El papagal de Venezia

El papagal de Venezia.

Doi Fodomi en puoch de temp, propio de chi da "zacan" che ava velcamia el muot, i s’ à pensé de jì auna a vedei Venezia. Chëst l eva ntourn l ann 1840. I se n é piei via a pe ju per el cianel de Egort e, ncan montei, ncan a pe, davò en valgugn dis i é ruei a Venezia. Da sëra, ben strac e plens de mprescion de dut chël che i ava vedù, i é jus a se cherì da albierch. Per se dé plu mportánza e no dé da cugnësce da ulache i eva, entánt cëna i descorëva todësch, e i é stei servis ben polito con dute le bele maniere. Ma nte sala metù ente na gabia, l eva ence en bel papagal, che forsci ence dël bele nlouta el capiva che i sciori entánt cëna ie plesc ester divertis con velch mujica. Nlouta no n’ eva ncora el fonografo, e ntánt duta la cëna el papagal sceguitáva a cianté "Porchi tedeschi, porchi tedeschi!" Sti doi fodomi i à capì che la lezion ie steva ben, ma per no ester coionei, un el disc a la parona: cotánt voleiso sun chël papagal? La parona per no volei el vëne la s’ à pensé de damané en sproposito! 60 corone. El Fodom tira fora el tacuin e el disc: Chilò éi le 60 corone! metelo nte fana, che ence se è bele cené, me l mánge delongo!