Chi che fesc contrate

Chi che fesc contrate.

Aeo mai vedù vos outre a contratà?
se i no bestema, se pó se diertì.
Ghin fesc de cheres che biśoign sćiopà,
se po l' é n sanser no se fenisce pi.

L' é Śane e Cencio che fesc contrate,
un vó vende, chel outro cronpà.
Ma ignante che i contrate see fate,
eh, andemo… ghin é tenpo da spetà!

Ignante de duto i zerca r' ostaria:
Digo, tiò osto, porta ca n litroto!…
E là i se scenta, e i no và pi via,
de n litro n deenta sete oto.

L' é n' armenta, r' é bona come n agnel.
Ra vendo par pagame n pra!
E po sarae anche n vedel.
R' armenta r' à da fei, de maśo ra farà.

Cencio vegni con me, i disc el sanser,
e de fora el trata el so interesso;
dapò el ciama anche Zane par fei l' afar,
e anch' a chel i disc lo stesso.

E alora Cencio, ce pensao de fei?
Ah… zirca al prezio no n' é nuia da dì.
Andemo, toltera l' é n bel afar da fei
ve l digo ió che ve ciamaré parsuaśo,
dijé de sci.

Se l' é par l' inporto che voi ió
r' armenta… ra cronpo… e r' é fenida;
ma s' el tien duro sul prezio,
digo de no, e fenida ra partida.

Intra el sci e 'l no ra và n bel pezo,
infin ch' el sanser fesc del bon;
Andemo Cencio! taià el mal par meso,
el no à torto, e tu t' as rejon.

Śone, bate śo na carta,
e Cencio ghin bete pede does,
e dapò… andemo… dàge ra man… e via!
Ca ra man… oh… ce fadies.

E coscì el sanser i ciapa ra man
de Śane e Cencio, e 'l dà n strucon.
Se lore strenśe, anche s' i fesc pian pian
eco mo… el contrato l' é fato… e pi che bon.