El śoen caalier de Brach

From Wikisource
Jump to navigation Jump to search
El śoen caalier de Brach  (1905)  by Bruno Apollonio
ladin Mareo
grafia moderna

El śoen caalier de Brach

- Ra val de Fanes r'é drio ra Tofanes, deentades tanto famoses inze sta ultima guera. A un zerto punto ra strada ra rua pede un prezipizio fondo 80 metre, e chel ponte ch'i à fato par passà sora, i lo ciama el Ponte outo. El luó 'l é proprio romantico e pitoresco, e sicome là r'aga śo par chi crepe, ra fesc 'na gran cascada, se pó dì che 'l é un dei pì biei dei dintorne de Cortina.


Ma a l fei ancora pì interessante śoa ra conoscenza de sto fato che par tradizion i conta inz'el paes.

- Na ota 'l ea donca un śoin cavalier de Brach, propietario del castel de Asch inze ra val de Badia.

Sto tos el i vorea ben a una fiola del castelan de Botestagno, e par śi a ra ciatà e a i fei 'l amor, 'l aea da traversà ra val de Fanes, el Ponte outo e 'l Pian de Loa.

I Anpezane i non aea neguna sinpatia par sto śoin cavalier e i non ea gnente afato contente che 'l se fejesse noizo de ra bela fiola del castelan de ra val. Par chesto i tramaa de 'l ciapà e i tendea despes, ma i non é stade mai boi de 'l brincà.

A ra fin i à deziso de petà śo el ponte e de 'l spietà là sul posto finche el vegnisse de ritorno, par se podé pó inpossessà de ra so parsona. Dito e fato.

Canche chel cavalier 'l é ruà là e che 'l s'à incorto del burto tiro ch'i vorea fei, el i à dà alcuanta speronades al so brao caval e co ra oga che 'l s'aea tolesc,'l à tirà, con corajo, un gran souto fin da cher'outra parte, e in sta maniera 'l à podù scanpà da ra sgrinfes di so persecutore. Chiste i é restade là de stuco a vede tanto corajo e tanta braura, e da 'l odio ch' i aea de dignante i é passade inz' un colpo a una gran stima e a un gran rispeto par el, che da chel di 'l à senpre podù śi par i fate suoi senza esse pì desturbà da negun.

Da Cortina se pó ruà al Ponte outo par el Pian de Loa, ma anche par un'outra strada. Ignante de esse inze a Fiames, se volta a man zanca, se passa el ponte sul Boite pede ra sìa e pó, su par una bela boscaia, se se porta in val de Fiorenza, se camina su par un troi erto fin a ra forzela fra el Col Rosà e ra Tofanes; e da ca inz' un'ora poco manco se rua śo in val de Posporcora propio al Ponte outo.