Bona sera, mia bona jent, a duc chi che me veit
Bona sera, mia bona jent, a duc chi che me veit
Bona sera mia bona jent,
a duc chi che me veit, e che me sent,
Insnet aré la grazia,
de ve fèr sutèr aut duchenc,
Gé ve cogne contèr
che volesse menèr chest cos a studièr,
perché l'é ora del lascèr vegnir al lumenous,
chest mi bel arlief de mi tous,
perché a ve l dir bel fora dret,
l'é tegnù enscin de 21 egn sconet,
l'é per chel che l vèrda fora coscì bon.
Ve dighe che l'é semper tegnù te stala, sot n graton,
ma ades Zitl, a forza de arfiadèr, l graton suèa
e dapò gé, coscita en ùltima no ciapèe nience
più, che che la brees me costèa.
E dapò ades, el no volea più stèr a scur.
ma che n dijede vo! ence a mi me pèr
che l fossa madur de denz, e de piesc.
Volesse l menèr a scola zaonder a studièr,
che l'emparassa tant a saer
se l'é la gialines o i manc che sgola
perché l cef l l'aessa dur e bon
che a tuscèr l no ge zede a nesciun muton.
E de pratega l'é ence bon segur,
che a magnèr l troa sorì la bocia ence a scur.
pagina:304
Ades vedede ben vo, che l'é grass e inton
tanche na menèda, perché a magnèr,
l fesc l'istescio che a cheghèr
l schicia jù a routoles,
n massl de gnoches al bocon.
Donca l volesse menèr ai studi zaonder
via per Ferèra, o Caprera o,
ma via aló no vegnarà pa fora nia
de chest mi bel Zitl,
e gé no volesse l'aer arlevà per nia,
che dapò coscì no aesse bona speranza
che canche son vege l me sostegne.
Dapò insnet intant che ela dormìa,
ge l'é tout da nascous,
e l'é tirà fin chiò con gran fadìa,
e canche la no l sent insnet più vaèr,
voi ben che la saute fora de let,
e che la l chiere piz e cianton,
chest bel mus de n Zitl,
e ve pree po bona jent,
che se la vegn per chisc piesc,
a ve domanèr se son passà e per chiò ruà,
che dijede che ne Zitl
ne Àgnol no l'é pa chiò ruà.
Ma... ma me pèr de sentir sdermenèr,
ge me cogne chierir n busc a sciampèr!
Zitl sta cet e no te mever,
che vegn tia mère a te chierir,
gé intant me pete jubas
e faghe finta de dormir.
Zitl, petonse ju duc doi jubas,
che sta maledeta vegia da Penìa, se bate ite l nès.
Ades te me ès intenù (parla con la moglie Scaturena)
gé voi che te me paes dut, chel che gé é spenù,
e che to bel Zitl me à costà,
l guant ducant,
gé no voi esser ne catif, ne bricon,
gé staghe a la stima del marangon,
scomenzon sunson, e jon in ju,
dapò te vedarès ben, che che gé é spenù
con to bel Zitl,
n bel ciapel
fat de reijes de lèrsc, e bel monejel,
na peza da coul, grana, e lèngia,
che ge jìa dutentorn a roda,
n bel colet de sora, fat fora de la bora,
più grossa del ciucim, n colet da desot
zenza botons, e zenza fedra, e ence dut zarà,
na ciameisa sotila, e monejela,
pagina:305
enfati la é fata del mie bombesc
che se troa te Contrin su de ogne pecel,
doi braes, fates de na scorza
che l se le cognea trèr ite e fora per forza,
doi autra braes, con ite semenzes de poges,
i ge disc chi da Soteguda
propiamenter de chi che stèsc taché
dì e net te la pel nuda,
doi ciauzes fates con chi lomescìe de fil,
che i fauresc ge disc lopa,
perché gé no n'aee l met de ge n comprèr doi de stopa,
doi stivèi zenza taches, e zenza ciodins,
doi refes de lèrsc, scì de scorza,
come cheles di Canalins.
Ades donca maladeta Scaturena te me ès intenù,
gé voi che te me paes dut chel che gé é spenù
con to bel Zitl, dapò se te ves te l tor con te, l cont te l'é fat.
A Janàgnol vel ben che Zitl, e Scaturena reste nuc,
Scaturena, seben che ti es mia consorte, te dis;
ma a l veder no fajon come che fèsc i etres;
ma bon bon, jache te me ves tant scherzèr,
ades gé vaghe ja Vich, e me faghe sobit paèr dut dal giùdize,
e ve augure n milion, carnascèr a duc mi amisc
e chiò no vegnaron più a se beghèr,
e dapò, di e fa che che te ves.
Ma onder me meneste mi Zitl maladeta Scaturena;
no voi che te me l menes via,
ne Zitl ne sia batarìa,
pinf panf punf e pinf e panf e punf
Zitl, aiut aiut che sion caput.