Biblia/Vetule Testamento/Psalmos/Psalmos 29

←Psalmos 28

Le Biblia in Interlingua Psalmos

Psalmos 30→

Psalmos

29. Ascribe al Senior gloria e potentia

In iste hymno de laude, le Psalmista se appella al assemblea celeste ut illes recognosce le splendor regal del Senior. Ille describe le potentia devastante del Senior como illo se revela in le tempestas de tonitro e affirma que le Senior exercita iste stupefaciente poter in favor de su populo. In su contexto original, iste psalmo esseva un hardite polemica contra le deo canaanita del tempestas Baal, quia illo affirma que le Senior e necun altere es le ver rege que tene sub su controlo le elementos del natura.

¹Ascribe al Senior, oh filios de Deo^[1], ascribe al Senior gloria e potentia! ²Ascribe al Senior le gloria de su nomine, adora le Senior in le splendor de su sanctitate!

³Le voce del Senior reverbera super le aqua del mares. Le Deo del gloria tonitrua, le Senior tonitrua super le oceanos^[2]. ⁴Le voce del Senior es potente; le voce del Senior es majestose. ⁵Le voce del Senior frange le forte cedros; le Senior fracassa le cedros del Libano. ⁶Ille face saltar le montes del Libano como un vitello; ille face salir le Monte Hermon como un juvene bove salvage. ⁷Le voce del Senior sidera con flammas de foco. ⁸Le voce del Senior succute le deserto; le Senior face tremer le deserto de Kadesh. ⁹Le voce del Senior face flecter large arbores e denuda forestes. In su templo omnes crita: “Gloria!”. ¹⁰Le Senior domina le aquas del diluvios. Le Senior sede sur su throno regal pro semper. ¹¹Le Senior da fortia a su populo. Le Senior benedice su populo con le pace.

Notas

1. Le phrase בְּנֵי אֵלִים (bne ʾelim, “filios del deos” o “filios de Deo”) recurre solmente hic e in le Psalmo 89:6. In le Psalmo 89 le “filios de deos/Deo” es appellate “le assemblea del sanctos” e “le consilio del sanctos”. Il pare que iste expression se refere al assemblea celeste, que comprende “angelos” e altere esseres supernatural. In Job 5:1; 15:15; Zacharia 14:5, iste esseres supernatural es appellate “sanctos”. Il pare que le VT emplea un expression canaanita que se refere al corte celeste e lo applica al esseres supernatural que circumfere le throno celeste.
2. O “multe aquas.