1 Reges

20

Ben-Adad attacca Samaria

²¹Deinde Ben-Hadad, rege de Syria, congregava tote su armea, supportate per le carros de guerra e cavallos de trenta-duo reges alliate. Illes ascendeva a pugnar contra Samaria e lo assediava. ²Ille mandava messageros a Rege Achab de Israel, que esseva in le citate. Ille le diceva: “Isto es lo que Ben-Hadad dice: ³¹‘Tu argento e tu auro es mie, e mie es alsi tu uxores e le melio de tu filios’”. ⁴¹Le rege de Israel le respondeva: “Il es justo como tu dice, mi senior le rege: io e toto lo que io possede es tue”.

⁵Tosto le messageros de Ben-Hadad retornava e diceva: “Isto es lo que Ben-Hadad dice: ‘Io jam te demandava que tu debe dar me tu argento, auro, uxores e filios. ⁶Ma deman, a iste mesme hora, io mandera mi officieros a perscrutar tu palatio e le domos de tu officieros. Toto lo que es preciose a tu oculos essera ponite in lor manos e portate via”. ⁷¹Alora le rege de Israel mandava vocar tote le ancianos del pais e les diceva: “Vole ben remarcar como iste homine insidia nos! Jam io esseva de accordo con su requesta que io le haberea date mi uxores, filios, argento e auro. Io non le opponeva resistentia”. ⁸Tote le ancianos e le populo le replicava: “Non consenti ni acquiesce a ille”. ⁹Alora Achab diceva a le messageros de Ben-Hadad: “Dice isto a mi senior le rege: ‘Io te dara tote lo que tu peteva le prime vice, ma io non pote acceptar tu ultime requesta’”. Assi le messageros retornava a Ben-Hadad con ille responsa.

¹⁰Inde Ben-Hadad mandava iste message a Achab: “Que le deos me colpa e mesmo me occide si il remanera bastante pulvere in Samaria pro provider de illo un manata pro cata uno de mi soldatos”. ¹¹Le rege de Israel mandava retro iste responsa: “Un guerrero qui se ancora debe vestir se de su armatura non debe gloriar se sicut un guerrero que jam ha vincite”. ¹²Quando Ben-Hadad recipeva iste responsa, ille e le altere reges bibeva in lor quartieramentos. Ille ordinava s su officieros: “Prepara vos a attaccar^[1]!”. Assi illes se preparava a attaccar le citate.

Le Senior libera Israel

¹³Inde, un certe propheta accedeva a Rege Achab de Israel, e le diceva: “Isto es lo que le Senior dice: ‘Esque tu vide iste grande fortias inimic? Ecce, hodie io va livrar les omne a te ut tu va cognoscer que io es le Senior’”. ¹⁴Achab le peteva: “Per qui isto essera accomplite?”. ille respondeva: “Isto es lo que le Senior ha dicite: ‘Per le truppas del commandantes provincial”. Achan peteva: “Qui incipera le combatto?”, e ille replicava: “Tu va facer lo”.

¹⁵Assi Achab faceva le appello del truppas del duo centos trenta duo commandantes provincial. Pois ille appellava le resto del armea de Israel, e lor numero esseva de septe milles homines. ¹⁶Illes comenciava marchar a mediedie, durante que Ben-Hadad e le altere trenta duo reges con illes, jam del toto avinate, esseva ancora in lor tentas. ¹⁷Le truppas del commandantes provincial marchava foras del citate qua le prime contingente. Dum illes se approximava, le exploratores de Ben-Hadad le reportava: “Alicun truppas exiva de Samaria”. ¹⁸Ille ordinava: “Si illes veni in pace o pro combatter, prende les vive”, ¹⁹Ma le commandantes provincial de Achab e le integre armea habeva exite pro combatter. ²⁰Cata soldato israelita percuteva e occideva su antagonista syrian, e subito le integre armea syrian esseva sasite per le panico e fugiva. Le israelitas les persequeva, ma Rege Ben-Hadad alicun de su equites fugiva a cavallo. ²¹Assi le rege de Israel destrueva le altere cavallos e carros de guerra e batteva completemente Syria.

Le Senior da a Israel un altere victoria

²²Le profeta visitava le rege de Israel e le instrueva assi: “Va e fortifica tu defensas. Determina lo que tu deberea facer, quia in primavera le rege de Syria te attaccara”. ²³¹Depost lor defaite, le officieros de Ben-Hadad le habeva dicite: “Le deos israelita es deos del collinas: ecce le ration de lor victoria. Nos tamen les pote batter facilemente in le plana. ²⁴Solmente, iste vice, reimplacia le reges con commandantes de campo! ²⁵Recruta un altere armea simile a illo que tu perdeva. Da nos le mesme numero de cavallos, carros de guerra, e homines, e nos les combattera in le plana. Il non ha ulle dubita que nos les battera”. Assi, Rege Ben-Hadad faceva sicut illes suggereva.

²⁶Igitur, le primavera sequente, ille appellava le armea syrian e sortiva a combatter Israel, iste vice a Aphec. ²⁷Alora Israel faceva le appello de su armea e recipeva lor approvisionamentos e sortiva marchante pro le battalia. Le armea israelita, tamen, pareva duo parve greges de capras in comparation con le vaste fortias syrian que reimpleva le campania!

²⁸Inde le homine de Deo accedeva al rege de Israel e le diceva: “Isto es lo que le Senior dice: ‘Le syrianos diceva que le Senior es un Deo del collinas e non del planas. Assi io causara pro te le disfacta de iste vaste armea. Alora tu va cognoscer que io es le Senior”.

²⁹Le duo armeas esseva displicate le un in fronte del altere per septe dies, e le septime die le battalia comenciava. In un singule die, le Israelitas occideva cento milles soldatos a pede. ³⁰Le resto fugiva a in le citate de Aphek, ma le muralia cadeva super illes e occideva altere vinti septe milles homines. Beh Hadad, fugiente, entrava in le citate e se occultava in un camera secrete. ³¹Le officieros de Ben Hadad le diceva: “Ecce, nos audiva que le reges de Israel es clemente. Vamos assi humiliar nos mesme per vestir nos con tela de sacco e con funiculos sur nostre testas, e offerer al rege de Israel nostre rendition. Forsan ille te lassara viver”. ³²Assi illes se vestiva con tela de sacco e funiculos, e illes vadeva al rege de Israel rogante le: “Tu servitor Ben-Hadad dice: ‘Io te preca, lassa me viver!”. Le rege de Israel le respondeva: “Esque ille es ancora vive? Ille es mi fratre!”. ³³Ille homines considerava iste responsa un bon signo e cito illes acceptava su offerta, dicente: “Si, Ben-Hadad es tu fratre”. “Vade e apporta le hic”, le rege de Israel les diceva. E quando Ben-Hadad arrivava, Achab le invitava a montar sur su carro. ³⁴Ben-Hadad diceva: “Le citates que mi patre prendeva de tu patre, io va restituer te los, e tu potera establir placias de commercio in Damasco, talmente como mi patre faceva in Samaria”. Inde Achab diceva: “Ben, io va liberar te sub iste conditiones”. Assi illes establiva inter se un nove tractato e Ben-Hadad esseva liberate.

Un propheta denuncia le actiones de Achab

³⁵Uno del membros del corporation del prophetas communicava a su socio un message del Senior: “Percute me!”. Ma ille homine refusava facer lo. ³⁶Alora le propheta le diceva: “Quia tu disobediva al voce del Senior, un leon te occidera si tosto que tu recede ab me”. Quando ille le quitava, un leon le attaccava e le occideva. ³⁷Inde ille trovava un altere homine e le diceva: “Percute me!”. Assi ille percuteva le propheta e le vulnerava. ³⁸Le propheta poneva un fascie super su oculos pro disguisar se e expectava al latere del via le passage del rege. ³⁹Quando le rege passava, ille clamava le rege e le diceva: “Io, tu servitor, esseva in le ardor del battalia e subito un homine me adduceva un prisionero. Ille diceva: “Custodia iste homine; si pro ulle ration ille succede escappar, tu debera pagar o con tu vita o con un talento de argento!”. ⁴⁰Ben, il incideva que, durante que io, tu servitor, faceva un altere cosa, le prisionero dispareva!”. Alora le rege de Israel le replicava: “Tu punition esseva jam determinate per tu proprie testimonio”. ⁴¹Alora le propheta cito removeva le fascie de su oculos, e le rege de Israel le recognosceva como un del prophetas. ⁴²Le propheta, alora, le diceva: “Isto es lo que le Senior ha dicite: ‘Quia tu liberava de tu manos un homine que io determinava que ille haberea debite morir, tu pagara con tu proprie vita, e tu populo suffrera e non le sue”. ⁴³Assi le rege de Israel retornava a casa in Samaria, triste e indignate.

Notas

↑ O “Circumfere le citate!”.

[1] O “Circumfere le citate!”.

[1]