Biblia/Vetule Testamento/Reges/1Reges 15

←1 Reges 14

Le Biblia in Interlingua Reges

1 Reges 16→

1 Reges

15

Abija regna super Judea

¹In le dece-octave anno del regno de Jeroboam, filio de Nebat, Abija^[1] deveniva rege super Judea. ²Ille regnava in Jerusalem tres annos. Su matre esseva Maacha, le granfilia de Absalom. ³Ille committeva le mesme peccatos de su patre que regnava ante le, e ille non esseva perfectemente fidel^[2] al Senior su Deo sicut su ancestre David lo habeva essite. ⁴Sed propter David, Deo permitteva a su descendentes de continuar a regnar, concedente le le prosecution de su dinastia^[3] in Jerusalem; assi Deo dava a Abija un filio post ille pro regnar in Jerusalem. ⁵Quia David habeva facite lo que le Senior approba e habeva obedite al commandamentos del Senior per tote su vita, excepte pro le incidente implicante Uriah le Hittita. ⁶Il esseva semper guerra inter Abija e Jeroboam durante tote le regno de Abija. ⁷Le resto del evenimentos del regno de Abija, includite su gestas e tote lo que ille faceva, esseva scribite in le pergamenas appellate le Annales del Regno de Judea. Abija e Jeroboam habeva essite in guerra le un contra le altere. ⁸Quando Abija moriva ille esseva inhumate in le Citate de David. Su filio Asa le reimplaciava qua rege.

Asa regna super Judea

⁹In le vinti-prime anno del regno de Jeroboam super Israel, Asa deveniva rege de Judea. ¹⁰Ille regnava per quaranta-uno annos in Jerusalem. Su granmatre esseva Maacha, filia de Abishalom. ¹¹Asa faceva lo que Deo approba sicut habeva facite su ancestre David. ¹²Ille banniva del pais le prostitution sacre masculin e feminin, e tote le repugnante idolos que su ancestres habeva erigite. ¹³Ille alsi amoveva su granmatre Maacha de su position qua regina matre proque illa se habeva facite un obscene palo de Ashera. Asa destrueva ille ignobile simulacro e lo combureva in le Vallea del Kidron. ¹⁴Quanquam ille non destrueva le sanctuarios pagan que il habeva super le collinas, le corde de Asa remaneva completemente fidel al Senior per tote su vita. ¹⁵Ille faceva reportar in le Templo del Senior le argento, le auro e plure objectos que ille e su patre habeva consecrate.

¹⁶Ora Asa e Rege Baasha de Israel per tote lor dies esseva continuemente in guerra le un contra le altere. ¹⁷Rege Baasha de israel attaccava le Giudea e fortificava le citadella de Ramah qua posto avantiate militar ut prevenir quicunque de quitar o entrar in le terra de Rege Asa de Judea. ¹⁸Asa removeva assi tote le argento e le auro que remaneva in le thesauro del Templo del Senior e del palatio regal. Ille lo mandava per le medio de alicun su ministros a Ben-hadad, filio de Tabrimmon, filio de Hezion, le rege de Aram, qui regnava in Damasco, insimul al sequente message: ¹⁹ “Io volerea facer un tractato con te, simile a illo que nostre ancestres faceva. Vide: io te manda argento e auro qua un dono. Infringe, io te preca, tu tractato con Rege Baasha de Israel, assi ille recedera de mi terra”. ²⁰Ben-hadad acquiesceva al offerta de Rege Asa e ordinava al commandante de su armea de attaccar le citates de Israel. Illes conquireva Ijon, Dan, Abel Beth Maacah, e tote le territorio de Nephtali, includite le region de Kinnereth. ²¹Quando Rege Baasha audiva in re lo que habeva evenite, ille abandonava le projecto de fortificar Ramah e se retirava a Tirzah. ²²Rege Asa ordinava a tote le homines del Judea, sin exception, de remover le lapides e le ligno que Baasa habeva empleate pro fortificar Ramah. Rege Haza usava iste material pro fortificar le citate de Geba, in le territorio de Beniamin, e le citate de Mizpah.

²³Le resto del evenimento del regno de Asa, includite tote su gestas e tote lo que ille faceva, e le nomines del citates que ille faceva edificar, esseva scribite in le pergamenas appellate le Annales del Regno de Judea. In su senectute ille developpava un morbo^[4] que disabilitava su pedes. ²⁴Quando Asa moriva, ille esseva inhumate con su ancestres in le Citate de David. Su filio Jehoshaphat le reimplaciava qua rege.

Nadab regna super Israel

²⁵In le seconde anno del regno de Asa super le Judea, le filio de Jeroboam, Nadab, deveniva rege de Israel. Ille regnava super Israel per duo annos. ²⁶Ille faceva lo que Deo disapproba, sequente le mal exemplo de su patre e incoragiante Israel a peccar.

²⁷Inde, Baasha, filio de Ahija, del tribo de Issachar, conspirava contra Nadab e le assassinava durante que ille e le armea de Israel assediava le citate philistee de Gibbethon. ²⁸Baasha occideva Nadab in le tertie die del regno de Rege Asa in Judea, e ille deveniva le sequente rege de Israel. ²⁹Immediatemente ille exterminava tote le descendentes de Rege Jeroboam, tanto que non mesmo un de ille familia real superviveva, justo como le Senior habeva promittitee concernente Jeroboam per le medio del propheta Ahija de Shilo. ³⁰Isto occurreva propter Jeroboam habeva provocate le ira del Senior a causa del peccatos que ille habeva committite e le peccatos que ille habeva inducite Israel a committer. ³¹Le resto del gestas de Nadab e toto lo que ille faceva esseva scribite in le pergamenas appellate le Annales del Regno de Israel.

Baasha regna super Israel

³²Il habeva constantemente guerra inter Rege Asa de Judea e Rege Baasha de Israel. ³³Baasha, filio de Ahija, comenciava regnar super omne Israel in le tertie anno del regno de Rege Asa super le Judea. Baasha regnava in Tirzah vinti-quatro annos. ³⁴Ma ille faceva lo que es mal al oculos del Senior e sequeva le exemplo de Jeroboam, perseverante in le peccatos que Jeroboam habeva inducite Israel a committer.

Notas

1. O Abijam, lit. mi patre es Yah(weh). Ille regnava ab 913-911 A.C. durante que Jeroboam regnava super Israel.
2. O “su corde non esseva perfecte”.
3. O “un lampa”, metaphora pro “dinastia”, un promissa de benediction permanente, cfr. 1 Reges 11:36; Psalmo 132:17; 2 Samuel 21:17.
4. Probabilemente le gutta. In le historia isto es cognoscite como “le maladia del reges”.