Desiderio ala patria

by Angelo Trebo

Desiderio ala patria  (1888)  by Angelo Trebo badiot Mareo

grafia moderna

Desiderio ala patria.

Olach' al stá na vila
sö dlungia n te bel bosch,
olach' al stá na ciasa,
crossö te chël bel post,

crossö te chël bel lü
con te oressi jí.

Olach' al é dan porta
n pre de flus tan bel,
olach' al jora tl' aria
rodunderes tan snel,

crossö te chël bel lü
con te oressi jí.

Olache le calander
adora da doman,
apëna ch' al vën l' alba,
so bel cianté mët man,

crossö te chël bel lü
con te oressi jí.

Olache nosta oma
te cöna se nainâ,
olache nost' infanzia
le pröm somié somiâ,

crossö te chël bel lü
con te oressi jí.