Chel tosat che à imparà a no dì pì baujie

From Wikisource
Jump to navigation Jump to search

Chel tosat che à imparà a no dì pì baujie


Sto viaz sentì ince valch per colese e propriamënter la storia de "chel tosat che à imparà a no dì pì baujie".

L ava inom Checo sto tosat e l jiva l secondo an a scola. Con l imparà no l stentava po tant ma el no i piajeva sta soto a imparà e jì a scola; e po per se portà fora, el birbo, el dijeva pien de baujie. L ava po ben paora da sa pare, parcieche l ava la visćia nte stua, ma l se le inventava bele per la fà franca. N di no l ava bù voia de se fà l compito e alora l s'à pensà de restà a cesa; el se n é jù sun ciauna e ntant l se feva sti conc coscì: "Lassa che i auter i vade a scola, puore gnoc! mi i no me brusca ve! per jì a stà ilò come n zon, tant me n stai chilò! Ma se i me ciapasse chilò, che abe da i dì a ma pare? Oh sto viaz dighe po che l é la maestra malada. E a la maestra, ce abe da i dì? Oh, dijarai che me doleva la testa e po la dijarà "poveretto, adesso stai meglio?" Coscì el se l ava iaro pensada fora bela, ma entant sa pare l à sentù zacai a zapolà e l é jù a dà na ogiada nte ciauna, ma no l à vedù degugn, parcieche chel canaia, svelto come la saeta, l s'ava scondù sot a latiera ite. Prest darè l é capità sa mare con chel picio Bepo, che l no i lassava na pas. La l à ciot y la l à cazé, con en pe ntel c… nte ciauna de Checo: "Vatene caite, cosci t'as finì de te scrazé, cativeria che t'es ..se no te taje, vegne po con la visćia! Checo, che entant l s'ava iaro scondù sot a letiera ite, l é vegnù fora dut content e l à scomenzé a ciamà: "Bepo, Bepoo… oh, ci polito, ades fon po asenade, vosto che fone culete fasciane sora let fora?" Bepo l é stat prest dacordo, l i deva la scorta a chel gran, entant l se la rideva de gusto. Sora de n frego l voleva ince l fà, ma Checo no l à volù l lassé: "Ti sì, pantalon, te saras bon de fà cie ti, se cogna savè… ti dame la scorta ti". Alora Bepo l à scomenzé a pestà ju dei piei, a fà susciuro e a ciamà sa mare; propio chel che Checo no voleva. A sto Checo l i é sauté en fum, l i à dat cater pedade, e l l à sgrafà e l à taié la corda per jì a se sconde. In chela vegniva sa pare su per le scale e l dis: "Ulà vasto? Come che no t'es jù a scola? Ah, canaia, t'as bù l coragio de me la fà n'autra ota", e l i à dat doi ciafe. Checo no l é stat pegher de se defende: "Pare, ma mi no podeve jì a scola, che la maestra l'é malada". E sa pare: "Ma chi auter i é ben a scola"! E Checo pronto: "Chi auter i stà n giro e i suoi no sà nia, mi inveze son vegnù a cesa a imparà"! Sa pare l dubitava ben tant e per chel l à dit: "Varda tosat, che se te me dighe baujie, puoreto ti! Canche i passa, domande po ben. Intant va nte ciauna e impara! Sa mare ince vegniva a vede ce che suzedeva, canche l à sentù che la maestra l'é malada, la dis: "Vade po a la ciatà delongo prima de fà marenda, ie porte po doi vof". Da mesdì i vegniva lori i tosac da scola, e l pare l à volù i domandà: Élo vera che la maestra é malada"? E subito un l dis: "Ah, no, no la no se mala mai no". Coscì le baujie de Checo à bù le giambe curte, e sa pare l à sapù ce che l ava da fà, massimamënter dopo che l é vegnù ince sa mare e l'à dit come che l é la storia. El s'à taié ju na visćia de venz bon monejela e l ie n à dat cater sece. Chesc à jovà. Checo l se l'à regordada per semper.