Biblia/Vetule Testamento/Psalmos/Psalmos 132

Psalmos

132. Oh Senior, memora David e tote su travalios

Le psalmista rememora a Deo le devotion de David e Su promissa re le dynastia de David e Sion..

¹Un canto del pelegrinos qui ascende a Jerusalem. Oh Senior, memora David e tote su travalios! ²Ille faceva un promissa solemne al Potente de Israel^[1]: ³“Io non entrara in mi proprie domo, io non jacera in mi lecto pro reposar, ⁴Io non concedera le somno a mi oculos e torpor a mi palpebras, ⁵donec io trova un loco pro edificar un habitation pro le Potente de Israel”. ⁶Ecce, nos audiva que le Arca esseva in Ephrata; nos lo trovava in le territorio de Jaar. ⁷Vamos entrar in le sanctuario^[2] del Senior; vamos adorar le al scabello de su pedes! ⁸Surge, oh Senior e entra a in le loco de tu reposo, insimul al Arca, symbolo de tu fortitude! ⁹Que tu sacerdotes sia vestite de integritate^[3] e que tu sanctos exulta! ¹⁰Propter tu servitor David, non averte tu reguardo ab le rege qui tu seligeva^[4]! ¹¹Le Senior faceva un juramento a David, con le promissa que ille nunquam habera recedite de illo. Ille diceva: “Io ponera un de tu descendentes^[5] sur tu throno. ¹²Si illes obedi al terminos de mi pacto e al leges que io les docera, alora anque lor filios sedera sur su throno pro semper”. ¹³Quia le Senior ha eligite Sion; ille decideva facer de illo su habitation. ¹⁴Ille diceva: “Isto essera mi loco de reposo pro semper; io habitara hic proque io lo seligeva. ¹⁵Io abundantemente providera a iste citate lo que illo necessita; io dara a su pauperes tote le nutrimento que illes besonia. ¹⁶Io protegera su sacerdotes, e su populo sancte cantara de gaudio. ¹⁷Ibi io rendera forte David. Mi uncto essera un lumine pro mi populo. ¹⁸Io humiliara su inimicos, e su corona resplendera.

Notas

1. Litt. “de Jacobo”.
2. O “tenta”, “tabernaculo”.
3. O “justitia”.
4. O “qui tu concrecrava”, “ab tu Uncto”.
5. Litt. “le fructo de tu ventre”.