Cincant'ani sun autere uni dì

I. Cincant' ani sun autere uni di
Tla santa Mëssa Gejù Crist ëis dunfrì.
Nsci pluëi ëis fat plu grazies sun chësc mond,
Che gotes tën l mer tant lerch y lonch.


II.

Mandà da Die a spënder Sacramënc,
Co ëis aumentà chësta grazies mo suvënz;
Cul batejé, pisté, cul urdené y dé l sant' uele!
Si lauda Idie, messons dì nëus duc perchël.


III.

Cincant' ani cun gran pazienza
Ëis fat cunëscer i pitli la majera scienza
Te scola ann per ann cul tenì dutrina.
Speron, che Vosta fadia ne fova per nia.


IV.

Ma ënghe per i granc, co ëis prià y laurà,
Cun tant de perdiches y nseniamënc purvà
De i tenì y mené na streda dl viers,
Y no i lascé sul gran stradon dl infiern.


V.

Y po - dlonch ora san cunté dla gran fazion,
Che à purtà y porta Vosta Benedescion.
Perchël dalonc caprò t' uni bujën
La jënt da Vo, Seniëur Andrea, vën gën.


VI.

Y chi perdù à velch - de valor o no -
À crì mo debant, à prià sant' Antone;
Va da Seniëur Andrea cun si spavënt
Y giapa bel mpont si roba suvënz.


VII.

Nsci cincant' ani drito V' ëis fat
Merit ntëur duc. Y nëus Ve savon gra!
De cuermënter rengrazion de dut l bën
A duc nëus fat da bel y bur tëmps.


VIII.
Ma danz puech o nia Vo ëis - chël savons -
De nosta recunescënza. Perchël mo prions:
Die Ve l paie, Seniëur Andrea, de dut l bon,
Die Ve l paie sun chësc y n l' auter mond!

S. CRISTINA, l 21 de lugio 1946.