Biblia/Vetule Testamento/Job/Job 24

Job

24

Le indifferentia apparente de Deo

¹Quare le Omnipotente non porta le impios al judicio^[1]? Quare illes qui le cognosce^[2] le attende frustra^[3]?

²Homines maleficente roba terra per remover le lapides marcator del confinios. Illes roba greges e los pone in lor proprie pasturas. ³Illes se appropria le asinos del orphanos e require le bove de un vidua qua pignore. ⁴Illes subverte le via del pauperes e illes qui es necessitose es fortiate occultar se insimul pro proteger se. ⁵Como onagros in le deserto, le paupere debe passar tote lor tempore cercante alimentos, cercante alimentos pro lor filios mesmo in le deserto. ⁶Illes recolta in agros que non possede, e face spicilegios in le vinias de peccatores. ⁷Illes pernocta nude in le frigido sin vestimentos o copertura. ⁸Illes es imbibite per le pluvias del montes e se serra contra le roccas non habente refugio. ⁹Gente malefic sasi le infante de un vidua ab su pectore, sumente le infante qua lor pignore. ¹⁰Le pauperes debe vagar nude sin vestimentos. Illes recolta nutrimento^[4] pro alteres e illes mesme es famelic. ¹¹Illes pressa le olivas sin esser permittite gustar lor oleo, e illes fulla le uva in le pressa de vino e suffre le sete. ¹²Le gemitos del morientes se eleva del citates e le vulnerate clama adjuta; ma Deo non presta attention al mal que les es facite^[5]. ¹³Il ha celles qui se rebella contra le lumine. Illes refusa recognoscer su vias o remane in su semitas. ¹⁴Le homicida se leva mane pro occider le povre e le necessitose; in le nocte ille vaga como un fur. ¹⁵Le oculos del adultero observa le incipiente crepusculo e dice: “Nemo me videra!”. Ille occulta su facie pro non esser recognoscite. ¹⁶Durante le nocte age le effractores e illes dormi durante le jorno. Illes non es accostumate al lumine del sol. ¹⁷Le nocte obscur es lor matino. Illes es alliatos del terrores nocturne^[6]. ¹⁸Illes, tamen, dispare sicut scuma in un torrente. Quid illes possede es maledicte e illes mesmo time entrar in lor vinias. ¹⁹Le tumba^[7] consume le peccatores justo como le siccitate e le calor consume le nive. ²⁰Lor proprie matres les oblidara. Le vermes les trovara dulce a mangiar. Nemo les rememorara. Gente malefic es frangite como arbores durante un tempesta. ²¹Illes decipe le feminas qui non ha filios pro adjutar las. Illes refusa adjutar le viduas necessitose.

²²Deo, tamen, in su potentia, traina via le forte. Illes pote elevar se multo in alto, ma non possede acun assicuration que illes vivera. ²³Illes pote esser permittite viver in securitate, ma Deo semper les reguarda. ²⁴Ben que nunc illes es eminente, in un momento illes essera humiliate como omne alteres, excidite como le summitate del spicas. ²⁵Si tote isto non es assi, qui poterea provar que io sia un mentitor? Qui poterea reducer a nihil mi parolas?

Notas

1. O “le tempores del judicio non es establite”.
2. Le justos.
3. Litt. “non vide su dies”.
4. O “porta le spicas de grano”.
5. O “a lor preces”.
6. O “del umbra del morte”.
7. O “Sheol”, “inferno”.