Biblia/Vetule Testamento/Judices/Judices 1

←Josua 24

La Bibia in Interlingua Judices

Judices 2→

Judices

1

Le populo de Israel occupa le pais de Canaan

¹Depost le morte de Josua, le Israelitas consultava^[1] le Senior e le peteva: “Qual de nostre tribo deberea conducer le invasion^[2] contra le Cananitas e lancear le attacco^[3]?”. ²Le Senior respondeva: “Le homines de Juda! Io ha ponite le pais in lor manos^[4]”. ³Alora le homines de Juda diceva a lor fratres del tribo de Simeon: “Veni, vamos combatter insimul contra le Cananitas in le territorio que esseva assignate a nos. Postea, nos alsi venira combatter in le territorio que esseva assignate a vos. Dunque, le homines de Simeon se jungeva a illes de Juda.

⁴Illes comenciava le guerra e le Senior poneva in lor manos le Cananitas e le Perizita: duo milles de illes cadeva sub lor colpos apud le citate de Bezek. ⁵Ibi illes trovava le rege cananita Adoni-Bezek e combatteva contra ille. Illes causava le defaite del Cananitas e del Perizitas. ⁶Quando Adoni-Bezek fugiva, illes le chassava e le capturava. Pois illes le excideva su pollices e le digitos grande del pedes. ⁷Adoni-bezek diceva: “Septanta reges, con pollices e digitos grande del pedes excise, recoltava le fragmentos de alimentos que cadeva de mi tabula. Nunc Deo me repaga pro tote lo que io les faceva”. Postea, illes le portava a Jerusalem, ubi ille moriva.

⁸Le homines de Juda attaccava Jerusalem e lo capturava. Un vice prendite le citate, illes exterminava su habitantes e lo incendiava. ⁹Pois illes passava a combatter contra le Cananitas que viveva in le region collinose del Negev e le region pedemontan del Shephela. ¹⁰Le homines de Juda attaccava alsi le Cananita que viveva in Hebron, que un vice se appellava Kiriath-Arba. Illes batteva le fortias de Sheshai, Ahiman e Talmai. ¹¹Ab ibi illes marchava contra le habitantes de Debir, que tunc se appellava Kiriath-Sepher. ¹²Caleb diceva: “Al homine que attaccara e capturara Kiriath-Sepher, io dara mi filia Achsa como su sposa”. ¹³Quando Othniel, filio de Kenaz, le fratre plus juvene de Caleb, lo capturava, Caleb le dava su filia Achsa como sposa.

¹⁴Le die que Achsa entrava como sposa in le casa de Othniel, illa proponeva a su marito de demandar un terreno a Caleb, su patre. Quando illa dismontava de su asino, Caleb la diceva: “Que volerea tu?”. ¹⁵Illa le respondeva: “Per favor, da me un dono special. Date que tu jam me dava terreno in le Negev, da me nunc fontes de aqua”. Assi Caleb le dava le fontes superior e le fontes inferior.

¹⁶Ora le Kenita, descendente del patre affin de Moses, habeva montava con le tribo de Juda ab le citate del Palmeros usque al deserto de Juda, al Negev de Arad, e se establiva inter le Amalekitas^[5]. ¹⁷Le homines de Juda vadeva con lor fratres le homines de Simeon e batteva le Cananita que viveva a Zephath. Illes consecrava al extermination iste citate e pro ille ration lo appellava Horma (que significa “extermination”). ¹⁸Juda conquireva Gaza, Askelon, Ekron, e le territorio que se trova circum iste citates.

¹⁹Le Senior esseva con le homines de Juda. Illes conquireva le region collinose, ma illes non succedeva conquirer le habitantes del planas costal, proque illes habeva carros de guerra con rotas orlate de ferro. ²⁰Como habeva dicite Moses, illes assignava Hebron a Caleb, le qual expelleva le tres filios de Anak. ²¹Le homines de Benjamin, totevia, non succedeva expeller le Jebusitas que viveva in Jerusalem. Pro ille ration, le Jebusitas continua viver a Jerusalem con le Benjaminita usque a hodie.

Successos partial

²²Quando le homines del tribo de Joseph attaccava Bethel, le Senior esseva con illes. ²³Illes inviava spiones a iste citate que anticamente se appellava Luz. ²⁴Le spiones videva un homine que sortiva del citate e le diceva: “Si tu mostra nos un entrata secrete pro adir in le citate, nos te dara un recompensa”. ²⁵Alora ille homine les monstrava un entrata secrete pro adir in le citate, e le homines de Joseph exterminava le habitantes del citate, ma ille lassava que ille homine con su familia quitar al secur ille citate. ²⁶Ille homine, assi, se transfereva in le pais del Hittitas e edificava le prime nucleo de un citate. Ille lo appellava Luz, e illo ha conservate ille nomine usque hodie.

²⁷Le homines de Manasse non conquireva Beth-Shean, Tanach, o le citates que il ha circum illo. Ni illes conquireva le population que vive in Dor, Ibleam, Megiddo o le citates circumstante. Le Cananita continuava viver in ille territorio. ²⁸Quandocunque le Israelitas esseva forte militarmente, illes fortiava le Cananitas a laborar como sclavos, ma illes nunquam les conquireva completemente.

²⁹Le homines de Ephraim non conquireva le Cananitas que viveva in Gezer. Le Cananitas continuava viver con illes in Gezer.

³⁰Le homines de Zebulun non conquireva le populationes que viveva in Kitron e Nahalol. Le Cananitas continuava viver inter illes e esseva fortiate laborar pro illes como sclavos.

³¹Le homines de Asher non conquireva le populationes que viveva in Acco o Sidon, ni illes conquireva Ahlab, Achzib, Helbah, Aphek, o Rehob. ³²Le population de Asher vive inter le Cananitas que reside in ille pais proque illes non lo conquireva.

³³Le homines de Nephtali non conquireva le populationes que viveva in Beth-Shemesh o Beth-Anath. Illes vive inter le Cananitas que reside in ille territorio. Le Cananitas que vive in Beth-Shemesh e Beth-Anath esseva fortiate a laboras pro illes como sclavos.

³⁴Le Amoritas fortiava le populo de Dan a viver in le region collinose. Illes non les permitteva de viver in le planas costal. ³⁵Le Amoritas habeva le determination de remaner in Har Heres, Aijalon, e Shaalbim. Quandocunque le tribo de Joseph esseva militarmente forte, le Amorita esseva fortiate a laborar pro illes como sclavos. ³⁶Le confinios del territorio amorita percurre le Montata del Scorpiones usque a Sela e plus in alto.

Notas

1. Per le medio de un oraculo prophetic.
2. O “comenciar le guerra”.
3. Let. “Qui debera montar pro nos contra le Cananitas pro attaccar les?”. Le nomine de cata tribo es considerate pois como un singulo individuo.
4. In le parolas del Senior illo es un facto jam complite, illo es certe.
5. O “con le populo de Juda”.