Biblia/Vetule Testamento/Psalmos/Psalmos 19

←Psalmos 18

Le Biblia in Interlingua Psalmos

Psalmos 20→

Psalmos

19. Le celos declara le gloria de Deo

In iste psalmo David releva le duo manieras per le quales Deo se revela, id es le obras del creation e per le medio de su lege, su revelation scripte, e exalta lor grandor. Deinde Davi pete a Deo de preservar le de toto lo que in su vita displace a Deo.

¹Pro le maestro del choro. Psalmo de David. Le celos declara le gloria de Deo, e le firmamento annuncia le obra de su manos. ²Die post die illos continua parlar; nocte post nocte illos face cognoscer lor creator. ³Illos parla, mesmo sin sonos o parolas; lor voce jammais se audi. ⁴Tamen, lor message echoa in omne partes del Terra; lor parolas se diffunde usque al horizonte le plus lontan^[1].

In le celos Deo poneva un habitation^[2] pro le sol. ⁵De illo illo sorti gloriose sicut un sponso de su lecto nuptial. Illo exulta sicut un athleta qui vince^[3] su cursa. ⁶Le sol surge ab un confinio del celos e procede in su curso usque al altere confinio. Nemo pote occultar se de su calor.

⁷¹Le lege del Senior es immaculate, illo revivisce le anima; le testimonio del Senior es digne de fiducia, illo rende sapiente personas naive^[4]. ⁸Le commandamentos del Senior es juste, illos illumina le oculos. ⁹Le respecto pro le Senior imparti puritate, illo es un valor permanente. Le leges del Senior es ver, cata un de illos es juste. ¹⁰Illos es multo plus desirabile del auro, multo plus del petras preciose. Illos es plus dulce que le melle, del melle que stilla ab le favos. ¹¹Illos servi de admonition pro me, tu servitor, e da grande recompensas a illes qui los obedi.

¹²Como poterea io deteger tote le peccatos que se occulta in mi corde? Munda me de iste celate faltas! ¹³Preserva me, tu servitor, del peccatos de superbia, que illos non me domina! Alora io essera immaculate e innocente de grave peccatos.

¹⁴Que le parolas de mi bucca e le meditation de mi corde te sia agradate, oh Senior, mi adjutor e mi redemptor!

Notas

1. O “confinios del mundo”.
2. Metaphoricamente, le loco ubi le sol vade a reposar in le vespere, litt. “un tenta”.
3. O “preste a participar al cursa”.
4. O “infantes”, “personas simple”.