Biblia/Vetule Testamento/Reges/1Reges 14

From Wikisource
Jump to navigation Jump to search
Le Biblia in Interlingua
Reges

1 Reges[edit]

14[edit]

1In ille tempore le filio de Jeroboam cadeva multo malade. 2Assi Jeroboam diceva a su uxor: “Leva te e disguisa te ut nemo va recognoscer que tu es le uxor de Jeroboam, e vade a Shilo, ubi es le propheta Ahija, le homine que me diceva que io haberea regnate super iste populo. 3Porta le un dono de dece panes, alicun tortelettas e un vaso de melle. e pete le que evenira al puero”.

4Le uxor de Jeroboam faceva como la habeva dicite. Illa vadeva a Shilo a facer visita a Ahija. Ora Ahija non poteva vider, quia ille habeva perdite su vista a causa de su senectute. 5Le Senior, tamen, habeva dicite a Ahija: “Ecce, le uxor de Jeroboam va venir pro consultar te super su filio, que cadeva multo malade. Responde la con le parolas que io te da. Quando illa venira, illa simulara esser alicun altere”. 6Quando Ahija audiva le sono del passos de ille femina que entrava per le porta, ille diceva:

“Entra, uxor de Jeroboam, quare simula tu esser un altere persona? Io esseva commissionate dar te mal novas. 7Vade a dicer a Jeroboam: ‘Isto dice le Senior, Deo de Israel: Io te exaltava ex inter mi populo Israel e te rendeva duce super mi populo Israel. 8Io divelleva le regno del manos del dinastia davidic e lo dava a te. Tu non es, tamen, sicut mi servitor David, qui obediva a mi commandamentos e me sequeva con tote su corde faciente solmente lo que io approba. 9Tu faceva lo que es mal multo plus que omne alteres qui esseva ante te. Tu me faceva inragiar faciente pro te deos alien fabricate de metallo; tu completemente faceva abstraction de me. 10Assi io es preste a inducer disastros super le dinastia de Jeroboam. Io percutera cata un de tu descendentes masculin in Israel, includite le debiles e le incapaces. Io ardera le dinastia de Jeroboam, justo como se arde le composto donec illo es completemente consumite. 11Le membros del familia de Jeroboam qui mori in le citate essera devorate de canes, e illes qui mori in le campos essera devorate de vultures. Io, le Senior, ha parlate’. 12Tu, igitur, leva te e vade a tu domo, e in le exacte momento que tu pedes entrara in le urbe, le puero va morir. 13Tote Israel le lugera e convenira pro su inhumation. Ille essera le sol membro de tu familia qui habera un proprie inhumation, quia iste puero es le sol in le integre familia de Jeroboam, in le qual le Senior, Deo de Israel, trovava alco de bon. 14Le Senior constituera pro ille un rege super Israel, qui destruera le familia de Jeroboam. Isto es preste a evenir! 15Deinde le Senior succutera Israel sicut un canna verberate del aqua de un torrente. Ille evellera Israel de iste bon terra que ille dava a lor ancestres e les dispergera usque trans le Fluvio Euphrate, quia illes irritava le Senior erigente idolos[1] pro adorar Asherah. 16Ille derelinquera Israel a su inimicos propter le peccatos committite de Jeroboam, qui peccava e faceva peccar Israel”.

17Assi, le uxor de Jeroboam se levava e retornava a Tirzah. Justo quando illa entrava per le limine del domo, le puero moriva. 18Omne Israel conveniva pro su inhumation e lugeva pro ille, como le Senior habeva dicite per le medio del propheta Ahijah.

Le fin del regno de Jeroboam[edit]

19Le resto del evenimentos del regno de Jeroboam, includite le detalios de su guerras e como ille habeva regnate, es scripte in le rolos de pergamena appellate le Annales del Reges de Israel. 20Jeroboam habeva regnate per vinti-duo annos. Depost le morte de Jeroboam, su filio Nadab le reimplaciava qua rege.

Le regno de Rehoboam super le Giudea[edit]

21Intertanto, Rehoboam, filio de Salomon regnava in Judea. Ille habeva quaranta-uno annos quando ille deveniva rege e ille regnava per dece-septe annos in Jerusalem, le citate que le Senior habeva eligite ex omne le tribo de Israel pro esser su demora[2]. Su matre esseva un femina ammonite appellate Naama.

22Durante le regno de Rehoboam, le populo de Judea faceva lo que es mal coram Deo, e le irritava con lor peccatos, quia illes faceva mesmo pejo que lor ancestres. 23Illes mesmo edificava pro se sanctuarios pagan, erigeva columnas sacre e palos de Asherah super le culmine de collinas e sub omne arbore frondose[3]. 24Il habeva mesmo prostitution sacre masculin in le pais. Illes committeva le mesme abominationes del nationes que le Senior habeva expellite de ille terra ante le arrivata del Israelitas.

25In le quinte anno del regno de Rehoboam, rege Shishak de Egypto attaccava Jerusalem. 26Ille saccheava le thesauros del domo del Senior e del palatio regal; ille furava toto, includite le scutos auree que Salomon habeva facite. 27Rege Jeroboam faceva scutos de bronzo pro reimplaciar los e los assignava al officieros del guarda regal que protegeva le entrata del palatio regal. 281Quandocunque le rege visitava le templo del Senior, le guarda regal los apportava e pois los reportava in le armeria del guardas.

29Le resto del evenimentos del regno de Rehoboam, includite su gestas e toto lo que ille faceva es scribite in le rolo de pergamenas appellate le Annales del Reges de Judea. 30Rehoboam e Jeroboam esseva continuemente in guerra le un contra le altere. 31Quando Rehoboam moriva, ille esseva inhumate inter su ancestres in le Citate de David. Su matre esseva Naama, un femina ammonita. Su filio Abija le reimplaciava qua rege.

Notas[edit]

  1. O “palos”.
  2. Litt. “pro placiar su nomine”.
  3. O “semperverde”.