Biblia/Vetule Testamento/Esther/Esther 1

←Nehemia 13

Le Biblia in Interlingua Esther

Esther 2→

Esther

1

Le banchetto prodige del rege Asuero

¹Le sequente evenimento occurreva in le dies de Asuero^[1] (io me refere a ille Asuero que regnava super cento vinti septe provincias que se extendeva del India usque al Ethiopia). ²In ille dies, durante que le rege Asuero sedeva sur su throno regal in Susa, le citadella, ³in le tertie anno de su regno, ille organisava un grande banchetto pro tote su officieros e su servientes. Le officieros^[2] del armea de Persia e de Media e le nobiles e le officieros del provincias esseva alsi presente.

⁴Ille les monstrava le richessas de su gloria regal e le pompa de su grandessa majestose durante multe tempore - exactemente cento octanta dies! ⁵Quando ille dies esseva complite, le rege provideva un banchetto de septe dies pro tote le population que esseva presente a Susa la citadella, tanto pro le plus eminente que pro le minime de illes. Le banchetto occurreva in le corte situate in le jardin del palatio regal. ⁶Le fornimento includeva cortinas de lino e de purpura sustenite per cordas del lino le plus fin e lana purpuree sur anellos de argento, columnas de alabastro, ottomanas de auro e de argento exhibite sur un pavimento de petras preciose de alabastro, matreperla, e petras de varie colores. ⁷Le biberages esseva servite in cuppas de auro, totes differente le un del alteres. Il esseva a disposition vino regal in abundantia al expensas del rege. ⁸Secundo le costume, se bibeva sin mensura, proque le rege habeva ordinate a su servientes de satisfacer omne desiro del convitatos^[3]. ⁹Anque le regina Vashti offereva un banchetto pro le feminas in le palatio regal del rege Asuero.

Le regina Vashti es deponite de su position regal

¹⁰Itaque, in le septime die, quando le rege Asuero comenciava sentir le effectos inebriante del vino, ille vocava le septe eunuchos de su servicio personal: Mehuman, Biztha, Harbona, Bigtha, Abagtha, Zethar, and Carcas, ¹¹e les commandava de portar coram ille le regina Vashti con le diadema regal in su capite. Ille voleva mostrar al populo e al officeros su beltate, proque illa esseva multo belle, ¹²Ma le regina Vashti declinava obsequer^[4] al commando del rege que la esseva livrate per le medio del eunuchos. Unde le rege deveniva extrememente irate, e su rage combureva in su corde.

¹³Pro tote lo que reguarda le affaires regal le reges habeva le habito tunc de consultar le sapientes, experte del tradition, del leges e del costumes. ¹⁴Le consilieros con le quales ille confereva le plus sovente esseva: Carshena, Shethar, Admatha, Tarshish, Meres, Marsena, e Memucan. Iste septe homines esseva le officieros de Persia e de Media con le rango le plus alte in imperio. ¹⁵Ille les demandava: “Secundo le lege, que deberea on facer al regina Vashti, culpabile de non haber obsequite le commando del rege Asuero livrate per le medio del eunuchos?”. ¹⁶Alora Memucan replicava al rege e al oficieros: “Le culpa del regina Vashti non lede solmente le rege, sed alsi tote le officieros e tote le populo que habita le provincias del re Asuero. ¹⁷Le nova del conducta del regina poterea diffunder se inter tote le feminas, le quales poterea assi contemner le autoritate de lor maritos, dicente se: ‘Le rege Asuero comandava de facer venir coram ille le regina Vashti e illa refusava de vader’. ¹⁸Hodie ipse le feminas del alte functionarios de Persia e de Media que audiva re le question concernente le regina poterea responder in le mesme maniera a tote le oficieros regal, e il haberea plus que bastante contempto e ira! ¹⁹Pro iste ration, si al rege isto pare bon, que ille emitte un edicto regal, e que illo sia scribite in le leges de Persia e de Media que non pote unquam esser abrogate, que Vashti non potera plus presentar se coram le rege Asuero. Le rege dara le titulo de regina a un altere femina melior que illa. ²⁰Quando le decreto regal essera notificate per tote su immense imperio, tote le feminas respectara lor maritos, tanto le plus eminente que le minime de illes. ²¹Le rege e su consilieros trovava bon iste proposta e assi le rege poneva in execution lo que Memucan le habeva consiliate. ²²Ille mandava epistolas per tote le provincias del imperio, a cata provincia secundo su proprie lingua, prescribente que le homine sia le sol autoritate super le membros de su familia e que omne feminas que es con illes sia submissive^[5].

Notas

1. Le version del Septanta ha “Antaserse”.
2. Le texto hebraic dice solmente “le armea”.
3. O “que se faceva secundo le voluntante de omnes”.
4. O “contemneva”. Le commando del rege probabilemente esseva de venir e monstrar se con solmente le diadema in su testa e nihil altere!
5. O “que in su casa se parla le lingua de su proprie populo”.