Epistola I de Petro Capitulo 1

1  Petro, apostolo de Jesus Christo, al electos qui vive como extranieros 
   in le dispersion de Ponto, Galatia, Cappadocia, Asia e Bithynia,

2  electe secundo le prescientia de Deo Patre, mediante le sanctification 
   del Spirito, a obedir e a esser aspergite con le sanguine de Jesus Christo:
   gratia e pace vos sia multiplicate.

3  Benedicte sia Deo e Patre de nostre Senior Jesus Christo, le qual in su
   grande misericordia nos faceva renascer, mediante le resurrection de Jesus
   Christo ex le mortos,

4  a un sperantia vive in vista de un hereditate incorruptibile, immaculate e
   immarcescibile, conservate in le celos pro vos,

5  que per le poter de Deo, mediante le fide, vos es custodiate pro le salvation
   que sta pro esser revelate in le ultime tempores.

6  In lo qual vos exulta, anque si ancora, per un pauc de tempore, il es
   necessari que vos es contristate con varie tentationes,

7  a fin que le proba del vostre fide, multe plus preciose del auro que peri 
   e totevia es probate con le foco, pote esser vostre laude, gloria e honor
   al tempore del revelation de Jesus Christo;

8  al qual vos ama sin haber jammais vidite; e al qual vos crede, anque si vos
   nunc non le vide, vos jubila de un allegressa ineffabile e gloriose, 

9  obtenente assi le fin del fide: le salvation del animas. 

10 Iste salvation ha essite le objecto del recercas e del investigationes del
   prophetas qui prophetisava del gratia a vos destinate.

11 Illes scrutava pro saper le tempore e le circumstantias que le Spirito 
   de Christo que esseva in illes indicava, quando anticipatemente testimoniava
   del suffrentias de Christo, e del glorias que debeva sequer.

12 E les esseva revelate que non pro se ipse mais pro vos illes administrava
   celle cosas, que nunc vos esseva annunciate per illes qui vos ha evangelisate
   per medio del Spirito Sancte inviate ab le celo; e que in celle cosas le
   angelos desidera reguardar. 

13 Pertanto, habente cingite le flancos de vostre mente, que vos sia sobrie, 
   e plen de sperantia in le gratia que vos essera offerite in le revelation 
   de Jesus Christo; 

14 e, como filios obediente, non vos conforma al concupiscentias del tempore 
   passate quando vos viveva in ignorantia;

15 mais como Ille qui vos ha appellate es sancte, sia vos etiam sancte in tote
   vostre conversion;

16 pois que sta scribite: Sia vos sancte, perque io es sancte.

17 E si vos invoca como Patre Ille qui sin acception de personas judica secundo
   le opera de cata un, cammina dunque vos in timor durante le tempore de vostre
   pelegrinage; 

18 sapente que vos esseva redimite ex vostre modo de viver secundo vostre
   paterne traditiones, non con cosas corruptibile, argento o auro,

19 mais con le preciose sanguine de Christo, como de un agno immaculate e 
   incontaminate, 

20 preordinate ante le fundation del mundo, e manifestate in le ultime tempores 
   pro vos,

21 que per medio de ille vos crede in Deo qui le ha resuscitate ex le mortos e 
   le ha date gloria, a fin que vostre fide e vostre sperantia esseva in Deo. 

22 Habente purificate vostre animas con le obedientia al veritate pro arrivar a 
   un sincer amor fraternal, ama vos dunque, le unes le alteres con un corde pur, 

23 pois que vos esseva regenerate non ex semine corruptibile, mais 
   incorruptibile, mediante le parola de Deo vivente e permanente. 

24 Pois que omne carne es como le herba, e su gloria como le flor del herba. Le 
   herba se sicca, e le flor cade; 

25 ma le parola del Senior permane in eterne. E iste es le parola que vos esseva 
   evangelisate. 

---

1 2 3 4 5

---

Indice Mat Mar Luc Joh Act Rom 1Co 2Co Gal Eph Php Col 1Th 2Th 1Ti 2Ti Tit Phm Heb Jac 1Pe 2Pe 1Jo 2Jo 3Jo Jud Rev