꦠꦼꦤ꧀ꦕꦺꦴꦕꦺꦴꦒ꧀ꦧꦧꦂꦥꦶꦱꦤ꧀꧉ꦆꦁꦠꦲꦸꦤ꧀ꦲꦶꦁꦏꦁꦏꦥꦼꦁꦏꦼꦂꦥꦸꦤꦶꦏꦥꦺꦴꦊꦏ꧀ꦱꦿꦢ꧀ꦱꦩ꧀ꦥꦸꦤ꧀ꦔꦽꦩ꧀ꦧꦒ꧀ꦧꦧ꧀ꦥꦸꦤꦶꦏ꧉ꦩꦏꦠꦼꦤ꧀ꦲꦸꦒꦶꦥꦏꦼꦩ꧀ꦥꦭ꧀ꦭꦤ꧀ Santy ꦲꦶꦁꦧꦭꦶꦱꦩ꧀ꦥꦸꦤ꧀ꦔꦠꦸꦂꦫꦏꦼꦤ꧀ꦱꦼꦫꦠ꧀ꦥꦤꦸꦮꦸꦤ꧀ꦤꦤ꧀ꦝꦠꦼꦁꦥꦩꦫꦺꦤ꧀ꦠꦃꦲꦒꦼꦁꦏꦤ꧀ꦛꦶꦏꦧꦤ꧀ꦠꦸꦲꦶꦁꦥꦢꦸꦏꦠꦸꦮꦤ꧀ꦫꦺꦱꦶꦝꦺꦤ꧀ꦲꦶꦁꦧꦭꦶ꧉ꦱꦥꦸꦤꦶꦏꦥꦤꦸꦮꦸꦤ꧀ꦤꦶꦥꦸꦤ꧀ꦮꦲꦸꦏꦲꦶꦢꦺꦤ꧀ꦲꦶꦁꦤꦒꦫꦶ꧈ꦲꦶꦁꦒꦶꦃꦥꦸꦤꦶꦏꦭꦫꦺꦧꦭꦶꦭꦺꦴꦩ꧀ꦧꦺꦴꦏ꧀ꦏꦺꦔꦶꦁꦔ꧀ꦭꦗꦼꦁꦔꦏꦼꦤ꧀ꦥꦱꦶꦤꦲꦺꦴꦤ꧀ꦤꦶꦥꦸꦤ꧀ꦝꦠꦼꦁ Osvia ꦲꦶꦁꦥꦿꦧꦭꦶꦁꦒ꧈ꦮꦶꦮꦶꦠ꧀ꦏꦸꦂꦱꦸꦱ꧀ꦲꦺꦁꦒꦭ꧀ꦲꦶꦁꦏꦁꦠꦸꦩꦥꦏ꧀ꦥꦸꦤꦶꦏ꧉
꧋ꦢꦸꦩꦸꦒꦶꦤꦶꦁꦱꦩꦁꦏꦺꦱꦺꦂꦠꦶꦥꦶꦏꦠ꧀ꦠꦩꦠ꧀ꦲꦶꦁꦥꦩꦸꦭꦁꦔꦤ꧀ꦲꦁꦏ II ꦥꦸꦤꦶꦏꦏꦠꦼꦠꦼꦥ꧀ꦥꦏꦼꦤ꧀ꦩꦮꦶꦱꦺꦒꦼꦭ꧀ꦉꦒꦶ f 1.50꧈ꦲꦶꦁꦏꦁꦩꦏꦠꦼꦤ꧀ꦮꦲꦸꦫꦕꦏ꧀ꦏꦶꦥꦸꦤ꧀ꦏꦁꦒꦺꦠꦶꦪꦁꦱꦼꦥꦸꦃꦲꦶꦥꦸꦤ꧀ꦭꦫꦺꦭꦫꦺꦥꦚ꧀ꦕꦺꦤ꧀ꦲꦶꦁꦒꦶꦃꦏꦮꦿꦠ꧀ꦠꦤ꧀꧈ꦥꦿꦩꦶꦭꦏꦛꦃꦱꦔꦼꦠ꧀ꦝꦶꦥ꧀ꦭꦺꦴꦩꦃꦠꦩꦠ꧀ꦠꦤ꧀ꦲꦁꦏ II ꦲꦶꦁꦏꦁꦱꦩꦶꦧꦺꦴꦠꦼꦤ꧀ꦢꦶꦥꦸꦤ꧀ꦠꦼꦧꦸꦱ꧀꧉ꦆꦁꦏꦁꦥꦸꦤꦶꦏꦥꦫꦲꦶꦤ꧀ꦱꦼꦥꦺꦏ꧀ꦠꦸꦂꦱꦩ꧀ꦥꦸꦤ꧀ꦏꦼꦉꦥ꧀ꦚꦸꦮꦸꦤ꧀ꦤꦏꦼꦤ꧀ꦱꦸꦢꦤ꧀ꦥꦲꦺꦴꦱ꧀ꦱꦺꦒꦼꦭ꧀ꦱꦩꦤ꧀ꦠꦼꦤ꧀ꦮꦲꦸ꧈ꦱꦲꦲꦶꦁꦥꦺꦴꦊꦏ꧀ꦱꦿꦢ꧀ꦲꦸꦒꦶꦱꦩ꧀ꦥꦸꦤ꧀ꦤꦠꦺꦏꦉꦩ꧀ꦧꦒ꧀꧉ꦱꦩꦁꦏꦺꦮꦺꦴꦤ꧀ꦠꦼꦤ꧀ꦏꦫꦩ꧀ꦥꦸꦁꦔꦤ꧀꧈ꦧꦶꦭꦶꦃꦧꦺꦚ꧀ꦗꦶꦁꦱꦶꦪꦩ꧀ꦔꦗꦼꦁꦥꦸꦤꦶꦏꦱꦺꦒꦼꦭ꧀ꦭꦶꦁꦝꦶꦥ꧀ꦭꦺꦴꦩꦃꦧꦺꦴꦠꦼꦤ꧀ꦉꦒꦶ f 1.50꧈ꦲꦤꦔꦶꦁꦤꦩꦸꦁꦉꦒꦶ f 0.50꧉ꦭꦺꦴꦮꦸꦁ꧉
꧋ꦱꦼꦫꦠ꧀ꦏꦧꦂꦱꦼꦢꦾꦠꦩꦩꦂꦠꦺꦴꦱ꧀ꦱꦏꦼꦤ꧀:ꦱꦏꦶꦁꦲꦢꦲꦢꦤꦶꦥꦸꦤ꧀ꦠꦸꦮꦤ꧀ꦢꦿ꧉ꦪꦥ꧀꧈ꦧꦺꦚ꧀ꦗꦶꦁꦮꦸꦭꦤ꧀ꦗꦸꦭꦶꦔꦗꦼꦁꦥꦸꦤꦶꦏꦲꦶꦁꦔꦪꦺꦴꦒꦾꦏꦂꦠꦧꦝꦺꦢꦶꦥꦸꦤ꧀ꦮꦺꦴꦤ꧀ꦠꦼꦤ꧀ꦤꦶꦥꦩꦸꦭꦔꦤ꧀ H.C.S. ꦥꦂꦠꦶꦏꦸꦭꦶꦂ꧈ꦱꦥꦸꦤꦶꦏꦕꦭꦺꦴꦤ꧀ꦩꦸꦫꦶꦢ꧀ꦱꦩ꧀ꦥꦸꦤ꧀ꦮꦺꦴꦤ꧀ꦠꦼꦤ꧀ꦱꦺꦏꦼꦠ꧀ꦠꦤ꧀꧉
꧋ꦮꦺꦴꦤ꧀ꦠꦼꦤ꧀ꦥꦮꦂꦠꦺꦴꦱ꧀꧈ꦧꦶꦭꦶꦃꦲꦶꦁꦏꦁꦧꦸꦥꦠꦶꦲꦶꦁꦏꦸꦭꦺꦴꦤ꧀ꦥꦿꦒꦲꦔ꧀ꦮꦺꦴꦤ꧀ꦠꦼꦤ꧀ꦤꦏꦼꦤ꧀ꦫꦺꦏꦢꦪꦏꦁꦒꦺꦢꦂꦩꦝꦠꦼꦁꦥꦫꦠꦼꦠꦶꦪꦁꦲꦶꦁꦧꦮꦃꦲꦶꦥꦸꦤ꧀ꦲꦶꦁꦏꦁꦱꦩꦶꦏꦧꦼꦤ꧀ꦤꦤ꧀ꦲꦶꦁꦏꦁꦏꦥꦼꦁꦏꦼꦂꦥꦸꦤꦶꦏ꧉ꦩꦶꦠꦸꦫꦸꦠ꧀ꦕꦫꦶꦪꦺꦴꦱ꧀ꦱꦶꦥꦸꦤ꧀ꦠꦶꦪꦁꦔꦿꦶꦏꦸ꧈ꦧꦼꦤꦱꦒꦼꦝꦒ꧀ꦒꦤ꧀ꦥꦸꦤꦶꦏꦏꦊꦧꦼꦠ꧀ꦲꦶꦁꦏꦁꦲꦒꦼꦁꦥꦶꦪꦩ꧀ꦧꦏ꧀ꦲꦶꦁꦱꦊꦧꦼꦠ꧀ꦠꦶꦥꦸꦤ꧀ꦏꦭꦶꦃꦢꦱꦠꦻꦴꦤ꧀ꦲꦶꦁꦏꦁꦱꦩ꧀ꦥꦸꦤ꧀꧉
꧋ꦱꦏꦶꦁꦱꦮꦃꦭꦸꦤ꧀ꦠꦏꦮꦂꦠꦺꦴꦱ꧀ꦱꦏꦼꦤ꧀꧈ꦧꦶꦭꦶꦃꦏꦭꦢꦶꦤ꧀ꦠꦼꦤ꧀ꦱꦼꦤꦺꦤ꧀ꦲꦶꦁꦏꦁꦏꦥꦼꦁꦏꦼꦂꦥꦸꦤꦶꦏ꧈ꦧꦫꦁꦧꦫꦔꦶꦥꦸꦤ꧀ꦒꦸꦫꦸꦥꦿꦶꦧꦸꦩꦶꦠꦼꦠꦶꦒ꧈ꦲꦶꦁꦏꦁꦢꦺꦫꦺꦁꦢꦔꦸꦥꦸꦤꦶꦏꦥꦶꦤꦼꦗꦃꦲꦤ꧀ꦲꦶꦁꦥꦫꦏꦺꦴꦩꦸꦤꦶꦱ꧀꧈ꦏꦭꦺꦭꦁꦔꦏꦼꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦏꦩꦂꦧꦺꦴꦭꦃ꧈ꦥꦼꦥꦗꦼꦁꦔꦤ꧀ꦤꦶꦥꦸꦤ꧀ꦱꦲꦺꦱꦔꦼꦠ꧀꧈ꦧꦫꦁꦧꦫꦁꦮꦻꦴꦏꦠꦏ꧀ꦱꦶꦂꦤꦩꦸꦁꦉꦒꦶ f 150.-꧈ꦲꦶꦁꦩꦁꦏꦱꦉꦁꦏꦭꦺꦭꦁꦱꦒꦼꦢ꧀ꦥꦗꦼꦁ f 1300.-.
꧋ꦥꦔꦢꦶꦭ꧀ꦭꦤ꧀ꦭꦤ꧀ꦢꦿꦢ꧀ꦲꦶꦁꦨꦠꦮꦶ꧈ꦏꦭꦠꦁꦒꦭ꧀ꦏꦥꦶꦁ꧇꧗꧇ꦥꦺꦧꦿꦸꦮꦫꦶꦥꦸꦤꦶꦏ꧈ꦲꦔꦿꦩ꧀ꦥꦸꦁꦔꦶꦥꦿꦏꦮꦶꦱ꧀ꦱꦶꦥꦸꦤ꧀ꦥꦫꦏꦺꦴꦩꦸꦤꦶꦱ꧀ꦲꦶꦁꦏꦁꦱꦩꦶꦲꦤꦼꦩ꧀ꦥꦸꦃꦉꦱꦺꦂꦱꦶꦂꦏꦼꦠꦺꦃ꧉ꦱꦢꦪꦥꦱꦏꦶꦠ꧀ꦠꦤ꧀ꦏꦲꦁꦒꦼꦥ꧀ꦊꦥꦠ꧀ꦗꦭꦂꦫꦤ꧀ꦲꦢꦩꦼꦭ꧀ꦏꦫꦩ꧀ꦩꦤ꧀ꦱꦲꦧꦝꦺꦚꦺꦴꦧꦶꦲꦩꦽꦗꦪꦠꦶꦪꦁ꧈ꦏꦤ꧀ꦛꦶꦏꦉꦩ꧀ꦧꦒ꧀ꦫꦸꦩꦶꦪꦶꦤ꧀꧉ꦄꦩ꧀ꦱꦶꦂꦧꦶꦤ꧀ꦱꦭ꧀ꦧꦶꦤꦶꦲꦶꦁꦏꦁꦲꦔꦏꦼꦤ꧀ꦤꦶꦱꦢꦪ꧈ꦥꦲꦸꦏꦸꦩ꧀ꦩꦤ꧀ꦤꦶꦥꦸꦤ꧀ꦢꦶꦥꦸꦤ꧀ꦱꦸꦢ꧈ꦢꦢꦺꦴꦱ꧀ꦭꦗꦼꦁꦤꦩꦸꦁꦏꦥꦠꦿꦥ꧀ꦥꦤ꧀ꦥꦲꦸꦏꦸꦩ꧀ꦩꦤ꧀ꦭꦩꦶꦤꦶꦥꦸꦤ꧀꧇꧑꧖꧇ꦠꦲꦸꦤ꧀꧉ꦗꦸꦲꦫꦶꦥꦲꦸꦏꦸꦩ꧀ꦩꦤꦶꦥꦸꦤ꧀ꦢꦶꦥꦸꦤ꧀ꦲꦮꦿꦠꦏ꧀ꦏꦼꦤ꧀꧈ꦗꦭꦫꦤ꧀ꦚꦺꦴꦭꦺꦴꦁꦥꦶꦱ꧀ꦠꦸꦭ꧀꧈ꦠꦸꦂꦠꦤ꧀ꦱꦃꦒꦺꦴꦫꦺꦴꦃꦏꦺꦩꦮꦺꦴꦤ꧀꧈ꦲꦩꦶꦭꦭꦗꦼꦁꦏꦥꦠꦿꦥ꧀ꦥꦤ꧀ꦥꦲꦸꦏꦸꦩ꧀ꦩꦤ꧀ꦭꦩꦶꦤꦶꦥꦸꦤ꧀꧇꧑꧘꧇ꦠꦲꦸꦤ꧀꧉ꦫꦱ꧀ꦢꦶꦏꦲꦸꦏꦸꦩ꧀꧇꧑꧕꧇ꦠꦲꦸꦤ꧀꧈ꦭꦤ꧀ꦩꦸꦲꦩꦢ꧀ꦄꦭꦶ꧇꧑꧕꧇꧉ꦩꦸꦲꦩꦢ꧀ꦧꦶꦤ꧀ꦱꦏ꧀ꦧꦃꦢꦶꦥꦸꦤ꧀ꦱꦸꦢꦲꦸꦏꦸꦩ꧀ꦩꦤ꧀ꦤꦶꦥꦸꦤ꧀ꦗꦭꦫꦤ꧀ꦠꦏ꧀ꦱꦶꦃꦏꦼꦭꦫꦺꦤ꧀ꦤꦼꦤ꧀꧈ꦲꦶꦁꦒꦶꦃꦥꦸꦤꦶꦏ꧇꧑꧓꧇ꦠꦲꦸꦤ꧀꧉ꦎꦱꦶꦤ꧀ꦭꦤ꧀ꦎꦩꦂꦲꦔꦏꦼꦤ꧀꧈ꦲꦩꦶꦭꦲꦸꦏꦸꦩ꧀ꦩꦤ꧀ꦲꦸꦒꦶꦱꦩꦶꦏꦱꦸꦢ꧈ꦤꦩꦸꦁ꧇꧑꧒꧇ꦠꦲꦸꦤ꧀꧉ꦱꦢꦪꦮꦲꦸꦏꦱꦸꦢꦏꦭꦶꦃꦲꦤ꧀ꦲꦸꦏꦸꦩ꧀ꦩꦤꦶꦥꦸꦤ꧀ꦏꦭꦢꦶꦥꦸꦤ꧀ꦠꦲꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦥꦏꦸꦚ꧀ꦗꦫꦤ꧀꧉
꧋ꦱꦏꦶꦁꦥꦝꦁꦏꦮꦂꦠꦺꦴꦱ꧀ꦱꦏꦼꦤ꧀:ꦏꦭꦩꦶꦭꦶꦠꦺꦂꦏꦭꦶꦃꦲꦔꦼꦠꦼꦂꦫꦏꦼꦤ꧀ꦏꦺꦴꦩꦸꦤꦶꦱ꧀ꦏꦭꦶꦃ꧈ꦮꦺꦴꦤ꧀ꦠꦼꦤ꧀ꦲꦶꦁꦱꦕꦼꦭꦏ꧀ꦏꦶꦁꦭꦸꦧꦸꦏ꧀ꦧꦶꦠꦸꦫꦤ꧀꧈ꦩꦶꦭꦶꦠꦺꦂꦏꦼꦏꦭꦶꦃꦮꦲꦸꦲꦔ꧀ꦭꦶꦭꦤꦶꦠꦶꦪꦁꦏꦼꦏꦭꦶꦃꦲꦶꦁꦏꦁꦏꦲꦼꦠꦼꦂꦫꦏꦼꦤ꧀꧈ꦤꦼꦝꦮꦺꦴꦤ꧀ꦠꦼꦤ꧀ꦲꦶꦁꦱꦠꦸꦁꦒꦶꦭ꧀ꦭꦶꦁꦮꦤ꧀ꦢꦺ꧉ꦏꦭꦱꦩꦤ꧀ꦠꦼꦤ꧀ꦏꦺꦴꦩꦸꦤꦶꦱ꧀ꦏꦼꦏꦭꦶꦃꦮꦲꦸꦢꦶꦥꦸꦤ꧀ꦲꦸꦕꦸꦭ꧀ꦭꦶꦧ꧀ꦭꦼꦁꦒꦸꦤꦶꦥꦸꦤ꧀꧈ꦲꦤꦁꦔꦶꦁꦲꦸꦗꦸꦓꦸꦗꦸꦒ꧀ꦭꦗꦼꦁꦲꦔꦽꦧꦠ꧀ꦭꦢꦶꦁꦔꦶꦥꦸꦤ꧀ꦲꦶꦁꦏꦁꦒꦝꦃꦮꦤ꧀ꦢꦺ꧈ꦱꦲꦭꦗꦼꦁꦲꦤꦼꦩ꧀ꦥꦸꦃꦩꦶꦭꦶꦠꦺꦂꦏꦭꦶꦃꦮꦲꦸ꧉ꦩꦶꦭꦶꦠꦺꦂꦏꦭꦶꦃꦥꦶꦱꦤ꧀ꦱꦩꦶꦤꦤ꧀ꦝꦁꦠꦠꦸ꧈ꦲꦶꦁꦏꦁꦱꦠꦸꦁꦒꦭ꧀ꦲꦶꦁꦠꦔꦤ꧀ꦤꦶꦥꦸꦤ꧀꧈ꦱꦠꦸꦁꦒꦭꦶꦥꦸꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦧꦁꦏꦺꦏ꧀ꦏꦤ꧀ꦤꦶꦥꦸꦤ꧀꧈ꦏꦺꦴꦩꦸꦤꦶꦱ꧀ꦮꦲꦸꦭꦗꦼꦁꦥꦶꦤꦼꦗꦃꦲꦤ꧀꧉
꧋ꦩꦶꦠꦸꦫꦸꦠ꧀ꦥꦮꦂꦠꦺꦴꦱ꧀ꦱꦶꦥꦸꦤ꧀ꦱꦼꦫꦠ꧀ꦏꦧꦂ A.I.D.꧈ꦎꦪꦺꦴꦲꦭꦶꦪꦱ꧀ꦄꦃꦪ꧉ꦲꦶꦁꦏꦁꦏꦊꦥꦠ꧀ꦠꦤ꧀ꦠꦸꦩꦸꦠ꧀ꦲꦢꦩꦼꦭ꧀ꦒꦺꦒꦺꦂꦫꦤ꧀ꦏꦺꦴꦩꦸꦤꦶꦱ꧀ꦮꦺꦴꦤ꧀ꦠꦼꦤ꧀ꦲꦶꦁꦠꦱꦶꦏ꧀ꦩꦭꦪꦃ꧈ꦢꦺꦤꦶꦁꦥꦔꦢꦶꦭ꧀ꦭꦤ꧀ꦭꦤ꧀ꦢꦿꦢ꧀ꦲꦶꦁꦠꦱꦶꦏ꧀ꦩꦭꦪꦃ꧈ꦏꦥꦠꦿꦥ꧀ꦥꦤ꧀ꦲꦸꦏꦸꦩ꧀ꦩꦤ꧀ꦏꦸꦚ꧀ꦗꦫꦭꦩꦶꦤꦶꦥꦸꦤ꧀꧇꧑꧓꧇ꦠꦲꦸꦤ꧀꧉
꧋ꦱꦏꦶꦁꦱꦺꦫꦁꦏꦮꦂꦠꦺꦴꦱ꧀ꦱꦏꦼꦤ꧀:ꦥꦔꦢꦶꦭ꧀ꦭꦤ꧀ꦭꦤ꧀ꦢꦿꦢ꧀ꦲꦶꦁꦔꦿꦶꦏ꧈ꦏꦭꦠꦁꦒꦭ꧀ꦏꦥꦶꦁ꧇꧘꧇ꦥꦺꦧꦿꦸꦮꦫꦶꦥꦸꦤꦶꦏ꧈ꦔꦿꦩ꧀ꦥꦸꦁꦔꦶꦥꦿꦏꦮꦶꦱ꧀ꦒꦺꦒꦺꦂꦫꦤ꧀ꦏꦺꦴꦩꦸꦤꦶꦱ꧀ꦲꦶꦁꦥꦩꦫꦪꦤ꧀꧉ꦮꦸꦱꦤꦤꦶꦥꦸꦤ꧀:ꦝꦩꦶꦫꦶꦭꦤ꧀ꦲꦗꦶꦱꦠꦿꦏꦥꦠꦿꦥ꧀ꦥꦤ꧀ꦲꦸꦏꦸꦩ꧀ꦩꦤ꧀ꦏꦸꦚ꧀ꦗꦫꦭꦩꦶꦤꦶꦥꦸꦤ꧀꧇꧑꧕꧇ꦠꦲꦸꦤ꧀꧈ꦎꦩꦂ꧈ꦲꦗꦶꦝꦺꦴꦪꦺꦴꦃꦭꦤ꧀ꦲꦗꦶꦢꦸꦭ꧀ꦱꦭꦩ꧀꧇꧑꧓꧇ꦠꦲꦸꦤ꧀꧈ꦭꦤ꧀ꦲꦗꦶꦄꦧꦸꦧꦏꦂ꧇꧑꧒꧇ꦠꦲꦸꦤ꧀꧉ꦱꦢꦪꦮꦲꦸꦏꦤ꧀ꦛꦶꦏꦱꦸꦢꦏꦭꦶꦲꦤ꧀ꦱꦢꦔꦸꦤꦶꦥꦸꦤ꧀ꦢꦶꦥꦸꦤ꧀ꦠꦲꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦥꦏꦸꦚ꧀ꦗꦫꦤ꧀꧉
Aneta ꦩꦂꦠꦺꦴꦱ꧀ꦱꦏꦼꦤ꧀ꦱꦏꦶꦁꦩꦏꦱꦂ꧈ꦧꦶꦭꦶꦃꦲꦶꦁꦏꦤ꧀ꦠꦺꦴꦂꦫꦶꦥꦸꦤ꧀ꦠꦸꦮꦤ꧀ꦤꦺꦴꦠꦫꦶꦱ꧀ Pischel ꦲꦶꦁꦄꦩ꧀ꦧꦺꦴꦤ꧀꧈ꦏꦏꦶꦫꦁꦔꦤ꧀ꦲꦂꦠꦏꦛꦃꦲꦶꦥꦸꦤ꧀ f 60.000.-,꧈ꦲꦶꦁꦒꦶꦃꦥꦸꦤꦶꦏꦢꦸꦩꦸꦤꦸꦁꦲꦂꦠꦭꦺꦭꦁꦔꦤ꧀꧉ꦠꦸꦮꦤ꧀ꦤꦺꦴꦠꦫꦶꦱ꧀ꦮꦲꦸꦱꦩ꧀ꦥꦸꦤ꧀ꦲꦔꦏꦼꦤ꧀ꦤꦶꦱꦢꦪꦏꦊꦥꦠ꧀ꦠꦤ꧀ꦤꦶꦥꦸꦤ꧀꧉
꧋ꦮꦺꦴꦤ꧀ꦠꦼꦤ꧀ꦥꦮꦂꦠꦺꦴꦱ꧀ꦧꦶꦭꦶꦃꦱꦊꦧꦼꦠ꧀ꦠꦶꦥꦸꦤ꧀ꦠꦲꦸꦤ꧀ꦥꦸꦤꦶꦏ꧈ꦤꦒꦫꦶꦧꦝꦺꦮꦶꦮꦶꦠ꧀ꦪꦱꦧꦸꦮꦺꦤ꧀ꦠꦸꦩꦿꦥ꧀ꦠꦼꦠꦶꦪꦁꦲꦶꦁꦏꦁꦕꦼꦏꦥ꧀ꦥꦔꦗꦂꦫꦤ꧀ꦤꦶꦥꦸꦤ꧀꧈ꦲꦢꦼꦒ꧀ꦒꦶꦁꦧꦸꦮꦺꦤ꧀ꦮꦲꦸꦮꦺꦴꦤ꧀ꦠꦼꦤ꧀ꦲꦶꦁꦱꦕꦼꦭꦏ꧀ꦏꦶꦁꦧꦤ꧀ꦝꦸꦁ꧉ꦮꦿꦒꦢ꧀ꦢꦶꦥꦸꦤ꧀ꦏꦠꦏ꧀ꦱꦶꦂꦮꦺꦴꦤ꧀ꦠꦼꦤ꧀ f 500.000.-. [ 96 ][Durma]
꧄ꦒꦗꦃꦮꦸꦭꦸꦁꦒꦸꦱ꧀ꦠꦶꦤꦺꦥꦶꦤꦥꦶꦫꦶꦁꦔꦤ꧀ ꦲꦺꦃꦥꦤ꧀ꦝꦺꦴꦒꦱꦶꦫꦺꦏ꧀ꦏꦶ ꦥꦫꦤ꧀ꦏꦪꦸꦤꦶꦫ ꦢꦺꦤꦺꦲꦔꦺꦕꦲꦺꦕ ꦏꦚ꧀ꦕꦤ꧀ꦠꦲꦏꦺꦃꦔꦼꦩꦱ꧀ꦱꦶ ꦠꦤ꧀ꦠꦸꦭꦸꦁꦪꦸꦢ ꦧꦪꦢꦺꦫꦤ꧀ꦠꦶꦲꦼꦤ꧀ꦠꦶꦁ
꧄ꦗꦪꦺꦁꦱꦫꦶꦩꦺꦱꦼꦩ꧀ꦱꦶꦒꦿꦤꦶꦠꦶꦃꦏꦸꦢ ꦒꦩ꧀ꦧꦶꦫꦥꦸꦤꦁꦢꦱꦶꦃ ꦩꦾꦁꦥꦫꦏꦢꦺꦪꦤ꧀ ꦥꦉꦁꦢꦺꦤ꧀ꦚꦠꦸꦩꦤ꧀ꦢꦁ ꦩꦶꦮꦃꦫꦢꦺꦤ꧀ꦮꦁꦱꦺꦁꦱꦫꦶ ꦲꦤꦶꦠꦶꦃꦏꦸꦢ ꦤꦤ꧀ꦢꦼꦂꦔꦩꦸꦏ꧀ꦫꦸꦩꦶꦪꦶꦤ꧀
꧄ꦏꦼꦧꦺꦴꦠꦫꦠꦺꦭꦤ꧀ꦏꦼꦧꦺꦴꦏꦤꦶꦒꦫ ꦉꦗꦱꦢꦠꦤ꧀ꦏꦫꦶ ꦩꦾꦁꦏꦼꦧꦺꦴꦏꦼꦤꦁꦔ ꦩꦾꦁꦕꦫꦁꦩꦤ꧀ꦝꦭꦶꦏ ꦭꦤ꧀ꦕꦫꦁꦤꦒꦧꦤ꧀ꦢꦺꦏ꧀ꦏꦶ ꦒꦾꦤ꧀ꦚꦠꦤ꧀ꦠꦼꦧꦃ ꦫꦸꦩꦼꦏ꧀ꦱꦺꦁꦏꦤꦤ꧀ꦏꦺꦫꦶ
꧄ꦱꦶꦫꦫꦁꦒꦤꦫꦤ꧀ꦠꦏꦩꦸꦁꦒꦺꦁꦔꦂꦱ ꦭꦤ꧀ꦏꦼꦧꦺꦴꦥꦤ꧀ꦝꦺꦴꦒꦺꦏ꧀ꦏꦶ ꦩꦕꦤ꧀ꦮꦸꦭꦸꦁꦱꦶꦫ ꦱꦩꦾꦤꦶꦤ꧀ꦝꦶꦲꦶꦮꦢꦾ ꦒꦗꦃꦮꦸꦭꦸꦁꦮꦸꦱ꧀ꦫꦸꦩꦶꦪꦶꦤ꧀ ꦲꦠꦶꦭꦂꦮꦢꦾ ꦩꦔꦩꦸꦏ꧀ꦔꦺꦴꦧꦿꦏ꧀ꦲꦧꦿꦶꦏ꧀
꧄ꦗꦪꦺꦁꦱꦫꦶꦏꦂꦱꦚꦩꦔꦤ꧀ꦠꦼꦥ꧀ꦪꦸꦢ ꦱꦩ꧀ꦥꦸꦤ꧀ꦠꦼꦩ꧀ꦥꦸꦃꦏꦁꦧꦫꦶꦱ꧀ ꦫꦩꦺꦥꦸꦤꦁꦪꦸꦢ ꦥꦁꦒꦶꦃꦥꦝꦥꦿꦮꦶꦫ ꦠꦤ꧀ꦲꦤꦏꦁꦔꦸꦕꦥ꧀ꦲꦗꦿꦶꦃ ꦱꦸꦫꦏ꧀ꦒꦸꦩꦼꦫꦃ ꦏꦢꦾꦏꦉꦔꦺꦁꦭꦔꦶꦠ꧀
꧄ꦢꦠꦤ꧀ꦢꦔꦸꦮꦻꦴꦢꦺꦤꦶꦫꦲꦪꦸꦢ ꦱꦏꦶꦁꦫꦩꦺꦤ꧀ꦤꦶꦁꦗꦸꦫꦶꦠ꧀ ꦮꦁꦏꦺꦱꦸꦁꦱꦸꦤ꧀ꦠꦸꦩ꧀ꦥꦁ ꦠꦶꦤꦺꦴꦤ꧀ꦲꦮꦼꦮꦸꦏꦶꦫꦤ꧀ ꦢꦶꦥꦠꦶꦩꦠꦲꦸꦤ꧀ꦩꦠꦶ ꦲꦼꦤ꧀ꦝꦱ꧀ꦱꦺꦥꦼꦕꦃ ꦫꦁꦒꦲꦶꦁꦏꦁꦩꦼꦗꦃꦲꦶ
꧄ꦄꦢꦶꦥꦠꦶꦲꦶꦁꦧꦭꦶꦠꦂꦱꦩ꧀ꦥꦸꦤ꧀ꦥꦼꦗꦃ ꦢꦶꦥꦠꦶꦱꦲꦺꦴꦱꦿꦒꦶ ꦩꦸꦂꦢꦚꦏꦲꦶꦫꦱ꧀ ꦢꦶꦥꦠꦶꦥꦗꦁꦥꦼꦗꦃ ꦒꦗꦃꦮꦸꦭꦸꦁꦏꦁꦩꦠꦺꦤ꧀ꦤꦶ ꦒꦼꦩ꧀ꦥꦁꦱꦸꦃꦱꦶꦂꦤ ꦲꦶꦁꦏꦁꦥꦫꦢꦶꦥꦠꦶ
꧄ꦄꦢꦶꦥꦠꦶꦲꦶꦁꦥꦼꦁꦒꦶꦁꦱꦩ꧀ꦥꦸꦤ꧀ꦏꦧꦤ꧀ꦢ ꦲꦶꦁꦭꦱꦼꦩ꧀ꦄꦢꦶꦥꦠꦶ ꦲꦥꦶꦲꦥꦶꦭꦺꦤ ꦲꦩꦺꦴꦂꦲꦶꦁꦩꦪꦶꦠ꧀ꦏꦛꦃ ꦏꦼꦧꦺꦴꦥꦊꦤ꧀ꦛꦸꦩꦫꦤ꧀ꦤꦶ ꦱꦩ꧀ꦥꦸꦤ꧀ꦧꦶꦤꦤ꧀ꦢ ꦲꦶꦁꦭꦱꦼꦩ꧀ꦄꦢꦶꦥꦠꦶ
꧄ꦱꦿꦶꦩꦒꦸꦮꦭꦸꦩꦪꦸꦲꦠꦶꦭꦂꦧꦭ ꦩꦏ꧀ꦱꦶꦃꦲꦤꦶꦠꦶꦃꦲꦺꦱ꧀ꦛꦶ ꦗꦪꦺꦁꦱꦫꦶꦩꦶꦪꦠ꧀ ꦱꦶꦒꦿꦔꦿꦥ꧀ꦏꦼꦤ꧀ꦠꦸꦫꦁꦒ ꦱꦁꦤꦠꦥꦶꦤꦼꦒꦠ꧀ꦔꦂꦱꦶ ꦢꦺꦗꦪꦺꦁꦱꦼꦏꦂ ꦤꦫꦶꦏ꧀ꦱꦫꦩ꧀ꦥꦁꦲꦒ꧀ꦭꦶꦱ꧀
꧄ꦮꦤ꧀ꦠꦶꦮꦤ꧀ꦠꦶꦱꦶꦤꦫꦩ꧀ꦥꦁꦢꦠꦤ꧀ꦏꦼꦤ ꦏꦭꦤꦗꦪꦺꦁꦱꦫꦶ ꦱꦁꦤꦠꦺꦁꦩꦒꦸꦮ ꦕꦶꦤꦤ꧀ꦝꦏ꧀ꦩꦸꦂꦢꦤꦶꦫ ꦗꦸꦩꦼꦤꦼꦁꦭꦸꦲꦸꦂꦫꦶꦁꦲꦺꦱ꧀ꦛꦶ ꦄꦚ꧀ꦗꦪꦺꦁꦱꦼꦏꦂ ꦱꦶꦫꦱꦿꦶꦤꦫꦥꦠꦶ
꧄ꦲꦶꦁꦩꦒꦸꦮꦮꦸꦱ꧀ꦥꦶꦤꦚ꧀ꦕꦱ꧀ꦩꦸꦂꦢꦤꦶꦫ ꦱꦸꦫꦏ꧀ꦒꦸꦩꦸꦫꦸꦃꦲꦠꦿꦶ ꦮꦸꦱ꧀ꦒꦼꦩ꧀ꦥꦁꦱꦸꦃꦱꦶꦂꦤ ꦮꦢꦾꦤꦺꦥꦿꦢꦶꦥꦠꦾ ꦭꦸꦩꦪꦸꦱꦶꦱꦤꦶꦁꦥꦠꦶ ꦱꦩꦶꦱꦱꦫꦤ꧀ ꦏꦸꦛꦤꦺꦏꦁꦢꦺꦤ꧀ꦲꦸꦁꦱꦶ
꧄ꦮꦺꦴꦁꦏꦗꦪꦺꦁꦱꦫꦺꦤ꧀ꦥꦿꦱꦩꦾꦧꦼꦧꦤ꧀ꦝꦁ ꦲꦺꦤ꧀ꦝꦺꦥꦼꦝꦁꦭꦤ꧀ꦠꦩ꧀ꦱꦶꦂ ꦒꦩꦼꦭꦤ꧀ꦠꦶꦤꦼꦩ꧀ꦧꦁ ꦠꦼꦔꦫꦩꦼꦤꦁꦲꦥꦿꦁ ꦒꦩ꧀ꦧꦶꦫꦏꦁꦥꦸꦤꦁꦢꦱꦶꦃ ꦪꦠꦔꦤ꧀ꦢꦶꦏ ꦏꦭꦤꦗꦪꦺꦁꦱꦫꦶ
꧄ꦏꦏꦁꦫꦁꦒꦤꦫꦤ꧀ꦠꦏꦭꦃꦩꦺꦤ꧀ꦠꦫ ꦏꦧꦺꦃꦏꦢꦁꦔꦶꦫꦺꦏꦶ ꦭꦃꦱꦶꦫꦧꦼꦏ꧀ꦠꦲ ꦧꦸꦫꦸꦤꦼꦤ꧀ꦩꦸꦁꦱꦸꦲꦶꦫ ꦧꦺꦴꦪꦺꦴꦁꦔꦼꦤ꧀ꦏꦁꦲꦤꦏ꧀ꦫꦧꦶ ꦪꦺꦤ꧀ꦲꦤꦧꦁꦒ ꦮꦱꦶꦱꦏ꧀ꦤꦢꦺꦤ꧀ꦩꦠꦶ
꧄ꦱꦶꦫꦫꦁꦒꦤꦫꦤ꧀ꦠꦏꦤꦸꦭꦾꦩꦺꦤ꧀ꦠꦂ ꦧꦸꦝꦭ꧀ꦱꦏꦢꦁꦤꦺꦏ꧀ꦏꦶ ꦲꦶꦁꦔꦶꦫꦶꦁꦲꦶꦁꦧꦭ ꦪꦠꦱꦿꦶꦤꦫꦤꦠ ꦲꦶꦁꦢꦲꦲꦶꦁꦏꦁꦮꦶꦤꦂꦤꦶ ꦩꦸꦤ꧀ꦢꦸꦂꦩꦿꦶꦁꦥꦸꦫ ꦭꦶꦂꦝꦁꦝꦁꦏꦁꦲꦸꦩꦶꦂꦫꦶꦁ꧉
[Dhandhanggula]
꧄ꦲꦼꦤ꧀ꦠꦾꦂꦱꦤꦶꦫꦱꦿꦶꦤꦫꦥꦠꦶ ꦢꦺꦤꦺꦱꦿꦪꦤꦺꦩꦼꦤꦁꦲꦪꦸꦢ ꦏꦭꦤꦗꦪꦺꦁꦱꦫꦶꦤꦺ ꦠꦤ꧀ꦏꦮꦂꦤꦲꦶꦁꦲꦼꦤꦸ ꦭꦩ꧀ꦥꦃꦲꦶꦫꦤꦠꦺꦁꦏꦝꦶꦫꦶ ꦲꦶꦁꦲꦭꦸꦤ꧀ꦲꦭꦸꦤ꧀ꦥꦿꦥ꧀ꦠ ꦒꦩꦼꦭꦤ꧀ꦒꦸꦩꦸꦫꦸꦃ ꦮꦢꦾꦭꦶꦠ꧀ꦱꦩꦾꦒꦩ꧀ꦧꦶꦫ ꦏꦁꦢꦺꦤ꧀ꦲꦸꦕꦥ꧀ꦏꦭꦤꦗꦪꦺꦔꦶꦁꦱꦫꦶ ꦱꦩꦾꦢꦺꦤ꧀ꦲꦊꦩ꧀ꦧꦤ
꧄ꦏꦮꦂꦤꦲꦏꦸꦢꦗꦪꦺꦁꦱꦫꦶ ꦱꦶꦒꦿꦏꦺꦴꦤ꧀ꦢꦸꦂꦭꦤ꧀ꦱꦮꦢꦾꦤꦶꦫ ꦲꦠꦿꦶꦒꦸꦩꦸꦫꦸꦃꦱ꧀ꦮꦫꦤꦺ ꦲꦶꦁꦠꦩ꧀ꦧꦏ꧀ꦧꦪꦫꦮꦸꦃ ꦱꦩ꧀ꦥꦸꦤ꧀ꦊꦁꦒꦃꦭꦤ꧀ꦲꦶꦁꦏꦁꦫꦪꦶ ꦏꦠꦿꦶꦩꦸꦁꦒꦺꦁꦲꦶꦁꦔꦂꦱ: ꦤꦶꦫꦱꦁꦲꦧꦒꦸꦱ꧀ ꦲꦶꦁꦗꦮꦶꦲꦸꦩꦾꦁꦒꦸꦩꦼꦫꦃ ꦲꦶꦁꦏꦁꦮꦢꦾꦉꦫꦮꦠ꧀ꦒꦼꦒꦩ꧀ꦩꦤ꧀ꦱꦩꦶ ꦠꦸꦩ꧀ꦧꦏ꧀ꦠꦸꦭꦸꦥ꧀ꦩꦾꦁꦥꦼꦝꦁ
꧄ꦠꦽꦚꦸꦃꦲꦶꦁꦠꦾꦱ꧀ꦏꦸꦢꦗꦪꦺꦁꦱꦫꦶ ꦏꦱꦧꦼꦠ꧀ꦲꦶꦁꦲꦱ꧀ꦩꦫꦠꦸꦫꦶꦢ ꦤꦶꦧꦲꦶꦁꦥꦒꦸꦭꦶꦁꦔꦤꦺ ꦲꦶꦁꦏꦁꦥꦤꦺꦴꦤ꧀ꦱꦸꦩꦥꦸꦠ꧀ ꦥꦤ꧀ꦏꦤ꧀ꦠꦏꦲꦶꦁꦠꦶꦭꦩ꧀ꦮꦔꦶ ꦲꦚ꧀ꦗꦿꦶꦠ꧀ꦏꦺꦤ꧀ꦢꦪꦥꦿꦤ ꦭꦮꦤ꧀ꦕꦤ꧀ꦢꦿꦱꦤ꧀ꦠꦸꦤ꧀ ꦩꦶꦮꦃꦢꦺꦮꦶꦤꦮꦔ꧀ꦮꦸꦭꦤ꧀ ꦒꦂꦮꦏꦠꦿꦶꦲꦥꦤ꧀ꦱꦩꦾꦲꦤꦸꦁꦏꦼꦩ꧀ꦩꦶ ꦥꦫꦥꦸꦠꦿꦶꦱꦢꦪ
꧄ꦱꦩꦾꦲꦚ꧀ꦗꦿꦶꦠ꧀ꦱꦒꦸꦁꦥꦫꦩꦤꦶꦱ꧀ ꦒꦸꦩꦼꦂꦏꦁꦠꦔꦶꦱ꧀ꦲꦶꦁꦠꦩ꧀ꦧꦏ꧀ꦧꦪ ꦮꦸꦱ꧀ꦏꦠꦸꦂꦲꦶꦁꦤꦠꦩꦁꦏꦺ ꦪꦺꦤ꧀ꦗꦪꦺꦁꦱꦫꦶꦏꦤ꧀ꦠꦸ ꦱꦶꦒꦿꦠꦼꦝꦏ꧀ꦤꦠꦺꦁꦏꦝꦶꦫꦶ ꦥꦿꦩꦺꦱ꧀ꦮꦫꦶꦱꦢꦪ ꦲꦸꦩꦶꦂꦫꦶꦁꦱꦁꦥꦿꦧꦸ ꦱꦱꦁꦏꦤꦶꦁꦫꦠ꧀ꦧꦶꦤꦼꦏ꧀ꦠ ꦮꦸꦏꦶꦂꦱꦫꦶꦥꦭꦧꦸꦲꦤ꧀ꦢꦠꦤ꧀ꦏꦫꦶ ꦠꦩꦶꦲꦺꦴꦪꦶꦩꦶꦤ꧀ꦢꦏ
꧄ꦗꦪꦺꦁꦱꦫꦶꦫꦶꦤꦸꦧꦸꦁꦥꦿꦫꦧꦶ ꦱꦶꦒꦿꦫꦮꦸꦃꦱꦁꦤꦠꦲꦶꦁꦢꦲ ꦲꦊꦁꦒꦃꦩꦸꦁꦒꦺꦁꦲꦸꦭꦺꦴꦤꦺ ꦲꦔꦤ꧀ꦢꦶꦏꦱꦁꦥꦿꦧꦸ: ꦲꦠ꧀ꦩꦗꦺꦁꦱꦸꦤ꧀ꦏꦶꦗꦪꦺꦁꦱꦫꦶ ꦧꦪꦲꦤꦤ꧀ꦝꦁꦧꦿꦤ ꦩꦻꦴꦢꦸꦏ꧀ꦲꦥꦸꦥꦸꦃ ꦢꦪꦥꦿꦤꦲꦠꦸꦂꦱꦼꦩ꧀ꦧꦃ ꦠꦤ꧀ꦏꦕꦸꦂꦤꦤ꧀ꦥꦸꦠꦿꦥꦢꦸꦏꦢꦺꦮꦗꦶ ꦢꦸꦏ꧀ꦩꦁꦱꦃꦔꦢꦶꦭꦒ
꧄ꦱꦫꦮꦸꦃꦲꦶꦥꦸꦤ꧀ꦲꦩꦔꦸꦤ꧀ꦗꦸꦫꦶꦠ꧀ ꦠꦤ꧀ꦥꦏꦫꦤꦤꦶꦧꦏꦤ꧀ꦠꦏ ꦢꦔꦸꦠꦤ꧀ꦲꦔ꧀ꦭꦶꦭꦶꦂꦩꦁꦏꦺ ꦱꦼꦏꦂꦠꦗꦶꦲꦤ꧀ꦢꦸꦭꦸ ꦩꦿꦶꦁꦏꦭꦤꦄꦚ꧀ꦗꦪꦺꦁꦱꦫꦶ ꦱꦁꦢꦾꦃꦲꦔꦂꦠꦶꦏꦺꦁꦠꦾꦱ꧀ ꦱꦸꦤ꧀ꦮꦧꦫꦺꦁꦏꦭ꧀ꦧꦸ ꦮꦺꦴꦁꦲꦶꦏꦶꦏꦂꦪꦲꦸꦥꦪ ꦲꦥꦶꦏꦤ꧀ꦠꦸꦢꦺꦤꦺꦕꦃꦪꦤꦺꦲꦧꦼꦕꦶꦏ꧀ ꦏꦂꦪꦱꦤ꧀ꦢꦶꦲꦭꦫ
꧄ꦪꦺꦤ꧀ꦲꦪ꧀ꦮꦠꦏꦸꦠꦩꦿꦶꦁꦫꦩꦗꦶ ꦲꦶꦁꦱꦸꦤ꧀ꦩꦸꦭꦶꦃꦩꦫꦶꦁꦢꦊꦩ꧀ꦥꦸꦫ ꦠꦤ꧀ꦱꦸꦢꦶꦢꦼꦊꦁꦫꦸꦥꦤꦺ ꦥꦤ꧀ꦝꦺꦴꦒꦲꦮꦺꦴꦠ꧀ꦱꦤ꧀ꦠꦸꦤ꧀ ꦩꦠꦸꦂꦝꦠꦼꦁꦤꦠꦺꦁꦏꦝꦶꦫꦶ ꦭꦁꦏꦸꦁꦩꦫꦱ꧀ꦲꦶꦁꦢꦿꦶꦪ ꦲꦧ꧀ꦢꦶꦱꦁꦲꦥꦿꦧꦸ ꦥꦸꦠꦿꦥꦢꦸꦏꦱꦁꦤꦠ ꦗꦪꦺꦁꦱꦫꦶꦠꦸꦫꦸꦤ꧀ꦠꦸꦩꦸꦫꦸꦤ꧀ꦲꦶꦁꦔꦸꦤꦶ ꦏꦁꦲꦺꦪꦁꦝꦠꦼꦁꦫꦩ
꧄ꦪꦺꦤ꧀ꦲꦩꦔꦸꦤ꧀ꦭꦒꦗꦪꦺꦁꦗꦸꦫꦶꦠ꧀ ꦢꦠꦤ꧀ꦮꦺꦴꦤ꧀ꦠꦼꦤ꧀ꦧꦿꦗꦏꦁꦠꦸꦩꦩ ꦪꦺꦤ꧀ꦱꦩ꧀ꦥꦸꦤ꧀ꦩꦸꦤ꧀ꦢꦸꦂꦪꦸꦢꦤꦺ ꦏꦤ꧀ꦠꦏꦭꦗꦼꦁꦭꦩ꧀ꦥꦸꦱ꧀ ꦏꦸꦩꦼꦚꦸꦠ꧀ꦠꦾꦱꦶꦫꦤꦽꦥꦠꦶ ꦮꦱꦤꦲꦔꦤ꧀ꦢꦶꦏ: ꦔ꧀ꦭꦶꦭꦶꦂꦫꦱꦸꦠꦺꦁꦱꦸꦤ꧀ ꦲꦶꦁꦱꦸꦤ꧀ꦥꦁꦒꦶꦃꦲꦏꦼꦤ꧀ꦭꦮꦤ꧀ ꦲꦫꦶꦤꦶꦫꦤꦶꦤꦶꦒꦭꦸꦃꦥꦝꦩꦁꦏꦶꦤ꧀ ꦥꦤ꧀ꦮꦸꦱ꧀ꦥꦿꦠꦶꦒ꧀ꦚꦤꦶꦔ꧀ꦮꦁ
꧄ꦱꦶꦫꦪꦺꦤ꧀ꦚꦶꦂꦤꦏ꧀ꦏꦼꦤ꧀ꦩꦸꦁꦱꦸꦃꦩꦩꦶ ꦤꦶꦤꦶꦥꦸꦠꦿꦶꦱꦸꦤ꧀ꦏꦂꦪꦒꦚ꧀ꦗꦂꦫꦤ꧀ ꦥꦤ꧀ꦮꦸꦱ꧀ꦧꦼꦒ꧀ꦗꦤꦶꦫꦩꦁꦏꦺ ꦱꦸꦤ꧀ꦠꦼꦝꦲꦶꦁꦢꦺꦮꦒꦸꦁ ꦭꦃꦩꦸꦭꦾꦲꦏꦶꦗꦪꦺꦁꦱꦫꦶ ꦩꦸꦏ꧀ꦠꦶꦪꦮꦶꦧꦮꦲ ꦤꦺꦁꦢꦲꦱꦸꦠꦺꦁꦱꦸꦤ꧀ ꦲꦶꦁꦱꦸꦤ꧀ꦧꦼꦒꦮꦤ꧀ꦏꦺꦮꦭ ꦠꦼꦏꦭꦶꦪꦼꦥ꧀ꦱꦺꦴꦠꦾꦤꦶꦫꦗꦪꦺꦁꦱꦫꦶ ꦩꦺꦱꦼꦩ꧀ꦏꦺꦤ꧀ꦢꦪꦥꦿꦤ
꧄ꦲꦶꦔꦺꦴꦪꦺꦴꦒ꧀ꦫꦧꦶꦤꦺꦱꦂꦪꦲꦤꦔꦶꦱ꧀ ꦭꦃꦠꦥꦔꦺꦫꦤ꧀ꦥꦶꦝꦔꦼꦠ꧀ꦠꦼꦤ ꦱꦿꦶꦤꦫꦺꦤ꧀ꦢꦿꦲꦤ꧀ꦢꦶꦏꦤꦺ ꦤꦩ꧀ꦧꦸꦠ꧀ꦠꦺꦴꦪꦲꦶꦁꦱꦁꦏꦸ ꦱꦶꦤꦺꦴꦠꦾꦤꦤ꧀ꦄꦚ꧀ꦗꦪꦺꦁꦱꦫꦶ ꦝꦸꦩꦠꦼꦁꦲꦶꦁꦏꦁꦒꦂꦮ ꦮꦸꦔꦸꦥꦸꦔꦸꦤ꧀ꦥꦸꦔꦸꦤ꧀ ꦩꦶꦪꦂꦱꦤ꧀ꦢꦶꦏꦤꦶꦁꦤꦠ ꦠꦼꦏꦱꦸꦩꦿꦃꦱꦫꦶꦫꦤꦺꦗꦪꦺꦁꦱꦫꦶ ꦲꦔ꧀ꦭꦶꦭꦶꦂꦱꦶꦒꦿꦊꦁꦒꦃ꧉
(ꦧꦝꦺꦏꦱꦩ꧀ꦧꦼꦠ꧀ꦠꦤ꧀) [ Inside_back_cover ]
ꦮꦶꦮꦶꦠ꧀ꦠꦁꦒꦭ꧀꧇꧕꧇ꦢꦸꦩꦸꦒꦶ꧇꧑꧐꧇ꦮꦸꦭꦤ꧀ꦗꦤꦸꦮꦫꦶꦥꦸꦤꦶꦏ꧈ꦲꦢ꧀ꦩꦶꦤꦶꦱ꧀ꦠꦿꦱꦶꦱꦩ꧀ꦥꦸꦤ꧀ꦠꦩ꧀ꦥꦶꦲꦂꦠꦱꦏꦶꦁꦥꦫꦥꦿꦶꦪꦤ꧀ꦠꦸꦤ꧀ꦭꦁꦒꦤ꧀ꦤꦤ꧀ꦏꦗꦮꦺꦤ꧀ꦲꦶꦁꦏꦁꦤꦺꦴꦩꦼꦂꦫꦶꦥꦸꦤ꧀ꦏꦱꦼꦧꦸꦠ꧀ꦲꦶꦁꦔꦤ꧀ꦝꦥ꧀ꦥꦸꦤꦶꦏ꧉ꦱꦸꦩꦼꦉꦥ꧀ꦥꦩ꧀ꦧꦪꦂꦫꦶꦁꦭꦁꦒꦤ꧀ꦤꦤ꧀ꦠꦸꦩꦿꦥ꧀ꦏ꧀ꦮꦂꦠꦭ꧀ꦏ꧀ꦮꦂꦠꦭ꧀ꦲꦶꦁꦏꦁꦏꦥꦿꦠꦺꦭꦏ꧀ꦏꦏꦼꦤ꧀ꦱꦮꦶꦁꦏꦶꦁꦔꦶꦁꦲꦂꦠꦮꦲꦸ꧉
ꦧꦺꦴꦠꦼꦤ꧀ꦱꦤꦺꦱ꧀ꦲꦢ꧀ꦩꦶꦤꦶꦱ꧀ꦠꦿꦱꦶꦲꦩꦸꦁꦔꦠꦸꦂꦫꦏꦼꦤ꧀ꦒꦼꦁꦔꦶꦁꦥꦤꦸꦮꦸꦤ꧀꧉
[Grafik]
ꦠꦏ꧀ꦱꦶꦃꦮꦺꦴꦤ꧀ꦠꦼꦤ꧀ꦱꦩ꧀ꦧꦼꦠ꧀ꦠꦶꦥꦸꦤ꧀꧉
[Iklan]
[Iklan]