Biblia/Vetule Testamento/Genesis/Genesis 9

←Genesis 8

Le Biblia in Interlingua Genesis

Genesis 10→

Genesis

9

Deo confirma su pacto

¹Igitur, Deo benediceva Noe e su filios e les diceva: “Cresce, multiplica e replena le Terra. ²Omne creaturas vivente del Terra e omne ave del celo essera terrificate de vos. Tote lo que repta sur le terreno e omne pisces del mar es sub vostre autoritate. ³Vos pote mangiar qualcunque cosa que vive. Como io vos ha date le plantas verde, io vos da nunc toto. ⁴Vos, tamen, non debe mangiar carne que ancora ha in illo le sanguine del vita. ⁵Certo vos me debera dar conto de vostre sanguine, del sanguine de vostre vita: io require que vos me da conto de vostre sanguine, del sanguine de vostre vitas; le mesmo io require a omne animal; io require al mano del homine de dar me conto del vita human, al mano de cata su fratre. ⁶Si alicuno effunde sanguine human, su proprie sanguine essera alsi effundite per manos human, quia Deo faceva le esseres human a su proprie imagine. ⁷Ergo, cresce e multiplica vos; diffunde vos sur le Terra e multiplica vos in illo”.

⁸Alora Deo diceva a Noe e a su filios: ⁹“Ecce, io nunc confirma mi pacto con te e tu descendentes post vos. ¹⁰E con omne creaturas vivente que es con vos, includite le aves, le animales domestic, e omne creaturas vivente del Terra con vos, tote los que sortiva del arca con te - omne creaturas vivente del Terra. ¹¹Si, io confirma mi pacto con vos. Nunquam plus omne cosas vivente essera occidite per le aquas de un diluvio, nunquam plus un diluvio destruera le Terra”. ¹²Deinde Deo diceva: “Isto es le garantia del pacto que io establi con vos e omne creaturas vivente con vos, un pacto pro omne subsequente generationes. ¹³Io ponera mi iride in le nubes, e illo devenira un garantia del pacto inter me e le Terra. ¹⁴Quandocunque io porta nubes super le terra e le iride appare in le nubes, ¹⁵alora io me rememorara de mi pacto con vos e con tote le creaturas vivente de omne sorta. Nunquam plus le aquas devenira un diluvio e destruera omne cosas vivente. ¹⁶Quando le iride essera in le nubes, io lo videra e me rememorara del pacto eterne inter Deo e tote le creaturas vivente de omne sorta que es sur le Terra”. ¹⁷Pois Deo diceva a Noe: “Isto es le garantia del pacto que io confirma inter me e omne cosas vivente que il ha sur le Terra”.

Le filios de Noe

¹⁸Le filios de Noe, qui sortiva del arca con lor patre, esseva Sem, Cham e Japhet. Cham es le patre de Canaan. ^1\9Ab iste tres filios de Noe proveniva tote le gentes que nunc popula le Terra. ²⁰Depost le diluvio, Noe incipeva cultivar le terreno, e ille plantava un vinia. ²¹Un vice ille bibeva le vino que ille habeva producite, se inebriava e se poneva jacer nude intra su tenta. ²²Cham, le patre de Canaan, videva que su patre esseva nude e sortiva a dicer lo a su fratres. ²³Alora Sem e Japhet prendeva un roba, lo teneva super lor spatulas e entrava in le tenta retrocedente ut coperir lor patre. Illes lo faceva reguardante in le altere direction ut non vider le genitales de lor patre. ²⁴Quando Noe se eveliava ab le stupor causate del vino, ille apprendeva re lo que Cham, su filio minor, habeva facite. ²⁵Alora ille malediceva Canaan, le filio de Cham, dicente: “Maledicite sia Canaan! que ille deveni pro su parentes le servo del servos”. ²⁶ Deinde Noe diceva: “Que le Senior, le Deo de Sem, sia benedicite, e que Canaan sia su servitor”.

²⁷Depost le diluvio, Noe viveva ancora tres centos quaranta cinque annos. ²⁸In total, ille viveva novem centos cinquanta annos, e pois ille moriva.