Biblia/Vetule Testamento/Jeremia/Jeremia 47

Jeremia

47

Un message concernente Philistea

¹Isto es le message del Senior al propheta Jeremia concernente le philisteos de Gaza, ante que illo esseva capturate per le armea egyptian. ²Isto es lo que le Senior dice: “Un inundation veni ex le nord e disbordara le pais integre. Illo destruera le terra e tote lo que illo contine - tanto citates quanto gente. Le gente critara de terror e omnes in le pais se lamentara. ³Audi le ruito del ungulas del stallones e le strepito del rotas durante que le carros de guerra accurre. Patres terrificate curre follemente sin reguardar retro a lor infantes inope.

⁴Quia le tempore ha venite de destruer tote le philisteos. Le tempore ha venite pro destruer tote le auxiliatores que remaneva pro Tyro e Sidon. Quia io, le Senior, destruera le philisteos, celle residuo que veniva ab le insula de Creta^[1]. ⁵Gaza essera humiliate, su capite rasate calve. Ashkelon jacera silente. Vos, residuo del costa mediterranee, usque quando vos facera incisiones in vostre cute qua signo de lucto? ⁶Usque quando vos critara: “Oh gladio del Senior, quanto longemente il essera usque tu cessa occider? Retorna in tu vaina, reposa e tace! ⁷Quomodo pote illo reposar quando io, le Senior, le ha date ordines? Io lo ha ordinate attaccar le populo de Ashkelon e le costa del mar”.

Notas

1. O “Caphtor”.