Biblia/Vetule Testamento/Samuel/2 Samuel 22

←Capitulo 21

Le Biblia in Interlingua Samuel

Capitulo 23→

2 Samuel

22

Un psalmo de David

¹David cantava al Senior le parolas de iste psalmo quando le Senior le liberava ab le potentia de su inimicos, includite Saul. ²Ille diceva^[1]:

“Le Senior es mi rocca, mi fortalessa e mi salvator. ³Mi Deo es mi summitate roccose al qual io fugi pro trovar protection, mi scuto, le corno de mi salvation, mi fortalessa, mi refugio, mi salvator. Tu me salva del violentia! ⁴Io invocava le Senior, que es digne de laude, e io esseva liberate de mi inimicos.

⁵Le fluctos del morte me inglutiva; le currentes de Belial me submergeva. ⁶Le cordas del Sheol me acordonava; le insidias del morte me attrappava. ⁷In mi tribulation io invocava le Senior, ad mi Deo io clamava e de su templo ille exaudiva mia voce e mi crito veniva a su aures.

⁸Le terra se sublevava e tremeva; le fundamentos del celo tremeva. Illos se sublevava quia ille irasceva. ⁹Fumo ascendeva de su nares, le foco que sortiva de su ore devorava toto; ille precipitava carbones ardente. ¹⁰Quando ille descendeva, ille faceva inclinar le celo e un nube spisse esseva sub su pedes. ¹¹Ille montava un angelo alate^[2] e volava; ille planava super le alas pennate del vento. ¹²Ille se inveloppava de tenebras, in densissime nubes de pluvia. ¹³Del fulgor que es ante ille veniva carbones de foco ardente. ¹⁴Le Senior tonitrava del celo, le Excelse altiava forte su voce. ¹⁵Ille lanceava sagittas e les disperdeva; fulmines e disfaceva le inimico. ¹⁶Le profunditates del mar appareva al vista, le regiones interne del mundo esseva discoperite per le crito de battalia del Senior, per le potente respiro furiose de su nares.

¹⁷Del alto ille extendeva su mano e me sasiva; ille me traheva foras da aquas rabiose. ¹⁸Ille me liberava ab mie inimico potentissime, ab illes qui me odia, quia illes esseva plus forte que me. ¹⁹Illes me confrontava in le die de mi affliction, ma le Senior deveniva mi supporto. ²⁰Ille me conduceva foras in un loco vaste e aperte; ille me liberava quia ille se complaceva de me. ²¹Le Senior me repagava secundo mi justitia, ille me retribueva propter mi comportamento pur e irreprochabile. ²²Quia io obediva ai comandamentos del Senior; io non me rebellava contra mi Deo. ²³Tote su preceptos es semper clar a mi mente e de su decretos io non recedeva. ²⁴Io esseva irreprochabile^[3] ante ille; io me custodiava pro non committer alicun iniquitate. ²⁵Le Senior me retribueva secundo mi justitia e secundo mi munditia que esseva coram su oculos.

²⁶Tu te comprova esser fidel con ille qui face lo que es juste e remane fidel a te, Senior. ²⁷Tu comproba esser digne de confidentia con qui es irreprochabile, ma tu comprova esser astute con qui es fraudulente. ²⁸Tu salva le opprimites, ma tu humilia le superbes. ²⁹Sin dubita tu es mi lampada, Senior; le Senior illumina le tenebras que es circa me. ³⁰Sin dubita con tu adjuta io pote attaccar un armea integre; per le potentia de Deo io pote saltar trans muros.

³¹Le unic e ver Deo age in maniera fidel; le promissas del Senior es digne de confidentia; ille es un scuto pro tote illes qui spera in ille. ³²Sin dubita, qui poterea appellar se Deo excepte nostre Deo? ³³Le unic e ver Deo es mi forte refugio; ille remove le obstaculos que se pone sur mi via. ³⁴Ille me da le agilitate de un cervo; ille me face camminar per alte locos. ³⁵Ille exercita mi mano pro le battalia; mi brachios pote tender anque le arco le plus dur. ³⁶Tu me da tu scuto de protection; tu bon voluntate de adjutar me permitte de prevaler. ³⁷Tu dilata mi sentieros subtus me; mi pedes non glissa.

³⁸Io perseque mi inimicos e les destrue. Io non me retirera si non post lor complete elimination. ³⁹Io les battera e les exterminara completemente; illes non potera resurger; illes cade a mi pedes. ⁴⁰Tu me da fortia pro le battalia; tu face que mi inimicos cade sur lor genus ante me. ⁴¹Tu face retirar mi inimicos. Io destrue qui me odia. ⁴²Illes clama, ma nemo veni adjutar les; illes invoca le Senior, ma ille refusa de audir lor precarias. ⁴³Io les mole finmente como le pulvere del terra; io les fulla e les calca como le fango sur le strata.

⁴⁴Tu me salva de un armea hostil, tu me preserva como leader del nationes. Gente super le quales io habeva un vice nulle autoritate, nunc es mi subjectos. ⁴⁵Estranieros es impotente ante a me; quando illes audi de mi interprisas ille se submitte a me. ⁴⁶Estranieros perde lor corage; illes treme de pavor quando illos quita lor fortalessas. ⁴⁷Le Senior vive! Mi protector es digne de laude! Le Senior qui me salva es exaltate como rege. ⁴⁸Le unic ver Deo me vindica completemente; ille face que le nationes se submitte a me. ⁴⁹Ille me libera de mi inimicos; tu me sasi e porta via da qui me attacca; ab viros inique tu me libera. ⁵⁰Pro isso io confide in te, Senior, ante le nationes. Io te cantara laudes. ⁵¹Ille da a su rege seligite victorias magnific, a David e a su descendentes in sempiterno!”.

Notas

1. Il ha essite longemente recognoscite que 2 Samuel 22 es non solmen te un del plus vetule plus grande poemas del Vetule Testamento, ma que, quia Psalm 18 corresponde a illo quasi litteralmente, se tracta de un texto clave del critica litterari.
2. Litt. un cherub(in).
3. O “immaculate”.