Condi sa palacao nin siring na guibo
con magcairiba mag amang malobo
minsan magbiriò bilog na Imperio
dai mayong dalan manganang totoo.
Sa maniuala ca nin catotohanan
can guiguibohon cong capasaluiban
aco an maluas sa pag gegeneral
an pitong Infantes ipaeenotan.
Ta con magadan na an pitong Infantes
digdi sa Españia na cutang harigue
mag-aramang ining baretang nalicsi
lomaog na camo gubaton an Corte.
An gabos na idtong palaman sa surat
sa Hadeng Almanzor pinadarang hayag
can sa Emperador mabasang siasat
an ogma sa boot dai nin casugad.
Busto de Lara, minsan siring naman
an hagad sa surat tolos papogotan
Hade napaontoc asin ta namongnan
sa gayon lalaki hauac na bansay.
Princesa, orog pang Si Doña Hismeña
nin si pagcahiling ki Busto de Lara,
tolos tinamaan amor na labi na
an boot, an puso nagtios nin dusa.
Tolos na hinagad sa ama niang Poon
si Busto de Lara dai na gadanon
grillosan na lamang an togñod na hatol
dian sa hardin co magserving oripon.
Iyo nang guinibo grinillosan lamang
sa Princesang hardin duman na nag-estar
calauigan nin aldao pagaroatubang
an Conde Princesa amor nagcamamay.
An pagcamootan nagcamacot baga
tulac nagcalaman can piling Princesa
iyo man pagdatung guerra sa Españia
Si Rubio Velasquez general na sadia.
Caya ibinotos caidtong guerrang idto
Hade sa España dahel sa ki Busto
poon can sogoon maguing mensagero
con anong dinatong sa Turquiang Reino.
Tara an nangyari nin si harani na
ejercito ninda sa Reinong Turquia
an pitong Infantes pinapagñenot na
natanauan tolos bantay sa muralla.