Biblia/Vetule Testamento/Proverbios/Proverbios 1

←Psalmos 150

Le Biblia in Interlingua Proverbios

Proverbios 2→

Le Proverbios

Introduction al libro

¹Proverbios^[1] de Salomon, filio de David e rege de Israel.

²Illos servi pro acquirer cognoscentia practic^[2] e disciplina; pro discerner con intelligentia sage consilios; ³pro reciper un erudition moral que porta a saper viver con justitia, rectitude e honorabilitate; ⁴pro instillar^[3] sagacitate^[4] al personas moralmente naive^[5] e pro dar al juvenes le habilitate de formular planos ben cogitate. ⁵Le sagio que los audi augmentara su saper e le intelligente acquirera un guida pro su conducta. ⁶Illos servi pro facer comprender le significato de parabolas e de allegorias, le parolas del sapientes e lor enigmas. ⁷Le prime passo a facer pro acquirer cognoscentia practic es le timor del Senior: solmente personas insensate poterea despicer^[6] sapientia e disciplina.

Admonitiones

⁸Filio mie! Presta attention al disciplina de tu patre e non rejecta le instructiones moral de tu matre. ⁹Como un gratiose diadema lor instructiones adornara tu fronte, como un preciose collar illos parara tu collo.

¹⁰Filio mie! Si peccatores essaya de escar te, non acquiesce les. ¹¹Se illes dice: “Veni con nos! Nos insidiara alicuno e versara sanguine, nos preparara un imboscada pro trappar un innocente sin causa; ¹²nos les ingurgitara vive como face le inferno^[7]; mesmo si illes es plen de vigor nos les facera cader in le fossa. ¹³Nos sasira omne sorta de pretiose substantias, nos reimplera nostre casas de rapinas. ⁴Junge te a nos! Nos repartira equalmente anque con te tote lo que nos roba!”.

¹⁵Filio mie! Non vader con illes, non permitte a tu pedes de sequer lor cammino! ¹⁶Illes es alacre a infliger damnos, e illes se hasta a effunder sanguine. ¹⁷Certo il es futile tender un rete ante le oculos de aves, ¹⁸ma iste gente cadera in le rete que illes mesme tendeva^[8]. ¹⁹Assi es le vias de tote illes qui essaya facer ganios injustemente. Ganios injuste rape le vita de illos que los acquire.

Le appello del sapientia

²⁰Le sapientia advoca per le stratas; illa crita a alte voce in le placias. ²¹In capite de vias ruitose illa clama; al entrata del portas del citate illa proclama: ²²“Quanto longemente ancora vos naive amera le naivitate? Quanto longemente ancora vos irrisores delectara vos in le irrision, e le imbecilles odiara le cognoscentia? ²³Se solmente vos responde a mi correction, alora io effundera in vos mi pensamentos^[9] e io facera vos comprender mi parolas. ²⁴Tamen, quia io vocava vos, ma vos declinava de audir, e io extendeva mi mano pro facer vos approximar, ma vos non prestava attention; ²⁵quia vos negligeva tote mi consilios e non obsequeva a mi correction, ²⁶un die il essera io a rider quando le disgratia venira super vos, il essera io a burlar me de vos ²⁷quando le terror que vos time colpara vos como un tempesta devastante, quando tribulation e calamitate advenira vos.

²⁸Tunc illes invocara me, ma io non respondera; illes querera de me, ma non me trovera: ²⁹isto evenira proque illes odiava le cognoscentia moral, e non seligeva le timor del Senior; ³⁰illes non obsequeva mi consilio, illes repelleva mi exhortationes. ³¹Igitur illes mangiara del fructo amar de lor conducta^[10] e essera stipate plenmente de lor proprie consilios. ³²De facto a occider le insensates essera lor obstination ipse; il essera lor indolentia a destruer le imbecilles. ³³Tamen, qui me presta attention vivera in securitate, in pace e sin pavor de esser damnificate.

Notas

1. “Proverbios” traduce communmente מָשָׁל (mashal) que pote significar un lection exemplificative o un analogia. Illos poterea esser un breve affirmation breve e vigorose (Ezekiel 16:44), un lection illustrative trahite del experientia (Psalmos 78:2-6), un dicto o proverbio (Deuteronomio 28:37), o un oraculo de futur benediction (Ezekiel 21:1-5). Hic illo significa un lection exemplificative que presenta un curso de action. Illo adjuta un persona a seliger como comportar se, sequer un modello o evitar un mal exemplo. Simile a “parabola”.
2. Sapientia, habilitate, maestria, virtuositate.
3. O “communicar”.
4. O “astutia”.
5. O “inexperte”, “infantes”.
6. O “minuspreciar”
7. Let. “Sheol”.
8. O “illes tende un imboscada a loro proprie vitas”
9. O “spirito”. Heb. “mi spirito”. Le termini “spirito” (רוּחַ, ruakh) functiona hic como un metonymia (= spirito) de association (= pensamentos), como indicate del parallelismo con “mi parolas” (דְּבָרַי, dvaray). Le vocabulo רוּחַ (ruakh, “spirito”) pote haber un accento cognitive, p. ex. “spirito de sapientia” (Exodo 28:3; Deuteronomio 34:9). Illo es empleate metonymicamente pro “parolas” (Job 20:3) and “mente” (Isaia 40:13; Ezekiel 11:5; 20:32; 1 Chronicas 28:16. Le “spirito de sapientia” produce maestria e le habilitate necessari pro le successo (Isaia 11:2; Johannes 7:37-39).
10. O “vias”.