Di Salvans y dla Cristanes
Di Salvans y dla Cristanes.
A Urtijëi, sëura Nudrëi su, de vieres de Secëda iel na nëida che se tlama l pra dla Tambres. La vedla jënt conta, che tlo ntëur sëura l pra dl Marëufer y sui plans da Fëur, per l plu ntëur l troi paian, se teniva su zacan for tlapes de jënt salvera. L fova jënt bën chersciuda, granda y gherda. I purtova na berba longia, i ciavei dut ntëur ju, guant mé puech. I fova usei ite al frëit y al ciaut. Viver vivovi de cërn salvera. Tenì su se tenivi per l plu ti bòsc ntëur ora, ma i se fajova nce daujin dala cëses per pudëi rubé dut ciech’ i giatova. N conta che per vester segures dai salvans purtova da vedlamënter la cëses daujin dal bosch de sëura pert per vieresc dut mé tei pitli bujes.
Chisc salvans fova temui dala jënt chʼ messova passé n chi tëmps l troi paian, ch’ menova dal Balest ca via per l bosch d’ Resciesa ora Laion. N ne se resiova nia a jì sëui ora per chësc troi, no mé per la ria jënt salvera, ma nce per la lores y lëufes. N pudova mé se nfidé a jì deplù adum a passé chisc luesc. Un sëul ova segur for da s’ mplanté cun chisc salvans.