Biblia/Vetule Testamento/Psalmos/Psalmos 136

←Psalmos 135

Le Biblia in Interlingua Psalmos

Psalmos 137→

Psalmos

136. Rende gratias al Senior, quia ille es bon!

In iste hymno le psalmista affirma que Deo es digne de omne laudes quia su misericordia dura pro semper, pro su autoritate soveran e compassion. Cata verso del salmo se conclude con le refrain: quia su misericordia dura pro semper!

¹Rende gratias al Senior, quia ille es bon! Quia su misericordia dura pro semper!

²Rende gratias al Deo del deos, quia su misericordia dura pro semper!

³Rende gratias al Senior del Seniores, quia su misericordia dura pro semper!

⁴Rende gratias a ille qui sol face potente miraculos! Quia su misericordia dura pro semper!

⁵Rende gratias a ille qui faceva le celos tanto habilemente! Quia su misericordia dura pro semper!

⁶Rende gratias a ille qui placiava le terra inter le aquas. Quia su misericordia dura pro semper!

⁷Rende gratias a ille qui faceva le grande lumines! Quia su misericordia dura pro semper!

⁸le sol pro presider le die, quia su misericordia dura pro semper!

⁹le luna e le stella pro presider le nocte, quia su misericordia dura pro semper!

¹⁰Rende gratias a ille qui percuteva le primogenites del Egypto. Quia su misericordia dura pro semper!

¹¹Ille faceva sortir Israel de lor medio, quia su misericordia dura pro semper!

¹²Ille ageva con mano forte e bracio potente, , quia su misericordia dura pro semper!

¹³Rende gratia a ille qui divideva le Mar Rubre, quia su misericordia dura pro semper!

¹⁴Ille conduceva Israel securmente per illo, quia su misericordia dura pro semper!

¹⁵Ma ille precipitava Pharaon e su armea in le Mar Rubre, quia su misericordia dura pro semper!

¹⁶Rende gratias a ille qui conduceva su populo trans le deserto, quia su misericordia dura pro semper!

¹⁷Rende gratia a ille qui percuteva reges magne, quia su misericordia dura pro semper!

¹⁸Ille occideva reges potente, quia su misericordia dura pro semper!

¹⁹Sihon, rege del amoritas, quia su misericordia dura pro semper!

²⁰E Og, rege de Bashan, quia su misericordia dura pro semper!

²¹Deo dava le terra de iste reges qua un hereditage, quia su misericordia dura pro semper!

²²Qua un hereditate a Israel, su serviente, quia su misericordia dura pro semper!

²³Ille se rememorava de nos in nostre debilitate, quia su misericordia dura pro semper!

²⁴Ille salvava nos ab nostre inimicos, quia su misericordia dura pro semper!

²⁵Ille da nutrimento a omne viventes, quia su misericordia dura pro semper!

²⁶Rende gratias al Deo del celos, quia su misericordia dura pro semper!