Biblia/Vetule Testamento/Samuel/2 Samuel 1

←1 Samuel 31

Le Biblia in Interlingua Samuel

Capitulo 2→

2 Samuel

1

David apprende del morte de Saul e de Jonathan

¹Postquam le morte de Saul^[1] quando David retornava de batter le Amalekitas, ille remaneva a Ziklag duo dies. ²Le tertie die il adveniva que un homine del armea de Saul arrivava dal campamento de Saul con vestimentos lacerate e pulvere sur su capite^[2]. Quando ille approchava David, le homine se prosternava.

³David le peteva: “Unde veni tu?”. Ille replicava: “Io fugiva del campamento de Israel”. ⁴David le diceva: “Que eveniva ibi? Dice me!”. Ille replicava: “Le populo fugiva del combatto e multes de illo cadeva e moriva. Mesmo Saul e su filio Jonathan moriva”. ⁵David diceva al guerrero^[3] que le habeva dicite isto: “Como face tu a saper que Saul e su filio Jonathan moriva^[4]?”. ⁶Le homine le diceva: “Per hasardo io me trovava sur le Monte Gilboa e io incontrava Saul que se appoiava sur su lancea pro sustener se, durante que le soldatos con carros de guerra le persequeva alacremente. ⁷Quando ille se volveva e me videva, ille me vocava. Io respondeva: “Ecce me!”. ⁸Ille me peteva: “Qui es tu?”. Io le diceva: “Io es un amalekita”. ⁹Ille alora me diceva: “Approcha te a me e termina mi vita. Io me senti multo vertiginose^[5] mesmo si ancora io vive”. ¹⁰Assi io me jectava super ille e le occideva, proque io sapeva que ille non poteva viver in tal conditiones. Pois io prendeva le diadema que esseva sur su capite e le bracialetto que ille portava al brachio e los portava hic a mi senior^[6]”.

¹¹Alora David sasiva su proprie vestimentos e los lacerava, e le mesmo faceva tote le homines que esseva con ille. ¹²Illes se lamentava, plangeva e jejunava usque al vespere pro Saul, pro su filio Jonathan, e pro le populo del Senior, que habeva devenite victimas del spada.

¹³Pois David peteva al soldato^[7] que le aveva informate: “Unde es tu?”. Ille replicava: “Io es un Amalekita, le filio de un residente estranie in Israel”. ¹⁴David exclamava: “Como hardiva tu altiar tu mano contra le homine que le Senior consecrava rege^[8] e occider le?”. ¹⁵Alora David vocava un de su homines e le commandava: “Veni hic e occide le!”. Assi se jectava super le Amalekita e le occideva”. ¹⁶David le diceva: “Tu mesme es responsabile de tu morte^[9]. Tu proprie bucca te accusava^[10] quando tu diceva: ‘Io me jectava super le homine que le Senior consecrava rege e le occideva”.

Tributo de David a Saul e Jonathan

¹⁷David componeva le sequente lamentation pro Saul e pro su filio Jonathan, ¹⁸e dava instructiones a que illo esseva inseniate al populo de Judea. Isto es le Canto del Arco e se trova scripte in le Libro del Juste^[11]. Illo diceva:

¹⁹“Le splendor de Israel jace assassinate sur le alte montes! Considera quomodo guerreros ardite ha cadite! ²⁰Non face lo saper a Gath, non propaga le nova per le vias de Ashkelon! Alteremente le filias del Philisteos exultarea, le filias del incircumcise lo celebrarea con festas! ²¹Oh montes de Gilboa, que non cade plus super vos ni pluvia ni rore, que vostre campos non sia plus fertile, proque ibi le scuto del guerreros ha essite dishonorate^[12]; le scuto de Saul jace a terra negligite e non plus oleate, ²²ma solmente polluite con le sanguine del inimicos, con le grassia del guerreros. L’arco de Jonathan non falleva unquam, e le spada de Saul non retornava unquam vacue! ²³Saul e Jonathan esseva grandemente amate durante lor vita, illes non se separava mesmo in le morte. Illos esseva plus veloce que le aquilas, plus forte que le leones. ²⁴Oh filias de Israel! Plora pro Saul, que vestiva vos de scarlato e adornava vos de joieles, que ornava de joieles vostre vestes. ²⁵Quomodo le guerreros ha cadite in le medio del battalia! Jonathan jace occise sur le alte montes! ²⁶Que dolor io senti pro te, fratre mie, Jonathan. Tu esseva pro me multo car, e multo plus amabile del amor de feminas. ²⁷Quomodo cadeva le guerreros ardite e esseva destruite le armas de guerra!”.

Notas

1. Iste capitulo es fortemente ligate a 1 Samuel 31. Originalmente 1 e 2 Samuel esseva un libro singule.
2. Lacerar se le vestimentos e jectar se pulvere sur le capite esseva tunc un expression de dolo.
3. O “juvene homine”.
4. O “Dice me unde Saul e su filio moriva”.
5. Saul esseva gravemente ferite e se sentiva debile e disorientate e non poteva poner fine per se ipse a su vita.
6. Le conto del morte de Saul, como illo eveniva vermente, se trova in 1 Samuel 31:3-5. Iste conto ci multo verisimilemente esseva un historia fabricate per ille homine, in le spero de obtener de David alicun favores. Probabilemente ille habeva trovate le cadavere de Saul e subtrahite le diadema e le bracialetto del corpore, e nunc ille sperava de ingratiar se David livrante a ille le emblemas del regalitate de Saul. In facente assi, le Amalekita interpretava falsemente le reaction de David a iste allegate participation al morte de Saul. Le consequentias de su mentitas se resolvera in su proprie morte.
7. O “juvene”.
8. O “le unguite del Senior”?
9. Let. “tu sanguine es sur tu capite”.
10. O “testificava contra te”.
11. Le “Libro del Juste” es un scripto non camonic que non es plus in existentia. Le Biblia refere se a illo hic e in Josua 10:12-13. Probabilemente illo esseva un collection de antique poesia national.
12. O “polluite”.