Biblia/Vetule Testamento/Job/Job 1

←Esther 10

Le Biblia in Interlingua Job

Job 2→

Job

1

Presentation de Job

¹Il habeva un homine in le pais de Uz que se appellava Job. Ille esseva un homine integre^[1] e recte^[2] que habeva timor^[3] de Deo e recedeva^[4] del mal. ²Ille habeva generate septe filios e tres filias. ³Su possessiones includeva septe milles oves, tres milles camelos, cinque centos pares subjugate de boves e cinque centos asinas. In ultra, ille habeva multe personas que laborava a su servicio^[5]. Ille esseva de facto le homine le plus eminente del terras de oriente.

⁴Su filios costumava organisar festas con su fratres cata uno a su torno in su casa e invitava alsi le tres sorores a mangiar e a biber con illes. ⁵Quando le dies de lor festear esseva terminate, Job les faceva venir a que illes se purificava^[6] e de bon matino ille offereva un holocausto pro cata uno de illes, proque ille pensava: “Forsan mi filios e filias peccava e malediceva Deo in lor cordes”. Isto deveniva pro Job un costume.

Prime proba

⁶Il occurreva un die que se reuniva le corte celeste^[7] al presentia del Senior, e le Accusator^[8] esseva inter illes. ⁷Le Senior le diceva: “Unde veni?”, e ille respondeva al Senior: “De forragiar sur le terra e ambular per illo”. ⁸Assi le Senior diceva al Accusator: “Esque tu considerava mi servitor Job? Il ha nulle altere como ille. Ille es un homine integre e recte, ille ha timor de Deo e recede del mal”.

⁹Le Accusator le respondeva: “Il non es frustra^[9] que Job time Deo! ¹⁹Tu ha ponite un haga pro proteger ille, su familia e tote su benes! Tu le ha benedicite in toto lo que ille interprendeva, e su possessiones se multiplicava sur le terra. ¹¹Totevia, essaya extender tu mano e colpa tote lo que ille possede, e sin dubita ille te maledicera de facie^[10]!”. ¹²Alora le Senior diceva a le Accusator: “Vamos facer assi: Io pone in tu poter^[11] tote lo que ille possede. Solmente non levar tu mano pro colpar su persona”. Assi le Accusator se retirava del presentia del Senior.

¹³Ora le die veniva que le filios e le filias de Job mangiava e bibeva vino in le casa de su filio primogenite, e ¹⁴un messagero veniva a Job e le nunciava: “Mentre le boves arava e le asinos pasturava juxta illos, ¹⁵le Sabeos faceva irruption e los portava totes via, e illes occideva tu servitores con le spada, e solmente io succedeva evader pro facer te lo saper”.

¹⁶Justo durante que iste-ci parlava, un altere messagero arrivava e diceva: “Le foco de Deo cadeva del celo e consumeva tanto le oves quanto le pastores. Solmente io succedeva fugir pro facer te lo saper.

¹⁷Justo durante que iste-ci parlava, un altere messagero arrivava e diceva: “Le Chaldeos formava tres bandas. faceva un razzia e robava tote le camelos, e illes mesmo occideva tu servitores con le spada. Solmente io succedeva fugir pro facer te lo saper.

¹⁸Justo durante que iste-ci parlava, un altere messagero arrivava e diceva: “Tu filios e tu filias mangiava e bibeva vino in le casa de tu filio primogenite, ¹⁹e subito un vento vehemente irrumpeva ab le deserto e concuteva le quatro angulos del casa, e illo cadeva super le juvenes, e tote illes moriva. Solmente io succedeva fugir pro facer te lo saper.

²⁰Tunc Job se levava, se lacerava le vestimentos, se tondeva le testa in signo de lucto e se prosterneva a terra. ²¹Ille diceva: “Io sortiva nude del utero de mi matre e nude io partira de iste vita^[12]. Le Senior dava e le Senior reprende. Que le nomine del Senior sia benedicite!”.

²²In tote isto Job non peccava, ni ille accusava Deo de ulle comportamento improprie.

Notas

1. integre: traduce: תָּם (tam) ex תָּמַם (tamam), esser complete, un labor terminate, complite. Alicuno lo traduce "perfecte". Le significato es que un persona o cosa es complete, sin defectos. Isto non significa "sin peccato", impeccabile, ma un persona que de tote corde se effortia de placer a Deo, que ha integritate e que es irreprochabile coram Deo.
2. Recte in su relationes con altere personas: Psalmos 37:7; 25:21.
3. I.e. respecto, reverentia.
4. Se teneva lontan dal mal.
5. O “un grande menage domestic”, o familia.
6. O “sanctificava”.
7. Let. “le filios de Deo”.
8. O “le Adversario”, “Satan.
9. O “gratis”.
10. O “frontalmente”.
11. O “in tu mano”.
12. O “retornara illac”.