Biblia/Vetule Testamento/Isaia/Isaia 64

←Isaia 63

Le Biblia in Interlingua Isaia

Isaia 65→

Isaia

64

¹(63:19b) Oh, si tu solmente divelleva le celos e descendeva! Mesmo le montes tremerea in tu presentia! ²Sicut le foco igni le ligno e face bullir le aqua, tu advenimento facerea turbar le gentes e tu adversario cognoscerea qui tu es^[1]! ³Quando in le passato tu operava miraculos impressionante que nos non expectava, tu descendeva e mesmo le montes incipeva tremer in tu presentia! ⁴Desde le tempores antique, nemo audiva o percipeva, e nulle oculo videva un deo como tu, qui opera pro les qui le expecta. ⁵Tu subveni a les qui se allegra in facer lo que es juste^[2], qui observa tu commandamentos. Ecce, tu irasceva quia nos los violava continuemente. Como ergo poterea gente como nos esser salvate? ⁶Nos omnes es simile a gente immunde e nostre si-dicite actos de justitia a tu oculos es simile a pannellos polluite de sanguine menstrual. Nos omnes marcesce sicut folios; propter nostre peccatos nos es como folios sufflate via del vento. ⁷Nemo invoca tu nomine o face un effortio pro approximar se a te. Quia tu nos ha rejectate^[3] e derelinquite al consequentias de nostre iniquitates. ⁸E nunc, Senior, tu es nostre patre, nos es le argilla e tu es nostre ollero, nos omnes es le productos de tu manos. ⁹Senior! Non esser nimis irascite contra nos! Non rememora plus nostre iniquitates! Ecce, respice, nos omnes es tu populo!

¹⁰Tu sancte citates deveniva un deserto; Sion deveniva un deserto, Jerusalem un ruina desolate. ¹¹Nostre templo sancte, nostre orgolio e gaudio, le loco ubi nostre ancestres te laudava, ha essite comburite per le foco; tote nostre desirate possessiones ha essite destruite. ¹²Propter tote isto, como pote tu ancora continer te, Senior? Como pote tu ancora tacer e continuar a affliger nos con vehementia?

Notas

1. O “tu les facerea cognoscer tu nomine”.
2. O “opera justitia”.
3. O “ha celate tu facie ab nos”.