Biblia/Vetule Testamento/Ezra/Ezra 3

From Wikisource
Jump to navigation Jump to search
Le Biblia in Interlingua
Ezra

Ezra[edit]

3[edit]

Le nove erection del altar[edit]

1Quando veniva le septime mense e le Israelitas viveva in lor citates, le populo se congregava in Jerusalem con un sol proposito. 2Alora Jeshua, filio de Jozadak se jungeva con le sacerdotes, su companiones e Zerubbabel, filio de Shealtiel con su familia, pro eriger de novo le altar de Deo in Israel, ut offerer super illo holocaustos, como il es requirite per le lege de Moses, le homine de Deo. 3Mesmo si le populo timeva le residentes local, illes erigeva de novo le altar in su loco original. Deinde illes comenciava sacrificar holocaustos al Senior mane e vespere.

4Illes celebrava le Festa del Tabernaculos como il es prescripte in le Lege, sacrificante le numero de holocaustos specificate pro cata un die del festa. 5Illes offereva ibi alsi le holocaustos regular e le offertas requirite pro le celebrationes del Nove Luna e le festas annual prescribite del Senior. Le populo dava alsi al Senior offertas voluntari. 6Dece-cinque dies ante le comenciamento del Festa del Tabernaculos, le sacerdotes habeva initiate sacrificar holocaustos al Senior. Isto eveniva mesmo ante le deposition del fundamentos del Templo del Senior.

Preparationes pro le reconstruction del Templo[edit]

7Assi illes provideva moneta pro ingagiar masones e carpenteros, e acquireva blocos de cedro del populo de Tyro e Sidon, pagante lo con nutrimento, vino e oleo de oliva. Le blocos de ligno esseva facite descender del montes del Libano e facite flottar longe le costa del Mar Mediterranee usque a Joppa, quia le rege Cyro de Persia lo habeva authorisate.

8In le secunde anno depost lor arrivata al templo de Deo in Jerusalem, in le secunde mense, Zerubbabel, filio de Shealtiel e Jeshua, filio de Jozadak initiava le labores insimul al resto de lor companiones, le sacerdotes e le Levitas, e tote illes qui habeva retornate a Jerusalem del exilio. Illes appunctava le Levitas con un etate de al minus vinti annos, a diriger le obra de reconstruction del Templo del Senior. 9Assi Jeshua appunctava sia su filios que su parentes, Kadmiel e su filios (le filios de Yehuda) a diriger le laboratores in le templo del Senior, insimul al filios de Henadad, lor filios e lor parentes le Levitas.

10Quando le edificatores completava le fundationes del Templo del Senior, le sacerdotes se vestiva de lor robas ceremonial e con lor cornos, e le Levitas (le filios de Asaph) con lor cymbalos, stava pro laudar le Senior secundo le instructiones lassate de Rege David de Israel. 11Con responsas antiphonal, illes cantava, laudante e glorificante le Senior: “Quia ille es bon; su amor pro Israel dura pro semper”. Quando le Templo del Senior esseva finalmente establite, tote le populo comenciava a critar laudante le Senior. 12Multes del sacerdotes, le Levitas e le capites - personas plus ancian que habeva vidite con lor proprie oculos le prime Templo - plorava a alte voce in un crito joiose. 13Non se poteva distinguer le differentia inter le sono del critos joiose e le sono del gente que plorava, proque le populo critava tanto fortemente que le sono se poteva audir a grande distantia.