Biblia/Vetule Testamento/Reges/1Reges 7

←1 Reges 6

Le Biblia in Interlingua Reges

1 Reges 8→

1 Reges

7

Le construction del palatio real

¹Deinde Salomon edificava alsi su palatio e lo terminava integremente in dece-tres annos. ²Ille lo appellava “Le Palatio del Foresta del Libano”. Illo esseva longe 100 cubitos, large 50 cubitos, e alte 30 cubitos^[1]. Illo habeva quatro rangos de columnas de cedro e trabes de cedro super le columnas. ³Le tecto super le trabes supportate per le columnas esseva anque facite de cedro; il habeva quaranta-cinque trabes, dece-cinque pro rango. ⁴Il habeva tres rangos de fenestras arrangiate in serie de tres. ⁵Tote le entratas^[2] habeva un forma rectangular e esseva arrangiate in series de tres. ⁶Ille faceva anque un “Sala de Columnas^[3]” que esseva longe 50 cubitos e large 30 cubitos^[4]. Ante illo il habeva un portico, insimul a un pavilion supportate per columnas. ⁷Ille anque faceva un sala del throno appellate “le Sala del Justitia” ubi ille faceva decisiones judiciari. Illo esseva revestite de cedro ab le pavimento usque al trabes. ⁸Le palatio in le qual ille habitava esseva fabricate in simile maniera. Ille anque fabricava un palatio como isto pro le filia del Pharaon, que ille habeva maritate. ⁹Ab le fundamentos usque al summitate del parietes, tote iste edificios esseva fabricate de grande bloccos de lapides de alte qualitate, taliate con serras e emarginate a mensuras exacte de omne latere. ¹⁰Alicun del enorme lapides de fundamento esseva de dece o de octo cubitos^[5]. ¹¹Le bloccos de lapides de alte qualitate empleate pro le muros esseva alsi taliate secundo mensura, e esseva usate anque trabes de cedro. ¹²Circa le grande cortil il habeva tres rangos de lapides cisellate e un rango de trabes de cedro, simile al cortil interne del templo del Senior e le salas del palatio.

Le fornitura del templo

¹³Le rege Salomon faceva venir Hiram de Tyro. ¹⁴Ille esseva le filio de un vidua del tribo de Nephtali, e su patre esseva un artisano del bronzo de Tyro. Ille habeva le maestria e cognoscentia pro facer omne sorta de obras de bronzo. Ille veniva facer tote le obras de metallo que le rege Salomon le assignava.

¹⁵Ille fundeva duo columnas de bronzo. Cata columna esseva alte dece-octo cubitos e dece-duo cubitos de circumferentia^[6]. ¹⁶Ille faceva duo capitellos de bronzo pro le columnas; cata un alte cinque cubitos. ¹⁷Cata capitello esseva decorate con septe series de grilliage e catenettas contexite. ¹⁸Ille alsi incirculava le grilliage con duo rangos de granatas pro decorar le capitellos supra le columnas. ¹⁹Le capitellos supra le columnas intra le vestibulo habeva un forma simile a lilios de aqua, e illos esseva alte quatro cubitos^[7]. ²⁰In le summitate de cata columna, justo supra le protuberantia al latere del grilliage, il habeva ornamentos in le forma de duo centos granatas disponite in rangos per tote su extension. ²¹Hiram disponeva le columnas in le portico del Templo, un verso le sud e un verso le nord. Ille vocava illo al sud Iachin, e illo al nord Booz. ²²Le capitellos sur le columnas habeva le forma de lilios de aqua. Assi le obra sur le columnas esseva terminate.

²³Postea, Hiram fundeva un grande bassino circular appellate “le Mar”. Illo mensurava dece cubitos ab orlo usque ad orlo; illo habeva un forma circular e se erigeva de cinque cubitos. Su circumferentia esseva de trenta cubitos. ²⁴Sub su orlo, per tote su circumferentia, il habeva sex sculpturas ornamental in le forma de cocurbitas, e illos esseva fundite como parte del bassino. ²⁵“Le Mar” esseva deponite super dece-duo boves. Tres esseva volvite verso nord, tres verso west, tres verso sud e tres verso est; lor facies mirava al exterior. ²⁶Illo esseva spisse quatro digitos e su bordo esseva como illo de un cuppa in le forma de un flor de lilio. Illo poteva continer circa duo milles batos^[8].

²⁷Hiram faceva alsi dece carros mobile de bronzo. Cata carro esseva de quatro cubitos de longitude, quatro cubitos de latitude e tres cubitos de altitude. ²⁸Ecce como le carro esseva fabricate. Illos habeva pannellos lateral firmate per transversas. ²⁹Super ambe le pannellos, inter le supportos, il habeva leones, boves e cherubines; similemente, super le supportos superior il habeva guirlandas a festones. ³⁰Cata carro habeva quatro rotas con axes de bronzo e quatro supportos. Sub le bassino, a cata latere, le supportos habeva le forma de guirlandas. ³¹Le apertura^[9] del carro, al summitate, habeva un corona ronde pro deponer le bassinetto super illo. Illo se projectava de un cubito supra le sommitate del carro como un socculo, e habeva un diametro de un cubito e medie. Illo esseva decorate in le exterior con gravuras de guirlandas. Le pannellos del carros esseva quadrate e non ronde. ³²Subtus le pannellos il habeva quatro rotas connectite con axes que habeva essite modulate como un sol unitate con le carros. ³³Le rotas habeva un diametro de un cubito e medie e esseva simile al rotas de un carro de guerra. Le axes, le radios, le orlos, e le modiolos esseva tote modulate de bronzo fundite. ³⁴A cata un del quatro angulos del carros il habeva ansas de supporto, e etiam istos esseva modulate como un sol unitate con le carro. ³⁵Circa le summitate de cata carro il habeva un orlo de medie cubito. Le ansas al angulos del carro e le pannello lateral esseva modulate como un sol unitate con le carro. ³⁶A decorar le pannellos e le ansas il habeva gravuras de cherubines, leones e palmas ubicunque se trovava spatio pro illos, e circa il habeva guirlandas. ³⁷Omne le dece carros esseva del mesme grandor e consimile, quia cata un de illos esseva fundite del mesme modulo.

³⁸Hiram faceva alsi dece bassinettos de bronzo, uno pro cata carro. Cata bassinetto habeva un diametro de quatro cubitos e poteva continer quaranta batos^[10] de aqua. ³⁹Ille disponeva cinque de ille carros al latere sud del Templo e cinque al latere nord. Le grande bassino appellate “le Mar” esseva placiate apud le angulo sud-est del Templo. ⁴⁰Ille faceva alsi le necessari vasos pro le cineres, le palettas e le scutellas.

Assi, finalmente, Hiram completava toto lo que le rege Salomon le habeva assignante facer pro le Templo del Senior: ⁴¹Le duo columnas; le duo capitellos in le forma de globos in le summitate del columnas; le duo texturas de catenas que decorava le capitellos; ⁴²le quatro centos granatas que pendeva del catenas sur le capitellos (duo rangos de granatas pro cata un del texturas de catenas al summitate del columnas); ⁴³le dece carros que portava le dece bassinettos; ⁴⁴le Mar e le dece boves que il habeva sub le Mar; ⁴⁵le vasos pro le cineres, le palettas e le scutellas.

Hiram faceva tote iste cosas de bronzo brunite pro le Templo del Senior, justo como le rege Salomon le habeva dicite. ⁴⁶Le rege los faceva modular in funderias de terra argillose in le region del Jordan inter Succot e Sarthan- ⁴⁷Salomon non faceva pesar tote iste cosas quia illos esseva in grande abundantia; le peso del bronzo esseva ignorate.

⁴⁸Salomon faceva alsi tote le fornituras del Templo del senior: le altar de auro; le tabula de auro pro le Pan del Proposition^[11]; ⁴⁹le candelabros de auro pur al entrata del sanctuario interior (cinque a dextera e cinque a sinistra), le decorationes auree in forma de flor, lampadas e forcipes; ⁵⁰le cuppas, le achatorias, le scutellas, le cocleares e le bracieros de auro pur; e le cardines del portas del sanctuario interne (illo es del Loco Sanctissime) e pro le portas del templo ipse. ⁵¹Quando salomon terminava construer le Templo del Senior, ille reponeva le objectos sacre que pertineva a su patre David (le argento, le auro, e altere articulos) in le thesauro del Templo del Senior.

Notas

1. 46 metros longe, 23 metros large, 13.8 metros alte.
2. Tote le portas e postes de porta.
3. O “columnada”.
4. 23 metros longe e 13,8 metros large.
5. 4,6 e 3,7 metros.
6. 8,3 metros alte e 5,5 metros.
7. 1,8 metros.
8. Circa 42 kilolitros.
9. O “bucca”.
10. 840 litros.
11. O “Pan del Presentia”.