Biblia/Vetule Testamento/Numeros/Numeros 11

←Numeros 10

La Bibia in Interlingua Numeros

Numeros 12→

Numeros

11

Le populo se plange de lor travalio

¹Quando le populo incipeva planger se de lor travalio, le Senior se doleva multo de isto. Assi, si tosto que le Senior lo audiva, su ira se inflammava; le foco del Senior ardeva inter illos e consumava un parte del populo in le peripheria del campamento. ²Quando le populo clamava ad Moses, ille orava al Senior, e le foco se extingueva. ³Assi ille placia esseva appellate Tabera, quia ibi le igne del Senior habeva ardite contra illes.

Querelas in le le nutrimento

⁴Le turba promiscue^[1] que esseva inter illes, appetteva vivandas plus agradabile^[2], e assi anque le Israelitas itero incipeva plorar e diceva: “Si solmente nos habeva carne a mangiar! ⁵Nos recorda le pisces que nos mangiava gratis in Egypto, le cucumbres, le melones, le porros, le cibollas e le allio. ⁶Nunc, tamen, nostre guttures es aride, e nihil altere nostre oculos respice nisi iste manna!”. ⁷Ora le manna esseva simile a semines de coriandros e su color esseva como le color del bdellio^[3]. ⁸Le populo sortiva e lo colligeva del terreno. Illes lo moleva o batteva con morteros a mano. Illes lo coceva in frigitorias e de illo faceva tortas. Su sapor esseva como panes oleate. ⁹Quando le rore descendeva de nocte super le campamento, le manna alsi descendeva.

Moses querela con le Senior

¹⁰Moses audiva le familias del populo que plorava al entrata de lor tenta; e quando le furor del Senior se inflammava valde, alsi Moses esseva de illo multo exasperate. ¹¹E Moses diceva al Senior: “Quare affligeva ti assi ti servitor? Quare io non trovava favor^[4] coram te, que tu imponeva le fardello de iste integre populo super mi spatulas? ¹²Esque io mesme concipeva omne iste populo a que tu poterea dicer me: ‘Porta les sur tu brachios, como un nutrice sole portar un infante al terra que tu promitteva de dar les con un solemne juramento? ¹³Unde io pote prender carne pro dar lo a iste integre populo, quia illes clama ad me: ‘Da nos carne a mangiar!”. ¹⁴Io non pote io solmente sustener tote iste populo, quia illo es troppo onerose pro me! ¹⁵Si tu age con me in iste maniera, io te obsecra de occider me, si io trova gratia a tu oculos: non face me vider tote iste mi pena!”.

Le responsa de Deo

¹⁶Alora le Senior diceva a Moses: “Congrega me septanta viros del seniores de Israel, que tu sape esser ancianos del populo e officieros super illo, e duce illes al entrata del Tabernaculo^[5]: que illes sta ibi con te. ¹⁷Alora io descendera e parlara con te, e io prendera un parte del Spirito que es super te e lo ponera super illes, e illes portara con te parte del fardello del populo, assi que illo non grava sur te solmente.

¹⁸E dice al populo: ‘Purifica^[6] vos, quia cras vos mangiara carne, nam io audiva vos plorar: ‘Qui dara nos carne a mangiar? Le vita pro nos esseva melior in Egypto!’. Ergo le Senior va dar vos carne, e vos mangiara. ¹⁹Vos mangiara, non solmente per un die, ni per duo dies, ni per dece dies, ni per vinti dies, ²⁰ma per un mense integre, donec illo sorti de vostre nares e se verte in nausea, quia vos dispreciava le Senior qui es in vostre medio e plorava coram ille dicente: ‘Quare sortiva nos ex Egypto?’”.

²¹Moses, tamen, respondeva al Senior: “Le populo, in cuje medio io es, contene sex centos milles personas a pede, ma tu dice: ‘Io les dara carne a que illes mangia per un mense integre. ²²Mesmo si nos macellava tote nostre greges e bestial, esque isto les satisfacerea? Mesmo si nos captava tote le pisces del mar, esque illo esserea satis pro illes?”. ²³E le Senior diceva a Moses: “Esque mi brachio perdeva forsan su poter? Ora nunc vos va vider si o no mi parola va accomplir se!”.

²⁴Assi Moses sortiva e reportava al populo de parolas del Senior. Ille, pois, congregava septanta viros del seniores del populo e le faceva star circa le Tabernaculo. ²⁵E le Senior descendeva in le nube e les parlava, e prendeva parte del Spirito que esseva super Moses e lo poneva super le septanta ancianos. Quando le Spirito se posava super illes, illes incipeva prophetisar, ma isto non haberea evenite plus in ultra.

Eldad e Medad

²⁶Duo homines, tamen, remaneva in le campamento; le nomine del prime esseva Eldad, e del secunde Medad. E le Spirito se posava super illes. Ora illes esseva enumerate inter le ancianos, ma non habeva vadite ad le Tabernaculo. Assi illes incipeva prophetisar in le campamento. ²⁷Alora un juvene homine accurreva a Moses e le reportava: “Eldad e Medad prophetisa in le campamento!”. ²⁸Josha, filio de Nun, le servitor de Moses, uno que le Senior habeva seligite desde le juventute, diceva: “Moses, mi senior, prohibe les de facer lo!”. ²⁹Ma Moses le replicava: “Esque tu es jelose pro me? Io multo volerea que omnes in le populo de Deo esseva prophetas e que le Senior haberea date a illes alsi su Spirito!”. ³⁰Alora Moses retornava al campamento insimul al ancianos de Israel.

Le provision de qualias

³¹Ora un vento sortiva ab le Senior e illo portava qualias^[7] ab le mar e los lassava cader circa le campamento. Per milias in omne direction il habeva qualias volante duo cubitos supra le terreno. ³²Assi le populo sortiva e capturava qualias per tote le die e le nocte, e mesmo le die sequente. Nemo colligeva de illos minus que 10 homers! Illes pois dispergeva le qualias capturate circa le campamento ut facer los siccar. ³³Durante que, tamen, le carne del qualias esseva ancora inter lor dentes, ante manducar lo, le furor del Senior se inflammava contra le populo, e le Senior lo colpava con un plaga multo grande.

³⁴Ergo, ille placia esseva appellate Kibroth Hattaava, quia ibi illes interrava le populo que concupisceva nutrimentos differente. ³⁵Deinde, sortite de Kibroth Hattaava, illes perveniva a Aseroth, ubi ille remaneva per alicun tempore.

Notas

1. Que comprendeva estranieros viagiante con illes.
2. Como illos que illes mangiava in Egypto.
3. O “resina de gumma”.
4. O “gratia”.
5. O “Tenta del incontro”.
6. O “sanctifica”.
7. O “coturnices”.