Biblia/Vetule Testamento/Psalmos/Psalmos 116

←Psalmos 115

Le Biblia in Interlingua Psalmos

Psalmos 117→

Psalmos

116. Io ama le Senior proque ille exaudiva le voce de mi deprecation

Le Psalmista rende gratias al Senior quia Ille le liberava de un crise que menaciava su vita e promitte de contar al integre communitate del pacto quid Deo ha facite pro ille.

¹Io ama le Senior proque ille exaudiva le voce de mi deprecation. ²Ille se inclinava pro audir me: assi, io va invocar le confidente per tote mi vita. ³Le morte me habeva involvite con su funes. Le angustia del inferno me sasiva. Io videva supervenir me solmente tribulation e dolor. ⁴Ma io invocava le nomine del Senior e diceva: “Senior, libera mi anima!”. ⁵Le Senior es misericordiose e juste. Nostre Deo es misericorde. ⁶Le Senior custodia illes que es sicut parve infantes. Io me sentiva abattite, ma ille me salvava. ⁷Retrova, anima mie, tu pace, quia le Senior te beneficiava. ⁸Si, Senior, tu redimeva mi anima del morte, essugava mi oculos del lacrimas e preveniva mi pedes de esser trappate. ⁹Io va ambular coram le Senior in le terra del viventes. ¹⁰Io crede in te; isto es le ration que io diceva: “Io es grandemente afflicte”. ¹¹In mi anxietate io clamava a te: “Omnes es mentitores"^[1]. ¹²Como pote io recompensar le Senior pro tote lo que ille faceva pro me? ¹³Io elevara le calice del salvation e laudara^[2] le nomine del Senior. ¹⁴Io complira le promissas que io faceva al Senior coram tote su populo.

¹⁵Le Senior considera multo preciose le vita^[3] de su sanctos. ¹⁶Oh Senior, vero io es tu servitor. Io es tu servitor, le filio de tu serviente. Tu laxava mi catenas e nunc io es libere. ¹⁷Io te offerera un sacrificio de action de gratias e invocara le nomine del Senior. ¹⁸Coram tote su populo io complira le votos que io faceva al Senior. ¹⁹Io lo facera in le cortes del domo del Senior, in le corde de Jerusalem. Alleluia^[4]!

Notas

1. Oː "Tote iste gente es mendace”
2. O “invocara”.
3. Litteralmente illo es “le morte de su sanctos”, ma le idea de iste expression non es que Deo se allegra del morte de su sanctos, ma que le menacia del morte de su sanctos attrahe su attention e les salva de illo!
4. O “laudas al Senior!”.