Biblia/Vetule Testamento/Job/Job 15

Job

15

Secunde discurso de Eliphaz

¹Inde, Eliphaz, le Themanita, diceva: ²“Esque un persona judiciose responderea con discursos vacue^[1] simile a ructos causate del aere calide que exi de su stomacho? ³Arguerea ille con parolas que a nihil servi e con sententias que nullemente poterea adjuvar? ⁴Tu mesmo annihila omne pietate e distrahe, con tu discursos, illes que alteremente quererea Deo! ⁵Lo que tu dice es inspirate de tu peccatos e tu parolas se funda super deceptiones. ⁶Il es tu ore mesme que te condemna e non io; tu labios ipse testifica contra te.

⁷Esque tu esseva le prime homine a nascer? Esque tu esseva generate ante que le colles mesme veniva al existentia? ⁸Tu pare cognoscer le mente ipse de Deo, como si tu audiva le secrete consilio de Deo. Esque tu limita le sapientia solmente a te ipse? ⁹Que cognosce tu que nos ignora? De que ha tu intelligentia que nos non cognosce? ¹⁰Gente savie con capillos blanc e vetules es inter nos, multo plus vetuste que tu patre mesme.

¹¹Esque es le parolas de conforto e de consolation de Deo o nostre expressiones gentil troppo insignificante pro te? ¹²Que es lo que portava via tu ration^[2]? Quare tu oculos batte le palpebras ¹³quando tu adressa tu ragie contra Deo e permitte que tal parolas exi de tu bucca? ¹⁴Quid es le homine ut sia immaculate, o un nate de femina que ille deberea esser juste? ¹⁵Ecce, si Deo non mesmo se confide in le angelos^[3] e si mesmo le celos non es bastante munde a su oculos, ¹⁶quanto magis abominabile e corrupte es le homine, que bibe le mal como aqua!

¹⁷Io te va explicar, audi me! Lo que io videva, io va declarar te lo; ¹⁸illo es llo que sapientes declara. Io te celara nihil de lo que veni ex le tradition de lor ancestres, ¹⁹al quales solmente esseva date le terra, quando necun estraniero transiva per inter illes. ²⁰Il es le impie que suffre tormentos per tote su dies, per tote le numero de su annos que es reservate al tyranno. ²¹Sonos terrificante imple su aures; in un tempore de pace le predator le attacca. ²²Ille non se expecta de escappar del tenebras; ille es destinate al gladio. ²³Ille vade errante - nutrimento pro vultures - ille sape que le die del tenebras se approxima rapide pro ille. ²⁴Le terrifica tribulation e angustia como un rege que se prepara pro le battalia. ²⁵Ille extende su mano contra Deo e se comporta como un heroe que defia le Omnipotente. ²⁶Con su forte scuto in mano, ille lancea un carga contra ille.

²⁷Ille, tamen, es troppo grasse e opulente pro esser in condition de combatter, su flancos es inflate de grassia. ²⁸Su citate, tamen, cadera in ruinas. Ille vivera in domos abandonate que es preste a collaber. ²⁹Ille non devenira ric, e su substantias non durara, ni su possessiones se expandera per le pais.

³⁰Ille non escappara del tenebras; su ramos essera devorate per le flammas, e le sufflo del bucca de Deo le destruera. ³¹Que ille non va confider se in ricchessas vacue decipente se mesme, quia le vanitate essera su recompensa. ³²Ante le tempore ille essera repagate plenmente, e su brancas non florescera. ³³¹Como un vinea ille lassara cader su uva acerbe, e como un olivo ille perdera su inflorescentias. ³⁴Tote isto eveni quia le congregation del impios es sterile, e le foco consumera le tentas de illes que accepta de esser corrumpite. ³⁵Illes concipe dolores e genera le iniquitate. Lor ventre produce deception.

Notas

1. O “sapientia ventose”. Le Hebraico es דַעַת־רוּחַ (daʿat ruakh). Isto significa cognoscentia sin contento, van cognoscentia, parolas vacue..
2. O “corde”.
3. O “in su sanctos”.