Biblia/Vetule Testamento/Psalmos/Psalmos 108

←Psalmos 107

Le Biblia in Interlingua Psalmos

Psalmos 109→

Psalmos

108. Mi corde es preste, Deo, mi corde nunc es preste

Con alicun variationes minor, iste psalmo es un composition de Psalmo 57:7-11 e 60:5-12.

¹Un cantico, un psalmo de David. Mi corde es preste, Deo, mi corde nunc es preste. Io cantara e te laudara con tote mi corde. ²Evelia vos, lyra e harpa! Con mi cantico io eveliara le alba. ³Io te regratiara inter tote le populo, oh Senior. Io cantara tu laudas inter omne gentes. ⁴Quia tu misericordia es plus alte que le celos. Tu fidelitate^[1] attinge le nubes. ⁵Sia exaltate, oh Deo, super le celos le plus alte. Que tu gloria resplende super tote le terra.

⁶Ora salva tu populo amate. Responde e salva nos per le medio de tu poter. ⁷Deo ha parlate in su sanctuario: “Io triumphara! Io dividera Shechem con gaudio. Io mensurara le vallea de Succoth. ⁸Gilead me pertine, mie es Manasseh. Ephraim es mi casco, Juda mi sceptro regal. ⁹Moab es mi bassino de lavage. Io facera que Edom me servi. Io critara de triumpho super Philistia”. ¹⁰Qui me conducera a in le citate fortificate? Qui me portara a Edom?

¹¹Esque ha tu nos repulsate, oh Deo? Esque tu non marchara plus con nostre armeas? ¹²Da nos auxilio contra nostre inimicos, quia omne adjuta que poterea dar nos homines es futile. ¹³Con le adjuta del potentia del Senior nos facera cosas grande, quia ille fullara nostre inimicos sub su pedes.

Notas

1. O “veritate”.