Biblia/Vetule Testamento/Jeremia/Jeremia 29

←Jeremia 28

Le Biblia in Interlingua Jeremia

Jeremia 30→

Jeremia

29

Un epistola al exiliatos

¹Hic il ha le parolas del epistola que le propheta Jeremia mandava al exiliatos ab Jerusalem a Babylon. Illo esseva adressate al seniores que habeva essite relinquite inter le exiliatos, al sacerdotes, al prophetas e a tote le altere personas que habeva essite exiliate a Babylon. ²Isto eveniva postquam Rege Jehoiakin, le regina matre, le officieros del corte, le altere officieros de Juda, le artisanos e le ferreros esseva deportate ab Jerusalem. ³Ille mandava le epistola per le medio de Elasah, filio de Shaphan e Gemariah, filio de Hilkia, quando illes vadeva a Babylon qua ambassadores de Rege Zedekiah apud Nebuchadnezzar. Isto es lo que esseva scribite in le epistola:

⁴“Isto es lo que le Senior del universo, le Deo de Israel, dice a tote le captivos qui esseva exiliate a Babylon ab Jerusalem: ⁵‘Edifica domos e habita in illos, planta hortos e mangia lo que illos producera. ⁶Marita vos e genera filios e filias. Trova uxores pro vostre filios e permitte a vostre filias de maritar se, ut illas alsi pare filios e filias. Multiplica vos ibi e non vole esser paucos de numero. ⁷Quere le pace e le prosperitate del citate ubi io mandava vos in exilio. Preca le Senior pro illo, quia su prosperitate es alsi vostre prosperitate’.

⁸Isto es lo que le Senior del universo, le Deo de Israel, dice: ‘Non permitte al prophetas inter vos o a illes qui assere esser capabile predicer le futuro per le medio del divination, de deciper vos. Non presta ulle attention al sonios que vos les incoragia facer. ⁹Quia illes vos prophetisa mentitas in mi nomine. Io, le Senior, lo assere!’.

¹⁰Isto es lo que dice le Senior: “Vos remanera in Babylonia septanta annos. Quando celle tempore de dominio babylonian essera terminate, io habera de novo consideration pro vos. Tunc io complira mi promissa de gratia e vos restablira vos in vostre patria. ¹¹Quia io sape quid io planava pro vos - dice le Senior - mi planos es facer vos prosperar, non de affliger vos. Io plana dar vos un futuro plen de sperantia. ¹²In celle dies quando vos me invocara e venira a me, io exaudira vostre precarias. ¹³Quando vos me querera con tote vostre corde, vos me trovara. ¹⁴Io essera trovate per vos - dice le Senior. Io facera concluder vostre captivitate e restablira vostre fortunas. Io vos congregara ab le nationes in le quales io vos exiliava e vos essera portate itero a vostre domos in vostre proprie terra’.

¹⁵Vos assere que le Senior ha suscitate prophetas pro vos in Babylonia. ¹⁶Isto es tamen, lo que le Senior dice re le rege qui sede sur le throno de David e tote illes qui ancora vive hic in Jerusalem - vostre parentes qui non esseva exiliate a Babylon. ¹⁷Le Deo del universo dice: ‘Io mandara super illes guerra, fame e peste. Io les tractara qua ficos que es tanto corrupte que non pote esser mangiate. ¹⁸Io les persequera con le gladio, con le fame e con le pestilentia. Io facera que tote le regnos del terra sia horrificate ante a lo que les eveni. io les rendera exemplos de illes qui es maledicite, objecto de horror, contempto e ridiculo inter tote le nationes ubi io les exiliava. ¹⁹Quia illes non prestava attention a lo que io les diceva per le medio de mi servitores, le prophetas que io les mandava semper de novo - dice le Senior - e vos exiliatos alsi non prestava attention - dice le Senior. ²⁰Vos, ergo, audi le parola del Senior, tote vos qui io mandava a Babylon de Jerusalem’.

²¹Isto es lo que le Senior del universo, le Deo de Israel, dice re vostre prophetas - Ahab filio de Kolaia e zedekia, filio de Maaseia - le quales vos dice mentitas in mi nomine: ‘Io les livrara a Nebuchdnezzar e ille les executara ante vostre oculos ipse. ²²Lor terribile fato devenira proverbial, tanto que le exiliatos de Juda in maledicer alicuno dicera: ‘Que le Senior te tracta como Zedekia e Ahab, le quales le rege de Babylonia rostiva a morte in le igne!”. ²³Isto les accidera proque illes faceva in Israel lo que es vergoniose. Illes committeva adulterio con le uxores de lor vicinos e ha dicite mendacios in mi nomine. Illes diceva parolas que io non les commandava dicer. Io sape lo que illes ha facite. Io testifica de isto. Io, le Senior, ha parlate”.

Un message pro Shemaia

²⁴Le Senior diceva a Jeremia: “Dice a Shemaia le nehelamita ²⁵que le Senior del universo, le Deo de Israel, ha un message pro ille. Dice le: ‘De su proprie initiativa tu mandava un epistola al sacerdote Zephania filio de Maaseia, e a tote le populo de Jerusalem. In tu epistola tu diceva a Zephania: ²⁶“Le Senior te rendeva sacerdote in le placia de Jehoiada. Ille te dava le supervision del Templo del Senior. Tu es responsabile de poner in pedicas e collares de ferro qualcunque folle qui assere esser un propheta. ²⁷E nunc quare tu non reprimendava Jeremia de Anathot, qui pretende esser un propheta inter vos! ²⁸Quia ille mesmo mandava un message a nos hic in Babylon. Ille scribeva e nos diceva: ‘Vos remanera ibi per un longe tempore. Edifica domos e habita in illos, planta hortos e mangia lo que illos producera’”.

²⁹Le sacerdote Zephania legeva celle epistola al propheta Jeremia. ³⁰Alora un message del Senior perveniva a Jeremia. Illo diceva: ¹³¹‘Manda un message a tote le exiliatos in Babylon. Dice les: ‘Le Senior ha parlate re Shemaia le nehelamita: ‘Shemaia ha vos parlate qua propheta, mesmo si io nunquam le commissionava. Ille face vos confider in un mentita. ³²Justo proque ille diceva isto - dice le Senior - io punira Shemaiah le nehelamita e su familia integre. Il non habera alcuno relinquite inter illes qui gaudera le bon cosas que io facera pro mi populo. Io, le Senior, lo assere, propter le rebellion adverso le Senior que esseva consiliate’”.