Biblia/Vetule Testamento/Jeremia/Jeremia 1

←Isaia 66

Le Biblia in Interlingua Jeremia

Jeremia 2→

Jeremia

I

Superscription

¹Iste libro registra lo que Jeremia, filio de Hilkiah, prophetisava. Ille esseva un del sacerdotes que viveva a Anatoth, in le territorio del tribo de Benjamin. ²Le Senior comenciava parlar le in le dece-tertie anno que Josia, filio de Amon, esseva rege de Juda. ³Le Senior le parlava alsi quando Jehoiakin, filio de Josia, esseva rege de Juda, e ille continuava parlar le usque al quinte mense del dece-prime anno que Zedekia, filio de Josia, esseva rege de Juda. Illo esseva le anno in le qual le populo de Jerusalem esseva portate in exilio.

Le vocation e le mission de Jeremia

⁴Le Senior me comunicava su parola. Ille me diceva: ⁵“Ante de formar te in le utero de tu matre io te se seligeva^[1]. Ante que tu sortiva de su ventre io te consecrava propheta destinate a portar mi message al nationes”. ⁶Io replicava: “Ah, Senior Deo! Io non sape como parlar satis ben pro facer lo, proque io es tro juvene”. ⁷Le Senior me respondeva: “Non dicer ‘Io es tro juvene’. Ma va a quicunque io te mandara e dice quecunque io te ordinara dicer. ⁸Non time les^[2], proque io essera con te pro proteger te. Isto te lo dice le Senior”. ⁹Alora le Senior extendeva su mano, me tangeva le bucca e me diceva. “Ecce, io poneva in tu bucca le parolas que tu debera dicer pro me. ¹⁰Ecce, per le presente acto, io te da le autoritate^[3] de annunciar a nationes e regnos que illos essera evellite e destruite, disperdite e dissipate, reedificate e plantate”.

Visiones que confirma le vocation e mission de Jeremia

¹¹Le Senior me comunicava su parola. Ille me diceva: “Que vide tu, Jeremia?”. Io respondeva: “Io vide un branca de un amandoliero, le arbore que vigila”. ¹²Le Senior me diceva: “Tu videva ben. Isto significa que io vigila proque mi parola^[4] se compli”.

¹³Le Senior me comunicava de novo su parola. Ille me diceva: “Que vide tu nunc?”. Io le replicava: “Io vide un olla de aqua in ebullition super un foco attisate per le vento del nord^[5]”. ¹⁴Le Senior me diceva: “Isto significa que ab le nord va venir un disastro contra tote le habitantes del pais. ¹⁵Proque io tosto convocara tote le regnos alliate del nord a que illos veni e pone lor thronos al entrata del portas de Jerusalem. Illos attaccara le muralias que lo cinge, e tote le urbes de Juda. Iste parola es certe: a dicer lo es io, le Senior. ¹⁶Iste-ci es le sententia que io annuncia al populo de Jerusalem e de Juda a causa de tote le mal que illes faceva. Proque illes derelinqueva me e offereva sacrificios a altere deos, adorante lo que illes fabricava con lor manos mesme.

¹⁷Ma tu, Jeremia prepara te. Va e dice a iste populo toto que io te instrueva. Non ha timor de illes, o io te dara un bon ration de esser terrificate de illes. ¹⁸Io, le Senior, per le presente acto io promitte de render te tanto forte quanto un citate fortificate, un columna de ferro e un muro de bronzo. Tu essera habile a contraponer te a tote illes que vive in le pais, includite le reges de Juda, su officiales, su sacerdotes e tote le populo del pais. ¹⁹Illes luctara contra te, ma non potera prevaler, proque io essera a tu flanco pro liberar te. Io, le Senior, te lo dice”.

Notas

1. Heb. “io te cognosceva”. Jeremia parla hic de su preordination al ministerio de propheta.
2. Non time le personas al quales tu debera parlar.
3. O “te constitue”.
4. Il es intendite hic “mi menacias”.
5. O “con le bucca girate verso nos ab le nord”.