Descrizion de la Val de Fascia
Descrizion de la Val de Fascia
La Val de Fascia é na val longia e strenta. La se tira su enlongia la Veisc. Da la man de sot la confina a la Val de Fiem, da la man de sora a Gardena, da la man dalaìt' a Livinarlonch e da la man dalafora a Neva.
Ades voi descriver chi seidesc paìsc che é dit inant: al prum a vegnir in su l'é Soraga. Chest l'é da dute doi le part da la Veisc, contarà cincanta ciase e na bela lejia de Sèn Piere. Sun chel gran Sas, che se chiama Sas dal Mesdì, i disc che l'é un muge de bregostane. Se se va mesora dò la strada se rua sa Sèn Jan che é la parochia de Fascia con cater ciase. (Se se va) cinch menuc en su contro Neva se rua a Vich, al più bel scito de Fascia, l'à cent ciase e la pretura; vijin a Vich é Valongia e Tamion. Doi ore dalafora da Vich l'é le mont da Vich. Anter un muge de prees l'é le ciajae. D'istà é propio bel fora mont perché l'é tropa jent e trop bestiam lafora. Ma ades cogne jir de retorn olache son restà. Amò un cart ora inant, se rua a Poza. Chest scito l'é bon gran e l'é da dute doi le man de la Veisc. Tedò l mont dalaìte l'é la bela mont de chi da Poza. Undò chindesc menuc dalaìte l'é Pera, più pìcol de Poza. I à ence na bela mont. Dapò vegn Mazin e Muncion, Mazin apede l'aga e Muncion sul mont. Chiò ju no i rejona più polit fascian, i rejona sche desche chi de la Val de Sora, dò vegn trei pìcoi lesc, Soial, Ciampestrin e Fontanac. Dò de chisc vegn il più bel scito de la Val de Sora, Ciampedel, dapò tedò i Muncioni vegn 4 pìcoi: Cianacei, Gries, Dalba, Penìa. Da tegnir a ment ben l'é che ogni ciasa à so tobià. Tut é te mez de bie pré o ciampes. Ogni paìsc l'é un pech più in su, la [é] ben certa se lo dut enlongia la Veisc su.