Gospul ma ‚Matthaeus‛

KAPIT: I

Tribütabim Yesusa : Kristus, son ela ‚David‛ : son ela ‚Abraham‛.
‚Abraham‛ äfatom eli ‚Isaac‛; ‚Isaac‛ äfatom eli ‚Iacob‛; ‚Iacob‛ äfatom eli ‚Iuda‛ e blodis oma;
‚Iuda‛ äfatom lä ‚Thamar‛ eli ‚Phares‛, ed eli ‚Zara‛; ‚Zara‛ äfatom eli ‚Esron‛; ‚Esron‛ äfatom eli ‚Aram‛;
‚Aram‛ äfatom eli ‚Aminadab‛; ‚Aminadab‛ äfatom eli ‚Naasson‛; ‚Naasson‛ äfatom eli ‚Salmon‛;
‚Salmon‛ äfatom lä ‚Rachab‛ eli ‚Booz‛; ‚Booz‛ äfatom lä ‚Ruth‛ eli ‚Obed‛; ‚Obed‛ äfatom eli ‚Isai‛;
‚Isai‛ äfatom hiregi : ‚David‛; hireg ‚David‛ äfatom lä jiviudan ela ‚Urias‛ eli ‚Salomon‛;
‚Salomon‛ äfatom eli ‚Roboam‛; ‚Roboam‛ äfatom eli ‚Abias‛; ‚Abias‛ äfatom eli ‚Asa‛;
‚Asa‛ äfatom eli ‚Iosaphat‛; ‚Iosaphat‛ äfatom eli ‚Ioram‛; ‚Ioram‛ äfatom eli ‚Ozias‛;
‚Ozias‛ äfatom eli ‚Ioatham‛; ‚Ioatham‛ äfatom eli ‚Achaz‛; ‚Achaz‛ äfatom eli ‚Ezechias‛;
‚Ezechias‛ äfatom eli ‚Manasses‛; ‚Manasses‛ äfatom eli ‚Amos‛; ‚Amos‛ äfatom eli ‚Iosias‛;
‚Iosias‛ äfatom eli ‚Iechonias‛ e blodis omik, timü xil lü «Babylon‛.
Pos xil lü ‚Babylon‛, ‚Iechonias‛ äfatom eli ‚Salathiel‛; ‚Salathiel‛ äfatom eli ‚Zorobabel‛;
‚Zorobabel‛ äfatom eli ‚Abiud‛; ‚Abiud‛ äfatom eli ‚Eliachim‛; ‚Eliachim‛ äfatom eli ‚Azor‛;
‚Azor‛ äfatom eli ‚Eliud‛;
‚Eliud‛ äfatom eli ‚Eleazar‛; ‚Eleazar‛ äfatom eli ‚Mathan‛; ‚Mathan‛ äfatom eli ‚Iacob‛;
‚Iacob‛ äfatom eli ‚Ioseph‛ : himatan ela ‚Maria‛, se kel Yesus Kristus panemöl pemotom.
So num gonidotas valik de ‚Abraham‛ jü ‚David‛ äbinon degfol, ed ut de ‚David‛ jü xil lü ‚Babylon‛ degfol, ed ut de xil lü ‚Babylon‛ jü Kristus degfol.
Moted Yesusa : Kristus ejenon so: ven mot omik : ‚Maria‛ ämatirajanof ko ‚Ioseph‛, äplakoy, das büä ikobikons, pigrodükof fa Saludalanal.
‚Ioseph‛ : himatan ofa, bi äbinom man ritik, e no ävilom jonetükön ofi len jemodastafäd, ädesinom ad lüvön kläno ofi.
Ab, du älabom tikodi at, in drim silanan Söla ädajonom oki lo om, ed äsagom ome: «O ‚Ioseph‛ : son ela ‚David‛! no dredolöd ad lasumön eli ‚Maria‛ : jimatan olik! ibä ut, kel pefatom in of, binom sek Saludalanala.
Omotof soni, keli onemol Yesusi; om ga olelivükom pöpi de sinods onik».
Atos valik ejenon, dat utos pöfölon, kelosi Söl espikom dub profetan:
«Ekö! jivirgan ogrodikof, ed omotof soni, keli onemoy eli ‚Emmanuel‛», kela tradutod binon : God binom ko obs.
Igalikölo se slip okik, ‚Ioseph‛ ädunom utosi, kelosi silanan Söla ibüdom ome, ed älasumom jimatani okik,
e no äkosädom geniko ko of, jüs imotof balidsoni oka; ed änemom omi Yesusi.

KAPIT: II

Ven nu Yesus pimotom, tö ‚Bethlehem‛ in Yudän timü hireg : ‚Herodes‛, ekö! sapans anik se lofüdän äkömoms ini ‚Hierusalem‛, ed äsäkoms:
«Kiöpo reg änu pemotöl Yudanas binom-li? Elogobs in lofüd steli omik, ed ekömobs ad stimodön omi».
Ven reg : ‚Herodes‛ älelilom atosi, äfäkikom, ed elans valik di ‚Hierusalem‛ ko om;
ed ikobükölo lekultanis e bibinolavanis valikis pöpa, äsäkom omes, kiöpo Kristus pömotom.
Äsagoms ome: «Tö ‚Bethlehem‛ in Yudän; ibä so pepenos dub profetan:
‚Ed ol : ‚Bethlehem‛, ol : Yudän, leno binol bapikün pö plins Yudäna : bi se ol geidan osüikom, kel okälom pöpi obik : Yisraelän‛».
Täno ‚Herodes‛ äbüedom vokön kläniko lofüdasapanis, ed äkoedom nunön omis kuratiko timi, tü kel stel ipubon.
Pos atos älesedom omis lü ‚Bethlehem‛ ko komit: «Vestigolsöd kuratiko tefü cil et, ed if utuvols omi, nunolsöd osi obe, dat i ob ogolob usio ad stimodön omi»!
Posä ililoms regi, ädetävoms; ed ekö! stel, keli ilogoms in lofüd, äfogolon omis, jüs äbleibon stebön sus plad, kö cil ädabinom.
Ven älogoms steli, äfredoms mu vemo.
Ed inüstepölo ini dom, älogoms cili ko ‚Maria‛ : mot omik; ädokienoms dalestümo foi om; ämaifükoms diviärilis oksik, ed äblinoms ome legivotis: gold, boväl e mir.
E bi pinunedoms in drim nemü God ad no gegolön lü ‚Herodes‛, ädatävoms ve veg votik lü län oksik.
Ven idetävoms, ekö! silanan Söla ädajonom oki in drim lo ‚Ioseph‛ ed äsagom: «Löädolöd, lasumolöd cili e moti omik, e fugolöd lü Lägüptän, e blibolöd us, jüs osagob ole! ibä ‚Herodes‛ osukom cili ad deidön omi».
Älöädom, ed älasumom ün neit cili e moti omik, ed ädetävom lü Lägüptän.
Äblibom us jü deadam ela ‚Herodes‛; dat utos pöfölon, kelosi Söl isagom dub profetan: «Se Lägüptän evokob soni obik».
Ven ‚Herodes‛ äküpom, das picütom fa lofüdasapans, äzunikom vemo, ed äbüedom deidön in ‚Bethlehem‛ ed in züamöp lölik ona cilis valik labü bäldot yelas tel e läs telas, bai tim, keli ivestigom de lofüdasapans.
Täno utos päfölon, kelos pisagon dub ‚Ieremias‛:
«Vög in el ‚Rama‛ pelilon, plon, drenam e viam mödik; ‚Rachel‛ äbedrenof cilis okik, e no ävilof patrodön, bi no plu dabinons».
Ven ‚Herodes‛ ideadom, ekö! silanan Söla ädajonom oki in drim lo ‚Ioseph‛ in Lägüptän,
ed äsagom: «Löädolöd, sumolöd cili e moti omik, e gololöd lü län : Yisraelän; ibä utans edeadoms, kels äviloms deadön cili».
Om nu älöädom, äkesumom cili e moti oma, ed äkömom ini län : Yisraelän.
Ab ven älelilom, das ‚Archelaus‛ äbinom hireg in Yudän pla ‚Herodes‛ : fat okik, ädredom ad golön usio. In drim nemü God penunedölo ätävom täno lü topäd : Galileyän.
Ed us elükömölo älomädükom oki ini zif ‚Nazareth‛ penemöl, dat utos pöfölon, kelos pesagon dub profetans, das pönemom elan di ‚Nazareth‛.

KAPIT: III

Ün tims et el ‚Ioannes‛ : blunedan äbitom in däsärt Yudäna, ko predam:
«Lecenolsöd! ibä regän sülas binon nilik».
Ibä atan binom utan, keli profetan : ‚Isaias‛ ädiseinom, ven äsagom:
«In däsärt vög vokom: Preparolsöd vegi pro Söl, kamükolsöd vegis oma»!
‚Ioannes‛ at älenlabom kloti jamodaherik, e zönüli küirik zü loin; nulüdot omik äbinädon me carads e miel natädik.
Täno ägolons lü om elans di ‚Hierusalem‛, valikans se Yudän e züamöps di ‚Iordanis‛;
ed äkoedons blunedön okis fa om in el ‚Iordanis‛, du äkoefons sinodis oksik.
E ven äloegom kömön farisetanis e sadukanis mödikis ad pablunedön fa om, äsagom omes: «O luvipärem! kin esevädükon oles, das öskeapols de cödetam lätik?
Pololsöd täno flukis, kels pötons lä lecen;
e no fatüitolsöd ad dalön sagön : Labobs eli ‚Abraham‛ as fat! Ibä sagob oles, das God kanom davedükön ele ‚Abraham‛ cilis se stons at.
Cüd ya seaton lä vul bimas; bim alik, kel kludo no polon flukis gudik, podocöpon, e pojedon ini fil.
Blunedob olis fe me vat ad lecein, ab utan, kel okömom pos ob, binom nämädikum, ka ob - no digädob ad polön sandalis oma - oblunedom olis me Saludalanal e me fil.
Viän binon in nam omik, oklinükom cepagluni oka, obarakom greni okik ini grenabarak, ofilükom lebräni me fil nekvänovik».
Täno Yesus äkömom de Galileyän lü ‚Iordanis‛ lü ‚Ioannes‛ ad pablunedön fa om.
Ab ‚Ioannes‛ ästöpädom omi, ed äsagom: «Neodob ad pablunedön fa ol, e kömol-li lü ob»?
Yesus ägesagom ome: «Leadolöd dunön obi! Ibä somo lönedos lü obs, ad fölön bligis valik». Täno äleadom dunön omi.
Posä piblunedom, äxänom sunädo se vat, ed ekö! sül ämaifikon, ed äloegom nexänön Lanali Goda, ä kömön sui ok.
Ed ekö! vög ätonon se sül: «Atan binom Son fa ob pelöföl, keli plidob vemo».

KAPIT: IV

Täno Yesus pädugom fa Lanal lü däsärt ad pablufedön fa diab.
E posä icunom dü dels foldeg e neits foldeg, fino äfaemom.
E ven blufodan ilükömom, äsagom ome: «If binol Son Goda, büdolöd täno, das stons at vedons bodeds»!
Ab ägesagom: «Epenoy: ‚Te de bod men no olifon, ab de vöd alik, kel kömon se mud Goda‛».
Täno diab äkesumom omi lü zif saludik, ed äpladom omi sui kren tema,
ed äsagom ome: «If binol Son Goda, stürolöd oli täno donio! epenoy ga: ‚Okomandom oli silananes oka, ed opoloms oli su nams, dat no joikol futi olik ta ston‛».
Ab Yesus äsagom ome: «Epenoy i : ‚No sötol blufodön Söli : God olik‛»!
Dönu diab äkesumom omi, efe lü bel vemo geilik, ed äjonom ome regänis valik vola, e glori onas,
ed äsagom ome: «Onis valik ogivob ole, if prostärnol foi ob, e leplekol obi».
Täno Yesus äsagom ome: «Moükolöd oli! o diab! Epenoy ga: ‚Söli : God ola oleplekolöd, e te omi okultolöd‛»!
Pos atos diab äklemom omi, ed ekö! silanans äkömoms ed ädünoms omi.
Ven ilelilom, das ‚Ioannes‛ pifanäböpom, ägetävom lü Galileyän,
älüvom eli ‚Nazareth‛, ed älomädükom oki ini ‚Capharnaum‛ len lak topöl, in topäd di ‚Zabulon‛ e ‚Nephthali‛,
dat utos pöfölon, kelos pesagon dub profetan: ‚Iesaias‛:
«Län di ‚Zabulon‛ e län di ‚Nephthali‛, veg lü lak, votaflanü ‚Iordanis‛, Galileyän paganas.
Pöp, kel äseadon in dag, elogon liti gretik, e love utans, kels äseadons in län e jad deada, lit esülöpikon».
De tim et Yesus äprimom ad predön: «Lecenolsöd! ibä regän sülas binon nilik».
Ven äspatom ve lak Galileyänik, älogom, das blods tel: ‚Simon‛ i ‚Petrus‛ penemöl ed ‚Andreas‛ : blod omik, äjedoms filäti ini lak, ibä äbinoms päskarans.
Äsagom lü oms: «Sökolsöd obi! ed ovedükob olis päskaranis menas».
Oms älüvoms sunädo filätis ed äsökoms omi.
E fövölo vegami okik, älogom blodis votik tel : ‚Iacobus‛ : son ela ‚Zebedaeus‛, e ‚Ioannes‛ : blod omik, kels in naf ko fat oksik : ‚Zebedaeus‛ änätükoms filätis oksik. Ävokom omis,
ed älüvoms sunädo nafi e fati oksik, ed äsökoms omi.
E Yesus äzitevom da Galileyän lölik, ätidölo in sünagogs, äpredölo gospuli dö regän, ed äsanölo malädis e liedis valasotikis in pöp.
E sagäd tefü om äziikon da Süriyän lölik; ed äblinoy lü om malädanis malädas e dolas valasotikas; diabäbis, munamalädanis, lemölanis, ed äsanom onis valik.
Trups mödik menas äsökons omi, se Galileyän, se elän ‚Decapolis‛, se ‚Hierusalem‛, se Yudän, e se topäds votaflanü ‚Iordanis‛.

KAPIT: V

Ven Yesus älogom menamödotis, äbexänom beli; e ven iseidom oki, tidäbs omik äkömons lü om.
Tän ämaifükom mudi okik, ed älejonom ones:
«Beatiks utans binons, kels lubegons lanöfi, ibä lü ons regän sülas duton.
Beatiks utans binons, kels lügons, ibä potrodons.
Beatiks sufälikans binons, ibä ogerons taledi.
Beatiks utans binons, kels faemons e soafons lü gid, ibä posatükons.
Beatiks miserans binons, ibä pomiserons.
Beatiks utans binons, kels labons ladäli klinik, ibä ologons Godi.
Beatiks püdikodans binons, ibä ponemons cils Goda.
Beatiks utans binons, kels papöjutons demü gid, ibä lü ons regän sülas duton.
Beatiks binols, ven lukofoy olis, pöjutoy olis, e slänoy olis demü ob,
fredolsöd e pleidolsöd! ibä mesed olsik in sül binon gretik; so ga epöjutoy profetanis, kels elifoms bü ols.
Binols sal taleda; ab if sal vedonöv nensmelik, me kin osalöfükoy üfo? No plu gudon, kas ad pamojedön ed ad padästepön fa mens.
Binols lit vola. Zif, kel topon löpo su bel, no kanon binön klänedik.
I no filedoy lampadi, e pladoy oni disi grenimaf, ab pladoy oni sui litikipian, tän litastralon pro valikans, kels binons in dom.
So lit olsik stralonös lo mens! dat logons vobodis gudik olsik e glorükons Fati olsik, kel binom in sül.
No cedolsöd, das ekömob ad sälonön lonemi e vobodis profetanas! No ekömob ad sälonön, ab ad lölöfükön.
Ibä vö! sagob oles, büä sil e tal upasetikons, ni el ‚iota‛ bal, ni diakritil bal lonema opasetikon büä fin dinas valik ujenon.
Klu utan, kel finidon püliküni lonas at, e lejonon menes ma atos, ponemon puik in regän sülas; ab utan, kel dunon ma lons, e lejonon onis votanes, ponemon gretik in regän sülas.
Ibä sagob oles, das, if gid olas no pluon tefü ut bibinolavanas e farisetanas, no onügolols ini regän sülas.
Elilos, das esagoy büanes: ‚No sötol deidön‛! ed utan, kel deidon, pocödeton fa cödalef.
Ab sagob oles, das alan, kel zunikon nenkodiko ta blod okik, digädon ad pacödetön fa cödalef, das utan, kel sagon ta blod okik: ‚Netäläktan‛ digädon ad pacödetön fa sanhedrin, e das utan, kel sagon: ‚Fopan‛ digädon ad pajedön ini fil höla.
If seimna blinol legivoti olik lü latar, ed us pö ol mem süikon, das blod olik labom bosi ta ol,
leadolöd blibön ön jenet at legivoti olik us fo latar, gololöd büiko ad rekosilön oli ko blod ola, e gololöd täno ad sakrifön legivoti olik!
Binolöd suno benomeugik kol tapalet olik, du nog binol su veg ko om! dat tapalet olik bo no lovegivom oli cödale, e cödal lovegivom oli gitädane, ed ol pafanäböpol!
Vö! sagob ole: No osegolol se fanäböp, büä upelol fenigi lätik.
Elilos, das pesagos: ‚No sötol dulterön‛!
Ab sagob oles, das ek, kel logedom ko desir lü vom, ya edulterom ko of in ladäl oka.
If kludo log detik skänon oli, seletirolöd oni, e mojedolöd oni! ibä binos gudikum pro ol, das bal limas olik paperon, kas koap lölik ola pajedon ini höl.
Ed if nam detik olik skänon oli, decöpolöd oni, e mojedolöd oni! ibä binos gudikum pro ol, das bal limedas olik paperon, kas koap lölik ola pajedon ini höl.
Esagoy i: ‚Utan, kel deteilom oki de jimatan okik, givomös ofe matiteilapenedi‛!
Ab sagob oles: Alan, kel deteilom oki de jimatan oka, pläsif demü nepued, kodom, das dulterof, ed utan, kel matikom ko jimati-eteilölan, dulterom.
Fovo elilols, das esagon büanes: ‚No sötol miyulön, ab sötol fölön lo Söl yuli olik‛!
Ab ob sagob oles: Leno yulolsöd! ni nämätü sül; ibä binon tron Goda;
ni nämätü tal, ibä binon futabam oma; ni nämätü ‚Hierusalem‛, ibä binon zif hirega gretik;
ni sötol yulön nämätü kap olik, ibä no kanol vedükön heri bal vietiki u blägiki.
Vöd olsik : si! binonöd : si! El nö! olsik : nö! Utos, kelos binon plö atos, binon badik.
Elilols, das pesagos: ‚Log tä log, e tut tä tut‛.
Ab ob sagob oles ad no tadunön badani: ab kel flapon oli sui cüg detik, flekolöd lü utan i votiki!
Ed if ek vilom cödädön ko ol ad dagetön nikloti olik, leadolöd dakipön ome i mänedi!
If ek mütom oli ad kegolön mö liöl bal, gololöd ko om mö tels!
Givolöd utane, kel begon ole bosi, e no deflekolöd oli de utan, kel begon loenio bosi!
Elilols, das esagoy: ‚Sötol löfön nilikünani olik, e hetön nefleni olik‛!
Ab ob sagob oles: Löfolsöd neflenis olsik; benedolsöd utanis, kels maleditons olis; benedolsöd utanis, kels hetons olis; e plekolsöd pro utans, kels tädons e pöjutons olis;
dat binolsös cils Fata olsik in süls; ibä koedom sülöpikön soli love badikans e gudikans, e koedom reinön love ritikans e neritikans.
If löfols utanis, kels löfons olis, digädi kinik üfo labols-li? Tolädans no dunoms-li otosi?
Ed if glidols te blodis olsik, veütikosi kinik üfo dunols-li? Pagans no dunons-li otosi?
Binolsöd kludo nendöfiks, soäsä Fat olsik in süls binom nendöfik»!

KAPIT: VI

«Kälälolsöd ad no dunön benodi olsik lo mens, dat ons logonsös oni! voto no labols mesedi de Fat olsik in süls.
Ven kludo limunol, no leadolöd trompetön osi föföl, soäsä simulans dunons in sünagogs e su süts, dat pastimonsös fa mens! Vö! sagob oles, egetons ya bläfodi oksik.
Ab ol, ven givol limuni, no leadolöd sevön name nedetik ola utosi, kelosi nam detik ola dunon,
dat limun blebonös klänik! E Fat olik, kel logom klänikosi, obläfom osi ole.
E ven plekol, no binolöd äsä simulans! Ibä atans löfilons ad stanön ä plekön in sünagogs e su gulöps piadas, dat palogonsös fa mens! Vö! sagob oles, egetons ya bläfodi oksik.
Ab ol, ven plekol, gololöd ini cem olik, färmükolöd yani, e plekolöd täno lü Fat olik, kel binom klänedik, e Fat olik, kel logom klänikosi, obläfom osi ole.
Ven nu plekols, no ogebolsöd mödoti gretik vödas vanik, äsä pagans dunons! ibä cedons, das polilidons dub prolid okas.
Klu no sümolsöd äsä ons! ibä Fat olsik sevom utosi, kelosi neodols, büä plekols ome.
Ols kludo plekolsöd so: O Fat obas, kel binol in süls! Nem olik pasaludükonöd!
Regän ola kömonöd! Vil olik jenonöd, äsä in sül, i su tal!
Givolös obes adelo bodi aldelik obsik!
E pardolös obes döbotis obsik, äsä i obs pardobs utanes, kels edöbons kol obs.
E no blufodolös obis, ab livükolös obis de bad! (Ibä dutons lü ol regän, e nämäd e glor jü ün laidüp. So binosös!)
Ibä if pardols menes döbotis onsik, i Fat sülik olsik opardom oles;
ab if no pardols menes döbotis onsik, Fat olsik i no opardom döbotis olsik.
E ven cunols, no jästolsöd ko logod lügik äsä simulans! ibä atans mijästidons logodis oksik, ad jonön menes, das cunons. Vö! sagob oles, ya egetons bläfodi oksik.
Ab ol, ven cunol, nugvetolöd kapi olik, e lavolöd logodi olik!
dat no jonol menes, das cunol, ab Fate olik, kel binom klänedik. E Fat olik, kel logom klänikosi, obläfom ole osi.
No konletolsöd oles divis su taled, kö tien e ruil distukons, e kö tifans nübreikoms e tifoms!
Ab konletolsöd oles divis in sül, kö ni tien ni ruil distukons, e kö tifans ni nübreikoms, ni tifoms!
Ibä utöpo, kö div ola binon, i ladäl olik obinon.
Log binon lampad koapa. If kludo log olik binon gudik, koap lölik olik obinon litik.
Ab if log olik binon badik, koap lölik olik obinon dagik. If kludo lit in koap olik binon dagik, kiogretik dag binon!
Nek kanon dünön sölis tel; ibä ud oheton balani ed olöfon votani, ud oslopon balani ed oludigidon votani. No kanols kultön Godi e mamuni.
Sekü kod at sagob oles: No kudolsöd dö lif olsik, kinis ofidols u kinis odrinols, ni dö koap olsik, kinis olenükols! Lif no digädon-li plu ka nulüdot, e koap olsik plu ka klotem?
Logolsöd lü böds sila, no sovons, ni fodons, ni konletons ini baraks! e Fat sülik olsik nulüdom onis. Ols no pluols-li vemo leigodü ons?
Kin olas kanon-li lüükön me kudam louni bal lunote okik?
E kikodo kudols-li tefü klotem? Küpedolsöd lelis fela, vio glofons! No töbidons, ni spulons.
E sagob oles, das igo ‚Salomon‛ ko glor valik oka no peklotom, äsä bal atas.
If nu God klotom so yebi fela, kel nog dabinon adelo, e pojedon odelo ini furnod, no odunom-li mu mödikumo osi kol ols? o smalalekredans!
Klu no kudolsöd e no sagolsöd: Kini ofidobs-li, u kini odrinobs-li, u klotis kinik olenükobs-li?
Ibä atosi valik pagans sukons. Fat sülik olsik sevom ye, vio neodols atosi valik.
Sukolsöd kludo balido regäni Goda, e gidi omik! ed atos valik polegivon oles.
Klu no kudolsöd tefü odel! Odel jäfikonös me kuds oka it! Del alik labon saidiko töbis lönik oka».

KAPIT: VII

«No cödetolsöd, dat no pacödetolsöd!
Ibä ma cödet, keli lonülols, pocödetols; e me maf, me kel mafols, omafoy kol ols.
E kis-li? Logol cipi in log bloda olik, e bemi in log olik no küpol!
U lio osagol-li blode olik: Dälolös, das setirob cipi se log olik, du in log olik bem dabinon?
O simulan! Moükolöd büikumo bemi se log olik, e logedolöd täno japäliko, lio setirol cipi se log bloda olik!
No givolsöd saludikosi doges, e no jedolsöd pärlatis olsik foi svins! dat bo no dästepons onis me lögs oksik, e flekons okis, e dasleitons olis.
Plekolsöd, ed ogivoy oles! sukolsöd, ed otuvols! nokolsöd, ed omaifükoy oles!
Ibä alan, kel plekon, geton, ed utan, kel sukon, tuvon, ed utane, kel nokon, omaifükoy.
U men kinik binon-la bevü ols, kel, if son onik begom one bodedi, ogivon ome stoni?
U kel, if begom one fiti, ogivon ome sneki?
If üfo ols : mens sinik sevols ad givön givotis gudik ciles olsik, plüo mödikumo Fat olsik in süls ogivom gudikosi utanes, kels begons ome osi.
Klu utosi valik, kelosi vilol, das mens dunons ole, dunolöd i ones! ibä atos binon lonem e büdeds profetanas.
Nügololsöd da leyan nabik! bi veitik leyan binon, e vidik veg, kel dugon lü päridikam, e mödikans dabinons, kels nügolons da on;
ibä nabik leyan binon, e rovik veg, kel dugon lü lif, e nemödikans dabinons, kels tuvons oni.
Prüdolsöd demü luprofetans, kels lükömons lü ols in jipaklots, ab kels binons ninälo lups raviälik!
Ma fluks onas oseivols onis. No plökoy ga vitidabälis de spinabimüls, u figis de tils.
So bim gudik alik prodon flukis jönik, ab bim puridik flukis badik.
Bim gudik no kanon prodön flukis badik, ed i no bim puridik flukis jönik.
Bim alik, kel no prodon flukis jönik, padäcöpon, e pajedon ini fil.
Demü atos oseivol onis ma fluks onsik.
No alan, kel sagon obe: O Söl! o Söl! onügolon ini regän sülas, ab utan, kel ledunon vili Fata obik in süls.
Tü del et mödikans osagons obe: O Söl! o Söl! no eprofetobs-li nemü ol? no esädiabobs-li nemü ol? no eduinobs-li milagis nemü ol?
E täno ostetob ones : Neföro esevob olis; moükolsöd olis de ob! ols, kels no fölols lonemi!
Alani kludo, kel lilon vödis at oba, e kel dunon ma ons, leigädob ko man täläktik, kel äbumon domi okik sui klif.
Ven nu rein ädofalon, flumeds äkömons, viens älebladons ed ätatakons domi et, no äfalon; ibä pibumon sui klif.
Ab alan, kel lilon vödis at oba, e kel no dunon ma ons, muton paleigädön ko man fopik, kel äbumon domi okik sui sab.
Ven nu rein ädofalon, flumeds äkömons, viens älebladons ed äjokons ta dom et, ädofalon, e fal onik äbinon gretik».
Ven Yesus ifinükom spikädi at, menamödots äbluvons dö lejon oma.
Ibä älejonom ones äsä nämätan, e no äsä bibinolavans onsik.

KAPIT: VIII

Ven inexänom de bel, trups mödik äsökons omi.
Tän lepradan älükömom lü om, ädofalom foi om, ed äsagom: «O söl! if vilol, kanol klinükön obi».
E Yesus ätenükom nami okik, ädoatom omi, ed äsagom: «Vilob osi; peklinükolöd»! E sunädo äklinom de leprad.
E Yesus äsagom ome: «Prüdolöd, das sagol atosi neke! Gololöd, ad dajonön oki kultane, e sakrifolöd givoti, keli ‚Moyses‛ ebüdülom, as blöf pro om»!
Ven ikömom ini ‚Capharnaum‛, kapiten manas tum äkömom lü om ko beg:
«O söl! hidünan obik seatom lemiko in dom obik, e sufom vemo».
E Yesus äsagom ome: «Okömob ad sanön omi».
Ab kapiten manas tum ägesagom: «O söl! No digädob, das okömolöv donü nuf obik. Sagolös te vödi bal, e hidünan obik osaunikom.
Ibä binob i man sumätöfü votikans, e labob sumätöfü ob soldatis; if sagob balane omas: ‚Gololöd‛! tän golom, e votikane: ‚Kömolöd‛! tän kömom, e hidünane obik: ‚Dunolöd atosi‛! tän dunom osi».
Ven Yesus älilom atosi, ästunom, ed äsagom utanes, kels äsökons omi: «Vö! sagob oles, in Yisraelän etuvob neki ko lekred so gretik.
Sagob oles, das mödikans okömoms se lofüd e se vesüd, ed olenseadons ko ‚Abraham‛, ‚Isaac‛ e ‚Iacob‛ in regän sülas;
du sons regäna posejedoms ini dag plödikün; us odabinons viam e knir tutas».
E lü kapiten manas tum Yesus äsagom: «Mogololöd! Ojenos gönü ol bai lekred ola». E hidünan äsaunikom tü timül ot.
Ven Yesus äkömom ini dom ela ‚Petrus‛, äloegom seatön in bed lümoti omik fifi suföli.
Ädoatom nami ofik, e fif älüvon ofi; älöädof ed äbötof omi.
Ün soar latik äblinoy lü om diabäbis mödik, ed äsejedom milananis me vöd pespiköl, ed äsanom malädanis valik;
dat utos pöfölon, kelos pesagon fa profetan : ‚Iesaias‛: «Emoükom fibälis obsik, ed emosumom malädis».
Ven Yesus älogom trupis gretik menas zü ok, äbüdom ones ad golön lü votaflan.
Täno bibinolavan seimik ägolom lü om ed äsagom: «O lejonan! osökob oli, kiöpio olügolol».
Ab Yesus äsagom ome: «Renars dalabons nimanästis, e böds sila nästis, ab Son mena no dalabom topi ad seitön sui on kapi okik».
Votik tidäbas omik äsagom ome: «O söl! dälolös obe, das golob büikumo ad sepülön fati obik»!
Ab Yesus äsagom ome: «Sökolöd obi! leadolöd deadanes sepülön deadanis onsik»!
Ven iboidom oki ini naf, tidäbs omik äsökoms omi.
Ed ekö! tep vemik ädavedon su lak et, sodas naf pätegon dub vefs; ed om äslipom.
Tidäbs ägoloms täno lü om, ägalükoms omi, ed äsagoms «O söl! Yufolös! nafädobs».
Ab äsagom omes: «Kikodo dredols-li? o smalalekredans»! Tän älöädom, ed äblamom vienis e laki, e tak gretik ädavedon.
Mens ästunons ed äsagons: «Men kiom atan binom, das igo viens e lak lobedons omi»!
Ven ikömom loveflano ini län elanas di ‚Gadara‛, diabäbs tel, kels isükömoms se sepüls, äkosgoloms omi; äbinons mens mu riskädiks, sodas nek äkanon golön ve veg et.
Ed äluvokädoms ome: «Demü kis jäfikol-li me obs? O Son Goda! Ekömol-li isio ad tomön obis bü tim»?
Fagü oms nu lemödot svinas äyebidon.
Milanans älebegons täno ome: «If sejedol obis, sedolös obis ini jep svinas»!
Ed äsagom ones: «Segololsöd»! Posä isegolons, äninikons ini svins. Ed ekö! lemödot lölik äjutedon de jol skapik lü lak, ed äpäridikon in vat.
Utans, kels ibälätoms onis, äfugoms, e ven ikömoms ini zif, äkonoms vali, i utosi tefü diabäbs.
Täno zifanef lölik äsegolon ad kosgolön Yesusi, e ven mens älogons omi, älebegons ome ad lüvön topädi okas.

KAPIT: IX

Posä iboidom oki ini naf, älovevegom ed äkömom ini lödöp okik.
Us äblinoy ome elemikölani, kel piseitom sui bed. E ven Yesus älogom kredi omas, äsagom elemikölane: «Dakipolöd kuradi! o son oba! Sinods olik pepardons ole».
Ed ekö! ans bibinolavanas äsagoms ninälo : «Man at blasfämom».
E Yesus, kel äküpom tikodis omas, äsagom: «Kikodo labols-li tikodis badik in ladäls olsik?
Kis ga binon-li fasilikum? ad sagön: sinods olik pepardons oles, ud ad sagön: Löädolöd e zigololöd!
Atos jenon, dat sevolsös, das Son mena labom su taled fägi ad pardön sinodis». Täno äsagom elemikölane: «Löädolöd, lasumolöd bedi olik, e gololöd lü dom olik»!
Ed älöädom, ed ägolom lü dom okik.
Ven menamödots älogons atosi, ädredikons, ed älobons Godi, kel igivom menes fägi so gretiki.
Ven Yesus äfövom vegami de us, äloegom seadön in tolädöp mani ‚Matthaeus‛ penemöli, ed äsagom ome: «Sökolöd obi»! Ed atan älöädom, ed äsökom omi.
Ed äjenos, ven älenseatom in dom, das tolädans e sinans mödiks äkömoms ed äkelenseatoms ko Yesus e tidäbs omik.
Ven farisetans älogoms atosi, äsäkoms tidäbes oma: «Kikodo tidan fidom-li ko tolädans e sinans»?
Yesus älilom atosi ed äsagom omes: «No saunans neodons sanani, ab malädans.
Degololsöd e lejonolsöd utosi, kelos binon: ‚Miseri vilob e no sakrifoti‛. Ibä no ekömob, ad vokön ritanis, ab sinanis».
Täno tidäbs ela ‚Ioannes‛ äkömoms lü om ed äsäkoms: «Kikodo obs e farisetans cunobs mödiko, ab tidäbs olik no»?
E Yesus äsagom omes: «Matedizelans no kanons ga lügodön, dü tim, das higam binom lä ons. Dels okömoms, das higam pumosumom, täno ocunoms.
Nek i no nüpladon diledi klöfa no pefuböla ini klot bäldik; ibä diled penüpladöl detiron bosi de klot, e sleatod gretikum davedon.
I no gifoy vini yunik ini saks bäldik; voto saks sleatons, vin moflumon, e saks nosikons. Ab if gifoy vini yunik ini saks nulik, tän bofiks padakipons».
Du äspikom atosi lü oms, man cädik änilikom, ädofalom foi om, ed äsagom: «Daut obik edeadof änu; ab kömolös e pladolös nami olik sui of, ed olifof»!
E Yesus älöädom, ed äsökom omi ko tidäbs okik.
Ed ekö! vom, kel isufof dü yels degtel sekü bludaflum, änilikof pödao lü om ed ägleipof simi mäneda omik.
Ibä äsagof ninälo: «If doatob te mänedi omik, osaunikob».
Ab Yesus ägüflekom oki, ed äsagom, ven älogom ofi: «Dakipolöd kuradi! o daut obik! Lekred olik esavon oli». E de timül ot vom äsaunof.
Ven Yesus äkömom ini dom mana cädik, ed älogom flutanis e menamödoti älenoidöl,
äsagom ones: «Mogololsöd! ibä jipulil no edeadof, ab slipof». Ed äbesmilons omi.
Posä menamödot pimoükon, ägolom ninio, ed ägleipom nami ofa, e jipulil ägalikof.
E sagäd atosa äpakon oki da län lölik.
Ven Yesus äfövom usao vegami, bleinans tel äsökoms omi, ed ävokädoms laodiko: «Miserolös obis, o Son ela ‚David‛»!
E ven ikömom ini dom, bleinans älükömoms lü om, e Yesus äsagom omes: «Kredols-li, das fägob ad dunön atosi»? Äsagoms ome: «Si! o Söl»!
Täno ädoatom logis omas, ed äsagom: «Ojenos bai lekred olas».
E logs omsik ämaifikons. E Yesus äsagom omes seväriko: «Kälälolsöd, das nek lelilon osi»!
Ab ädegoloms ed äsevädükoms osi ini län lölik et.
Ekö! ven ämogoloms, älüblinoy ome mani sudamüätik diabäböl.
E ven milanan pisejedon, sudamüätan äspikom. E menamödots ästunons, ed äsagons: «Somikosi nog neföro elogoy in Yisraelän».
Ab farisetans äsagoms: «Säjedom milananis medamü cif milananas».
Yesus nu äzigolom ve zifs e vilags valiks, lejonölo in sünagogs onas, predölo gospuli regäna e sanölo malädis e malädülis valikis.
Älogölo lemödoti menas, ämiserom onis, bi älefenons ed äletöbidons, äsä jips nen galedan.
Täno äsagom tidäbes: «Klopot binon vo gretik, ab vobans binons nemödiks;
plekolsöd kludo söle klopota, das sedomös vobanis ad klopön pro om»!

KAPIT: X

Posä ivokom lü ok tidäbis degtel okik, ägerom omes nämädi löpü milanans, sodas äkanoms sejedön onis, e fägi ad sanön malädis e malädülis valikis.
Nems pastolanas nu binons ats: balido ‚Simon‛: ‚Petrus‛ penemöl, e blod omik: ‚Andreas‛; ‚Iacobus : son ela ‚Zebedaeus‛, e ‚Ioannes‛ : blod oma,
‚Philippus‛ e ‚Bartholomaeus‛, ‚Thomas‛ e ‚Matthaeus‛ : tolädan; ‚Iacobus‛ : son ela ‚Alphaeus‛; e ‚Lebbaens‛: ‚Thaddaeus‛ penäinemöl,
‚Simon‛ : Kanaänan, e ‚Iudas‛ : elan di ‚Kariot‛, kel i eträtom omi.
Degtelanis at Yesus älesedom, ed äbüdom omes: «No gololsöd lü pagans e no gololsöd lü zifs Samaritäna!
Gololsöd buikumo lü jips epölavegöl doma : Yisraelän!
Ven ukömols lü ons, predolsöd täno, das regän sülas binon nilik.
Sanolsöd malädanis, lelifükolsöd deadanis, klinükolsöd lepradanis, sejedolsöd milananis! As legivot edagetols osi, as legivot givolsöd osi!
No kepololsöd moni goldik, ni largentiki, ni kupriniki in zönüls olsik.
Ni tävasakädi, ni niklotis tel, ni jukis, ni stafi, ibä voban digädom kosidi oka.
If kömols ini zif u vilag seimik, vestigolsöd, kim in on digädom ad getedön olis; e blibolsöd lä om, jüs detävols!
Pö nügol ini dom, oglidols oni.
If dom binon stimabik, tän püdaglid olsik kömonöd lü dom! If no binon stimabik, tän püdaglid olsik geblibonöd pö ols!
If no getedoy olis, ni daliloy vödis olsik, delemufükolsöd, ven ukömols se dom et u zif et, püfi de futs olsik!
Vö! sagob oles: Obinos pro län elas ‚Sodoma‛ e ‚Gomorrha‛ sofovikum, ka pro zif et.
Ekö! lesedob olis äsä jipis zänodü lups; binolsöd kludo prüdiks äsä sneks, e nenbadiniludiks äsä pijuns!
Ab prüdolsöd demü mens! ibä olovegivons olis lü sanhedrin, ed olebatons olis in sünagogs oksik;
podugols lü proviniguverans e regs demü ob ad lekoefön lekredi olsik lo oms e lo pagans.
Ven lovegivoy olis, no kudolsöd vio e dö utos, kelosi osagols! ibä tü timül et utos potikodükon oles, kelosi osagols.
Ibä ols no binols utans, kels spikons, ab lan Fata olsik, kel spikon dub ols.
Blod bal olovegivom deadio blodi votik, fat cili okik, e cils ovolutikons ta pals oksik ed odeidons onis.
E pohetols fa valikans, demü nem obik; ab utan, kel laidälon jü fin, obleibon padakipön.
If kludo pöjutoy olis in zif bal, fugolsöd täno lü votik! ibä vö! sagob oles, büä ufinükols tävi olsik ve zifs Yisraeläna, Son mena ukömom.
Tidäb no pluom tefü tidan okik, ni hislafan tefü mastan oka.
Saidosös pro tidäb, das vedom äsä tidan okik, e pro hislafan äsä mastan okik! If enemons domasöli eli ‚Beelzebul‛, vio mödikumo onemons so domakompenanis oma.
No dredolsöd kludo pro oms! ibä petegölos nonik dabinon, kelos no posätegon, e peklänedölos nonik, kelos no posevon.
Kelosi sagob oles in dag, sagolsöd utosi in lit! E kelosi lelilols dub lil, notükolsöd utosi de nufs!
No dredolsöd tefü utans, kels kanons deidön koapi, ab no lani! ab dredolsöd buikumo tefü om, kel kanom nosükön in höl e lani e koapi!
Spärs tel no paselons-li tä fenig bal? E no bal atas ofalon sui taled nen büsev Fata olsik.
E de ols hers valik kapa penumons.
Klu no dredolsöd! Buols bu spärs mödik.
Pro alan kludo, kel lekoefom lo mens pro ob, i ob olekoefob lo Fat olsik in süls;
ab alani, kel noädom obi lo mens, i ob onoädob lo Fat olsik in süls.
No cedolsöd, das ekömob ad blinön püdi sui taled! no ekömob ad blinön püdi, ab glävi.
Ibä ekömob ad kodön teläli bevü men e fat onik, daut e mot ofik, lüdaut e lümot ofik,
e domakompenans obinons neflens odas.
Kel löfon fati u moti mödikumo ka obi, utan no digädon pö ob; e kel löfon soni u dauti mödikumo ka obi, utan no digädon pö ob.
Kel no lasumon krodi oka e sökon obi, utan no digädon pö ob.
Kel etuvon lifi okik, utan operon oni; e kel eperon lifi okik demü ob, utan otuvon oni.
Utan, kel getedon olis, getedon obi, ed utan, kel getedon obi, getedon utani, kel elesedom obi.
Utan, kel getedon profetani, bi binom profetan, ogeton mesedi profetana; ed utan, kel getedon ritani, bi binon ritik, ogeton mesedi ritana.
Ed utan, kel givon balane smalanas at bosi, if at binonöv köpet te bal vata koldik, bi binon tidäb obik, vö! sagob oles, no onegeton mesedi okik».

KAPIT: XI

Ven Yesus ifinükon ad gevön tidäbes degtel büdülis at, ämotevom usao ad lejonön e predön in zifs omsik.
Ven ‚Ioannes‛ in fanäböp älelilom dö vobods Kristusa, älesedom tidäbis oka ad säkön ome:
«Binol-li utan, kel ökömom, u mutobs-li stebedön votani»?
E Yesus ägesagom omes: «Gololsöd ad nunön ele ‚Ioannes‛ utosi, kelosi lilols e logols!
Bleinans dönulogons e lemölans zispatons, lepradans paklinükons e sudans lilons, deadans palelifükons e pöfans lelilons gospuli.
E beatik utan binon, kel no skanon dö ob».
Ven ädetevoms, Yesus äprimon ad spikön lü menamödot dö ‚Ioannes‛: «Ad logedön kisi, egolols-li lü däsärt? Ridi dub vien pemufüköli?
Ab ad logedön kisi, egolols-li üfo? Mani klotis feinik lenlaböli? Ekö! utans, kels lenlabons klotis feinik, dabinons in doms regas.
Ab ad logedön kisi, egolols-li? Profetani? Vö! sagob ole, balani, kel binom veütikum ka profetan.
Ibä binom utan, dö kel epenoy: ‚Ekö! olesedob silanani obik lo ol, dat meikomös bü ol vegi‛!
Vö! sagob oles: nek utanas, kels pemotons fa voms, binon gretikum, ka ‚Ioannes‛ : blunedan; ab smalikünan in regän sülas binon gretikum ka om.
De dels ela ‚Ioannes‛ : blunedan jü adel regän sülas pabejutedon, e jutedans gleipons mekädo lü on.
Ibä profetams valik e lonem peprofetons jü tü dels ela ‚Ioannes‛.
Ed, if vilols dasumön osi, atan binom el ‚Elias‛, kel ökömom.
Kel labon lilis ad lilön, utan lilonöd!
Ko kin oleigodob-li menädi at? Sümon ad cils, kels seadons su makets, e lüvokons lü flenädans oksik:
‚Eflutobs oles, ab no edanüdols; eviobs, ab no eflapols olis sui blöt‛.
Ibä, ven el ‚Ioannes‛ äkömom nes fidön e nes drinön, äsagons : ‚Diabäbom‛;
e ven Son mena äkömom, kel sio fidom e drinom, äsagons : «Ekö! mödifidan ä vinidrinan, flen tolädanas e paganas‛! E sap gidükon oki dub vobods okik».
Täno äprimom ad blamön zifanis zifas, in kels mödiküns milagas omik piduinons, bi no ilecenons.
«Vi! o elans di ‚Chorazin‛! Vi! o elans di ‚Bethsaida‛! ibä, üf in ‚Tyrus‛ e ‚Sidon‛ milags piduinonsöv, kels peduinons lä ols, valans ilecenonsöv in lügodaklot e zen.
Ab sagob oles : Obinos tü del cödetama lätik pro elans di ‚Tyrus‛ e ‚Sidon‛ sufovikum, ka pro ols.
Ed ols : elans di ‚Capharnaum‛, kels pelöpükols jü ini sül, odonikols ini höl. Ibä üf in ‚Sodom‛ milags piduinonsöv, kels peduinons lä ols, ibleibonöv dabinön jü ün adel.
Ab sagob oles: Obinos tü del cödetama lätik pro utans topäda di ‚Sodom‛ sufovikum, ka pro ols».
Tü tim et Yesus äsagom, posä isoalükom oki: «Suemob, o Fat! Söl süla e taleda! das eklänedol dinis at pro sapans e täläktans, ed edasevädükol onis balugikanes.
Si! o Fat! ibä somo ävedos plid pro ol.
Val pelovegivon obe fa Fat obik, e nek sevon Soni, pläs Fat; e nek sevon Fati, pläs Son ed utans, keles Son evilom dasevädükön osi.
Kömolsöd lü ob, ols valik, kels fenols, e pebelodols, ed okoedob takädön olis!
Tovolsöd sui ols yoki obik e lärnolsöd de ob! ibä binob ladälo sofälik ä mükik, ed otuvols takedi pro lans olsik.
Ibä yok obik binon sofik, e fled obik leitik».

KAPIT: XII

Ün tim et Yesus ägolom tü jabatadel seimik da grenaläned; bi tidäbs omik äfaemoms, äprimoms ad plökön e fidön spigis.
Ven farisetans älogoms atosi, äsagoms ome: «Ekö! tidäbs olik dunoms bosi, keli no daloy dunön tü jabat».
Ab äsagom omes : «No ereidols-li utosi, kelosi ‚David‛ edunom, ven om e kompenans omik äfaemoms?
Vio ägolom ini dom Goda ed äfidom jonetabodedis, de kels ni om ni kompenans omik ädaloms fidön, bi binons te pro kultans.
U no ereidols-li in lonem, das kultans ün jabats viodoms in saludöp jabati, nendas binoms kodädiks?
E sagob oles: Bos gretikum ka tem dabinon is.
If ädasevolsöv, kisi notodot : ‚Miseri vilob, e no sakrifoti‛ sinifon, no imicödolsöv nenkodädanis.
Ibä Son mena binom mastan jabata».
Edegolölo usao, äkömom ini sünagog omsik,
ed ekö! us men labü nam isägiköl ädabinon. Ädasäkoms ome: «Pedälos-li ad sanön tü jabat»? ko disein ad kusadön omi.
Ed äsagom omes: «If balan bevü ols labomöv jipi te bali, ed at falonöv tü jabat ini sep, no ogleipomöv-li ed oseramenomöv-li oni?
Mö liomödikos nu men pluon-li leigodü jip? Klu pedälos ad dunön benodi tü jabat».
Täno äsagom mene: «Tenükolöd nami olik». Ätenükon oni, ed idönunätikon, äbinon saunik äsä votik.
Ab farisetans ämogoloms ed äplotoms ta om, ad päridükön omi.
Ven Yesus ädasevom atosi, ädetevons usao. Mödikans äsökons omi, ed äsanom onis valik,
ab äproibom ones seväriko ad sevädükön omi,
dat utos pöfölon, kelos pesagon dub profetan : ‚Iesaias‛:
«Ekö! binom hidünan obik, keli evälob, löfäb oba, keli lan obik plidon; oseitob lanöfi oba sui om, olenunom netes cödoti.
No ofeitom, ni oluvokädom, nek olilon su süts vögi omik.
Ridi epleaföl no breikom; sumbudi smoköl no kvänom, jüs ukoedom vikodön gidi.
Ad nem omik nets ospelons».
Täno bleinan sudamüätik pediaböl pälüblinom lü om, ed äsanom omi, sodas sudamüätan äspikom ed älogom.
E menamödots valik äbluvons ed äsagons: «Atan no binom-li bo son ela ‚David‛»?
Ab, ven farisetans äliloms atosi, äsagoms: «Sejedom milananis te dub ‚Beelzebul‛ : cif diabas».
Om, äsevölo utosi, kelos päbetikon ninälo fa oms, äsagom omes: «Regän alik, kel komipon ta ok it podistukon; zif alik u dom alik, kel komipon ta ok it, no obleibon dabinön.
If diab sejedon diabi, tän komipon ta ok it; lio reigän omik üfo obleibon-li dabinön?
If ob sejedob diabis dub ‚Beelzebul‛, dub kin sons olsik üfo sejedoms-li onis? Sekü atos obinoms cödals olas.
Ab if ob sejedob milananis dub lan Goda, tän regän Goda ya ekömon lü ols.
U, lio ek kanom-li nügolön ini dom mana nämik e ravön möbemi omik, if no jänom büikumo mani nämik? ibä pas täno kanom beravön domi.
Utan, kel no binon ko ob, binon ta ob; e kel no kobükon ko ob, utan spearükon.
Sekü atos sagob oles: Sinod alik e blasfäm alik popardons mene; ab slän lana no popardon.
If ek espikon ta Son mena, atos popardon one; ab if espikon bosi ta Saludalanal, atos no popardon one, ni in dabinöp, ni in lananöp.
Ocedols u, das bim binon gudik e fluk ona binon gudik, u, das bim binon badik e fluk ona binon badik; ibä ma fluk bim pasevon.
O luvipärem! vio kanols-li sagön bosi gudik, du binols badiks? Ibä se bundan ladöfa mud spikon.
Men gudik süramenon se diviär ladöfa gudik okik gudikosi; men badik se diviär ladöfa badik okik badikosi.
Ab sagob oles: Dö vöd lindifik alik, keli mens spikons, ogidükons tü cödetamadel lätik;
ibä stabü vöds olik polibocödetol, e stabü vöds olik pomicödetol».
Seimna bibinolavans e farisetans aniks älüspikoms ome so: «O mastan! desirobs ad logön mali de ol».
Ab ägespikom omes: «Menäd badik ä dulterik sukon mali, e mal nonik pogivon one, ka mal profetana : ‚Ionas‛.
Ibä leigoäsä el ‚Ionas‛ äbinom dü dels kil e neits kil in bälid valüta, son mena obinom in nined tala dü dels kil e neits kil.
Mans di ‚Nineve‛ olelifikoms tü del cödetama lätik leigüpü menäd at, ed okoedoms micödetön oni, ibä oms älecenoms ad predam ela ‚Ionas‛; ed ekö! balan, kel binom gretikum ka ‚Ionas‛ binom is.
Jireg sulüdäna polelifükof tü del cödetama lätik leigüpü menäd at, ed okoedof micödetön oni, ibä ekömof de finots taleda ad lilön sapi ela ‚Salomon‛; ed ekö! balan, kel binom gretikum ka ‚Salomon‛ binom is.
If nu lanan neklinik esegolon se men, tän zitevon da topäds sigik ad sukön takädöpi, e no tuvon oni.
Täno sagon: ‚Ogegolob lü dom obik, de kel esegolob‛. Ed us ekömölo tuvon oni vagiki, pesvipöli ä peleodüköli.
Nu segolon e kesumon ko ok lananis votik vel, kels binons badikums ka on, nükömons ini dom e blibons us; so finod mena et vedon badikum ka ün prim. Somo i ojenos tefü menäd badik at».
Du nog äspikom lü menamödots, ekö! mot e blods ästanons plödo, steifölo ad spikön ome.
Ek täno äsagom ome: «Ekö! mot e blods ola stanons plödo; vilons spikön ole»‛.
Ab ägesagom utane, kel isagom atosi: «Kif binof-li mot oba? Kims binoms-li blods oba»?
Ed ätenükölo nami okik love tidäbs okik, äsagom: «Ekö! is mot oba e blods oba binons;
ibä alutan, kel dunon vili Fata obik, kel binom in süls, binon blod obik, sör obik, mot obik».

KAPIT: XIII

Ün tim et Yesus älüvom domi okik, ed äseidom oki len lak.
Nu menamödots so mödiks äkobikons zü om, das ägolom ad seidön oki sui naf.
Äspikom mödiko lü ons in parabs, somo: «Seimna sovan äsegolom ad sovön.
Ven äsovom, dil äfalon sui veg, e böds äkömons ed äfifidons oni.
Dil votik äfalon sui glun stonagik, kö no älabon taili mödik, ed ädaglofikon sunädo, bi ätuvon te jüdi slenik taila,
ab ven sol äsülöpikon, äflamädon ed äsigikon, bi no älabon vulis.
Dil votik äfalon ini tils, e tils ädaglofikons ed äteifons oni.
Dil votik äfalon sui tail gudik, ed ägivon prodi, tumnaiko, mäldegnaiko u kildegnaiko.
Kel labon lilis ad lilön, utan lilonöd»!
Tidäbs nu älükömoms lü om, ed äsagoms ome: «Kikodo spikol-li lü ons in parabs»?
Ägesagom omes: «Bi pegevos oles ad suemön müsteris regäna sülas, ab ones atos no pegevon.
Ibä ai kel dalabon, utane pogivos, ed odalabon bundani; ab kel no dalabon, de utan, utos, keli dalabon, pomosumon.
Sekü atos spikob in parabs, bi logölo no logons, e lilölo no lilons ni suemons.
In ons profetam ela ‚Iesaias‛ pafölon: ‚Me liläm olilols, ab ga no osuemols, e logölo ologols, ab ga no odasevols;
ibä ladäl pöpa et edüfälikon; me lils älilons töbo, e logis oksik äfärmükons; dat no ölogons me logs, no ölilons me lils, no ösuemons me ladäl, no ölecenons, ed ob no ölibükob onis de sinods onsik‛.
Güä logs olsik binons beatiks bi logons, e lils olsik, bi lilons.
Vö! sagob oles: profetans e ritans mödiks edesirons ad logön utosi, kelosi logols, ab no älogons osi, ed ad lilön utosi, kelosi lilols, ab no älilons osi.
Lelilolsöd nu parabi sovana!
If ek lilon sagodi tefü regän sülas, e no suemon oni, tän diab kömom e ravom uti, kel pesovon ini ladäl onik; atos binon ut, kel pesovon sui veg.
Ut, kel pesovon sui top stonagik, binon utan, kel lilon sagodi e lasumon sunädo fredo oni;
ab no labon vuli in ok it, binon men timüla: if padränälon u papöjuton kodü sagod, tän papäridükon sunädo.
Kel pesovon in tils, ut binon utan, kel lilon sagodi, e pö kel kuds taledik e bätods liega teifons oni, e sagod vedon nensekik.
Ed ut, kel pesovon sui tail gudik, binon utan, kel lilon sagodi e suemon oni: at prodon seki, tumnaiko, mäldegnaiko, kildegnaiko».
Parabi votik äloseidom so ones: «Regän sülas sümon ad men, kel sovom sidi gudik ini läned okik.
E ven mens äslipons, neflen omik äkömom, ed äsovom mikebi vü sovot, ed ämogolom.
Ven nu stags äsprotons ed äprimons ad flukön, i mikeb äsüikon.
Täno dünans dalabana äkömoms lü om ed äsagoms: ‚O Söl! no esovol-li sidi gudik ini läned olik? Lio üfo esüükon-li mikebi‛?
Äsagom omes: ‚Men neflenik edunom atosi‛. Tän dünans äsäkoms ome : ‚Vilol-li üfo, das osämikebobs länedi‛?
Ab äsagom : ‚Nö! omögosöv, das pö sämikebam, onosükolsöv leigüpo sovoti.
Leadolsöd daglofön bofikis jü klop! ed ün klopüp osagob fodanes: Kobükolsöd büikumo mikebi, e tanolsöd oni ad tufs, ad filükön oni! Ab blinolsöd greni ini barak‛!»
Parabi votik äloseidom ones so : «Regän sülas sümon ad mutaragran, keli ek äsumon ed äsovon ini läned oka;
binon vo smalikün sidas valik, ab ven edaglofon, binon gretikum ka härbats, ed evedon bim, sodas böds sila kömons ad nästön ini tuigs ona».
Parabi votik äkonom ones: «Regän sülas sümon ad lefapest, keli vom äsumof ed ämigof ini böjuls kil meila, jüs pämökon löliko ko lef».
Atosi valik Yesus äsagom me parabs lü menamödots, e nen parabs no äspikom lü ons;
dat utos pöfölon, kelos pesagon fa profetan: «Omaifükob mudi obik in parabs, onotodob utosi, kelos piklänedon primao».
Täno Yesus äleadom degolön de ok menamödotis, ed ägolom lü dom okik. Nu tidäbs omik äkömoms lü om, ed äbegoms: «Plänolös obes parabi mikeba in läned»!
Ägespikom omes: «Sovan sida gudik binom Son mena;
läned binon vol, sid gudik binon sons regäna, mikeb sons badana,
neflen, kel äsovom eti binom diab; klop binon finikam vola, fodans binoms silanans.
Klu, leigoäsä mikeb pakobükon e pafilükon me fil, so ojenos timü finikam vola.
Son mena olesedom silananis oka, ed okobükoms se regän omik skänis valik, ed utanis, kels dunons negitöfi,
ed ojedoms onis ini purgator; us drenam e knir tutas odabinons.
Tän ritans onidons äsä sol in regän Fata oksik. Kel labon lilis ad lilön, utan lilonöd!
I regän sülas sümon ad div in läned peklänedöl; men tuvon ati, e klänedon oni; sekü fred dö atos golon ad selön vali, keli dalabon, e remon länedi et.
I regän sülas sümon ad tedan, kel sukom pärlatis jönik.
Ven ituvom pärlati jerabik, eselom vali, keli ädalabom, ed äremom oni.
I regän sülas sümon ad fitafilät, kel pejedon ini mel, e konleton dinis valasotik;
ven binon fulik, tiroms oni sui jol, seidoms okis e sesukoms dinis gudik, e jedoms onis ini ninädians; e badädi mojedoms.
So ojenos timü finikam vola: Silanans osegoloms ed oseramenoms badanis, kels dabinons zenodü ritans,
ed ojedoms onis ini purgator; us drenam e knir tutas odabinons.
Suemols-li atosi valik»? Äsagoms ome: «Si»!
Nu äsagom omes: «Sekü atos bibinolavan alik, pro regän sülas petidöl, sümon ad söl doma, kel süramenom se kipedöp okik dinis nulik e bäldikis».
Ven Yesus ifinükom parabis valik at, ädegolom usao.
Ikömölo ini lomazif okik ätidom ones in sünagogs onsik; sodas äbluvikons ed äsagons: «Kiöpao labom-li sapi valik at e fägi ad dunön milagis?
No binom-li son kapenana? Mot oma no panemof-li ‚Maria‛? e blods oma ‚Iacobus‛, ‚Ioseph‛, ‚Simon‛ e ‚Iudas‛?
E sörs oma, ofs valik no lödofs-li lä obs? Kiöpao üfo labom-li vali at»?
Soms äskanons demü om. Ab Yesus äsagom lü ons: «Profetan te no pastimom in lomän e dom oka».
Ed us no äduinom milagis mödik sekü nekred onsik.

KAPIT: XIV

Ün tim et folplinan : ‚Herodes‛ älilom sagädi tefü Yesus,
ed äsagom dünanes okik: «Atan binom ‚Ioannes‛ : blunedan; atan elelifikom se deadans; sekü atos näms et vobedons in om».
‚Herodes‛ igleipom ga eli ‚Ioannes‛ ed ifanäböpom omi, vilöfü el ‚Herodias‛ : jimatan bloda okik : ‚Philippus‛.
Ibä ‚Ioannes‛ äsagom ome: «No pedälos ole ad labön ofi».
Vilöfo ideidomöv omi; ab ädredom demü pöp, kel älecedon omi profetani.
Ven nu motedazäl ela ‚Herodes‛ ikömon, daut ela ‚Herodias‛ ädanüdof lo sog, ed äplitof so vemo eli ‚Herodes‛,
das äpromom yulo ad givön ofe aluti, keli begoföv.
Ed of, fa mot okik pestigädöl, äsagof: «Givolös obe is su bov kapi ela ‚Ioannes‛ : blunedan».
Reg ävedom lügik; ab demü yul okik, e demü lotans, äbüdom, das pägivon,
ed äbüedom säkapön in fanäböp eli ‚Ioannes‛.
E kap omik päninioblinon su bov, e pägivon jipule, e jiatan äblinof oni mote okik.
Tidäbs omik äkömoms ad ramenön funi omik, äsepüloms oni, ed ägoloms konön Yesuse utosi, kelos ijenon.
Ven Yesus älilom atosi, ädetävom usao in naf lü top natädik soalik. E ven menamödots älilons atosi, äsökoms futo se zifs omi.
Ven äsükömom, älogom menamödoti gretik; äkeliedom vemo ko ons, ed äsanom malädanis onsik.
Ven äsoarikos, tidäbs äkömoms lü om, ed äsagoms: «Top at no pabelödon, e binos ya latik. Leadolös mogolön menis, dat kanons golön lü vilags ad remön okes zibis»!
E Yesus äsagom omes: «No nedons mogolön; givolsöd ols ones fidi»!
Ab äsagoms ome: «Labobs nosi, äsä bodedis lul, e fitis tel».
Äsagom: «Blinolsöd onis obe isio»!
Nu äbüdom menamödotes ad seidön okis sui yeb, äsumom bodedis lul e fitis tel, älöpiologom äl sül, ed äbenedom onis; äbreikom bodedis, ed ägivom onis tidäbes, ed atans menamödotes.
Valikans äfidons e päsatükons; älasumoy breikotis eretöl mö bäsets fulik degtel.
Utans, kels ifidons äbinons mans zao lulmils, plä voms e cils.
Sunädo pos atos ämütom tidäbis ad boidön okis ini naf, ed ad lovenafön votaflanio bü om, du öleadom mogolön menamödotis.
Posä ileadom mogolön menamödotis, äbexänom beli ad plekön in soalöp. E ven ivedos soar latik, äbinom us soaliko.
Nu naf äbinon zänodü lak, e päditretülükon dub vefs, bi vien äbinon taik.
Ün neitogal folid älükömom lü oms, ägolölo su vat laka.
Tidäbs, loegöl golön omi su vat laka, äsagoms ebluvölo, das äbinos späk, ed äluvokädoms sekü dredäl.
Ab Yesus äspikom sunädo lü oms, ed äsagom: «Binolsöd benoladäliks! Binos ob. No dredolsöd»!
Nu ‚Petrus‛ ägesagom ome: «O Söl! if binos ol, büdolös üfo obi ad kömön su vat lü ol»!
Äsagom: «Kömolöd»! E ‚Petrus‛ änexänom se naf, ed ägolom su vat lü om.
Ab älogölo vieni nämöfik, ädredikom, e ven äprimom ad sadön, ävokädom: «O Söl! savolös obi»!
Sunädo Yesus ätenükom nami okik, ägleipom omi, ed äsagom ome: «O smalalekredan! Kikodo edotol-li»?
Ven ixänoms ini naf, vien änosikon.
Ed utans, kels äbinoms in naf, ädofaloms lo om, ed äsagoms: «Binol jenöfo Son Goda»!
E ven ilovenafoms, ägoloms ini topäd di ‚Genesareth‛.
E ven mens topäda et ädasevons, kim äbinom, älesedons nunanis lü züamöp lölik ed äblinons ome malädanis valik;
ed atans älebegons ome ad dalön doatön kloti omik, if binosöv te kvat ona. Ed alutans, kels ädoatons osi, äsaunikons.

KAPIT: XV

Ün tim et bibinolavans e farisetans aniks se ‚Hierusalem‛ äkömoms lü Yesus ed äsäkoms:
«Kikodo tidäbs olik neföloms-li stidis de vönädans peloveükölis? Ibä no lavoms namis oksik, ven ofidoms bodi».
Ägesagom omes: «Kikodo i ols nefölols-li büdedi Goda demü vönaoloveikod olsik?
Ibä God esagom: ‚Stimolöd fati e moti olikis‛, e ‚Kel malediton fati u moti oka, utan odeadon fümo‛.
Ab sagols: ‚If sagol fate u mote olik: Utos binon givot, kelosi frutidol ole de ob, no ostimon fati u moti oka‛.
So nenämükols büdedi Goda, demü vönaoloveikod olsik.
O simulans! gideto ‚Iesaias‛ eprofetom dö ols:
‚Pöp at stimon obi ko lips, ab ladäl onik binon fagik de ob.
Vaniko kultons obi me lejonods oksik, kels binons büdeds menas».
Posä ivokom menamödoti lü ok, äsagom one: «Lilolsöd e suemolsöd!
No utos, kelos ninikon ini mud neklinükon meni, ab utos, kel sekömon se mud neklinükon oni».
Täno tidäbs äkömoms ed äsagoms ome: «Sevol-li, das farisetans eskanoms, ven äliloms vödis ola»?
Ägesagom: «Plan alik, kel no peplanon fa Fat sülik obik, posäplanon.
Leadolsöd golön omis! Binoms dugans bleinik bleinanas, ed if bleinan bal dugon bleinani votik, bofikans falons ini sep».
Täno ‚Petrus‛ ägesagom ome: «Plänolös obes parabi»!
Äsagom omes: «Binols-li i ols ai nog so nelärnafägiks?
No sevols-li, das alutos, kel ninikon ini mud, kömon ini bälid, e pamojedon ini prifet?
Ab kelos sekömon se mud, utos süikon se ladäl, ed atos neklinükon meni.
Ibä se ladäl tikods badik süikons: sasens, dulters, nepueds, tifots, temunods dobik, blasfäms.
Ats binons dins, kels neklinükons meni; ab fid ko nams no pelavöls no neklinükon meni».
E Yesus ädegolom usao, ed ägolom lü topäds di ‚Tyrus‛ e ‚Sidon‛.
Ed ekö! vom Kanaänik se topäds et äsegolof ed älüvokädof ome: «Miserolös obi! o Söl! O Son ela ‚David‛! daut obik diabäbof vemo».
No ägespikom ofe vödi bal. Täno tidäbs äkömoms lü om, ed äbegoms ome: «Leadolös mogolön ofi! ibä sökof obis vokädölo».
Ägesagom omes: «Pelesedob te lü jips peperöl dafamüla Yisraelänik».
Ab änilikof lü om, ed ädofalöl lo om, äsagof: «O Söl! yufolös obi»!
Ab ägesagom nu: «No binos gidöfik ad sumön bodi cilas, ed ad jedön oni dogiles».
Ab äsagof: «Binos sio soik! o Söl! ibä dogils fidons bodabrekülis, kels falons de tab sölas onsik».
Täno Yesus äsagom ofe: «O vom! kred olik binon gretik. Ojenosöd ma vil olik»! E daut ofik äsaunikof de timül et.
Edetevölo usao, Yesus äkömom leni lak di ‚Galilaea‛, äbexänom beli, ed äseidom oki.
Täno menamödots mödik äkömons lü om, keblinöls lemanis, bleinanis, sudamüätanis, boatanis, e votikanis mödik, e seitöls onis foi futs omik, ed äsaunom onis;
sodas menamödots ästunikons, ven älogons, das sudamüätans äspikons, boatans äsaunons, lemans äzigolons, e bleinans älogons. Ed äglorükons Godi Yisraeläna.
Nu Yesus ävokom tidäbis lü ok ed äsagom: «Keliedob ko menamödot; ibä mens binons ya dü dels kil lä ob, e no labons bosi ad fidön. No vilob leadön degolön onis jöeniko, dat no sukubons dü vegam».
Tidäbs äsagoms ome: «Lio ogetobs-li in soalöp at bodi saidik, ad satükön mödoti so gretiki»?
E Yesus äsagom omes: «Bodedis kimödotik labols-li»? Äsagoms: «Veli e fitilis nemödik».
Täno äbüdom menes ad seidön okis sui glun.
Äsumom bodedis vel e fitis, e posä isagom danipleki, äbreikom onis, ed ägivom onis tidäbes okik, kels ägivoms onis menes.
Valans äfidons e päsätükons. Breikotis iretöl älasumoy : bäsets fulik vel.
Num utanas, kels ifidons äbinons: mans folmil, plä voms e cils.
E posä ileadom mogolön menamödotis, äboidom oki ini naf ed äkömom ini topäd ela ‚Magada‛.

KAPIT: XVI

Seimna farisetans e sadukans äkömoms ad blufön omi, ed äsäkoms ome ad jonön omes mali se sül.
Ägespikom omes: «Soaro sagols : ‚Stom jönik, ibä sil binon redik‛;
e gödo : ‚Adelo olabobs tepi, ibä sil binon dofaredik‛. O simulans! Sevols-li sio ad distidön logoti sila, ab no malis timas?
Dafamül badik ä dulterik säkon mali; ab mal nonik pogivon one, plä ut profetana : ‚Ionas‛». Ed älüvölo omis, ädegolom.
Ven tidäbs äkömoms leni votaflan, iglömoms ad kesumön bodi.
Tän Yesus äsagom omes : «Prüdolsöd! galedolsöd olis demü lefapest farisetanas e sadukanas»!
Ävätäloms ninälo ed äsagoms: «Binos, bi no ekesumobs bodedis».
Yesus äsuemom atosi, ed äsagom: «Kisi vätälols-li ninälo»? O smalalekredans! bi no ekesumols bodedis.
Labols-li üfo no nog dasevi? No betikols-li bodedis lul lulmilanas, e bäsetis kimödotik elasumols?
Ni bodedis vel folmilanas, e bäsetis kimödotik elasumols?
Lio mögos-li, das no suemols, das no äspikob oles dö bodeds, ven äsagob ad galedön olis demü lefapest farisetanas e sadukanas»?
Täno ädasevoms, das no esagom, das ämutoms galedön demü lefapest boda, ab demü lejon farisetanas e sadukanas.
Ven Yesus äkömom ini topäd di ‚Caesarea Philippi‛, äsäkom tidäbes okik «Kim, mens sagons-li, das Son menas binom»?
Äsagoms: «Semans : ‚Ioannes‛ : blunedan; votans : ‚Elia‛; votans : ‚Ieremias‛ u balan profetanas».
Äsagom omes: «Ab ols, kim, sagols-li, das binob»?
E ‚Simon Petrus‛ ägespikom ome: «Binol Kristus : Son Goda liföl».
Yesus ägesagom ome: «Beatik binol, o ‚Simon Bar-Iona‛! ibä atosi mit e blud no edasevädükons ole, ab Fat obik in süls.
E sagob ole : Binol ‚Petrus‛ : klifaman, e su klif at olebumob komoti obik, e leyans höla no obemekädons oni.
Ogivob ole kikis regäna sülas; ut, keli otanol su taled, putanon in süls, ed ut, keli olivükol su taled, pulivükon in süls».
Tän äproibom tidäbes, ad sagön eke, das äbinom Kristus.
De timül et Yesus äprimom ad jonön tidäbes okik, das äzesüdos, ad golön lü ‚Hierusalem‛, e das ösufom mödiko de bäldikünans, de lekultans, e de bibinolavans, das pödeidom, e das ölelifikom tü del kilid.
E ‚Petrus‛ äkesumom omi flanio, ed äprimom ad blamön omi: «God galedomös oli! O Söl! atos no oreifon oli».
Ab ädeflekom oki, ed äsagom ele ‚Petrus‛: «Moö! gololöd po ob! O diab! binol skän pro ob; ibä no labol tikodis Goda, ab utis menas».
Täno Yesus äsagom lü tidäbs okik: «If ek vilom züpön obi, atan noädomöd oki! lasumomöd krodi okik! e sökomöd täno obi!
Ibä, kel vilon dakipön lifi okik, utan operon oni; ed utan, kel peron oni demü ob, otuvon oni.
Kisi frutosöv-li mene, if gaenonöv voli lölik, e lan ona sufonöv dämi? U kisi men givonöv-li tökü lan okik?
Ibä Son mena okömom in glor Fata okik ko silanans omik, ed oblöfom eke ma kondöt omik.
Vö! sagob oles: Semans utanas, kels binons is, no odeadons, büä oloegons kömön Soni mena ini regän omik».

KAPIT: XVII

Pos dels mäl Yesus äkesumom eli ‚Petrus‛, eli ‚Iacobus‛ ed eli ‚Ioannes‛ : blod omik, ed äblinom omis lü bel geilik; votan no ädabinon us.
Ed äcenodom lo oms; logod omik änidon äsä sol, klots omik ävedons vietiks äsä lit.
Ed ekö! lo oms ‚Moyses‛ ed ‚Elias‛ äpuboms, äspikölo ko om.
Täno ‚Petrus‛ äspikom lü Yesus: «O Söl! Binos gudik, das binobs is. If vilol, obumobs is tänadis kil: bali pro ol, bali pro ‚Moyses‛, e bali pro ‚Elias‛».
Du nog äspikom, ekö! lefog litöl älovejadon omis, e se lefog vög äsagon: «Atan binom son palöföl obik, keli plidob vemo. Lilolsöd omi»!
Ven tidäbs äliloms atosi, äfaloms sui logods oksik, ed ädredikoms vemo.
Ab Yesus äkömom lü oms, ädoatom omis, ed äsagom: «Löädolsöd e no dredolsöd»!
E ven älölogoms logis oksik, no älogoms votani, äsä te Yesusi.
E dü nexän de bel Yesus äbüdom omes: «Sagolsöd neke bosi dö vision at, büä Son mena ulelifikom se deadans»!
E tidäbs omik äsäkoms ome: «Lio-li? Bibinolavans esagoms ga, das ‚Elias‛ ökömom büikumo».
Ägespikom : «‚Elias‛ kömom büikumo, ed oleodükom vali.
Ab sagob oles, das ‚Elias‛ ya ekömom, ab no edasevoy omi, ed edunoy ko om, soäsä eviloy. So i Son mena osufom dub ons».
Täno tidäbs äsuemoms, das äspikom ko oms dö ‚Ioannes‛ : blunedan.
Ven äkömoms lä menamödot, men äkömon lü om, äkienon lo om,
ed äbegon: «O Söl! miserolös soni obik! ibä binom munamalädik e sufom vemo; falom go suvo ini fil, e suvo ini vat.
Eblinob omi lü tidäbs olik, ab no ekanoms sanön omi».
Yesus ägesagom : «O menäd nelekredik ä mivedöl! Kilunüpo obinob-li nog lä ols? Kilunüpo mutob-li nog sufälön olis? Blinolsöd omi obe isio»!
E Yesus ätädom milanani, posä etan äsegolon se om, e de timül et hipul äbinom saunik.
Ven tidäbs äbinoms soeliks ko om, äsäkoms ome: «Sekü kod kinik no äkanobs-li semofön oni»?
Yesus nu äsagom omes: «Sekü smalalekred olsik. Ibä, vö! sagob oles, if labolsöv lekredi, äsä keril mutara, sagolsöv bele at: «Gololöd de top at lü top et‛! ed ogolonöv, e nos binonöv nemögik pro ols.
Ab menäd at no setevon, äsä ad plekön e ad cunön».
Ven ästeboms in Galileyän Yesus äsagom omes: «Son mena polovegivom ini nams menas.
Odeidoy omi, ab tü del kilid olelifikom». Ed äglumikoms vemo.
Ven äkömoms ini ‚Capharnaum‛ kädädans teldragmadas pro tem äsäkoms ele ‚Petrus‛ : «Mastan olsik no opelom-li teldragmadi»?
Äsagom : «si»! E ven äkömom lomio, Yesus äprevenom omi, ed äsäkom: «Kisi cedol-li? o ‚Simon‛! Regs taleda, de kins flagädoms-li tripi u kasidi? de sons lönik-li okas u de foginans-li»?
Ven ägesagom ad atos: «De foginans», Yesus äsagom ome: «Tän sons binoms netripabiks.
Ab, dat no skänobs onis, gololöd lü lak, sejedolöd fitahuki, e sumolöd fiti balid, keli süramenol, maifükolöd mudi onik, ed otuvol sikuli; pelolöd me at pro ob e pro ol»!

KAPIT: XVIII

Ün tim et tidäbs äkömoms lü Yesus ed äsäkoms: «Kin ga binon-li gretikün in regän sülas»?
Ed ävokom cili, äpladom oni zänodü oms,
ed äsagom: «Vö! sagob oles, if no cenols, e vedols äsä cils, no kömols ini regän sülas.
Klu kel mükükon oki äsä cil at, utan binon gretikün in regän sülas.
E kel lasumon cili somik nemü ob, utan lasumon obi;
e kel skänon balani smalikanas at, kels lekredons obi, binosöv gudikum pro utan, das mülaston palägonöv zü särvig onik, e pasädonöv ini dib laka.
Vi! lü vol demü skäns. Zesüdos, das skäns kömons, ab vi! lü men, dub kel skän davedon.
If nam olik u fut olik skänonöv oli, decöpolöd oni e mojedolöd oni! ibä binos gudikum ad lifön pemitulölo u boatiko, kas pajedön ko nams tel u futs tel ini fil laidüpik.
Ed if log olik skänonöv oli, setirolöd oni e mojedolöd oni! ibä binos gudikum pro ol ad lifön ballogiko, kas pajedön tellogiko ini höl fila.
Galedolsöd ad no ludigidön bali smalikanas at! ibä sagob oles, das silanans onsik logons laiduliko logodi Fata obik, kel binom in süls.
Ibä Son mena ekömom ad savön utosi, kelos peperon.
Kisi cedols-li? If ek labon jipis tum, e bal onas epölavegon, no olüvon-li jipis züldegzül su bel, e no ogolon-li ad sukön jipi epölavegöl?
Ed if utuvon oni, vö! sagob oles, das ofredon mödikumo dö at, ka dö jips züldegzül, kels no epölavegons.
So i no binos vil Fata olsik, kel binom in süls, das balan smalikanas at opäridikon.
If blod olik edunomöv midunoti kol ol, gololöd ad süadükön omi, ven binol soelik ko om, tefü kodäd omik. If dalilom oli, tän egaenol omi.
If no dalilom oli, sumolöd ko ol täno balani u pösodis tel! dat din alik fümon dub temunods temunanas tel u kilas.
If nu no dalilomöv i onis, sagolöd osi komote! If no dalilomöv i komoti, tän binomös pö ol asä pagan u tolädan!
Vö! sagob oles: utos valik, kelosi tanätols su taled, putanäton in sül, ed utos, kelosi sätanätols su taled, pusätanäton in sül.
Dönu, sagob oles, if telans olas su taled plekonsöv baicediko dini alseimik, atos pogivon ones fa Fat obik in süls;
ibä kö telans u kilans ekobikons demü nem obik, ob binob zänodü ons».
Täno ‚Petrus‛ äkömom lü om, ed äsagom: «O Söl! liomödotikna mutob-li pardön blode obik, kel dunom midunoti kol ob, jüo velna-li»?
Yesus äsagom ome: «Sagob ole no jüo velna, ab jüo veldegna velna.
Sekü atos regän sülas kanon paleigodön ko reg seimik, kel ävilom klirön ko dünans okik.
Ven äprimom kliri, balan pälüblinom ome, kel ädebom ome taläntis degmil,
e bi no älabom moni ad pelön, söl äbüdom, das om, ko jimatan e cils oma, ed alut, keli ädalabom, pöselon diseinü moed deba.
Sekü atos dünan ädofalom lo om, ed äsagom : ‚Sufädolös ko ob! opelob ole vali‛.
Söl ämiserom dünani et, äleadom mogolön omi, ed ästiamom ome debi.
Ven dünan et äsegolom, ätuvom balani kedünanas omik, kel ädebom ome sikulis tum; ägleipom omi len gug ed äsagom : ‚Pelolöd uti, keli debol‛!
Sekü atos kedünan omik ädofalom lo om ed äsagom lebegölo: ‚Sufädolöd ko ob! opelob ole‛.
Ab no ävilom, ämogolom ed äfanäbükom omi, jüs öpelom pedebölosi.
Ven kedünans älogoms utosi, kelos äjenon, älügikoms vemo, ed ägoloms ad konön vali söle oksik.
Tän söl äbüdom kömön omi, ed äsagom ome: ‚O dünan badik! Debi lölik et estiamob ole sekü lebeg olik;
No äsötol-li i ol miserön kedünani olik, soäsä ob emiserob oli‛?
Ed äzunölo, söl omik älovegivom omi gitädanes, jüs öpelom uti valik, keli ädebom ome.
So i Fat sülik olsik odunom oles, if no alans olas pardomsöv ladöfo blode okik».

KAPIT: XIX

Posä Yesus ispikom vödis at, ädetevom de Galileyän, ed ägolom lü ziläk Yudäna votaflanü el ‚Iordanis‛.
Menamödots mödik äsökons omi, ed äsanom us onis.
E farisetans äkömoms lü om, ad blufön omi; äsäkoms: «Pedälos-li ad dejoikön jimatani okik demü kod alseimik»?
Ägesagom: «No ereidob-li, das Jafal emekom primao dabinädis e manikis e vomikis?
e das esagom: ‚Sekü kod at man olüvom fati e moti oka, ed oslopom jimatani okik; e bofans et obinons koap midik bal‛?
Binons kludo no plu koaps tel, ab koap midik bal. Kelosi God kludo ebalom, utosi men no teilonöd»!
Äsagoms ome: «Sekü kis üfo ‚Moyses‛ ebüdom-li mane ad givön ofe matiteilapenädi, büä dejoikom ofi»?
Äsagom omes: «Demü düfäl ladäla olsik ‚Moyses‛ edälom oles ad dejoikön jimatanis olsik; ab primao no ebinos soik.
E sagob oles: Kel dejoikom jimatani okik demü kod votik, äsä demü nepued, e matikom ko jivotan, utan dulterom; e jijoikäb, kel matikof ko hivotan, dulterof».
Täno tidäbs omik äsagoms ome: «If tef bevü man e vom binon soik, tän no binos frutabik ad matikön».
Ab äsagom omes: «No valans suemons sagodi at; te utans, kels labons tälenüli atosa.
Ibä negenükäbs dabinoms, kels pemotoms so, negenükäbs dabinoms, kels penegenükoms fa mens, ed i negenükäbs dabinoms, kels enegenükoms okis it demü regän sülas. Kel kanon suemön atosi, utan suemonös osi»!
Täno cils päblinons lü om, dat äsuiseitomös plekölo namis sui ons. Ab tidäbs äblamoms onis.
Ab Yesus äsagom: «Letolsöd cilis, e no neletolsöd onis ad kömön lü ob! Ibä lü somans regän sülas duton».
E posä iseitom namis sui ons, ädetevom usao.
Ed ekö! balan äkömom lü om ed äsagom: «O Mastan gudik! gudikosi kinik mutob-li dunön, ad dagetön lifi laidüpik»?
Äsagom ome: «Liö! nemol-li obi gudiki? Nek binon gudik, plä Balan, sevabo God. Ab if vilol nügolön ini lif, fölolöd ai büdedis»!
Äsagom ome: «Kinikis-li»? Yesus äsagom: «No sötol deidön, no dulterön, no tifön, no temunön dobiko,
Stimolöd fati e moti olikis, e löfolöd kemeni olik äsä oli it»!
Hiyunan äsagom ome: «Atosi valik yunao ai edunob. Kisi edunob-li nog tu nemödiko»?
Yesus äsagom ome: «If vilol binön lölöfik, benö! Selolöd uti valik, keli dalabol, givolöd oni pöfanes, ed olabol divi in sül. Kömolöd e sökolöd obi»!
Ab ven hiyunan älilom vödis at, ädegolom lügiko; ibä älabom dalabotis mödik.
Täno Yesus äsagom tidäbes okik: «Vö! sagob oles, obinos töbik pro liegan ad nügolön ini regän sülas.
Si! sagob oles, binos fasilikum pro jamod ad golön da hog nada, ka pro liegan ad nügolön ini regän Goda».
Ven tidäbs äliloms atosi, äbinoms go bluviks, ed äsagoms: «Ab kin täno kanon-li binön sefik»?
E Yesus omis lülogöl äsagom: «Pö mens atos nemögon, ab pö God val binon mögik».
Tän ‚Petrus‛ äsagom gespikölo ome: «Ekö! Elüvobs vali, ed esökobs oli; kis üfo olüduton-li lü obs»?
Yesus äsagom omes: «Vö! sagob oles, das ols, kels esökols obi, oseadols, ven Son mena oseadom su tron glorik oka, i su trons degtel, ad cödön tribütis degtel Yisraeläna.
Ed alan, kel elüvon domis, blodis, söris, moti, fati, jimatani, cilis u länedis oka nämätü nem obik, odageton tumoti, ed ogeron lifi laidüpik.
Ab balidans mödik obinons lätikans, e lätikans balidans».

KAPIT: XX

«So regän sülas binon äsä domasöl, kel äsegolom ün göd gölik ad hürön vobanis demü vitidagad okik.
Posä ibalädom ko vobans ad pelön omes sikuli bal tä vobod dela bal, äsedom omis lü vitidagad okik.
Ven äsegolom tü düp kilid dönu, älogom su maket votanis, kels äbinoms nenvobiks.
Atanes äsagom: Gololsöd i ols lü vitidabel, ed ogivob oles uti, kel binon gidik!
Ägoloms usio. Ven dönu äsegolom zao tü düp mälid e tü düp zülid, ädunom leigo.
E ven äsegolom zao tü düp degbalid, ätuvom votanis, ed äsäkom omes: Sekü kis stanols-li is nevobiko dü del lölik?
Äsagoms ome: Bi nek ehürom obis. Äsagom omes: Gololsöd i ols lü vitidagad! Ogetols uti, kel binon gidik.
Ven soar ivedos söl vitidagada äsagom guvane oka: Vokolöd vobanis e pelolöd omes mesedi, primölo pö lätikan e somo jü balidan!
Ven utans de düp degbalid ikömoms, alans ägetoms sikuli bal.
Ven balidans ikömoms, äniludoms ad getön mödikumo, ab i oms alik ägetoms sikuli bal.
Pö get ata ämuroms ta dalaban,
ed isagoms: Lätikans evoboms te dü düp bal, ed eleigädol omis ko obs, kels evobobs töbiko in hit dü del lölik.
Ab ägespikom balane omas: O flen- no negidob kol ol. No ebalädikol-li ko ob tefü sikul bal?
Sumolöd uti, kel duton lü ol e mogolöd! Vilob givön lätikane et leigiko äsä ole.
U no dalob-li dunön ko obikos utosi, kelosi vilob? U log olik zunon-li, bi binob gudik?
Somo lätikans obinons balidans, e balidans lätikans; ibä mödikans pevokons, ab nemödikans pevälons».
E ven Yesus ätevom lü ‚Hierusalem‛, äkesumom te tidäbis degtel, ed äsagom dü vegam omes:
«Ekö! tevobs lü ‚Hierusalem‛, e Son mena polovegivom lekultanes e bibiinolavanes; ed atans ocödetoms omi ad deadön.
Ed olovegivoms omi paganes, ad kofön, ad lebatön ed ad krodön omi; ab tü del kilid polelifükom».
Täno mot sonas ela ‚Zebedaeus‛ äkömof ko sons ofik lü om ed ädofalof lo om ad begön ome bosi.
Äsagom ofe: «Kisi desirol-li»? Äsagof ome: «Sagolös, das sons obik tel at oseadoms detü e nedetü ol in regän olik»!
Yesus ägesagom: «No sevols utosi, kelosi begols. Ofägols-li ad vagio drinön köpi, keli ob ovagükob? (ud ad pablunedön me bluned, me kel poblunedob»?) Sagoms ome: «Si»!
Ed äsagom: «Köpi obik ovagiodrinols sio, (e me bluned, me kel pablunedob, poblunedols sio) ab seadi detü ob e nedetü ob, no kanob gevön, ab atos pogevon fa Fat oba utanes, keles atos pejonedon fa om».
Ven degans votik äliloms atosi, äbadocedoms osi vemo blodes tel.
Yesus ävokom omis lü ok ed äsagom: «Sevols, das plins reigoms pöpis, e das gretans bemastoms onis.
So no dalos jenön bevü ols; ab utan, kel vilom vedön gretik bevü ols, binomöd dünan olsik!
Ed if ek bevü ols vilom binön balidan, utan obinomöd slafan olsik!
leigoäsä Son mena no ekömom ad padünön, ab ad dünön, ed ad givön lifi okik asä säsinamasakrifoti pro mödikans».
E ven ädegoloms se ‚Iericho‛, menamödot gretik äsökon onis.
Ed ekö! bleinans tel, kels äseadons len veg, ed älilons, das Yesus äbeigolom, ävokädons: «Miserolös obis, o Söl! o Son ela ‚David‛»!
Menamödot äblamon onis, ed äbüdon ones ad seilön. Ab ävokädons nog laodikumo: «Miserolös obis, o Söl! o Son ela ‚David‛»!
E Yesus ästopom, älüspikom lü ons, ed äsäkom: «Kisi vipols-li, das odunob oles»?
Äsagons ome: «O söl! das logs obsik pamaifükonsös»!
E Yesus ämiserom onis, ed ädoatom logis onsik, e sunädo äkanons logön, ed äsökons omi.

KAPIT: XXI

Ven änilikoms lü ‚Hierusalem‛ ed äkömoms tö ‚Bethphage‛ len Learabel, Yesus älesedom tidäbis tel,
ed äsagom omes: «Gololsöd lü vilag visü ols, ed otuvols sunädo jicuki pefimatanöl, e cuküli lä of. Livükolsöd onis, e blinolsöd onis obe!
Ed if ek sagonöv bosi dö atos, gesagolsöd täno : Söl neodom onis, tän oleadon sunädo golön onis».
Atos ejenon, dat pöfölon utos, kelosi profetan esagom:
«Sagolsöd daute ela ‚Sion‛: Ekö! reg olik kömom lü ol, sofäliko e seadölo su cuk e cukül : nimül lodotanima».
Tidäbs ädegoloms, ädunoms äsä Yesus ikomitom omes,
äblinoms jicuki e cuküli ed äseitoms klotis oksik sui ons, ed äseidoms omi sui ats.
E dil gretikün menamödota äseatenükon klotis okik sui veg, votikans ädeflapons tuigis de bims, ed ästürülons onis sui veg.
Menamödots, kels äfogolons e kels äsökons, ävokädons: «‚Hosanna‛! pro Son ela ‚David‛! Pabenedomös utan, kel kömon nemü Söl! Löpiküno ‚Hosanna‛»!
E ven änüvegom ini ‚Hierusalem‛, zifanef lölik äfäkädikon, ed äsäkon: «Kim atan binom-li»?
E menamödots äsagons: «Atan binom Yesus : profetan se ‚Nazareth‛ in Galileyän».
E Yesus änügolom ini tem Goda, ed ämofom selanis e remanis votikis, kels äbinons in tem, ädojedom tabis monicänanas e bamis pijuniselanas.
Ed äsagom omes: «Epenoy: ‚Dom oba ponemon plekadom‛, ab ols emekols oni ravanaspadädi‛».
Täno bleinans e boatans äkömoms lü om in tem, ed äsanom onis.
Ab lekultans e bibinolavans äskanoms, ven älogoms milagis, kelis ädunom, e ven älieloms vokädön cilis in tem: «‚Hosanna‛ pro Son ela ‚David‛».
Ed äsagoms ome: «Lilol-li utosi, kelosi atans sagons»? E Yesus äsagom omes: «Si! Ereidols-li neföro? ‚Se muds cilas e sügäbas epreparol lobi olik‛».
Älüvom omis ed äsegolom se zif lü ‚Bethania‛, kö ästebom dü neit.
Ven ägegolom ün göd fovik lü zif, äfaemom.
E ven älogom figabimi len veg, ägolom lü on, ab ätuvom nosi äsä bledis. Äsagom nu one: «Laidüpo no plu oprodon flukis». E sunädo figabim äsigikon.
Ven tidäbs älogoms atosi, ästunoms ed äsagoms: «Lio figabim esigikon-li süpo»?
E Yesus ägespikom omes: «Vö! sagob oles, if labolsöv lekredi e no dotolsöv, no dunolsöv te utosi, kelosi edunob pö figabim at, ab, if sagolsöv lü bel at: ‚Tovolöd oli, e sturolöd ini mel‛! atos jenonöv.
Alutosi, kelosi begolsöv lekredölo, getolsöv».
E ven ikömom ini tem, ed älejonom us, lekultans e bäldikünans pöpa äsäkoms ome: «Sekü gitod kinik dunol-li atosi? e kim egivom-li ole gitodi at»?
Yesus ägesagom omes: «I ob olonülob oles säki. If ogivols obe gespiki, i ob osagob oles, sekü gitod kinik, dunob atosi.
Kiöpao bluned ela ‚Ioannes‛ binon-li? Se sül-li, u se mens-li»? Ävätäloms nu ninälo: «If sagobs : ‚Se sül‛, tän osäkom obes: ‚Kikodo üfo no ekredols-li omi‛?
If sagobs: ‚Se mens‛, tän dredobs demü menamödot, ibä mödikans lecedons eli ‚Ioannes‛ asä profetani».
Ägespikoms kludo: «No sevobs osi». Tän i om äsagom omes: «Täno i ob no sagob oles, sekü gitod kinik dunob atosi.
Lio betikols-li atosi? Ek älabom sonis tel. Äkömom lü balidan ed äsagom: ‚O son obik! Gololöd ad vobön adelo in vitidagad obik‛!
Ägesagom: ‚No vilob osi‛. Ab latikumo älepidom osi, ed ägolom.
Ed ägolölo lü telidan, äsagom otosi. Atan ägesagom: ‚Si! o Söl‛! ab no ägolom.
Kim bofikanas edunom-li ma vil fata okik»? Ägesagoms: «Balidan». Tän Yesus äsagom omes: «Vö! sagob oles: Tolädans e jinepuedans okömons bu ols ini regän Goda.
Ibä ‚Ioannes‛ ekömom lü ols ad jonön oles vegami verätik, ab no ekredols omi. Tolädans e jinepuedans sio ekredons omi, e do älogols atosi, no eleceinols latikumo olis, e no eprimols ad kredön omi.
Lilolsöd parabi votik! Glunidalaban seimik imeikom vitidagadi, ibuidom oni, ibüedom mekön in on vitidabälipedömi, ed ibumom tümi; äbailom oni vitidagadanes ed ämotävom.
Ven nu klopüp änilikon, älesedom dünanis okik lü vitidagadans ad getön flukis, kels ädutons lü om.
Ab vitidagadans ägleipoms dünanis omik, äflapoms atanis, ädeidoms votanis, ed ästonoms dönu votanis.
Dönu älesedom dünanis votik, ön num gretikum, ka pö naed balid, ed ädunoms ta oms ön mod ot.
Fino älesedom soni okik lü oms, sagölo ninälo: ‚Ospaloms soni obik‛.
Ab ven vitidagadans älogoms soni, äsagoms odes: ‚Atan binom geran. Gö! deidobsöd omi, e dakipobsöd geroti omik‛!
Klu ägleipoms omi, äjedoms omi se vitidagad, ed ädeidom omi.
Ven nu dalaban vitidagada gekömom, kisi odunom-li ta oms»?
Äsagoms ome: «Opäridükom badanis, ed obailom vitidagadi vitidagadanes votik, kels oblünoms ome tü tüps pötik flukis».
Yesus äsagom omes: «Ereidols-li neai in penäds bibik? ‚Ston, keli bumans emojedoms, evedon gulaston. Atos ejenon ma vil Söla, e binon milag in logs obsik‛.
Demü atos sagob oles: Regän Goda podesumon de ols, e pogivon pöpe, kel prodon flukis.
Ed utan, kel falon sui ston at, otrovon, ed utani, sui kel falon, otroivon».
Ven lekultans e farisetans äliloms parabis omik, äskanoms, das äzeilom omis.
Ed ästeifoms ad bemastikön omi, ab ädredoms menamödotis, bi ats älecedons omi profetani.

KAPIT: XXII

Dönu Yesus äspikom in parabs; äsagom:
«Regän sülas sümon ad reg, kel ämeikom matedafidedi pro son okik,
ed älesedom dünanis okik ad vokön utanis, kels pivüdons pro matedafided; ab no ävilons kömön.
Dönu älesedom dünanis votik, ko komit: Sagolsöd vüdäbes: Ekö! fided obik pemökon, hobubs e veter pepinädüköl pepugons, e val binon blümik. Kömolsöd lü matedafided!
Ab nes demön atosi ägolons, balan lü läned okik, votan lü tedabüsid okik;
e retans ägleipons dünanis omik, ed ämiträitons ed ädeidons omis.
Nu reg et äzunikom, ed älesedom kriganis okik ad dadeidön sasenanis, ed ad lefilükön zifi onas.
Täno äsagom dünanes okik: Matedafided binon sio blümik, ab vüdäbs no ävöladons pro at.
Gololsöd lü traväröps vegas, e vüdolsöd ad matedafided alutanis, kelis otuvols.
Dünans et nu ägoloms sui vegs, ed äblinoms valanis, kelis ätuvoms, badikanis e gudikanis. E tab matedafideda äbinon fulik me lotans.
Ven nu reg änükömom ad lelogön lotanis lenseatöl, älogom us meni, kel no ilenükon matedaklotemi.
Äsagom ome: ‚O flen! Lio ekömol-li isio nen matedaklotem‛? Ed ämüätikon.
Täno reg äsagom dünanes: ‚Tanolsöd futis e namis omikis, lasumolsöd omi e jedolsöd omi ini dagöp plödikün! Us drenam e knir tutas odabinons‛.
Ibä mödikans pevokons, ab nemödikans pevälons».
Täno farisetans äkobikoms ad vätälön, vio öbrulälükoms omi medü säk böladik.
Älesedoms lü om tidäbis oksik ko slopans ela ‚Herodes‛, ad säkön ome: «O mastan! sevobs, das binol men veratiälik, das lejonol ma verat vegami Goda, e das demol neki; ibä binol men nesekidik.
Sagolös kludo obes: Lio cedol-li? Pedälos-li ad pelön tripi lampöre, u no»?
Ab Yesus ädaseivom diseini badik omsik, ed äsagom: «O simulans! Kio blufols-li obi?
Dajonolsöd obe tripafenigi»! Äblinoms ome sikali.
Ed äsäkom omes: «De kim magot at binol-li? E lio nüpenäd tonon-li»?
Äsagoms ome: «Atan binom lampör». Täno äsagom omes: «Givolsöd kludo lampöre utosi, kelos duton lü lampör, e Gode utosi, kelos duton lü God»!
Ven äliloms atosi, ästunikoms, äzedoms omi, ed ämogoloms.
Ün del ot sadakans, kels nooms lelifikami, äkömoms lü om, ed äsäkoms ome:
«O mastan! ‚Moyses‛ esagom: ‚If ek deadom nenciliko, tän blod omik omatikom ko jimatan omik, ad fatön posbinanis blode okik‛.
Nu lä obs blods vel ädabinoms. Balidan ämatikom ed ädeadom, e bi no älabom cilis, äposbinükom jimatani okik blode okik.
E so äjenos pö telidan, pö kilidan, jü pö velidan.
Fino pos valans i vom ädeadof.
Pö lelifikam, de kim obinof-li jimatan? ibä valans elaboms ofi».
Yesus ägespikom omes: «Pölols, bi no sevols penädis bibik, ni nämi Goda.
Ibä pö lelifikam no matikons ni pamatükons, ab binons as silanans in sül.
E tefü lelifikam deadanas no ereidols-li utosi, kelos pesagon oles fa God:
‚Binob God ela ‚Abraham‛, God ela ‚Isaac‛ ä God ela ‚Iacob‛? God no binom God deadanas, ab God lifölanas‛».
Ven menamödots älilons atosi, äbluvikons dö lejon omik.
Ven farisetans äliloms, das isäspikom sadukanis, äkobikoms,
e balan omas : gitavan äsäkom ome, ad blufön omi:
«O mastan! büded kinik lonema binon-li veütik»?
Yesus nu äsagom ome: «Sötol löfön Söli : God olik, ko ladäl lölik ola, ko lan lölik ola, e ko täläkt lölik ola!
Atos binon büded balid ä gretik.
Telid, kel leigon lä atos, tonon: ‚Sötol löfön kemeni olik äsä oli it‛!
Dö büdeds tel at lonem lölik ed utos, kel peprofeton, sekidons».
Ven farisetans äkoboms, Yesus äsäkom omes:
«Cedi kinik labols-li dö Kristus? Son kima binom-li»? Ägesagoms ome: «Son ela ‚David‛».
Äsagom omes: «Lio üfo ‚David‛ nemom-li omi tiko söli, ven sagom:
‚Söl esagom söle obik: Seadolöd detü ob, jüs useitob neflenis olik asä futabami pro futs olik‛.
If ‚David‛ nemom omi söli okik, lio üfo binom-li son omik»?
E nek äkanom gesagön ome vödi bal; e de del et nek plu äriskom ad säkön ome bosi.

KAPIT: XXIII

Täno Yesus äspikom lü menamödots e tidäbs okik:
«Su stul ela ‚Moyses‛ bibinolavans e farisetans seadoms.
Fölolsöd e dunolsöd kludo kuratiko utosi valik, kelosi sagoms ad dunön! ab no dunolsöd ma duns omas! Ibä spikoms sio, ab no dunoms ma atos.
Kobosumoms fledotis vetik ä töbiko polovikis, e seitoms onis sui jots menas, nes ninükön doati bal pro ons.
Utosi valik, kelosi dunoms, dunoms ad palogedön fa mens. Vidükoms plekaküiredis oksik, gretükoms kvatis klotas oksik.
Löfiloms ad labön stimapladi pö daifafideds, ed ad seadön su stuls föfikün in sünagogs,
ed ad paglidön su makets, ed ad panemön rabinan fa mens.
Ab ols, no koedolsöd panemön rabinans! ibä Balan binom Fat olsik: utan, kel binom in sül.
I no nemolsöd olis duganis, ibä Balan binom dugan olas : Kristus.
E gretikünan olas obinon dünan olsik.
Alutan, kel löpükon oki, podonükon, ed alutan, kel donükon oki, polöpükon.
Vi! lü ols, o bibinolavans e farisetans! O simulans! bi färmükols menes regäni sülas. Ols it no nügolols ini on, e neletols utanis, kels vilons nügolön ini on.
(Vi! lü ols, o bibinolavans e farisetans! O simulans! bi luslugols domis jiviudanas me kodül, das mutols plekön lunüpo. Sekü atos, odagetols micödeti gretikum.)
Vi! lü ols, o bibinolavans e farisetans! O simulans! bi zitevols love vat e län ad slopükön yudani bal; e ven evedon atan, vedükols oni cili höla, kel binon telna so badik äsä ol.
Vi! lü ols, o dugans bleinälik! kels sagols: ‚If ek yulon nämätü tem, atos no lonöfon; ab if yulon nämätü gold tema, tän ebligidon‛.
O fopans e bleinälans! Kis völadon-li mödikumo, gold-li u tem-li, kel saludükon goldi?
‚Ed, if yulon nämätü latar, atos no lonöfon; ab if yulon nämätü legivot su on, tän ebligidon‛.
O fopans e bleinälans! Kis völadon-li mödikumo, legivot-li u latar-li, kel saludükon legivoti?
Utan vo, kel yulon nämätü latar, yulon nämätü on e nämätü val su on,
ed utan, kel yulon nämätü tem, yulon nämätü on e nämätü utan, kel lödom in on,
ed utan, kel yulon nämätü sül, yulon nämätü tron Goda e nämätü utan, kel seadom su on.
Vi! lü ols, o bibinolavans e farisetans! O simulans! bi pelols degdili mäntaplana, maita, e komena, e nefölols büdedis veütikum: gid, miser e konfid. Atos sötoy fölön, e no sötoy nefölön etis!
O dugans bleinälik! kels sibols muskiti, e luslugols jamodi.
Vi! lü ols, o bibinolavans e farisetans! O simulans! bi klinükols plödaflani köpa e bova, ab nino fulons me ravot e nestön.
O farisetan bleinälik! Klinükolöd büikumo ninaflani köpa e bova, dat i plödaflan onas vedonös klinik!
Vi! lü ols, o bibinolavans e farisetans! O simulans! bi sümols ad sepüls pegüpädöl; plödaflano logotons jöniko, ab nino fulons me bonis deadanas e miota valasotik.
So i ols labols vo plödaflano logoti gidik pro mens, ab ninälo binols susfuliks me simul e negitöfs.
Vi! lü ols, o bibinolavans e farisetans! O simulans! bi bumols sepülis pro profetans e dekols mebamalis diganas.
E sagols: ‚If ilifobsöv ün dels büröletanas obsik, tän no ibinobsöv kedöbiks pö sasen profetanas‛.
Somo dasevols, das binols sons sasesanas profetanas.
Ed ols ofulükols mafi büröletanas olsik.
O sneks! o luvipärans! Lio oskeapolsöv-li de micödet ad höliovegam?
Ekö! sekü atos lesedob lü ols profetanis, sapanis e bibinolavanis. Ananis omas odeidols, ed okrodols; ananis olebatols in sünagogs olsik ed opöjutols de zif lü zif;
dat kömonös love ols blud nensinik valik, kel pespilon su taled, de blud ela ‚Abel‛ ritik jü ut ela ‚Zacharias‛ : son ela ‚Barachias‛, keli esasenols vü tem e latar!
Vö! sagob oles, dins valik at okömons love tribüt at.
O ‚Hierusalem‛! ‚Hierusalem‛! o ols! kels deidols profetanis, e stonols utanis, kels pelesedoms lü ols, vio suvo evilob kobükön cilis olsik, äsä jigok kobükof gokülis okik dis flitäms okik, ab no evilols.
Ekö! dom olsik poleadon failön.
Ibä sagob oles: No plu ologols obi denu, jüs osagols : ‚Utan pabenedomös, kel kömom nemü Söl‛»!

KAPIT: XXIV

Yesus äsegolom ed ädegolom de tem, e tidäbs omik äkömoms ed äjonoms ome bumotis tema.
Ägesagom omes: «No logols-li atis valik? Vö! sagob oles: No ston bal obleibon seatön su votik nes podistukön».
Ven äseadom su Learabel, tidäbs äkömoms lü om soeliko ed äsagoms: «Sagolös obes, kitimo atos valik ojenon-li, e dub kis osevobs-li das ogekömol e das vol ofinikon»?
Yesus ägesagom omes: «Galedolsöd, das nek pölükom olis!
Mödikans okömoms me nem obik, osagölo: ‚Ob binob Kristus‛. Ed opölükoms mödikanis.
Olilols dö krigs e dö sagäds tefü krigs. Galedolsöd, das no fäkikols! Ibä zesüdos, das atos jenon; ab atos no nog binon fin.
Ibä net ovoluton ta net; reigän ta reigän; ed in topäds difik faemaditrets, pästs e taladrems odabinons.
Atos valik binon prim davedadolas.
Tän polovegivols ad pamiträitön ed ad padeidön, e pohetols fa pöps valik, bi labols nemi obik.
E täno mödikans poskänons; olovegivons odis, ed ohetons odis.
Ed i luprofetans mödik osüikoms, ed opölükoms mödikanis.
E bi sin opluikon, löf mödikanas okoldälikon.
Ab kel olaidälon jü fin, utan posavon.
Büiko gospul regäna ponotükon in vol lölik, as temunod pro nets valik, täno fin okömon.
Ven logols kludo in top saludik distuki ledredodik, dö kel profetan : ‚Daniel‛ espikom (fomälolsöd ven reidols atosi!),
täno utans, kels binons in Yudän fugons lü bels,
utan, kel binon su nuf no doniogolon ad sumön bosi se dom okik;
utan, kel binon su läned, no gegolon ad sumön mänedi okik.
Vi! ün dels et lü voms grodik e sügöls!
Plekolsöd, das fug olsik no jenon ün nifüp ni ün jabat!
Ibä täno ditret so gretik odabinon, soäsä neai edabinon sis prim vola jü adel, e no odabinon.
Ed if dels et no pobrefükonsöv, dabinäd lifik nonik obleibonöv padakipön; ab demü väläbs dels et pobrefükons.
If täno ek sagonöv: ‚Ekö! is Kristus binom‛, ud ‚us binom‛! No kredolsöd osi!
Ibä els Kristus dobik e profetans dobik osüikoms, ed odunoms malis so gretikis e milagis, das mögiko pölükoms igo väläbis.
Ekö! ebüsagob osi oles.
If sagoy kludo oles: ‚Ekö! binom in däsärt‛; no gololsöd usio! ‚Ekö! binom in stokacem‛; no kredolsöd osi!
Ibä leigoäsä leklär süjuton lofüdao e liton jü vesüd, so köm Sona mena obinon.
Uto kö karot dabinon, vulturs kobikons.
Sunädo pos ditret delas et, sol odagikon , e mun no ogivon liti okik, stels ofalons de sil, e sülanämäds ovakulons.
Täno mal Sona mena opubon in sil, e tribüts valik taleda oflapons okis sui blöt, ed oloegons kömön Soni mena su lefogs sila ko nämäd e glor gretiks.
Olesedom silananis okik ko tonäd vemik posunas, ed okobükons väläbis de vienüds fol, de finot bal sila lü votik.
Lärnolsöd de figabim parabi at! Ven nu tuigs onik müdikons, e bleds onik sprotons, tän sevols, das hitüp binon nilik.
So i ven logols dinis valik at, osevols, das binom nilo fo yan.
Vö! sagob oles, genäd at no opasetikon, büä atos valik ujenon.
Sil e tal opasetikons, ab vöds obik no omoikons.
Ab tefü del et e düp et nek sevon bosi, igo silanans süla no sevons onis, ab te Fat oba sevom onis.
Leigo äsä ejenos ün dels ela ‚Noe‛, so i obinos tefü köm Sona mena.
Ibä leigo äsä ün dels bü letuvatam äfidoy ed ädrinoy, ämatikoy ed ämatükoy, jü del, kü ‚Noe‛ ägolom ini rak,
e no äsevoy bosi, jüs letuvatam äkömon ed ämoükon valanis, so i ojenos pö köm Sona mena.
Täno mans tel obinoms su läned; balan pokesumom, votan poposbinükon.
Voms tel obinofs in mül; balan pokesumof, votan poposbinükof.
Klu galädolsöd! ibä no sevols, tü del kinik Söl olas okömom.
Suemols ga, das domasöl ügaledomöv, if isevomöv, tü düp kinik tifan ökömomöv, e no ületomöv omi ad nübreikön domi okik.
Blümolsöd kludo i ols! ibä tü düp, keli no niludols, Son mena okömom.
Kim nu binom-li hidünan fiedik ä täläktik, keli söl omik ecälon pro sumätöfans okik, ad givön ones pötatimo zibi?
Beatik hidünan binom, ven söl omik, domio kömölo, tuvom omi so dunöli.
Vö! sagob oles, das ocälom omi guvani dalabotas valik okik.
Ab if hidünan et binom badik e sagom ninälo: Söl obik ozögom ad domiokömön;
e primom ad flapön kedünanis okik, du om it fidom e drinom ko brietans,
tän söl hidünana et okömom tü del, keli no spetom, e tü düp, keli no sevom,
ed odeteilom omi, ed okompenükom omi fäte simultanas; uto drenam e knir tutas odabinons».

KAPIT: XXV

«Tän regän sülas osümon ad utos, kelos ejenon pö jivirgans deg, kels äkosgolofs ko lampads oksik higami.
Lul ofas äbinofs sapiks e lul fopiks.
Jifopans, kels ikeblinofs lampadis oksik, no ikeblinofs leüli;
jisapans äkeblinofs ye ko lampads oksik, i leüli in luflads.
Ven higam ämoblibom lunüpo, valikans äslipöfikofs ed äslipikofs.
Zeneito nu ävokoy: ‚Ekö! higam kömom, segololsöd ad kosgolön omi‛!
Täno jivirgans valik et älöädofs ed äleodükofs lampadis oksik.
Täno jifopans äsagofs jisapanes: ‚Givolsös bosi leüla olsik, ibä lampads obsik kvänikons‛!
Ab jisapans ägespikofs: ‚Nö! ibä täno ba leül saidik no dabinonöv pro obs e pro ols. Gololsöd buikumo lü selans, e remolsöd pro ols it‛!
Ab ven jiatans idegolofs ad remön, higam äkömom, e jiutans, kels äbinofs blümiks, ägolofs ko om lü mated; e yan päfärmükon.
Latikumo i jivirgans votik äkömofs, ed äsagofs: ‚O Söl! o Söl! maifükolös pro obs‛!
Ab äsagom: ‚Vö! sagob oles, no sevob olis‛.
Klu galolsöd! ibä no sevols deli, ni düpi.
Leigoso binos, äsä pö man, kel, ven ädetävom, ibüedom kömön hidünanis okik, ed älovegivom omes moni okik;
balane ägivom taläntis lul, telidane telis e kilidane bali, alane ma tälen omik. Täno ädetävom.
Utan, kel nu igetom taläntis lul ägolom ad tedön me ons, ed ädagetom gaenodi taläntas votik lul.
Leigoso utan, kel igetom taläntis tel, ägaenodom lä ats telis votik.
Ab utan, kel igetom talänti bal, ägolom ad sebön in glun sepi, ed äklänedom ini on moni söla okik.
Pos lunüp söl hidünanas et äkömom ed äklirom ko oms.
Utan, kel igetom taläntis lul, äkömom ed äblinom taläntis votik lul, sagölo: ‚O Söl! taläntis lul elükonfidol obe; ekö! egaenodob lä ats taläntis votik lul‛.
Ome söl omik äsagom: ‚Gudö! o dünan brafik ä fiedik! dö nemödikos ebinol fiedik, dö mödikos ocälob oli. Kompenolöd pö fred söla olik‛!
Täno utan, kel igetom taläntis tel äkömom ed äsagom: ‚O Söl! taläntis tel elovegivol obe. Ekö! egaenodob lä ats telis votik‛.
Ome söl omik äsagom: ‚Gudö! o dünan brafik ä fiedik! dö nemödikos ebinol fiedik, dö mödikos ocälob oli. Kompenolöd pö fred söla olik‛!
Täno utan, kel igetom talänti bal äkömom ed äsagom: ‚O Söl! äsevob, das binol men düfälik, kel fodol utöpo, kö no esovol, e klopol utöpo, kö no ejedülol.
Sekü atos ävedob dredik, ed egolob ad klänedön ini glun talänti olik; ekö! is labol ledutoti olik‛..
Ed ome söl omik ägespikom: ‚O ol! dünan badik ä trögik! äsevol-li, das fodob utöpo, kö no esovob, e das klopob utöpo, kö no ejedülob?
Tän älabol bligi ad fienidön moni obik lä bankal, ed ögegetolöv pö lomioköm obik e dalaboti obik, e fieni.
Sumolsöd kludo de om talänti bal at, e givolsöd oni utane, kel labom taläntis deg!
Ibä alane, kel dalabon, pogivos, ed aiplu pogivos, e de utan, kel no dalabon, i utos, keli labon, podesumon.
E jedolsöd hidünani nenfrutik ini dagöp plödikün! kö drenam e knir tutas odabinons‛.
Ven täno Son mena kömom in glor okik, ko silanans valik oka, oseadom su tron glorik okik;
e lo om nets valik pokobükons, ed oteilom onis de ods, leigoäsä galedan teilom jipis de kapars.
Opladom jipis detü ok, e kaparis nedetü ok.
Tän reg osagom utanes, kels binons detü om: ‚Gö! o pebenedölans fa Fat obik! labedolsöd regäni, kel peblümükon pro ols de stabükam vola!
Ibä ven äfaemob, ezibols obi; ven äsoafob, eklietols obi; ven äbinob foginan, elotidols obi;
ven änüdob, eklotols obi; ven ämalädob, ekälols obi; ven äfanäbob, evisitols obi‛.
Tän ritans ogespikons ome: ‚O Söl! Kitimo ezibobs-li oli, ven äfaemol? ud eklietobs-li oli, ven äsoafol?
Kitimo elogobs-li oli äsä foginani, ed elotidobs-li oli? ud eklotobs-li oli, ven änüdol?
Kitimo elogobs-li oli ven äbinol malädik, ud in fanäböp, ed evisitobs-li oli‛?
Reg ogespikom ones: ‚Vö! sagob oles, alutosi, kelosi edunols pro balan blodas mu pülikünas at oba, edunols pro ob‛.
Ed utanes, kels binons nedetü om, reg osagom: ‚Mogololsöd de ob! o maleditäbs! lü fil laidüpik, kel peblümükon diabe e silananes omik!
Ibä ven äfaemob, no ezibols obi; ven äsoafob, no eklietols obi;
ven äbinob foginan, no elotidols obi; ven änüdob, no eklotols obi; ven äbinob malädik, ed in fanäböp, no evisitols obi‛.
Täno ogespikons ome: ‚O söl! kitimo elogobs-li oli, ven äbinol faemik, u soafik, u foginan, u nüdik, u malädik, ud in fanäböp, e no eduinobs yufoti ole‛?
Ad atos ogespikom ones: ‚Vö! sagob oles, alutosi, kelosi no edunols pro balan pülikünanas at, i no edunols pro ob‛.
Atans ogolons lü top datoma laidüpik, e ritans utöpio, kö lif laidüpik dabinon».

KAPIT: XXVI

Posä Yesus ifinükom spikädi at, äsagom tidäbes okik:
«Sevols, das pos dels tel obinos pasat; tän Son mena polovegivom ad pakrodön».
Tü tim at lekultans e bäldikünans pöpa äkobikoms in ledom dalekultana ‚Caiphas‛ penemöla,
äsludoms ad fanön käfo omi, ed ad deidön omi;
ab no tü zäladel; dat no volut davedonös in pöp!
Ven Yesus äbinom tö ‚Bethania‛ in dom ela ‚Simon‛ : lepradan,
äkömof lü om vom, kel älabof fladili laabatik ko benosmelaleül jerabik, keli äsegifof sui kap omik, du älenseatom len tab.
Ven tidäbs älogoms atosi, äskanoms, ed äsagoms: «Pro kis nespäl at fruton-li?
Ikanoy selön jeriko ati, e givön moni pöfanes».
Yesus, kel ädaseivom omis äsagom omes: «Kikodo töbols-li vomi at? ibä edunof vobodi gudik kol ob.
Ibä pöfanis ai labols lä ols, ab no labols ai obi.
Ibä ven äsegifof nugveti benosmelik at sui koap oba, edunof atosi demü sepülam oba.
Vö! sagob oles, utöpo in vol lölik, kö gospul at ponotükon, i ad mebön ofi ospikoy dö utos, kelosi edunof».
Ün tim et balan degtelanefa, ‚Iudas Iscariotes‛ penemöl, ägolom lü lekultans,
ed äsagom: «Kisi vilols-li givön obe, if loveükob omi oles»? Atans ägivoms ome sikulis kildeg.
De timül et, äsukom pöti gudik ad loveükön omi.
Tü del balid delas boda nenlefik tidäbs äkömoms lü om, ed äsäkoms: «Kiöpo vilol-li, das oblümükobs ole pasatafidädi»?
Om nu ägespikom: «Gololsöd in zif lü seman, e sagolsöd ome: Mastal sagom : Tim obik binon nilik, vilob zelön lä ol pasati ko tidäbs obik»!
Tidäbs ädunoms, soäsä Yesus ibüdom omes, ed äblümükoms pasatafidädi.
Soaro älenseatom len tab ko degtelanef.
E du fid äsagom: «Vö! sagob oles, das balan olas oträtom obi».
Älügikoms vemo, ed alan omas, balan pos votan, äprimom ad sagön lü om: «Ob ga no binob-li utan? o Söl»!
Äsagom nu: «Balan, kel steigom kobü ob nami ini bov; binom utan, kel oträtom obi.
Son mena omoikom sio, äsä epenoy dö om, ab vi! lü men, fa kel Son mena paträtom. Äbinosöv gudikum pro men et, if no pimotomöv».
Nu ‚Iudas‛ : trätan, ägesagom: «Ob ga no binob-li utan? o rabinan»! Äsagom ome: «Esagol osi».
Ven nu äfidoms, Yesus äsumom bodi, äbenedom oni, äbreikom oni, ägivom oni tidäbes oka, ed äsagom: «Sumolsöd; e fidolsöd! at binon koap obik».
Pos atos äsumom köpi, äbenedom oni, älovegivom oni, ed äsagom: «Drinolsöd ols valik se at!
Ibä at binon blud obik diateka nulik, kel paspilon pro mödikans ad pardön sinodis.
Sagob i oles, das denu no plu odrinob prodoti vitida, jü del ut, tü kel odrinob oni kobü ols dönu in regän Fata obik»
Posä ikanitoms lelobakaniti, ägoloms lü Learabel.
Täno Yesus äsagom omes: «Ols valik oskanols ün aneit dö ob. Ibä epenoy: ‚Oflapob galedani, e jips jepa pospearükons‛.
E posä ulelifikob, ofogolob olis lü Galileyän».
‚Petrus‛ ägesagom ome: «Ifi valans oskanomsöv dö ol, ob oskanob neföro dö ol».
Yesus äsagom ome: «Vö! sagob ole, ün neit ebo at, büä higok ukravom, onoädol kilna obi».
‚Petrus‛ äsagom ome: «Ifi mutoböv deadön ko ol, no onoädob oli». Ed otosi tidäbs valik äsagoms.
Täno Yesus ägolom ko oms lü top ‚Gethsemane‛ panemöl, ed äsagom tidäbes okik: «Bleibolsöd seadön is, jüs uplekob us»!
Äkesumom eli ‚Petrus‛ e sonis bofik ela ‚Zebedaeus‛, ed äprimom ad vedön lügik ä dredik.
Täno äsagom omes: «Lan obik binon mu dibätiko lügik. Blibolsöd is, e galolsöd ko ob»!
Ägolom boso fagikumo. Ädofalom sui logod okik ed äplekom: «O Fat obik! If mögos, leadolös beigolön de ob köpi at! ab no soäsä ob vilob, ab soäsä ol vilol».
Nu ägolom lü tidäbs, ed ätuvom omis slipölis, ed äsagom ele ‚Petrus‛ : «No kanols-li galön dü düp bal ko ob?
Galolsöd e plekolsöd ad no pablufodön! Lanöf binon sio vilöfik, ab mid binon fiböfik».
Telidnaedo ägolom ed äplekom: «O Fat obik! If no binos mögik, das köp at obeigolon obi, tän ovagükob oni. Vil olik jenonöd»!
Ven ägekömom lü oms dönu, ätuvom omis slipölis; ibä logs omsik äbinons lefeniks.
Äleadom slipön omis, ed ägolom kilidnaedo ad plekön me vöds ot.
Täno äkömom lä tiodäbs okik, ed äsagom omes: «Laislipolsöd e takädolsöd! Ekö! düp enilikon, tü kel Son mena palovegivom ini nams sinanas.
Löädolsöd! Golobsöd! Utan, kel oträtom obi, binom nilik».
Ekö! du nog äspikom, ‚Iudas‛ : balan degtelanefa äkömom, kobü lusog gretik labü säbs e klöbs, fa lekultans e bäldikünans pöpa pilesedöl.
Trätan irajanom ko oms mali: «Om, keli okidob, binom utan; gleipolsöd omi»!
E stedöfiko ägolölo lü Yesus, äsagom: «Glidö! o rabinan»! ed äkidom omi.
Yesus äsagom ome: «O flen! Demü kis binol-li is? Täno älükömoms, älenodoms Yesusi, ed ägleipoms omi.
Ed ekö! balan utanas, kels äbinoms lä Yesus, ätenükom nami okik, ätirom säbi okik, äflapom hidünani dalekultana, ed ädecöpom lili omik.
Täno Yesus äsagom ome: «Veadolöd säbi olik! Ibä alutans, kels gleipons glävi, opäridikons dub gläv.
U cedol-li, das no kanoböv plekön nu Fate obik, e das täno olesedomöv ad yufön obi legionis plu degtelis silananas?
Lio üfo penäds bibik pofölonsöv, sekü kels mutos jenön so»?
Otüpo Yesus äsagom lusoge: «Äsä ta ravan esegolols ko säbs e klöbs ad fanäbükön obi; aldeliko äseadob lä ols in tem ad lejonön, e no egleipols obi.
Ab atos valik jenon, dat penäds profetanas pofölos». Täno tidäbs valik älüvoms omi, ed äfugoms.
Utans, kels ifanäbükoms Yesusi, ädugoms omi lü dalekultan : ‚Caiphas‛, lä kel bibinolavans e bäldikünans ikobikoms.
Nu «Petrus‛ äsökom omi fagoto jü lecem dalekultana, änügolom ed äseidom oki lä hidünans ad logön, vio atos öfinikon.
E lekultans e bäldikünans e sanhedrin lölik äsukons temunodis dobik ta Yesus, dat äkanonsöv cödetön omi deadio,
ab no ätuvons onis. Do temunans dobik mödik äkömoms, no ätuvoms onis. Fino temunans dobik tel äkömoms;
äsagoms: «Esagom: Kanob debreikön temi Goda, e bumön oni ünü dels kil».
Nu dalekultan äsagom ome: «Sagol-li nosi ta utos, demü kelos kusadoms oli»?
Ab Yesus äseilom. Täno dalekultan äsagom ome: «Säkob ole yulo nämätü God lifik ad sagön obes, va binol Kristus : Son Goda».
Tän Yesus äsagom ome: «Esagol verati. Ab sagob oles, denu ologols Soni mena seadölo detü Nämal, e kömöli su lefogs sila».
Täno dalekultan äsleitom klotis okik, ed äsagom: «Eblasfämom. Demü kis neodobs-li nog temunanis? Ekö! nu ols it elilols blasfämi omik.
Kisi cedols-li tefü atos»? Ed ägespikoms: «Döbom ad deadön».
Täno äsputoms ini logod omik, ed ägivom ome liliflapis: Äflapoms sui logod omik,
ed äsagoms: «Profetolöd obes! o Kristus! Kim eflapom oli»?
‚Petrus‛ äseadom plödo in yad. Jibalan jidünanas äkömof lü om ed äsagof: «I ol äbinol lä Yesus : Galileyänan».
Ab änoom osi lo valans, ed äsagom: «No sevob utosi, kelosi sagol».
E ven ägolom lü leyan ad segolön, jidünan votik älogof omi, ed äsagof utanes, kels äbinons us: «I atan äbinom lä Yesus : elan di ‚Nazareth‛».
E dönu änoom osi, efe yulo: «No sevob meni at».
Pos brefüp züölans änilikons ed äsagons lü ‚Petrus‛: «Veratö! I ol binol balan omas. Ibä spik olik notükon, kis binol».
Tän äprimom ad maleditön oki ed ad yulön: «No sevob meni et». E sunädo higok äkravom.
Tän ‚Petrus‛ ämemom utosi, kelosi Yesus isagom: «Büä higok okravom, unoädol kilna obi». Ägolom plödio, ed ädrenom biedäliko.

KAPIT: XXVII

Ün göd fovik valiks lekultans e bäldikünans pöpa äsludoms tefü Yesus ad deidön omi.
E posä ijänädoms omi, ämodugoms omi, ed älovegivom omi guverale : ‚Pontius Pilatus‛.
Ven nu ‚Iudas‛, kel iträtom omi, älogom, das pimicödetom, äsenälom lepidi, ed ägeblinom sikulis kildeg lekultanes e bäldikünanes,
ed äsagom: «Esinob demü trät nensinana». Ab äsagom ome: «Kisi atos demon-li obes? Dalol lülogön».
Ad atos äjedom moni ini tem, ämogolom, ed älägom oki.
Lekultans ätovädoms moni, ed äsagoms: «Ati no dalobs stürön ini temakäd, bi binon mimesed».
Pos dakonsälam äsludoms ad remön tä at länedi skalela ad deadanöp pro foginänans.
Sekü kod at läned et panemon jü atim mimesedaläned.
So utos pefölon, kelos pesagon fa profetan : ‚Ieremias‛: «Ed äsumoms sikulis kildeg: suäm petäxetölosa, keli etäxetoms de sons Yisraeläna,
ed egivoms onis tä läned skalela, soäsä Söl ibüdom obe».
Nu Yesus ästanom fo guveral. E guveral äsäkom ome: «Binol-li reg yudanas»? E Yesus ägesagom: «Sagol osi».
Ab ven päkusadom fa lekultans e bäldikünans, ägesagom nosi.
Täno ‚Pilatus‛ äsagom ome: «No lilol-li, vio vemo temunoms ta ol»?
Ab no ägesagom ome vödi bal, sodas guveral ästunom mu vemo.
Guveral nu äkösömom ad gevön tü zäladel gönü pöp libi fanäbe, keli ädesiroy.
Nu älaboy fanäbi lufamik : ‚Barabbas‛ penemöli.
Ven nu äkobükoms okis, ‚Pilatus‛ äsäkom omes: «Kime vilols-li, das gevob pro ols libi? Ele ‚Barabbas‛-li, u Yesuse-li, kel panemom Kristus»?
Ibä äsevom sio, das ilovegivoms omi sekü glöt.
Ven äseadom su cödalastul, jimatan omik äsedof ome nuni: «No jäfikolöd ga me ritan et, ibä äneito esufob mödiko in drim demü om»!
Lekultans e bäldikünans äslüdoms menamödoti ad välön eli ‚Barabbas‛ ed ad deidön Yesusi.
Ven nu guveral äsäkom omes: «Kime fanäbas tel vilols-li, das gevob pro ols libi»? ägesagoms kludo: «ele ‚Barabbas‛»!
‚Pilatus‛ äsagom omes: «Kisi odunob-li üfo ko Yesus, kel panemom Kristus»? E valans äsagoms: «Pakrodomöd»!
Ab guveral äsagom: «Badikosi kinik edunom-li üfo»? Ed äluvokädoms nog laodikumo: «Pakrodomöd»!
Ven ‚Pilatus‛ äküpom, das no äreafom ad disein okik, ab güo, das volut ödavedon, äsumom vati, ed älavom namis okik lo menamödot, ed äsagom: «Binob nedöbik tefü dun ta ritan at. Ols gididols».
Menamödot ägespikon balvögiko: «Dun at ta om pobläfonös obes e ciles obsik»!
Tän ägevom gönü pöp libi ele ‚Barabbas‛, e posä ibüedom lebatön Yesusi, älovegivom omi ad pakrodön.
Tän soldats guverala äblinoms Yesusi ini cödöp, ed äkobükoms kohorti lölik ta om.
Äsäklotoms omi, ed älenükoms ome mänedi leredik.
Äflökoms kroni de spins, ed äpladoms oni sui kap omik; ägivoms ome stagi rida ini detanam, ädofaloms fo om sui kiens oksik, ed äsagoms kofölo ome: «Glidö! o reg yudanas»!
Äsputoms sui om, äsumoms ridastagi ed äflapoms me on sui kap omik.
Posä ikofoms so omi, ädesumoms de om mänedi, älenükoms ome klotis lönik oma, ed ämodugoms omi ad pakrodön.
Ven ädegoloms ätuvoms mani di ‚Cyrene‛ labü nem : ‚Simon‛: ämütoms omi ad polön krodi omik.
E ven ikömoms sui top, kel panemon ‚Golgotha‛, kel sinifon: kranatop,
ägivoms ome ad drinön vini ko bil pemigöli, e ven ägutom oni, ärefudom ad drinön.
Posä ikrodoms omi, äseadiloms kübädamo klotis omik. (Dat pöfölonös utos, kelos pesagon fa profetans: «Eseadiloms bevü ods klotis obik, e demü klots obik ekübädoms».
Äseidoms okis ed ägaledoms us omi.
Sus kap omik älenfimükoms supenädi, miduni omik nunöli: Atan binom Yesus : reg Yudanas.
Täno äkrodoms ko om ravanis tel, balani detaflanü e balani nedetaflanü om.
Beigolans älukofons omi, ed äsagons lemufölo kapis oksik:
«Ol, kel debreikol temi, e bumol dönu oni ünü dels kil, savolöd oli it! If binol Son Goda, kömolöd täno de krod»!
Leigoso i lekultans ko bibinolavans e bäldikünans äkofoms omi, sagölo:
«Esavom votikanis, oki it no kanom savön. Binom ga reg Yisraeläna, dekömomöd üfo de krod! tän okredobs omi.
Ekonfidom Godi, savomöd nu omi, if binom böniälik kol om! Esagom ga: Binob Son Goda».
Leigo i ravans, kels pikrodoms ko om, äkofoms omi.
Tän de düp mälid dag ädavedon love taled lölik jü düp zülid.
Zao tü düp zülid Yesus ävokädom me vög laodik: «Eli, Eli, lamma sabachthani»? Atos sinifon: ‚O God obik! o God obik! sekü kis elüvob-li obi‛?
Ven anans züstanölanas älilons atosi, äsagons: «Vokom eli ‚Elias‛».
E sunädo balan onas ägolom ad ramenön spogi, äblunom oni ini vinig, äpladom oni sui rid ed ädrienom omi,
ab votans äsagons: «Stebedobsöd ad logön, va ‚Elias‛ osavom omi»!
Yesus ävokädom dönu me vög laodik, ed ädeadom.
Ed ekö! körten in tem äsleaton telio de löp jü don, tal ädremon e klifs äslitons okis,
sepüls ämaifikons, e koaps mödik saludanas ideadöl älelifikons:
Pos lelifikam okas, älüvons sepülis, ed ägolons lü zif saludik, kö epubons pö mödikans.
Ven nu kapiten ed utans, kels ägaledoms Yesusi, älogoms taladremi, ed utosi valik, kel äjenon, äsagoms mu dredölo: «Jenöfö! äbinom Son Goda».
Us voms mödik ädabinofs, kels älogofs fagao atosi. Jiatans isökofs Yesusi de Galileyän, ad dünön omi.
Bevü ofs äbinofs ‚Maria‛ di ‚Magdala‛; ‚Maria‛ : mot elas ‚Iacobus‛ e ‚Ioseph‛, e mot sonas ela ‚Zebedaeus‛.
Ven ivedos soar man liegik di ‚Arimathaea‛, ‚Ioseph‛ penemöl, kel it i ivedom tidäb Yesusa äkömom.
Atan ägolom lü ‚Pilatus‛ ed äbegom koapi Yesusa. Täno ‚Pilatus‛ äbüdom, das koap at pögivon ome.
‚Ioseph‛ äsumom koapi, ävilupom oni ini diled linumastofik klinik,
ed äseitom oni ini sepül nulik, keli ibüedom secöpön ini klif; äjapodom stoni gretik foi yan sepüla, ed ämogolom.
‚Maria‛ di ‚Magdala‛ e ‚Maria‛ votik äbinofs us, ed äseadofs visü sepül.
Tü del fovik, sevabo del pos preparamadel, lekultans e farisetans äkobikoms lä ‚Pilatus‛,
ed äsagoms: «O söl! memobs, das cütan et esagom timü lif okik: Pos dels kil, olelifikob.
Büedolös kludo galedön sepüli jü del kilid! Mögosöv, das tidäbs oma okömoms, ed otifoms omi, ed osagoms pöpe: Elelifikom se deadam. Somo cüt lätik binonöv nog badikum ka balid».
‚Pilatus‛ äsagom omes: «Kanobs labön galädanefi; dunolsöd e galedolsöd ma ced gudikün olsik»!
Täno ämogoloms ed äpladoms galädanis lä sepül, posä isniloms stoni komü galädanef.

KAPIT: XXVIII

Pos fin jabata, ün prim dela balid viga, ‚Maria‛ di ‚Magdala‛ e ‚Maria‛ votik äkömofs ad visitön sepüli.
Ed ekö! taladrem vemik äjenon; ibä silanan ädonikom se sül, älükömom ed ädejapodom stoni de yan, ed äseidom oki sui on.
Logot omik äsümon ad ut leklära, klotem omik äbinon nifavietik.
Galädans ädremons sekü dred pro om, ed ävedoms äsä deadans.
Silanan nu äsagom vomes: «No dredolsöd! Sevob ga, das sukols Yesusi, kel pekrodom.
No binom is; elelifikom, soäsä esagom. Kömolsöd isio, logolsöd topi, kö eseatom.
E gololsöd spido ad sagön tidäbes omik: Elelifikom se deadam e golom bü ols lü Galileyän; us ologols omi. Ekö! esagob osi oles»!
E ko dred gretik e fred gretik, äfagikofs de sepül, ed äspidofs ad nunön atosi tidäbes omik.
Ed ekö! ven ägolofs ad nunön atosi tidäbes omik, Yesus äkosgolom ofis, ed äsagom ofes: «Paglidolsöd»! Jiatans ästepofs lü om, ägleipofs futis omik, ed ädofalofs foi om.
Pos atos Yesus äsagom ofes: «No dredolsöd! Gololsöd ad sagön blodes obik, das mutoms golön lü Galileyän, e das ologoms us obi»!
Ven ädegoloms, anans galädanefa ägoloms lü zif, ed äkonoms lekultanes vali, kel ijenon.
Posä atans nu ikobikoms ko bäldikünans, ed ivätäloms, kisi ömutoms dunön, ägivoms soldates moni mödik,
ed äsagoms: «Sagolsöd, das tidäbs omik ekömoms äneito ed etifoms omi, du äslipols!
Ed if guveral olilomöv atosi, tän okotenükobs omi, ed okälobs, das no nedols kudön».
Älüsumoms moni, ed ädunoms soäsä pibüdos omes. E sagod at pepakon bevü yudans jü tim at.
Tidäbs ägoloms nu lü Galileyän, lü bel, lü kel Yesus ibüdom omes,
e ven älogoms omi, ädofaloms foi om; ab anans ädotoms.
E Yesus ästepom lä oms ed äsagom: «Nämäd valik in sül e su taled pegivon obe.
Gololsöd kludo lü nets valik, e vedükolsöd onis tidäbis oba! Blunedolsöd onis nämätü Fat, e Son e Saludalanal, e tidolsöd onis ad laibinükön utosi valik, kelosi ebüdob oles!
Ed ekö! Binob ko ols dü dels valik jü fin vola».

---------- oOo ----------

Ninädalised