Civilisation e lingua universal/Secunde Parte/Capitulo 1
| ←Cap. 3: Le revolution del Interlinguistica | Civilisation e lingua universal by |
Cap. 2: Sumeria, matre del civilisationes→ |
SECUNDE PARTE: CIVILISATIONES E STATOS UNIVERSAL[edit]
1. NASCENTIA DEL CIVILISATION[edit]
Le homine non-civilisate vive per collection de bacas, fructos, per chassa e per pisca. Le neolitic invention del agricultura, le domestication et elevation de animales significa un revolution del economia primitive de collection e chassa: Le homine deveni collaborator e meliorator del natura, in vice de remaner solmente un exploitator e parasito.
Post le revolution agricultural-pastoral, le nascentia del civilisation maxime importante in le humanitate, proque le civilisation forni le fundamento, super le qual le developpamento spiritual e material del humanitate pote facer grande progresso.
Le prime civilisationes es producte per le grande racia blanc. Le altere grande racias, le mongol e le negroide, non habe parte in le prime developpamento del civilisation. Le mongolicos comencia haber parte, quande illes migra in le paises habitate per le grande racia blanc. Le negros, isolate in Africa per le deserto Sahara al nord, e del resto per le oceano, non ha parte in le origine del grande civilisationes, ben que illes habeva culturas remarcabile.
Le GRANDE RACIA BLANC include tres tipos: le racia blonde con testa longe, ex le grande planas del nord, le racia alpin o armenoide, con testa ronde, ex le montanias; le racia mediterran, con capillos obscur e testa longe, ex le planas del sud: egyptianos, semiticos, grande parte del population de Grecia, Italia, Espania etc.
Le INITIO DEL HISTORIC EPOCA DE UN CIVILISATION es le production de DOCUMENTOS SCRIPTE, que transmitte a nos lor linguas. Le SCRIPTURA es un sistema de notationes super material durabile: discos de argilla, papiro, pergamena. Le scriptura es un speculo permanente de civilisation e de su lingua, e ha plus grande effecto pro stimular le progresso del civilisation, que non importa qual altere invention durante le carriera del homine.
Secundo le evidentia archeologic, le prime civilisationes son nate in le Medie Oriente: in JERICHO, in le valle del Jordan - e in Sumeria, in le valles del Tigris e del Eufrate. Le civilisation de JERICHO emerge dece a dece-due mille annos ante Cristo. Possibilemente le civilisation de Sumeria es stimulate per Jericho. Totevia le arte de ceramica non es inventate in Jericho, ma es venite a Jericho ex un altere pais - dunque existeva un civilisation al minus contemporan con Jericho, ma tecnicamente plus avantiate, probabilemente in Sumeria. Le civilisation de Egypto es stimulate per Sumeria. Assi le rota pro vehiculos e pro facer ceramica, es inventate in Sumeria 3500 a.C., contra que le rota appare in Egypto verso 1600 annos a.C.
Le plus antique SCRIPTURAS sumerian et egyptian appare 4000 a.C. Le civilisationes de INDIA e CHINA es multo plus juvene. Le plus antique scripturas chinese data de 1500 annos a.C. Il es multo probabile, que le civilisationes de India e China es stimulate per Sumer et Egypto; non pote esser un accidente, que le cultura de campos de grano e le elevation de bestial seque, in India e in China, le sumerian-egyptian sistema economic.
Le plus importante pais pro le nascentia del civilisation (e del linguas) es le Crescente Fertile: un marca semicircular, como un crescente aperte al sud, imbraciante le parte septentrional del steppa semi-desertic de Arabia.
Le Revolution neolitic: le introduction del agricultura, le domestication et elevation de animales, le prime industrias de ceramica, de textura e de metallurgia, es facte in le Crescente Fertile. In le antiquitate, le ala oriental del Crescente Fertile contine Sumeria; le parte septentrional contine Syria, Palestina e Fenicia. Le steppa semi-desertic de Arabia, imbraciate per le Crescente Fertile, habeva herba in parte pluviose del anno, et era habitate per non-civilisate tribos semitic: akkadianos, amoritas. arameos, caldeanos etc., que pasturaca lor greges.
Ora, qual es le essentia del processo de civilisation?
Le responsa es, que le practica de certe occulationes, specialmente del metallurgia e del scriptura, require specialistas. Pro facer possibile, que ferreros e scribas pote dedicar lor total tempore e labor a lor specialitates, illes debe esser liberate del carga de producer alimento pro se e pro lor familias. Quando le productivitate del travaliatores agricole augmenta a un nivello sufficiente pro alimentar tote le communitate incluse le specialistas, qui non produce alimentos, alora le specialistas pote laborar solmente pro producer lor productos special. Ora, un societate, in le qual un minuscule parte del population es liberate del carga de producer alimentos e dunque labora como specialistas, tal societat es entrate in le processo del civilisation. Le effecto specific del civilisation es le division del labor. Nunc specialistas, laborante solmente in lor campos particular, inventa instrumentos, per le quales le productivitate del labor agricole augmenta e deveni plus fructuose. Assi, sempre minus labor agrari es necesse pro le alimentation del communitate, si que un sempre plus grande numero del homines pote devenir specialistas. Le processo de civilisation es le liberation progressive de un parte crescente del humanitate ab le production de alimentos e, in le mesme tempore, le dedication de un parte crescente del humanitat a labores specialisate. Le proportion inter le numero de agricultores e le numero de specialistas es le indice numeric del progresso del civilisation.
Le augmento del productivitat agricole es possibile ubi on pote facer le terra ultraproductive per medio de drainage et irrigation - dunque in le profunde humus alluvial del valles del grande fluvios: Tigris, Eufrate, Nilo, Indus, Yangtse. Este valles era anteriormente paludes inhospitabile, coperte de jungla. Le bonification o melioration de tal immense paludes es le plus grandiose interprisa del homine antique. Le successo del interprisa (le fortissime auqmento del production agricole) ha create le prime grande civilisationes in SUMERIA, EGYPTO, INDIA e China. Le developpamento del melioration es rendite possibile per le labor de specialistas, qui ha constructe le instrumentos de drainage e de irrigation. Le ultra-productivitate non solo procura alimentos pro le tote communitate, ma permitte tamben un exportation considerabile, dunque un major excambio commercial.
Contacto commercial inter communitates parlante linguas differente es sempre accompaniate per excambio linguistic, perque le commerciante debe parlar con le cliente.
Alcun scriptores religiose data le creation del mundo 4000 annos a.Cr. De facto, le prime grande civilisation, Sumeria, emerge justemente 4000 annos a.Cr. Evidentemente le scriptores antique ha concepte le initio del civilisation como le initio del mundo. Le localisation biblic del Jardin de Eden corresponde exactemente al pais fertilissime inter Tigris e Eufrate.